Bisa, Hwehwɛ, na Bɔ mu
Ɔsor Egya ne nhyehyɛɛ mu fã a ohia tsitsir nye kwan a yenya dɛ yɛnye No bedzi nkitaho wɔ aber biara a yɛpɛ mu no.
Abosoom anan a abɛsen kɔ, wɔ me kyerɛwsɛm ne nsũae mu no, nna merekenkan Alma no somdwuma wɔ Ammonihah ho asɛm ber a muhun nsusui yi wɔ Come, Follow Me: mu dɛ “Ber a idwendwen nhyira ahorow akɛse a Nyankopɔn dze maa Nephi dɔm ho no (hwɛ Alma 9:19–23), dwendwen nhyira ahorow akɛse a Ɔdze ama wo ho no.’’1 Meyɛɛ m’adwen dɛ mebɛkyerɛw nhyira ahorow a Nyankopɔn dze ama me no na medze egu mo nwoma abaɛfor digital dze no mu. Annkyɛr koraa, nna mekyerɛɛw nhyira nkorkor 16.
Ma odzi akotsen wɔ mu nye Agyenkwa n’ehumbɔbɔr na werdam afɔrbɔ ho nhyira ahorow akɛse wɔ m’afamu. Mesanee so kyerɛɛw nhyira a menyae dɛ migyinae ma Agyenkwa no ananmu dɛ asɛmpasomafo kumabaa wɔ Portugal na, ekyir no, menye me onnyiewiei adamfo, Patricia, wɔ Brazil Porto Alegre South Mission, bea a yɛnye asɛmpasomafo anwanwafo 522 a wɔyɛ ndam somee. Merekã Patricia ho asɛm a, nhyira ahorow pii a mekyerɛɛw no dɛm da no yɛ nhyira ahorow a yɛabɔ mu ena mu enyigye wɔ hɛn mfe 40 awar mu nyina—a hɛn nsɔwano wɔ São Paula Brazil Temple, hɛn mba anwanwafo baasa, hɔn hokãfo, na hɛn mbanana 13 kã ho.
M’adwendwen danee so kɔr m’awofo atseneneefo, a wɔdze asɛmpa fapem horow tsetsee me no do. Tsitsir ara, ɔkaa me mber a me nã dɔfo nye me buu ntwɛr bɔ mpaa wɔ me mpa ho ber a nna medzi bɛyɛ mfe 10 no. Ebia ɔtsee nkã dɛ sɛ me mpaabɔ bodu m’Egya a ɔwɔ Sor nkyɛn a, nna ohia dɛ otu mpon. Ntsi no ɔsee dɛ, “Mibedzi kan abɔ mpaa, na me mpaabɔ ekyir no, abɔ mpaa.’’ Ɔkɔr do yɛɛ nhwɛdo yi anafua piinara, kɛpem dɛ onyaa awerɛhyɛmu dɛ meesũa nkyerɛkyerɛ no na ne nyɛe wɔ mbrɛ wosi kasa kyerɛ Ɔsor Egya. Mobɔkɔ do ada no ase dɛ ɔkyerɛ me mpaa bɔ, osiandɛ musũae dɛ Ɔsor Egya tsie me mpaabɔ na Oyi ano.
Nokwar, ɔno yɛ nhyira kɛse kor so a mekyerɛɛw kãa ho—akyɛdze no dɛ ibotum atse na esũa Ewuradze ne pɛ. Ɔsor Egya ne nhyehyɛɛ mu fã a ohia tsitsir nye kwan a yenya dɛ yɛnye No bedzi nkitaho wɔ aber biara a yɛpɛ mu no.
Ɔfrɛ fi Ewuradze hɔ.
Mber a Agyenkwa no kɛseraa Amerika wɔ No Wusoɛr ekyir no, Osii ɔfrɛ no a nna Ɔdze ama N’esuafo wɔ Galilee no do. Ɔsee dɛ:
“Hom mbisa, na wɔbɛma hom; hom nhwehwɛ na hom bohu; hom mbɔ mu na wobobue hom.
“Na obiara a obisa no onya; na nyia ɔhwehwɛ no ohu; na nyia ɔbɔ mu no wobobue no’’ (3 Nephi 14:7–8; san so hwɛ Matthew 7:7–8).
Hɛn nkɔnhyɛnyi, President Russell M. Nelson, ama hɛn ɔfrɛ a ɔtse dɛm wɔ hɛn da mu. Ɔsee dɛ: “Bɔ mpaa wɔ Jesus Christ ne dzin mu wɔ wo haw, wo suro, wo mbrɛwyɛ ho—nyew, w’akoma mu ahwehwɛdze ankasa no. Na nkyii tsie! Kyerɛw adwendwen no a ɔba wo tsir mu no. Kyerɛw wo nkã-tse na dzi ndzeyɛɛ a okenyan wo no do. Erokɔ do fa dɛm kwan yi do adzekyee kesi adzekyee, bosoom kesi bosoom, afe kesi afe no, ibenyin wɔ “nyikyerɛ nkyerɛkyerɛ mu.”2
President Nelson dze kãa ho dɛ, “Nda a ɔreba mu no, yennkotum atsena ase sunsum mu a Sunsum Krɔnkrɔn ne bambɔ, n’akwankyerɛ. ne kyerɛpɛn, n’awerɛkyekyer, na ne daa daa nhyɛdo nnkã ho.’’3
Ebɛnadze ntsi na nyikyerɛ hia tsitsir ma hɛn sunsum mu asetsena? Osiandɛ wiadze no botum enya mpiresi nhyɛdo, a ndaadaa na ndanenyi ahyɛ no mu mã. Yɛnye hɛn Ɔsor Egya nkitahodzi ma hɛn tum ma yɛtase dza ɔyɛ nokwar na dza ɔyɛ ator mu, dza ohia ma Ewuradze ne nhyehyɛɛ mu ma hɛn na dza onnhia mma hɛn mu. Wiadze no so botum ayɛ yaw na akomatsew. Naaso ber a yɛkã hɛn adwendwen na nkãtse nokwar mu ara wɔ mpaabɔ mu no, yɛbɛtse awerɛkyekyer no a ofi hɛn Ɔsor Egya hɔ no na awerɛhyɛmu no nkã dɛ Ɔdɔ hɛn na yɛsom No bo.
Bisa
Ewuradze see dɛ “Na obiara a obisa no, onya.’’ Erebisa yɛ dɛ ɔyɛ mberɛw, naaso tum wɔ mu osiandɛ ɔda hɛn apɛdze horow na hɛn gyedzi edzi. Mbom, ɔgye mber na abotar ma esũa dze atse Ewuradze ne ndze ase. Yɛkyɛn hɛn aso ma adwendwen na nkã-tse horow a wɔba hɛn adwen na hɛn akoma mu, na yɛkyerɛw to hɔ, dɛ mbrɛ hɛn nkɔnhyɛnyi etu hɛn fo dɛ yɛnyɛ no. Yɛrekyerɛw hɛn nkenyan horow no yɛ yerenya ne fã bi a ohia. Ɔboa hɛn ma yɛkaa, yɛhwehwɛ mu, na yɛsan tse dza Ewuradze rekyerɛkyerɛ hɛn no nkã bio.
Ɔnnkyɛree na dɔfo bi see me dɛ, “Megye ankorankor nyikyerɛ dzi dɛ ɔyɛ nokwar. Megye dzi dɛ Sunsum Krɔnkrɔn no bɛkyerɛ me ndzɛmba nyina a ɔsɛ dɛ meyɛ.4 Ɔyɛ mberɛw dɛ mebɛgye edzi sɛ mo bo yɛ me hyew wɔ mo mu a taduasi kã ho.5 Naaso mibesi dɛn botum ama Sunsum Krɔnkrɔn no nye me akasa daa wɔ gyinabew yi mu?’’
Mo dɔfo, nye hom nyinara, mebɛkã akyerɛ hom dɛ mara so mepɛ dɛ daa daa mebɛtse nkenyan dzendzen ne nkã a ofi Sunsum no hɔ na daa meehu anamɔn kwan a mibedzi do no pefee. Mbom minnya. Naaso, dza yebotum ataa atse nkã nye Ewuradze ne ndze komm, tseabaa no a Ɔwasa gu hɛn adwen na akoma mu no dɛ; “Mowɔ ha. Modɔ wo. Kɔ do; yɛ dza oye koraa. Mobɔ boa wo.’’ Onnhia dɛ daa yebenya biribiara ho nyimdzii anaa yebohu biribiara.
Ndze komm, tseabaa no si no tadua, hyɛ nkuran, na ɔkyekye werɛ—na mber pii no ɔnoara nye dza yehia no dɛm da no. Sunsum Krɔnkrɔn no yɛ nokwar, na Ne nkenyan horow no yɛ nokwar—akɛse na nkakraba.
Hwehwɛ
Ewuradze kɔr do bɔɔ anohoba dɛ, “Nyia ɔhwehwɛ no, ohu.’’ Erohwehwɛ kyerɛ adwen na sunsum mu mbɔdzembɔ—ndwendwen ho, nsɔhwɛ, mbɔdzembɔ, na adzesua. Yɛhwehwɛ osiandɛ yɛgye Ewuradze n’anohoba horow no dzi. “Na nyia ɔba Nyankopɔn nkyɛn no otwar dɛ ɔgye dzi dɛ ɔwɔ hɔ, na ɔyɛ hɔn a wɔhwehwɛ n’ekyir kwan katuafo’’ (Hebrewfo 11:6). Sɛ yɛhwehwɛ a, nna ahobrɛadze mu ara yɛregye to mu dɛ yɛda ho wɔ pii sũa, na Ewuradze bɛtserɛw hɛn ntseasee mu a, orisiesie hɛn ma yeenya beberee. “Na hwɛ, dɛm na Ewuradze Nyankopɔn se: Medze me nsɛm bɛma adasamba nsensaneeba tsia nsensaneeba, ahyɛdze tsia ahyɛdze, ha kakra, hɔ kakra; … na nyia ɔgye no mebɛma no pii’’ (2 Nephi 28:30).
Bɔ mu
No koraa koraa no Ewuradze see dɛ, “Na nyia ɔbɔ mu no, wobobue no.’’ Ibɔbɔ mu nye dɛ edze gyedzi yɛ adze. Sɛ yɛdze ɔhyewbɔ ka No do a, Ewuradze bue kwan a ɔda hɛn enyim no. Asɔr ndwom dɛɛdɛw bi kyerɛkyerɛ hɛn dɛ “yɛnkekã hɛnho na yɛnyɛ biribi kyɛn dɛ yɛdwen [hɛn] akatua a ɔwɔ sor ho. Ereyɛ papa yɛ enyigye, dɛw a wɔtow ho abaw a onnhyia, asɛdze na ɔdɔ ho nhyira.’’6 Ɔnnkyɛree na Elder Gerrit W. Gong a ɔka Duebien no hɔn Quorum ho no kyerɛkyerɛɛ mu dɛ nyikyerɛ taa ba mber a yegu do ridzi dwuma pa. Ɔkãa dɛ: “Ber a yɛrosom hɔn a woetwa hɛnho ehyia no, megye dzi dɛ Ewuradze ma hɛn No dɔ ho ahom mbordo ma hɔn na dɛm ntsi yenya bi. Megye dzi dɛ yɛtse Ne ndze—yɛtse Ne nkã wɔ kwan soronko mu—ber a yɛbɔ mpaa ma hɔn a woetwa hɛnho ehyia osiandɛ ɔno nye mpaabɔ horow mu kor a Ɔpɛ dɛ oyi ano dodow.’’7
Alma ne Fasusu
Dɛm nsusui ɔnnyɛ kyinkyinɛnn wɔ Come, Follow Me mu dɛ mondwendwen me nhyira horow ho no dze sunsum dɛɛdɛw na sunsum mu nhumu horow a enyi nnda kwan bae. Ber a mokɔr do kenkaan Alma na no somdwuma ho asɛm wɔ Ammonihah no, muhun dɛ Alma ma bisa, hwehwɛ, na bɔ mu asekyerɛ ho fasusu papa. Yɛkenkan dɛ “Alma dzii dwuma ara yie wɔ sunsum mu, ɔnye Nyame dzii aper wɔ mpaabɔ dzendzenndzen mu, dɛ onhue no Sunsum ngu dɔm a wɔwɔ kurow no mu no do.’’ Naaso, dɛm mpaabɔ no, oennyi ano dɛ mbrɛ nna n’enyi da kwan no, na wɔpaam Alma fii kuropɔn no mu. “Nna awerɛhow ahyɛ no do no,’’ Nnkyɛ Alma repa aba, ber no na ɔbɔfo dze asɛm yi brɛɛ no: “Nhyira akã wo, Alma; dɛm ntsi, ma wo tsir do wɔ sor na dzi dɛw, osiandɛ ɔwɔ dɛ idzi dɛw wɔ siantsir bi ntsi.’’ Ɔbɔfo no kãa kyerɛɛ no dɛ ɔnsan nkɔ Ammonihah na ɔnkɔbɔ mbɔdzen bio, na Alma “saan n’ekyir ntsɛmara.’’8
Ebɛnadze na yesũa fi Alma a oribisa, ɔrohwehwɛ, na ɔrobɔ mu ho asɛm ho? Yesũa dɛ mpaabɔ hia sunsum mu nkõdzen, na daa no ɔnntaa mma hɛn dza hɛn enyi da do no. Mbom sɛ yenya abagura anaa awerɛhow hyɛ hɛn do a, Ewuradze ma hɛn awerɛkyekyer na ahoɔdzen wɔ akwanhorow soronko mu. Ebia Orinnyi hɛn nsɛmbisa nyina ano anaa onnya hɛn nsɛnhia ho anoyi hɔara; mbom, Ɔhyɛ hɛn nkuran dɛ yɛnkɔ do mbɔ mbɔdzen. Sɛ afei ntsɛmara yɛdze hɛn nhyehyɛɛ bata Ne nhyehyɛɛ ho a, Obobue kwan no ama hɛn, dɛmara dɛ Ɔyɛe dze ma Alma no.
Ɔyɛ me dasegye dɛ asɛmpa ne mãhyɛ ne mberano nye yi. Yebotum edzi Jesus Christ No Werdambɔ no ho nhyira horow ho dɛw wɔ hɛn abrabɔ mu. Kyerɛwsɛm no wɔ hɔ ma hɛn koraa. Nkɔnhyɛfo na wodzi hɛn baano a wɔkyerɛkyerɛ hɛn Ewuradze ne pɛ ma nkõdzen mber a yɛtse mu no. Dza ɔkã ho no, yɛwɔ hɛnara hɛn nyikyerɛ ho kwan akwantsen ama Ewuradze eetum akyekye hɛn werɛ na Ɔakyerɛ hɛn kwan ankorankor. Dɛ mbrɛ ɔbɔfo no see Alma no, yɛwɔ “siantsir kɛse bi ntsi yedzi dɛw’’ (Alma 8:15). Jesus Christ ne dzin mu, amen.