Yɛbɔsɔ Hɔn Ahwɛ
Sesei nye mber a yɛdze bɛyɛ ahoboa na yehu ama hɛnho dɛ yɛpɛ na yebotum ayɛ adzebiara a Ewuradze hɛn Nyankopɔn bɛhyɛ hɛn ho mbra no.
Mobɔ mpaa dze serɛ Sunsum Krɔnkrɔn no mboa ma hɛn nyina ber a mekyɛ adwendwen na atsenkã a wɔaba m’adwen na m’akoma mu wɔ ehyiadzi yi ho ahosiesie no.
Nsɔhwɛ horow no ho Hia a Ohia
Bɔbor mfe eduonu ansaana me frɛ ba Asɔr som mu me mber nyina no, meyɛɛ edwuma dɛ esũapɔn mu kyerɛkyerɛnyi na ɔhwɛdofo. Nna m’asodzii fapem dɛ kyerɛkyerɛnyi nye dɛ moboa esũafo no ma wohu mbrɛ hɔnankasa wobotum esũa adze ama hɔnho. Na m’edwuma mu adze tsitsir kor nye mereyɛ esũafo no hɔn mbɔdzembɔ ho nsɔhwɛ, merema grade horow, na merema ho kasakyerɛ. Dɛ mbrɛ hom nyim dadaw fi hom sũahu mu no, nsɔhwɛ nntaa nnyɛ adzesũa ho nhyehyɛɛ n’afã a esũafo no pɛ no papa!
Naaso nsɔhwɛ ne nyɛe ofi mber to mber no, hia tsitsir ma adzesũa. Nsɔhwɛ a woesiesie no yie no boa hɛn ma yesusu dza yehia dɛ yehu na dza yenyim ankasa wɔ adzesũadze pɔkyee bi ho; ɔma yenya esusudze a yɛdze beker hɛn adzesũa na mpontu.
Dɛmara so, ɔnnkyebo ɔbra sar yi do nsɔhwɛ no yɛ adze tsitsir ma hɛn onnyiewiei mpontu. Naaso, ɔyɛ nwanwa dɛ, asɛmfua nsɔhwɛ nnyi Ngyiresi Borɔfo kasa kyerɛwsɛm gyinapɛn mu kor mpo. Mbom, nsɛmfua tse dɛ sɔ no hwɛ, na hwehwɛ mu na sɔ hwɛ na wɔdze kyerɛ hɛn sunsum mu nyimdzee mu no nhwɛdo yie, hɛn ntseasee, na som ma hɛn Ɔsor Egya n’onnyiewiei enyigye ho nhyehyɛɛ na mbrɛ yebotum ahwehwɛ Agyenkwa No Werdambɔ ho nhyira horow.
Ɔno a Ɔyɛ nkwagye ho nhyehyɛɛ ne farbaa no kyerɛɛ hɛn ɔnnkyebo abrabɔ yi mu a Ɔdze nsɛmfua sɔ no hwɛ, hwehwɛ mu, na sɔ hwɛ wɔ tsetse na ndɛ mber kyerɛwsɛm mu. “Na yɛbɔsɔ hɔn ahwɛ, dɛ sɛ wɔbɛyɛ ndzɛmba nyinara a Ewuradze hɔn Nyankopɔn bɛhyɛ hɔn ho mbra no.”1
Hom nsusu David Ndwontofo no ntotɔserɛ yi
“Ewuradze hwehwɛ mo mu na sɔ me hwɛ; sɔ m’asabu na akoma hwɛ.
“Na w’adɔyɛ wɔ m’enyi do; Na manantsew wo nokwar no mu.”2
Na Ewuradze paa mu kãa no afe 1833 mu dɛ, “Dɛm ntsi, mma hom nnsuro hom atamfo, osiandɛ mahyɛ ɔmom wɔ m’akoma mu, Ewuradze na ɔse, dɛ mobɔsɔ hom ahwɛ wɔ ndzɛmba nyina mu, dɛ gyangyanbiara hom bɛtsena m’ahyɛmu mu dze akɔ owu mu mpo, ama woeebu hom bem.3
Ndɛ Da Yi Wɔrosɔ hɛn Ahwɛ Ahorow
Afe 2020 ne fã ayɛ, wiadze nyina mu nsan yarba bɔn a wɔasɔ hɛn nyina, wɔahwehwɛ hɛn mu, na wɔahaw hɛn wɔ akwan pii mu. Mobɔ mpaa dɛ yɛyɛ ankorankor na ebusua ebusua no yerusũa adzesũadze a ɔsom bo a gyedɛ sũahu horow a ɔhaw kɛse na obotum dze akyerɛ hɛn no. Mowɔ enyidado so dɛ hɛn nyina bɛgye “Nyankopɔn ne kɛseyɛ” ato mu emudzi mu na nokwar no dɛ obehyira [hɛn] wɔ [hɛn] amandzehu mu ma eesi [hɛn] yie.4
Fapem ebien botum ama hɛn kwankyerɛ na ahoɔdzen ber a yehyia nsɔhwɛ na nkõdzen gyinabew horow wɔ hɛn abrabɔ mu, mbrɛ wɔbɛyɛ biara: (1) ahosiesie ho fapem, na (2) ereper kɔ kan irigyina pintsinn wɔ Christ mu ho fapem.
Wɔrosɔ hɛn Hwɛ na Ahosiesie
Dɛ yɛyɛ Agyenkwa n’esuafo no, wɔhyɛ hɛn mbra dɛ “hom nsiesie biribiara a ohia no yie; na hom nsi ofi, ofi a wɔbɔ mpaa wɔ mu, ofi a wɔkyen kɔm wɔ mu, gyedzi fi, nwomasũa fi, enyimnyam fi, ofi a no mu ndzɛmba wɔyɛ no esiado esiado, Nyankopɔn ne fi.”5
Wɔbɔ hɛn anohoba so dɛ, ““sɛ [yɛ]yɛ ahosiesie a, [ye]nnkosuro.”
“Na ama hom eetum eguan efi ɔtamfo no tum ase, na wɔdze hom aaboa ano ayɛ hom atseneneefo a nkekãa nye afɔbu biara nnyi hom ho dze ama me.6
Kyerɛwsɛm yinom ma hɛn nhwɛdo a odzi mu a yɛdze bɛhyehyɛ na yesiesie hɛn abrabɔ honandua mu na sunsum mu nyina. Hɛn mbɔdzembɔ dɛ yɛbɛyɛ ahoboa ama ɔnnkyebo abrabɔ mu sũahu nsɔhwɛ horow no wɔdɛ ɔfa Agyenkwa no ne fasusu do, Ɔno a nkakrankakra “[ɔ]kɔr kan wɔ nyansa nye tsipɛn mu, na Nyankopɔn nye nyimpa hɔ enyimpa mu”7—nyansa mu, honandua, na sunsum mu, na nyimpa mu nkitahodzi a woedzi afora pɛr.
Abosoom kakra ara abɛsen no, ewiaber bi, emi na Susan kaan hɛn edziban na esian ho bambɔ ndzɛmba a yɛdze esie. Dɛm ber no, nna COVID-19 retserɛw ntsɛmtsɛm, na asaase-wosow awosow hɛn fie wɔ Utah. Fitsi hɛn awar ahyɛse no ara yedzi dwuma dɛ yebedzi nkɔnhyɛ afotu do a ɔfa ereyɛ ahoboa ama ɔhaw a ennyida ho, ntsi “yɛhwehwɛɛ” hɛn ahoboa ho kradoyɛ wɔ virus na asaase-wosow ahorow ber no, nna ɔyɛ adze oye na mber pa a yɛayɛ no. Nna yɛpɛ dɛ yehu hɛn grade horow a yebenya wɔ nsɔhwɛ yinom a wɔammbɔ ho nkae no.
Yesũaa adze pii. Mbea ahorow pii mu no, nna hɛn ahoboa dwuma no ye ara. Mbea binom so mu no, mbom, nna ohia mpontu osiandɛ yennhu dɛm ehyiadze no ntsɛm ma yɛnnyɛ ho ahoboa wɔ mber pa mu.
Yɛsereserɛw pii so. Mfatoho, yekopue ndzɛmba binom so do wɔ hɛn danba no sumabea a wɔayɛ hɛn edziban korabea mfe du mfe du. Nokwar, nna yesuro dɛ yebobue na yɛahwɛhwɛ akoradze no bi do a yesuro dɛ yɛdze wiadze nyina nsan yarba kor so bɛba! Naaso ɔwɔ dɛ hom enyi gye dɛ hom bohu dɛ ndzɛmba a bɔr ahyɛ mu mã no yɛtowee gui yie, ma wɔammfa yarba bɔn biara ammba wiadze mu.
Asɔrmba binom kã dɛ esian ho nhyehyɛɛ na ndzɛmba a ohia, edziban ne nsiei, na nda-ebiasa ehiadze ho nnhia bio osiandɛ Enuanom no nnkasaa ho ndaansa yi na wonnsii nsɛngyinado a ɔfa ho wɔ wiadze mfɛndzanan ehyiadzi mu. Mbom Asɔr baanodzifo esi do apaa mu akã kɔkɔbɔ yi mfe du mfe du. Mfe pii mu nkɔnhyɛ afotusɛm a ɔsaa no yɛ kɔkɔbɔ a wɔakã abɔ mu a ɔyɛ ndam na pefee na ɔgyegye koraa kyɛn ma ankorkor dze botum abɛyɛ.
Tse dɛ ma ɔhaw mber da esintɔ horow a ɔwɔ honandua mu ahosiesie edzi no, dɛmara so na sunsum mu enyibugudo na atse yie su yarba no nya nsunsuando bɔn kɛse wɔ abrabɔ nsɔhwɛ a ɔyɛ dzen mu. Mfatoho, yesũa fi mbaabun du abɛbusɛm no mu dɛ erutu ahosiesie ne nyɛe ahyɛ da no gya nkõgu wɔ nsɔhwɛ ber mu. Hom nkaa mbrɛ mbaabun nkwasea beenum enntum annyɛ ahoboa yie ama nsɔhwɛ no a wɔdze maa hɔn ayefor kun ne mbae da no mu no.
“Na hɔn a wɔyɛɛ nkwasea no, wɔfaa hɔn nkandzea no, wɔammfa ngo annka ho:
“Na enyansafo no faa ngo guu hɔn ntoa mu kaa hɔn nkandzea no ho. …
“Na esuom no, wɔtsẽaa mu dɛ, Hwɛ, ayeforkun no reba o! Hom nkɔ nkehyia no kwan.
“Nna mbaabun no nyina soɛree na wɔkekaa hɔn nkandzea.
“Na nkwasea no see enyansafo no dɛ, Hom mma hɛn hom ngo no bi, na hɛn nkandzea rudundum.
“Na enyansafo no buaa dɛ, Oho, bɛyɛ na ɔronnsõ hɛn nye hom; na mbom hom nkɔ hɔn a wɔtɔn no hɔ nkɔtɔ homdze.
“Na ber a wɔkɔree rokɔtɔ no, ayeforkun no bae, na hɔn a wɔayɛ krado no nye no kɔr ayefor ase, na wɔtoow abow no mu.
“Na ekyir no na mbaabun nkaa no so bae bɛsee dɛ, Ewuradze, bue hɛn.”8
“Na ɔnodze, obuae see hɔn dɛ, Nokwar mese hom dɛ hom nnyim me.”9
Nsɔhwɛ yi mu no, annyɛ yie koraa no, mbaabun nkwasea beenum no kyerɛɛ dɛ wɔyɛ asɛm no etsiefo nko na wɔnnyɛ ne yɛfo.10
Mowɔ nyɛnko bi a nna ɔyɛ mbra skuul adzesũanyi a n’enyi da hɔ ara yie. Adzesũa mber no mu no, dabiara Sam hwer ne mber dze kenkaan n’adzesũadze biara a orusũa ne nsɛnsin ahorow no na otwitwi no ntsiatsia. Odzii nhwɛdo yi do ma n’adzesũa nyina dapɛn na bosoom ewiei biara. Mbrɛ osi sũa adze no boaa no ma otumii sũaa mbra no nnyɛ dɛ osũae guu ne tsir mu ara. Na ber a nsɔhwɛ a odzi ewiei bɛnee no, nna Sam ayɛ ahoboa. Nokwar, ohun dɛ nsɔhwɛ a odzi ewiei ber no nye ne mbrasũa n’afã kor a noho annkyer no koraa. Ahosiesie yie na mber pa mu no, dzi konyimdzi wɔ nsɔhwɛ mu kan.
Mbrɛ Sam osii sũaa ne mbrasũa no da Ewuradze ne fapem nhwɛdo ma mpontu na nyinii mu kor edzi yie. “Na hwɛ dɛm na Ewuradze Nyankopɔn se: Medze me nsɛm bɛma adasamba nsensaaneba tsia nsensaaneba, ahyɛdze tsia ahyɛdze, ha kakra, hɔ kakra; na nhyira nkã hɔn a wodzi m’ahyɛdze do, na wɔdze hɔn aso ma m’afotu, na wobosua nyansa.”11
Moto nsa frɛ hɛn mu kor biara dɛ “[yɛ]ndwendwen [hɛn] akwan ho”12 na “[yɛ]mpɛnsapɛnsa [hɛn] mu nhwɛ dɛ [yɛ]wɔ gyedzi no mu anaa; [yɛ]nnunu [hɛnho] nhwɛ.”13 Ebɛnadze na yesũa efi ndaansa yinom mu abrabɔ nsakyer na nsiwdze ahorow mu? Ebɛnadze na yehia ma yetu mpon wɔ hɛn abrabɔ mu, sunsum mu, honandua mu, nkitahodzi mu, nkã-tse mu, nye nyansa mu? Sesei nye mber a yɛdze bɛyɛ ahoboa na yehu ama hɛnho dɛ yɛpɛ na yebotum ayɛ adzebiara a Ewuradze hɛn Nyankopɔn bɛhyɛ hɛn ho mbra no.
Wɔrosɔ hɛn Ahwɛ na Yɛreper Akɔ Kan
Mpɛn bi mokɔr asɛmpasomafo aberantsɛba bi a owui wɔ akwanhyia mu no funsie som. Asɛmpasomafo no n’egya kasaa wɔ som n’ase na ɔkyerɛkyerɛɛ no dɔba no mpofir mu honandua mu mpaapaamu n’akomayaw mu. Osii no pi dɛ narankasa ɔnntse siantsir horow na ber a dɛm nsɛm yinom sisi no ase. Mbom daa mebɛkaa ɔbarimba pa yi dɛ ɔrepaa mu kã dɛ onyim dɛ Nyame nyim siantsir horow na ber a ne ba no etwa mu akɔ no—na ɔno ara ye ma no. Ɔkãa kyerɛɛ mboanofo no dɛ ɔwɔ mu dɛ, ɔno na n’ebusua hɔn werɛ ahow dze, naaso ɔbɛyɛ yie, hɔn dasegye tsim na onnhihim. Mpaamukã yi na ɔdze wie ne nsɛm kã: “Mepɛ dɛ hom hu dɛ ɔfa Jesus Christ N’asɛmpa ho dze, hɛn ebusua nyina hyɛ mu. Hɛn nyina yɛhyɛ mu.”
Dɔfo a wɔahwer no tsetseew akoma a nna ɔyɛ dzen dze, naaso ebusua akokodurfo yinom no nna wɔayɛ sunsum mu ahoboa dɛ wobotum edua dɛm amandzehu kwan yi do 14 esũa onnyiewiei adzesuadze a ho hia no.
Nokwardzi nnyɛ egyangyadze anaa katseeyɛ. Mbom, ɔyɛ yɛrotwer Jesus Christ dɛ hɛn Agyenkwa na yɛdze hɛn werɛ rehyɛ No mu, Ne dzin mu, na N’anohoba mu. Ber a “[yɛ]per kɔ kan gyina pintsinn wɔ Christ mu, [ye]nya enyidado a ɔhyerɛn na odzi mu, na [ye]nya Nyankopɔn nye nyimpa nyina ho dɔ,”15 no wɔdze onnyiewiei nhumu na enyido-adzehu a ɔtra dza hɛn ɔnnkyebo nyansaa yi botum ehu koraa no, ehyira hɛn. Ɔbɛma yetum “[a]boa [hɛn] ano na [ye]gyina mbea krɔnkrɔn do”16 na “yennhihim, [a]kɛpem dɛ Ewuradze ne da no bɛba.”17
Ber a nna morosom dɛ Brigham Young University—Idaho president no, Elder Jeffrey R. Holland baa campus hɔ Mumu afe 1998 mu dɛ ɔrebɛkasa wɔ hɛn dapɛn dapɛn mpaabɔsom no kor mu. Emi na Susan too nsa frɛɛ adzesũafo no kuw bi dɛ wɔnye Elder Holland nhyia ana ɔama n’amandzɛɛbɔ no. Ber a hɛn mber a yɛbɔɔ mu dzii no reba ewie no, mibisaa Elder Holland dɛ, “Sɛ ibotum akyerɛkyerɛ adzesũafo yinom adze kor pɛr a, nkyɛ ɔbɛyɛ ebɛnadze?”
Obuaa dɛ:
“Yeruhu ntwuwii kɛse a ɔkɔ nkyɛmu ebien n’afã. Wobeyi asaase a ɔda finimfin a nkyɛ ibotum akɔ do no efi hɔ ama Latter-day Saintfo. Wobeyi kwan no finimfin no efi hɔ.
“Sɛ itsɛw nsu enyi wɔ esutsen a ɔrepem mu a, ɔnye wo bɔkɔ beebi. Ibɔkɔ beebi a ɔbɛpar wo akɔ biara. Yɛretsɛw nsu enyi, yeridzi nkorfo ekyir, yɛnye ampar no rokɔ no nnkɛyɛ yie.
“Ɔwɔ dɛ yɛyɛ nsanmuyi. Irinnsan mu nnyi mpo yɛ nsanmuyi. Hom nsũa nsan mu nyi sesei.”
Elder Holland n’asɛm a ɔfa nkyɛmu ebien a ɔrokɔ do abɛyɛ nkɔnhyɛsɛm a aba mu wɔ aman abrabɔ nye nsɛm a esisi mfe 22 a oyii m’asɛmbisa ano no. Ɔrekã fa nsonsonee kɛse a ɔbɛda Ewuradze n’akwan na wiadze dze mu ho asɛm no, Elder Holland bɔɔ kɔkɔ dɛ nda no a w’anan kor si nsan-ananmu Asɔr no mu na kor no so si wiadze no rohwer ntsɛmtsɛm. Ewuradze no somfo yi, nna ɔrehyɛ mbasirmba no nkuran dɛ wɔnsan mu nyi, wɔnyɛ ahoboa, na wɔmbɛyɛ Agyenkwa n’esũafo anokwafo. Nna ɔroboa hɔn ma woedua wɔrosɔ hɔn ahwɛ, wɔahwehwɛ hɔn mu, na hɔn abrabɔ mu nkõdzen sũahu ahorow no.
Anohoba na Dasegye
Kwan a yɛfa do dze yɛ hɛnho nhwehwɛmu no yɛ Ɔsor Egya ne enyigye ho nhyehyɛɛ kɛse no ne fã. Mobɔ hom anohoba dɛ sɛ hɛn nyina yɛ ahoboa na yɛdze gyedzi wɔ hɛn Agyenkwa no mu aper akɔ kan a, hɛn nyina botum enya grade abɔso kor noara wɔ ɔnnkyebo abrabɔ ho nhwehwɛmu mu: “Mbo! akowaa pa nye nokwafo, edzi ndzɛmba kumaabi ho nokwar: medze wo besi ndzɛmba pii do: kɔ wo wura ne dɛw mu.”18
Megye dase dɛ Nyankopɔn Onnyiewiei Egya no nye hɛn Egya. Jesus Christ yɛ Ne Ba tseasefo a Wɔwoo no Kortoo no, hɛn Agyenkwa na Pomfo. Nokwar yinom ho na megye me dase enyigye mu ara wɔ Jesus Christ ne dzin krɔnkrɔn no mu, amen.