Jesus Christ N’Ayarsa Tum no
Sɛ yɛba Jesus Christ hɔ na yenya gyedzi wɔ No mu, yenu hɛnho, na yedzi na yesie ahyɛmu horow a, hɛn basabasayɛ—dza ɔnam do bae biara no—wobotum asã no yarba.
Ofitsi afe yi n’ahyɛse no, yeehyia nsɛmansɛm pii a nna enyi nnda. Owu na akatua a oetwa osian wiadze nyina mu nsan yarba no ntsi aka wiadzemba na aman sikasɛm dzendzenndzen.
Asaase-wosow, ogya, na nsuyirii ahorow wɔ wiadze n’afã pii no, dɛmara dɛ wimu nsakyeree esian horow, a woegya nyimpa kegyaa, abagura, na awerɛhow, a wɔrodwendwen sɛ hɔn abrabɔ bɛsan ayɛ dɛ mbrɛ nna ɔtse no.
Hom mma menkã mankasa m’asɛm a ɔfa ahohiahia ho.
Mber a nna hɛn mba yɛ mbofra no, wɔyɛɛ hɔn adwen dɛ wobosũa sanku bɔ. Nna emi na mo kun, Rudy, pɛ dɛ yɛma hɛn mba no dɛm kwan yi, mbom nna yennyi sanku. Nna yennkotum atɔ sanku fofor, ntsi Rudy hyɛɛ ase dɛ ɔrohwehwɛ dadaw bi.
Dɛm afe Borɔnya no, ɔdze sanku bɔdoom hɛn ahobow mu, na hɛn mba no sũaa sanku bɔ hɔn mfe nyina.
Mber a hɛn mbambanyin nyinii na wofii fie no, huntuma na ɔbɔɔ sanku dadaw no ntsi yɛtɔnee. Mfe kakra twaa mu no, nna yesie sika kakra. Da kor bi Rudy kãa dɛ, “Megye dzi dɛ mber aso a yenya sanku fofor.’’
Mibisaa dɛ, “Ebɛnadze ntsi na ɔwɔ dɛ yenya sanku fofor, ber a hɛn mu biara mmbɔ?’’
Ɔkãa dɛ, “O, nkyɛ yebotum enya sanku a nankasa bɔ! Edze iPad no, ibotum ayɛ nhyehyɛɛ ma sanku no ɔabɔ ndwom bɔbor 4,000, a asɔr ndwom, Tabernacle Adwontokuw ndwom, Primary ndwom nyinara, na piinara a ɔkekã ho.”
Rudy yɛɛ ara ma mepɛɛ dɛ yɛbɔtɔ sanku no.
Yɛtɔɔ sanku fofor fɛɛfɛw bi a nankasa tum bɔ, na nda kakra ekyir no, mbanyin abran beenu, dze baa hɛn fie.
Mekyerɛɛ hɔn bea a mepɛ dɛ osi na mifii kwan no mu.
Nna ɔyɛ sanku fɛɛfɛw kɛsenara, na ama ɔakɔ abow no mu no, woyiyii n’anan no na wɔyɛe dze sanku no too ne nkyɛn afamu wɔ hwiir kakraba a wopia a wɔdze bae no do.
Nna hɛn dan no si koko a osian kakra do, na ma ɔyɛ awerɛhow nye dɛ dɛm anapa no nna esukwankyɛaba atɔ, ma ndzɛmba afow na wɔayɛ torkaa. Ana hom tum hu bea a ɔrokɔ a?
Ber a nna woripia sanku no rofow koko kakra no, ɔtserewee, na metsee dede kɛse kudumm bi. Sanku no efi hwiir no do ahwe famu dzendzenndzen ma oegya ikã kɛsenara wɔ hɛn efuw no mu.
Mekaã dɛ, “Me wuo. Ana hom ho YIE a?’’
Ndaase mu ara nna mbanyin beenu no hɔn ho YIE.
Ahobow kɛse kãa hɔn ber a kor hwɛɛ kor n’enyim, afei wɔhwɛɛ me na wɔkãa dɛ, “Yɛannhyɛ daa. Yɛdze bɛsan akɔ no korabew na yɛama hɛn panyin afrɛ wo.’’
Annkyɛr na panyin no nye Rudy rekasa ma wɔahyehyɛ dze sanku fofor aba. Rudy yɛ ayamuyiefo a ɔdze bɔn kyɛ na ɔkãa kyerɛɛ panyin no dɛ OYE wonsiesie dza ɔasɛɛ no ara na wɔnsan mfa sanku noara mbra, naaso panyin no sii nketse dɛ obenya fofor ama hɛn.
Rudy buae, kãa dɛ, “Ɔnnsɛe kɛse dɛm. Wonsiesie ara na wɔmfa mbra.’’
Panyin no kãa dɛ, “Dua no ebu, na dua no ebu prɛko pɛr no dze, onnkotum agyegye dɛmara bio ara da. Hom benya sanku fofor.’’
Nkyerɛbaa na enuanom, ana hɛn nyina yɛntse dɛ sanku yi a, mbubui kakra, mpae, na ɔsɛe, a yɛtse nkã dɛ yɛnnkɛtse dɛmara bio dabiarada a? Sɛ yɛba Jesus Christ hɔ na yenya gyedzi wɔ No mu, yenu hɛnho, na yɛyɛ na yesie ahyɛmudzi horow a, hɛn basabasayɛ—a adze a ɔdze bae biara—botum enya ayarsa. Kwan yi, a ɔdze Agyenkwa n’ayarsa tum ba hɛn abrabɔ mu no, mma yɛnnsan nyɛ ma nkyɛ yɛtse no, mbom ɔyɛ hɛn yie ara kyɛn nkaano no. Minyim dɛ ɔnam hɛn Agyenkwa, Jesus Christ, no Werdambɔ do no, wobotum esiesie hɛn, yeedzi mu, na yenya hɛn botae ne mãhyɛ dɛmara dɛ sanku fɛɛfɛw fofor a ɔgyegye yie no.
President Russell M. Nelson kyerɛkyerɛɛ dɛ: “ Sɛ nsɔhwɛ dzendzen no ba hɛn do a, nna mber aso dɛ hɛn gyedzi wɔ Nyankopɔn no mu dɔ yie, yɛyɛ edwuma dzen, na yɛsom binom. Afei Ɔbɛsã hɛn akoma a ebubu no yarba. Ɔbɛma hɛn asomdwee na awerɛkyekyer ankorankor. Owu mpo, runntum nnsɛe akyɛdze akɛse horow yinom no.’’1
Jesus see dɛ:
“Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye.
“Hom mfa mo kɔndua no nto hom do, na hom nsũa me, osiandɛ modwe na mebrɛ moho adze wɔ akoma mu: na hom benya ahomgye ama hom akra.
“Na mo kɔndua yɛ mberɛw, na m’adzesoa yɛ har” (Matthew 11:28–30).
Yɛbɛba No hɔ ma ɔasã hɛn abagura yarba no, yehia dɛ yenya gyedzi wɔ Jesus Christ mu. “Yerenya gyedzi wɔ Jesus Christ mu n’asekyerɛ nye yɛredan No koraa—yerenya awerɛhyɛmu wɔ No daapem tum … na ɔdɔ mu. Eregye Ne nkyerɛkyerɛ edzi kã ho. N’asekyerɛ nye yɛregye edzi dɛ mpo sɛ yɛnntse ndzɛmba nyina ase a, Ɔno dze ɔtse ase. Osiandɛ Ɔasɔw hɛn yaw, atseetsee, na mberɛwyɛ nyina, ntsi no, Onyim mbrɛ obesi bɔboa hɛn ma yɛahyɛ hɛn daa daa nkõdzen horow do.’’2
Sɛ yɛba No hɔ a, “dɛwdzi, asomdwee, na awerɛkyekye bɛhyɛ hɛn mã. Dza ɔyɛ [dzen na ɔhaw] nyina wɔ abrabɔ ho no ɔnam Jesus Christ no Werdambɔ no do obotum atsen no.’’3 Oetu hɛn fo dɛ, “Hom nhwɛ me wɔ hom adwendwen biribiara mu; mma hom nngye kyim, mma hom nnsuro’’ (Nkyerɛkyerɛ na Ahyɛmudzi 6:36).
Mormon Nwoma mu no ber a adzesoadze a wɔdze too Alma na no dɔm do no hyɛɛ hɔn do mbordo no, dɔm no totɔe serɛɛ ahotɔ. Ewuradze ennyi hɔn adzesoadze emmfi hɔ; mbom Ɔbɔɔ hɔn anohoba dɛ:
“Na mebɛma adzesoadze a wɔdze egu hom abatsir do no ayɛ har a hom renntse mpo dɛ ɔda hom ekyir, wɔ ber a hom wɔ nkowaasom mu mpo; na iyi na mebɛyɛ ama hom egyina ayɛ adasefo ama me ndaamba, na ama hom ehu nokwar no dɛ Emi, Ewuradze Nyankopɔn, mesera mo nkorɔfo wɔ hɔn amandzehu mu.
“Na afei ɔbaa dɛ adzesoadze a wɔdze too Alma nye n’enuanom do no yɛɛ har; nyew, Ewuradze hyɛɛ hɔn dzen ama woeetum asoa hɔn adzesoadze no na wɔammberɛ, na enyigye mu na abotar na wɔdze gyaa hɔnho mu maa Ewuradze ne pɛ’’ (Mosiah 24:14–15).
Agyenkwa no tum a ɔdze sã yarba na ɔma adzesoadze yɛ har ho asɛm no, Elder Tad R. Callister akyerɛkyerɛ dɛ:
“Werdambɔ no ho nhyira horow kor nye dɛ yebotum enya Agyenkwa no no mboa tum no Isaiah sii do kãa Ewuradze n’ayarsã, ɔdwe nhyɛdo ho asɛm. Ɔgyee dase dɛ Agyenkwa no ayɛ ‘akoban ama ohianyi wɔ n’ahohia mu, ehum ano guandɔbea, ɔhyew mu nwinwin’ (Isaiah 25:4). Hɔn a wodzi awerɛhow no, Isaiah paa mu kãa dɛ Agyenkwa no wɔ tum dɛ ‘[ɔ]kyekye hɔn a wodzi nkɔmbɔ nyinara werɛ’ (Isaiah 61:2), na ‘ɔbɛpepa enyi nyina ho nyinsuwa’ (Isaiah 25:8; san so hwɛ Nyikyerɛ 7:7); ‘ɔbɛnyan nyia no sunsum abobɔ na abrɛ adze ’ (Isaiah 57:15); na ‘membɛkyekyer hɔn a hɔn akoma ebubu’ (Isaiah 61:1; san so hwɛ Luke 4:18; Ndwom 147:3). Nna no mboa tum no tserɛ ara ma dɛ otum sesã ‘memma hɔn abɔtsir nhyɛ nso ananmu, enyigye ngo nhyɛ nkɔmbɔdzi anamu, ayɛyi atar nhyɛ awerɛhow sunsum ananmu’ (Isaiah 61:3).
“O, ebɛn enyidado na ɔkɔ sor wɔ anohoba horow no mu! … No Sunsum sã yarba; osiesie; ɔkyekye werɛ; ɔdze abrabɔ fofor hyɛ akoma a onnyi enyidado no mu. Ɔwɔ tum dɛ ɔsesã dza ɔnnyɛ fɛw na ɔyɛ emumuyɛ na mfaso nnyi mu nyinara wɔ abrabɔ mu ayɛ no adzebi a ɔsom bo na ɔyɛ enyimnyam dodow. Ɔwɔ tum dɛ ɔsakyer ɔnnkyebo no nsõ yɛ no mfesantsen ne fɛɛfɛfɛw.’’4
Megye dase dɛ Jesus Christ nye hɛn Agyenkwa dɔfo, hɛn Pomfo, Ɔyarsãfo Wura, na hɛn nyɛnko nokwafo. Sɛ yɛ dan No a, Ɔbɛsã hɛn yarba na Ɔama yeedzi mu bio. Megye dase dɛ iyi nye N’Asɔr na Ɔreyɛ ahoboa asan aba asaase yi do bio dze tum na enyimnyam ebedzi hen. Wɔ Jesus Christ ne dzin mu, amen.