Wɔakamfo ama Ewuradze
Hyɛ kwan no ase sesei dɛ ibɛyɛ obi a “wɔakamfo ama Ewuradze” ama No Sunsum aawɔ wo nkyɛn mbordo.
Mema hom akye, mo nuanom na me nkyerɛbaa. Dɛ meyɛ hɛn Agyenkwa, Jesus Christ osũanyi, mahwɛ nhyiamu a yɛreboaboa ano abaefo mu fi wiadze afã beebiara wɔ ehyiadzi yi mu no, ho kwan.
Afe yi ayɛ soronko dodow. Emi no, edwuma a President a Odzi Kan na n’Apamfo dze maa me dɛ menkotu Ewuradze ne temple krɔnkrɔn wɔ Durban, Africa Anaafo, nhyɛ Ewuradze nsa na medze hyɛɛ afe yi ase. Mowerɛ nnkefir da mbrɛ dan no si yɛ fɛw no. Mbom dza ɔbor mbrɛ ɔtse no, nkorɔfo a wɔayɛ ahosiesie yie na wɔdze enyidzi hɛɛn fi krɔnkrɔn mu no ɔbɔsom mo bo daa. Wɔbaa dɛ wɔayɛ krado dɛ wɔbɛkã Nsanananmu nhyira a ɔkrɔn no ho: Ewuradze ne fi a worutu ahyɛ Nyame nsa. Wɔdze akoma a ɔdɔ ahyɛ mu mã ma No na No Werdambɔ no bae. Wɔbae a ndaase ma hɛn Egya a ɔwɔ Sor ahyɛ hɔn mã dɛ wɔama hɔn ayɛdze horow a obegya hɔn akɔ nkwagye ntowdo mu. Wɔbae a wodzi mu.
Temple horow, bea a ɔwɔ biara no, ɔbor wiadze akwan do. Latter-day Saint temple kor biara a ɔwɔ wiadze yi mu no—ne nyina 168 no—gyina hɔ dɛ hɛn dasegye ma hɛn gyedzi wɔ onnyiewiei nkwa mu na enyigye dɛ yɛnye hɛn ebusua ebusua bedzi wɔ hɛn Ɔsor Egya nkyɛn. Yɛrokɔ temple no tow hɛn ntseasee mu ma Nyame Tsir na daapem asɛmpa, hɛn pisi dɛ yɛdze nokwar bɔbɔ bra na yɛakyerɛkyerɛ, na hɛn pɛ dɛ yebedzi hɛn Ewuradze na Agyenkwa, Jesus Christ ekyir.
Asɔr no ne temple biara abowano no wɔakyerɛw nsɛmfua no a ɔsɛ, “Krɔnkrɔnyɛ ma Ewuradze.” Temple no yɛ Ewuradze ne fie na guansumabea fi wiadze. No sunsum twa hɔn a wɔsom wɔ n’afasu krɔnkrɔn mu no fua. Ɔno na ɔhyehyɛ gyinapɛn a yɛdze hɛn mu dɛ N’ahohɔ.
M’asew banyin, Blaine Twitchell, nyimpa papa kor minyim no pɛn kyerɛɛ me adzesuadze kɛse bi. Emi na Akyerɛbaa Rasband kɛseraa no ber a aka kakra ma n’abrabɔ no aba ewiei no. Ber a yɛhɛɛn ne pia mu no, nna no bishop refi hɔ ara nye no. Ber a yekyiaa bishop no, modween dɛ, “Bishop yi yɛ adze papa. Ɔwɔ ha rosom no wardba nokwafo no kor.”
Mekãa kyerɛɛ Blaine, “Ɔnnyɛ ahomkã dɛ bishop abɛserɛ wo.”
Blaine hwɛɛ me na obuae, “Nna ɔbor dɛm koraa. Mibisaa bishop no dɛ ɔmbra osiandɛ nna mepɛ me temple recommend kokoamu mpɛnsapɛnsamu. Mepɛ dɛ mokɔ a wɔakamfo me ama Ewuradze” Na ɔyɛe!
Dɛm kasasin no, “wɔakamfo ama Ewuradze,” no nye me atsena. Ɔdze nhumu fofor koraa aba kokoamu mpɛnsapɛnsamu a hɛn Asɔr baanodzifo no taa yɛ no. Temple recommend no ho hia kɛse ara ma Asɔr n’ahyɛse, kesi afe 1891 mu no, temple recommend biara Asɔr no ne President dze ne nsa hyɛ ase.1
Mbabun anaa mpanyin dze o, wo temple recommend kokoamu mpɛnsapɛnsamu no mmfa dza yɛ nye dza nnyɛ ho. Nkamfo krataa no nnyɛ adze a wɔakyerɛw no nkorkor, kwanma, anaa tsikitsi a ɔma ntsenae bea mapã. Ɔkrɔn koraa na ɔwɔ sunsum mu botae kɛse. Ama afata temple recommend enyidzi mu no, otwar dɛ w’abrabɔ nye Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no ne nkyerɛkyerɛ no saa.
Wo kokoamu mpɛnsapɛnsamu no ma wo kwan ma ehwehwɛ wo kra mu fa w’ankorankor gyedzi wɔ Jesus Christ na No Werdambɔ no mu. Ewɔ ho nhyira dɛ ebɛkyerɛ wo dasegye wɔ asɛmpa a wɔdze asan ananmu aba; wo pɛ dɛ ebɛma hɔn a Ewuradze afrɛ hɔn dɛ wondzi N’Asɔr no bano tsipia; wo gyedzi wɔ asɛmpa nkyerɛkyerɛ no mu; w’ebusua asodzii a eyɛ; nye wo su wɔ nokwardzi, ahosan, ahosie, setsie, Enyansasɛm ne ndzi do, ebupɛn du mbra, na Ahomgyeda no krɔnkrɔnyɛ. Iyinom nye fapem nkyerɛkyerɛ ma abrabɔ a osi pi wɔ Jesus Christ na N’edwuma mu.
Wo temple recommend no bɛkyerɛ dɛ sunsum no bun mu mbɔdzembɔ dɛ edze Ewuradze ne mbrasɛm bɔbɔ bra, adɔ dza Ɔdɔ: ahobrɛadze, botooyɛ, enyimpi si, ayamuyie, akokodur, ayamuhyehye, bɔnfakyɛ, na setsie. Na etu woho si hɔ ma dɛm gyinapɛn no ber a ekyerɛw wo dzin wɔ krataa krɔnkrɔn no do no.
Wo temple recommend no bue ɔsor mbobow ma ɔwo na binom a hom wɔ ahyɛdze na ayɛdze a ɔwɔ onnyiewiei tum a enuma, endowment, awar, na nsɔwano kã ho.
“Wɔakamfo wo ama Ewuradze” nye dɛ wɔbɛkaa wo wɔ dza ɔsɛ Latter-day Saintnyi ahyɛmudzi-sienyi. M’asew Blaine, hun no dɛ ɔwɔ ahoboaboa a ohia kɛse ma ber a obegyina Ewuradze enyim ahobrɛadze mu.
Hom nsusu ber a Moses foow Horeb Bepɔw na Ewuradze Jehovah puee no do wɔ haban a ɔredzɛw mu. Nyankopɔn kãa kyerɛɛ no dɛ, “Yiyi w’ananadze mpaboa no, na bea a igyina do yɛ asaase krɔnkrɔn,”2
Yeririyi hɛn mpaboa wɔ temple abow ano yɛ yerigyaa wiadze akɔndɔdze anaa enyikadze a ɔbɔtwe hɛn efi sunsum mu nyinii ho, yɛdze ndzɛmba no a ɔma yeyi hɛn enyi fi hɛn abrabɔ mu dza ɔsombo do no to nkyɛn, yɛtra wentwiwentwi su, na yɛfa mber yɛ krɔnkrɔn.
Sor nhyehyɛɛ do no, hɛn nyimpadua yi yɛ Nyankopɔn n’abɔdze, ɔyɛ temple ma hɛn sunsum, na ɔsɛ dɛ yɛdze obu hwɛ do yie. Primary ndwom mu nsɛm yɛ nokwar dodow, “Mo honandua yɛ temple, na ohia ahwɛyie papaapa.”3 Ber a Ewuradze puee Nephifo do no, Ɔhyɛɛ hɔn mbra dɛ, “Hom [m]ma Sunsum Krɔnkrɔn no a hom benya no [n]tsew homho, ma hom eetum egyina m’enyin wɔ da a odzi ewiei no mu dɛ nkekãa biara nnyi homho”4 Ewuradze bisaa dɛ “Ebɛn nyimpa ne saso na ɔsɛ dɛ hom yɛ?” Ewuradze bisaa na nkyii Obuaa, “Dɛ ma metse mpo.”5 Ama “wɔakamfo hɛn ama Ewuradze,” yɛbɔ mbɔdzen dɛ yɛbɛyɛ dɛ ma Ɔtse.
Mekaa dɛ miritsie President Howard W. Hunter wɔ n’asɛm a ɔkaa no ne wiadze mfɛndzanan ehyiadzi a odzi kan dɛ Asɔr no ne President a otsĩa 14 no. Ɔkãa dɛ, “Ɔyɛ m’akoma mu ahwehwɛdze kɛse dɛ asɔrba panyin biara bɛfata dɛ ɔbɛhɛn temple mu. Ɔbɛyɛ enyisɔ ama Ewuradze sɛ asɔrba panyin biara bɛfata—na oekita—temple recommend a ɔmmpaa ho.”6 Medze bɛkã ho dɛ limited-use recommend bɛkyerɛ hɛn mbasirmba a wɔsom bo yinom kwan pefee no.
President Nelson kaa President Hunter ne nsɛm no dɛ, “Dɛm da no, Obiradzi 6, 1994 no, temple recommend a yɛkita no bɛyɛɛ adze fofor wɔ me kotoku mu. Ansaana no, nna ɔyɛ dza medze nya biribi. Nna ɔyɛ dza ɔma me kwan ma mehɛn Ewuradze ne fi krɔnkrɔn no mu; mbom ɔkãa asɛm no ekyir no, ɔbɛyɛɛ ahwehwɛdze no ankasa. Ɔbɛyɛɛ me setsie ma Nyankopɔn no nkɔnhyɛnyi n’abawdobɔdze.”7
Sɛ innyaa nngyee wo recommend anaa sɛ wo recommend apaho a, hom ntow santsen wɔ bishop abow enyim tse dɛ ma tsetse Ahotseweefo no toow santsen wɔ Nauvoo Temple abow enyim wɔ afe 1846 mu no.8 Nna m’ewuakɔr kã dɛm anokwafo no ho. Nna worigya hɔn kuropɔn fɛɛfɛw akɔ anee, mbom nna wonyim dɛ sũahu krɔnkrɔn rotweɔn hɔn wɔ temple no mu. Sarah Rich kyerewee wɔ Iowa kwan nkekakekã no, “Sɛ ɔnnyɛ gyedzi na nyimdzee a wɔdze maa hɛn wɔ dɛm temple no mu a … ,nkyɛ hɛn akwantu no bɛyɛ …, ihuruw wɔ sum mu”9 Ɔno nye dza yɛreyew sɛ yebodua abrabɔ yi mu gyan a yennyi nkenyan na asomdwee a wɔabɔ ho anohoba wɔ temple no.
Hyɛ kwan no ase sesei dɛ ibɛyɛ obi a “wɔakamfo ama Ewuradze” ama No Sunsum awɔ wo nkyɛn mbordo na N’esusudze dze “adwenmutsewee” abrɛ wo.11
Hom mbabun baanodzifo, elderfo quorum president, Relief Society president, na enuanom na nkyerɛbaa asomfo no bɔboa ma wɔayɛ ahoboa, na hom bishop anaa nkorbata mu president ama hom kwankyerɛ ɔdɔ mu ara.
Yɛwɔ mber a wɔato temple horow no mu anaa wodzi mu dwuma kumabaa. President Nelson na hɛn a yɛsom wɔ n’afã no, nna nkenyan adwenpɔw dɛ yɛntotow temple horow mu no yɛɛ “yaw” na “ɔtseetsee hɛn ara yie.” President Nelson hun noho dɛ oribisa, “Ebɛnadze na mebɛkã akyerɛ Nkɔnhyɛnyi Joseph Smith? Ebɛnadze na mebɛkã akyerɛ Brigham Young, Wilford Woodroff, na Presidentfo nkaa no, besi President Thomas S. Monson?”11
Sesei, nkakrankakra na ndaase mu ara yerubuebue temple horow ma wɔayɛ nsɔwano na endowment a wɔatsew hɔn a wɔkɔ no hɔn dodow do.
Mbom, wonngyaa dɛ ɔsɛ dɛ idzi mu kɔ temple. Mintsĩ mu nkã, dɛ itum kɔ temple anaa nntum no, ohia dɛ inya temple recommend a ɔmmpaa ho na itsim yie wɔ ahyɛmu anamɔn kwan no do.
Mfeda emi na Akyerɛbaa Rasband kor New Zealand wɔ edwumayɛ ho a yɛnye young single adultfo kuw kɛse rekasa. Nna temple no nkɔree yɛ dzen ma hɔn; dza ɔwɔ Hamilton no worisiesie, na wɔda ho rotweɔn Auckland temple ne asaase tutu no. Naaso, menyaa atsenkã dɛ menhyɛ hɔn nkuran ma wɔnkɛyɛ temple recommend no fofor anaa wɔnkɛgye bi.
Worunntum mpo mmfa nnkɔ temple a, wɔdze hɔnho bɛba Ewuradze enyim a hɔnho atsew na wɔayɛ ahoboa dɛ wɔbɔsom No. Erefata dɛ ibekita temple recommend a ɔmmpaa ho no yɛ bambɔ fi ɔsɛɛfo ne nsa, osiandɛ edze w’abrabɔ esi no pi ama Ewuradze, na anohoba dɛ Sunsum no nye wo bɛtsena.
Yɛyɛ temple edwuma ber a yɛhwehwɛ hɛn ewuakɔr na yɛdze hɔn edzin ma wɔyɛ ayɛdze. Ber yi a wɔatoto temple horow mu no, yetum akɔ do ayɛ hɛn ebusua ebusua mu nhwehwɛmu. Nyame no Sunsum wɔ hɛn akoma mu no, yɛyɛ, ngyinahɔmanyi, yegyina hɔ ma hɔn ma “wɔakamfo hɔn ama Ewuradze.”
Ber a morosom dɛ Temple Asoɛe Kwankyerɛfo Panyin no, metsee President Gordon B. Hinckley ɔrekasa fa kyerɛwsɛm yi Ewuradze kãa faa Nauvoo Temple ho: “Hom mma me temple ho dwumadzi no, nye ndwuma a medze ama hom dɛ hom nyɛ no nkɔ do, na mma hom nngyaa mu nngu hɔ; na hom mma hom mbɔdzembɔ, nye aperdzi, na abotar, nye hom ndwuma nyɛ mbɔho ebien, na hom akatua nnkɔbɔ hom, dɛm na Ewuradze ɔse.”12
Hɛn edwuma wɔ temple mu no fam hɛn onnyiewiei akatua ho. Ndaansa yi wɔayɛ hɛn nsɔhwɛ. Ewuradze afrɛ hɛn dɛ yɛnfa “mbɔdzembɔ, … penkyɛr, na abotar”13 nyɛ edwuma wɔ temple mu. Iyɛ obi a “wɔakamfo ama Ewuradze” no hia dɛm su yinom. Otwar dɛ yesi nkitsi dze mbrasɛm no bɔ bra, yɛwɔwdo wɔ hɛn asokyɛn wɔ temple ahyɛmudzi ho, na dza Ewuradze kɔ do kyerɛkyerɛ hɛn fa ho no yɛ hɛn enyisɔ na yenya abotar tweɔn kesi temple horow no mbuei emudzi mu.
Sɛ Ewuradze se hɛn dɛ “yɛntow “ hɛn mbɔdzembɔ mu a, Oribisa hɛn dɛ yɛma hɛn tseneneeyɛ nyɛ kɛse. Mfatoho, yebotum atra hɛn kyerɛwsɛm adzesũa mu, hɛn ebusua abakɔsɛm nhwehwɛmu, na hɛn gyedzi mpaabɔ mu ama yɛaakyɛ hɛn dɔ ma Ewuradze ne fie ama hɔn a wɔreyɛ ahoboa agye temple recommend, nkankara hɛn ebusua mu mba.
Mobɔ hom anohoba dɛ Ewuradze Jesus Christ no Ɔsomafo dɛ ber a hom bɔ mbɔdzen tow hom tsenenee ndzeyɛɛ mu no, hom bɛtse nkenyan wɔ hom som ma Nyame Egya na Jesus Christ, hom bɛtse Sunsum Krɔnkrɔn no kwankyerɛ no mbordo, hom benya enyisɔ ama hom ahyɛmu krɔnkrɔn no, na hom bɛtse asomdwee a hom nyim dɛ “wɔakamfo hom ama Ewuradze.” Jesus Christ ne dzin mu, amen.