Yɛrebɛyɛ Tse dɛ Ɔno
Agyenkwa no mboa krɔnkrɔn kã ho no nko na hɛn nyinara botum yetu mpon abɛyɛ tse dɛ Ɔno.
Jesus Christ n’abrabɔ na no somdwuma adzesũanyi a ɔyɛ ahwɛyie mpo no, Agyenkwa n’afotu dɛ bɛyɛ “mpo dɛ ma metse’’1 no yɛ dzen papa na ɔyɛ dɛ yennkotum enya. Ebia etse dɛ emi—ehwɛ wo mfomdo na nkõgu, ntsi adwen mu no ɔyɛ ahomkã dɛ ibɛnantsew anamɔn kwan a ɔmmfow sor na mpontu nnyi do. “Nokwar ara, nkyerɛkyerɛ yi nnyɛ nokwar na ɔyɛ ndaadaa,’’ naaso yɛgye to mu, ber a ahotɔ mu ara yɛfa kwan a ɔbrɛ nnyi mu, dɛm ntsi nsesã a yehia dɛ yenya no mmba
Na sɛ yɛbɛyɛ “mpo tse dɛ [Ɔno]’’ nnyɛ kasambirenyi a, wɔ hɛn ɔnnkyebo tsebew mu mpo a? Na sɛ ɔyɛ, wɔ kwan bi do, dza yɛbotum enya wɔ abrabɔ yi mu na, nokwar, ɔsɛ dɛ oedzi kan esi ama yɛnye No atsena bio a? Na sɛ “mpo tse dɛ emi’’ no yɛ dɛmara na pɛpɛɛpɛr dɛ ma Agyenkwa kyerɛ no ɛ? Afei ebɛnadze a? Mbɔdzembɔ dodow ahen na yebenya pɛ dze bɛma ma No tum nwanwa no aba hɛn abrabɔ mu ama yeetum asesã hɛn awosu apɛdze horow ankasa?
Elder Neal A. Maxwell kyerɛkyerɛɛ dɛ: “Ber a yɛdwendwen mbrasɛm a Jesus dze ama hɛn ho dɛ yɛmbɛyɛ tse dɛ Ɔno no no, yɛtse hɛn sunsum mu gyinabew a yɛwɔ mu sesei no ase dɛ, ɔnnyɛ dɛ yɛyɛ emumuyɛfo, na, mbom ɔyɛ dza hɛn akoma nnyi mu yie na ntsi enyimpisi nnyi hɛn mu ma N’edwuma—a ɔyɛ hɛn edwuma, so! Yɛkamfo na yɛnntaa nnsũasua No.’’2 Charles M. Sheldon, ɔsɔfo kumabaa bi, kyerɛɛ adwenkyerɛ a ɔsɛ wɔ kwan yi mu dɛ: “Hɛn Christian som pɛ ahotɔ na ahomka dodow ara kyɛn dɛ ɔbɛfa biribara a ɔyɛ basabasa na ɔyɛ durdur dɛ mbeamudua asoa.’’3
Nokwar, mbrasɛm no fa hɛn nyinara ho dɛ yɛbɛyɛ tse dɛ Ɔno, dɛmara dɛ Jesus Christ bɛyɛe tse dɛ Egya no.4 Ber a yɛkɔ kan no, yedzi mu koraa, yewie, na yetu mpon emudzi mu.5 Nkyerɛkyerɛ a ɔtse dɛm no nngyina som kor biara ne gyedzi do mbom ofi Owura Noara no hɔ tɔɔtsen. Ɔyɛ nhumu tsitsir yi na ɔwɔ dɛ yɛbɔ bra dɛ mbrɛ mbrasɛm no tse, yɛhwɛ nkɔmbɔdzi a yɛnye binom dzi, na yetu hɛn nkitahodzi a yɛnye nkorɔfo wɔ no mpon. Nokwar, kwan biara bio nnyi hɔ a yɛdze besiesie nkitahodzi anaa ɔman bi a woebubu kyɛn dɛ hɛn mu kor biara bosũasua Asomdwee Hen no.6
Hom mma yɛnhwɛ mbrɛ yebesi adwendwen, dze enyidahɔ, na yɛagye enyim, ahyɛ ase ahwehwɛ dɛ yɛbɛyɛ dɛ mbrɛ Ɔno tse, ber a yerenya Jesus Christ no su horow ankasa no.
Si Ngyinae na Fa woho Hyɛ mu
Mfe kakra a abɛsen no, emi na me yer kegyinaa Japan ne bepɔw tsentsen, Bepɔw Fuji, n’anamɔn kwan ase hɔ. Ber a yɛhyɛɛ ase dɛ yɛrofow no yɛhwɛɛ no sor fi ekyirekyir na yɛdwenee sɛ yebotum ekodu hɔ a.
Ber a nna yɛrokɔ kan no, yɛtsee brɛ, honam yaw, na sorkɔ no nsunsuando nkã. Adwen mu no, ɔyɛɛ ehiadze maa hɛn dɛ yebetsim wɔ anamɔn a odzi do no ara do. Yɛbɛkã dɛ, “Ebia munnkotum edu sor, mbom mubotum etu anamɔn a odzi do no sesei.’’ Annkyɛr na ewiei no edwuma a ɔyɛ dzen papa no yetumii yɛe—anamɔn kor anamɔn kor.
Anamɔn a odzi kan wɔ anamɔn kwan yi do a yɛbɛyɛ tse dɛ Jesus Christ no, nye yebenya pɛ dɛ yɛbɛyɛ dɛm. Yɛbɛtse afotu no ase yɛbɛyɛ tse dɛ Ɔno yɛ papa, naaso dɛm ntseasee hia dɛ yɛdze pɛ dzendzen bɛkã ho dze asesã hɛnankasa hɛnho, ber biara anamɔn kor, dze atra honammunyi no.7 Yebenya pɛ no, otwar dɛ yehu Onyia Jesus Christ yɛ. Otwar dɛ yehu No suban ho nsɛm,8 na otwar dɛ yɛhwehwɛ No su wɔ kyerɛwsɛm mu, asɔr som horow, na mbeambea krɔnkrɔn so. Sɛ yɛhyɛ ase dɛ yeruhu No ho nsɛm a, yebohu No su dɛ ɔda edzi wɔ binom mu. Iyi bɛhyɛ hɛn nkuran wɔ hɛnara hɛn ahwehwɛdze ho, osiandɛ sɛ binom tum nya No su no kakra a, hɛn so yebotum enya.
Sɛ yedzi nokwar ma hɛnho a, Christ ne Kan no9 a ɔwɔ hɛn mu no wasa dɛ sɛ yɛdze bea a yeedu dze toto Agyenkwa no suban a odzi mu no ho a nna kwan da ntamu.10 Nokwardzi a ɔtse dɛm hia tsitsir sɛ ɔwɔ dɛ yɛkɔ kan abɛyɛ tse dɛ Ɔno a. Ampaara, nokwardzi yɛ No su mu kor.
Afei, hɛn a yɛwɔ akokodur no botum ebisa ebusuanyi bi a yɛgye no dzi, ɔhokanyi, nyɛnko, anaa sunsum mu banodzinyi ɛbɛn Jesus Christ no suban a yɛwɔ ho hia—na yebehia dɛ yɛyɛ krado dɛ yɛbɛgye nyiano a yɛnnkɛpɛ dɛ yɛbɛtse no. Ɔtɔfabi a yehu hɛnho wɔ paserew yi ahwehwɛ a ɔkyerɛ hɛn dɛ yɛyɛ krokrobaa dodow anaa yɛafɔn kyɛn ma yɛtse no.
Anyɛnkofo anaa ebusuafo a yɛgye hɔn dzi no botum aboa hɛn ma yeehu mbrɛ yɛtse pɛpɛɛpɛr, na hɔn mpo, adɔfo na aboafo a wɔpɛ dɛ wɔyɛ no mpo, wonnkotum ehu ndzɛmba emudzi mu. No nsunsuando no, ohia tsitsir dɛ hɛn so yebisa hɛn Ɔsor Egya dɔfo dza yehia na beebi a ɔwɔ dɛ yɛdze hɛn mbɔdzembɔ tsim. Onyim mbrɛ yɛtse pɛpɛɛpɛr na ɔdɔ mu ara ɔbɛkyerɛ hɛn hɛn mberɛwyɛ.11 Ebia ɔwo ibosũa dɛ ihia abotar kɛsenara, ahobrɛadze, ayamuyie, ɔdɔ, enyidado, enyimpi, anaa setsie, mobobɔ kakra a.12
Ɔnnkyɛree pii, na menyaa sunsum mu sũahu bi ber a Asɔr banodzinyi dɔfo bi yɛɛ nsusui tɔɔtsen papaapa bi dɛ ohia dɛ mutu su tsitsir bi mpon. Ɔdɔ mu ara ɔannkyea nokwar no. Dɛm anafua no, mekãa sũahu yi kyerɛɛ me yer. Ɔyɛɛ ehumbɔbɔr ayamuyie mpo ber a ɔpen no nsusui no do. Sunsum Krɔnkrɔn no sii no pi kyerɛɛ me dɛ hɔn afotu no fi Ɔsor Egya dɔfo hɔ.
Ebia ɔbɔboa nokwar mu ara so dɛ ibowie su tse dɛ Christ dwumadzi no a ɔwɔ Preach My Gospel tsir 6 mu no.13
Prɛko pɛr a ayɛ nokwar nhwehwɛmu na esi gyinae dɛ ibɛhyɛ ase afow bepɔw no, ohia dɛ inu woho. Ɔdɔ mu ara President Russell M. Nelson kyerɛkyerɛɛ dɛ: “Sɛ yesan mu yi dɛ yebonu hɛnho a, yɛfa dɛ yɛbɛsesã. Yɛma Agyenkwa no kwan ma ɔsesã hɛn ma yɛfa hɛn tam mapã no fura. Yɛsan mu yi dɛ yebenyin sunsum mu na yeenya enyigye—hɛn mponee ho enyigye wɔ No mu. Sɛ yesan mu yi dɛ yebonu hɛnho a, yɛfa dɛ yɛbɛyɛ tse dɛ Jesus Christ ara yie’’14
Yɛrebɛyɛ tse dɛ Jesus Christ no behia hɛn akoma na adwen sesã, nokwar, hɛn suban ankasa, na ɔnam Jesus Christ no ɔgye adom nko do na yɛyɛ a ɔbɛyɛ yie.15
Hwehwɛ na Yɛ
Afei a esi gyinae dɛ ibɛsesã na enu woho na edua mpaabɔ, ndwendwen ho nokwar mu, na ebia nye binom afa apam ahwehwɛ no, ibehia dɛ iyi su bi a tsitsir ara ibetsim do. Ibehia dɛ edze enyimpi dze mbɔdzembɔ a mfaso wɔ mu hyɛ mu. Su yinom remmba ara kwa na mpofirmu, mbom wɔnam N’adom do no wɔbɛba nkakrankakra ber erobɔ ho mbɔdzen.
Su tse dɛ Christ yɛ akyɛdze horow a ofi Ɔsor Egya dɔfo hɔ dze hyira hɛn na hɔn a woetwa hɛnho ehyia no. Dɛmara dɛ, hɛn mbɔdzembɔ dɛ yebenya su yinom behia nokwar ntotɔserɛ agye Ne mboa krɔnkrɔn. Sɛ yɛhwehwɛ akyɛdze horow yinom dze asom binom yie a, Obehyira hɛn wɔ hɛn mbɔdzembɔ mu. Yɛdze pɛsenankomanya hwehwɛ akyɛdze fi Nyankopɔn hɔ a obowie enyimguase na abagura.
Ber a yetsim wɔ su kor a ohia do yie no, sɛ yɛkɔ kan wɔ dɛm su ne nyae mu a, yɛsan nya su binom so. Ana obi a oritsim yie wɔ ayamuyie do nnkeyin wɔ ɔdɔ na ahobrɛadze mu? Ana obi a oritsim wɔ setsie do nnkenya enyimia na enyidado kɛsenara? Hom mbɔdzembɔ tsitsir dɛ wobenya su kor no bɛyɛ nsu pramee a ɔma ahɛn nyinara do sor wɔ nsuhɛn gyinabea.
Kyerɛw to hɔ na Kɔdo Yɛ
Ohia ma me ber a meper mebɛyɛ tse dɛ Ɔno dɛ mekyerɛw mo sũahu horow na dza murusũa. Ber a musũa adze a No su no kor da m’adwen do yie no, kyerɛwsɛm no bɛyɛ fofor ber a muhu su yi ne mfatoho horow wɔ Ne nkyerɛkyerɛ, No somdwuma, na N’esuafo mu. M’enyiwa so tsim yie ma muhu su no wɔ binom mu. Meehu ankorankor anwanwafo a wɔwɔ Asɔr no mu nye hɔn a wonnyi mu a wɔwɔ suban a wosũaa No. Ɔyɛ mfatoho horow a tum wɔ mu wɔ mbrɛ su horow no besi botum dɛ ɔnam No ɔdɔ adom do no ɔda edzi wɔ nyimpa ara mu.
Ama yeehu nokwar kankɔ no, obehia dɛ yɛdze nkɔdo mbɔdzembɔ hyɛ mu. Tse dɛ bepɔw no mfowee hia ahoboaboa ansaana, na ntsimii kodu ewiei na penkyɛr ber a erofow no, dɛmara so na akwantu yi behia nokwar mbɔdzembɔ na afɔrbɔ. Nokwar Christian som, a yɛper bɛyɛ tse dɛ hɛn Owura no, ehia hɛn mbɔdzen papa daa.16
Afei kɔkɔbɔ tsiabaa. Mbrasɛm dɛ yɛbɛyɛ tse dɛ Ɔno no nnkyerɛ dɛ yedzi fɔ, yɛmmfata, anaa wɔnndɔ hɛn. Hɛn ɔnnkyebo sũahu nyina yɛ kankɔ, mbɔdzembɔ, nkõgu, na konyimdzi. Ɔwɔ mu mpo dɛ menye me yer bɛpɛ dɛ yebotum emua hɛn enyiwa na nkɔngyaa yi mu ara yɛdze hɛnho ekesi no sor no, naaso nnyɛ dɛm na abrabɔ tse.
Hom reyɛ dza oye, wɔdɔ hom, naaso dɛm nnkyerɛ dɛ hom dzi mu. Edwuma wɔ hɔ dɛ wɔyɛ no abrabɔ yi mu na dza odzi do no. No mboa krɔnkrɔn kã ho na hɛn nyinara botum yɛakɔ kan abɛyɛ tse dɛ Ɔno.
Mber yinom mu ber a, “ndzɛmba nyinara [bɛyɛ] begyabegya; na … suro [yɛ dɛ] ɔbɛba nkorɔfo nyinara do,’’17 edur kortsee, n’eduryɛ kortsee, nye yɛbɛper ayɛ tse dɛ Agyenkwa no,18 adasamba nyinara Pomfo no19 Wiadze Kan no,20 na yɛbɔhwehwɛ Ɔno a ɔpaa mu kãa dɛ, “Emi nye kwan no.’’21
Minyim dɛ nkakrankara yerudua No mboa krɔnkrɔn na ahoɔdzen do no yebenya yɛabɛyɛ tse dɛ Ɔno. Sɛ ɔnntse dɛm a, nnkyɛ Ɔamma hɛn mbrasɛm yi.22 Minyim iyi—mu bi osiandɛ muhu No wɔ hom mu pii mu. Ndzɛmba yinom ho na megye me dase wɔ Jesus Christ ne dzin mu, amen.