Yɛkã Christ ho Asɛm
Ber a wiadze nnkã Jesus Christ ho asɛm pii no, hom mma yɛnkã No ho asɛm mbordo.
Mekyerɛ mo dɔ ma hom, hɛn anyɛnkofo adɔfo na agyedzifo mfɛfo. Hom gyedzi na akokodur abosoom kakra a abɛsen yi ayɛ me fɛw, ber yi a wiadze nyina mu nsan yarba atõtõ hɛn abrabɔ na wɔafa ebusuafo a wɔsom bo na anyɛnkofo adɔfo no.
Ber yi mu a yennyim dza ɔbɛba yi, menya enyisɔ soronko wɔ me nyimdzee a osi pi na ɔyɛ nokwar dɛ Jesus nye Christ no. Ana hom enya dɛm atsenkã no bi? Dza ɔyɛ dzen ahorow a rohom hɛn mu kor biara do, naaso dza ɔda hɛn enyim daa nye Nyia a Ɔkãa no ahobrɛadze mu dɛ, “Emi nye ɔkwan no, nokwar no na nkwa no.”1 Ber a yerudua nyimpa ntamu ntsetsewee mu hyɛber yi, onnhia dɛ yebodua hyɛber a yɛnye, Ɔno a Ɔfrɛ hɛn ɔdɔ mu ara dɛ, “Hom mbra Me nkyɛn,”2 no nya sunsum mu ntamu ntsetsewee.
Tse dɛ kwankyerɛ nworaba a ɔda wimu a wɔatsew na ɔahyɛ sum no, Jesus Christ hyerɛn hɛn kwan mu. Ɔbaa asaase wɔ mbowa abɔbɔfo edzidzi daka mu. Ɔbɔɔ bra emudzi mu. Ɔsãa ayarfo yarba na onyaan ewufo. Ɔyɛɛ nyɛnko ma hɔn a wommbu hɔn bi no. Ɔkyerɛɛ hɛn dɛ yɛnyɛ papa, setsie, na yɛndodɔ hɛnho nkorkor. Wɔbɔɔ no mbeamudua mu, ɔsoɛree enyimnyam mu nda ebiasa ekyir no, a ɔma hɛn na hɔn a yɛdɔ hɔn no kwan ma yɛatsena ase owu ekyir. Ɔnam N’ehumbɔbɔr na adom a onnyi kabea no, Ɔfaa hɛn bɔn na hɛn amandzehu too No do, a Ɔdze bɔnfakyɛ abrɛ hɛn sɛ yenu hɛn ho a, na asomdwee wɔ ɔbra n’ehum mu. Yɛdɔ No. Yesɔr No. Yɛkã No do. Ɔyɛ hɛn akra ne sekyɛ.
Enyigye mu ara, ber a sunsum mu pisi yi rehyɛ dzen wɔ hɛn mu no, dodow ara wɔ asaase yi do a wonyin Jesus Christ noho asɛm ketseketse bi, na, wiadze n’afã bi wɔ hɔ a wɔabɔ Ne dzin dawur mfe aha pii mu no, gyedzi wɔ Jesus Christ mu no reyew. Ahotseweefo akokodurfo no a wɔwɔ Europe Aborɔkyir no wɔahwɛ gyedzi a ɔrokɔ famu mfe du mfe du. Ɔyɛ yaw dɛ, wɔ United States ha no so gyedzi rokɔ famu. Adzesũa nhwehwɛmu a wɔyɛɛ no ndaansa yi kyerɛ dɛ mfe 10 a wɔabɛsen yi nkorɔfo ɔpepe 30 na woegyaa dɛ wɔregye Jesus Christ No krɔnkrɔnyɛ no edzi.4 Ehwɛ no wiadze nyina mu a, adzesũa nhwehwɛmu kor so susu dɛ mfe du mfe du ɔreba no mu. nkorɔfo a wobefi Christian som mu bɛyɛ afoforfo worubofua no mbɔho ebien.5
Nyew, yedze obu ma obiara ne pɛ a ɔdze san mu yi no, naaso Ɔsor Egya paa mu kãa dɛ, “Oyi nye mo dɔba: hom ntsie no.”6 Megye dase dɛ da no bɛba ber a anankorma nyina bɔkotow na tɛkyerɛma nyina apaa mu akã dɛ Jesus nye Christ no.7
Yensi dɛn mbua hɛn wiadze a ɔresesã yi? Ber a binom rubu hɔn enyi egu hɔn gyedzi do no, binom rohwehwɛ nokwar no. Yɛafa Agyenkwa ne dzin ato hɛnankasa hɛn do. Ebɛn adze bio na yɛnyɛ nkã ho?
President Russell M. Nelson n’Ahoboaboa no
Hɛn nyiano ne fã bɛba ber a yɛkaa mbrɛ Ewuradze sii kyerɛkyerɛɛ President Russell M. Nelson abosoom kakra ana ne frɛ dɛ Asɔr no ne President no. Ɔrekasa afe kor ana ne frɛ no, President Nelson too nsa frɛ hɛn dɛ yensũa dzin Jesus Christ no ntõtõho 2,200 no a wɔakyerɛw no wɔ Topical Guide mu no ara yie.7
Abosoom ebiasa ekyir no, wɔ Ebɔbira wiadze mfɛndzanan ehyiadzi mu, ɔkãa mbrɛ mfe du mfe du a oetu noho esi hɔ dɛ osũanyi mpo no, Jesus Christ ho nsɛm adzesũa yi a ɔakɔ bun mu dɛm no, ahyɛ no do papaapa. Akyerɛbaa Wendy Nelson bisaa no nhyɛdo a woenya. Obuaa dɛ, “Mayɛ nyimpa fofor!” Ɔayɛ nyimpa fofor? Edzi mfe 92, nyimpa fofor? President Nelson kyerɛkyerɛɛ mu:
“Sɛ yɛfa mber na yɛdze sũa Agyenkwa no ho nsɛm na No werdam afɔrbɔ no a, yɛtwe bɛn [No]. …
“… Agyenkwa no na N’asɛmpa no [ba bɛyɛ] fapem a yetsim wɔ do.”9
Agyenkwa no kãa dɛ, “Hom nhwɛ me wɔ hom adwendwen biara mu.”10
Wiadze a edwumayɛ, atseetsee, na dza ɔfata nkamfo wɔ mu no, yesie hɛn akoma, hɛn adwen, na hɛn adwendwen wɔ Ɔno a Ɔyɛ hɛn enyidado na nkwagye no do.
Sɛ kwan fofor a wɔdze sũa Agyenkwa ho nsɛm boaa President Nelson ma ɔyɛɛ ahoboa a, ana onnkotum aboa hɛn so ma so yɛayɛ ahoboa a?
Oritsĩ mu akasa afa Asɔr ne dzin ho no, President Nelson kyerɛkyerɛɛ dɛ: “Sɛ yebotum enya Jesus Christ No Werdambɔ no tum ho kwan a—dɛ ɔbɛtsew hɛnho na Ɔasã hɛn yarba, Ɔbɛma hɛn ahoɔdzen na Oepegya hɛn, na ewiei no Ɔama hɛn nkwagye ntowdo a—otwar dɛ yɛda no edzi pefee dɛ Ɔno nye dɛm tum ne farbaa.”11 President Nelson kyerɛɛ hɛn dɛ ber biara yɛdze Asɔr no ne dzin ankasa frɛ no no, biribi a ɔyɛ dɛ adze ketseaba no, ɔnnyɛ adze ketseaba koraa na ɔbɛkyerɛ wiadze no ne ndaamba.
Hom Ahoboaboa ho Anohoba
Mobɔ hom anohoba dɛ sɛ hom yɛ ahoboa, dɛ mbrɛ President Nelson yɛɛ no a, hom so bɛsesã, hom bɔdwen Agyenkwa no ho, ataa akã no ho nsɛm a hom nnsuro. Ber a hom ba bohu No na hom dɔ No yie mpo no, hom nsɛnkã ba ahotɔ mu ara, dɛ ma osi ba ber a hom rekasa fa hom mba anaa fa nyɛnko dɔfo bi ho no. Hɔn a woritsie wo nnkenya pɛ biara dɛ wobɛgye kyim anaa wɔbɛpam wo na mbom wobosũa pii efi wo hɔ.
Emi na ɔwo nyina yɛkã Jesus Christ no ho nsɛm dze mbom bia yebotum akã no yie kakra. Sɛ wiadze rennkã No ho nsɛm pii a, woana na ɔrebɛkã No ho nsɛm mbordo? Hɛn ara a! Yɛnye Christianfo binom a woetu hɔnho esi hɔ!
Yɛrekã Christ ho Asɛm wɔ Hɛn Efiefi mu
Ana Agyenkwa no mfonyin wɔ hɛn efiefi? Ana yɛtaa kã Jesus n’abɛbusɛm kyerɛ hɛn mbofra a? “Jesus no ho nsɛm [tse dɛ] mframa a oruhuw kɛse fa hɛn mbofra hɔn akoma mu gyedzi nyena a woekua do.”12 Sɛ wo mbofra bisa wo nsɛmbisa a, gye enyim ara dwen ho dɛ ibɛkyerɛ dza Agyenkwa no kyerɛɛ. Mfatoho, sɛ w’abofra bisa dɛ, “Daddy, dɛn ntsi na yɛbɔ mpaa?” Ibotum ebua dɛ, “Ɔno yɛ asɛmbisa mapã. Ana ikaa ber a Jesus bɔɔ mpaa no? Ma yɛnkasa mfa siantsir a Ɔbɔɔ mpaa na mbrɛ Osii bɔɔ mpaa ho.”
“Yɛkã Christ ho asɛm, yedzi dɛw wɔ Christ mu, … ama hɛn mba eehu fibea kor a ɔsɛ dɛ wɔkɔ kɔhwehwɛ hɔn bɔnfakyɛ.”13
Yɛrekã Christ ho Asɛm wɔ Asɔr no mu
Kyerɛwsɛm iyi ara dze kã ho dɛ “yɛbɔ Christ ho asɛmpa no dawur.”14 Hɛn som a yɛdze sɔr mu no, hom mma yentsim wɔ Agyenkwa Jesus Christ na No werdam afɔrbɔ no do. Iyi nnkyerɛ dɛ yennkotum akã nsɛm afa hɛn ankasa hɛn abrabɔ mu sũahu ho anaa yɛbɛkye binom hɔn adwendwen. Bia hɛn nsɛngyinado no bɛfa ebusua ebusua anaa som anaa temple anaa ndaansa yi asɛmpakã dwuma, biribiara a ɔwɔ hɛn asɔryɛ mu no wɔ dɛ ɔtsen kɔ Ewuradze Jesus Christ do.
Mfe eduasa a wɔabɛsen no, President Dallin H. Oaks kãa krataa bi a onyaa “fii banyin bi ɔkãa dɛ ɔkɔɔr [sacrament] nhyiamu bi na otsiei dasegye duesuon a ɔanntse dɛ wɔabɔ Agyenkwa ne dzin, no ho asɛm.”15 Na President Oaks hyɛɛ no nsew dɛ “Bia na ɔnntse dɛm dze [naaso] meserɛ akã osiandɛ ɔma hɛn dza hɛn nyina bɛkaa no pefee.”16 Nkyii ɔtoo nsa frɛɛ hɛn dɛ yɛnkã Jesus Christ ho asɛm wɔ hɛn kasaa na adzesua mpɛnsampɛnsamu horow mu ara yie. Mahyɛ no nsew dɛ yɛdze enyi retsim Christ do wɔ hɛn Asɔr nhyiamu horow mu ara yie. Hom ma yɛngye enyim ara nkɔ do wɔ mbɔdzembɔ pa yinom mu.
Yɛnye Binom Rekã Christ ho Asɛm
Yɛmbue kwan, na yenya pɛ dɛ hɔn a woetwa ehyia hɛnho no yɛnye hɔn bɛkã Christ ho asɛm. President Nelson kãa dɛ, Jesus Christ esuafo nokwafo no wɔ pɛ dɛ wogyina, wobue hɔn ano kasa, na wɔyɛ soronko fi wiadzefo ho.17
Ɔtɔfabi a yɛdwen dɛ yɛnye binom edzi nkɔmbɔ kor ara no ɔwɔ dɛ ɔma wɔba asɔr anaa wohu asɛmpasomafo no. Hom mma Ewuradze kwan ma ɔma hɔn kwankyerɛ dɛ ma wɔbɛpɛ, na hɛn so yɛndwen hɛn asodzi dɛ yɛbɛyɛ Ne ndze ama no, yɛdze adwendahɔ na yɛada hɛn gyedzi edzi. Elder Dieter F. Uchtdorf akyerɛ hɛn dɛ sɛ obi bisa hɛn hɛn dapɛn ewiei ho asɛm a, ɔwɔ dɛ yenya pɛ na yebua no enyigye mu ara dɛ yɛpɛɛ Primary mbofra no a wɔtoow “Morobɔ mbɔdzen mayɛ tse dɛ Jesus”18no papaapa. Yɛngye hɛn gyedzi wɔ Christ mu ahomkã mu ara. Sɛ obi kyɛ asɛnhia bi a ɔwɔ wɔ hɔn abrabɔ mu a, yebotum akã dɛ, John, Mary, inyim dɛ megye Jesus Christ dzi. Madwen biribi a Ɔkãe a bia obotum aboa wo.”
Yɛma kwan wɔ social media do na yɛnkasa mfa hɛn awerɛhyɛmu wɔ Christ ho asɛm mu. Dodowara a bedzi wo nyi wɔ wo gyedzi ho, mbom sɛ obi mmpɛ dɛ otsie ber a irekã Agyenkwa no ho asɛm a, nya akokodur wɔ N’anohoba dɛ: “Nhyira akã hom ber a wɔbɛkã nsɛm bɔn etsia hom … wɔ me ntsi. … Na hom akatua sõ wɔ sor.”19 Ohia hɛn yie dɛ yɛbɛyɛ N’akãdofo kyɛn hɛnakasa hɛn akãdofo “bɛpɛ hɛn asɛm.” Peter tuu fo dɛ, “Hom nsiesie homho daa dɛ hom beyi ano [afa] enyidado a ɔwɔ hom mu no.”20 Hom mma yɛnkã Christ ho asɛm.
Mormon Nwoma no yɛ Jesus Christ ho dasefo mapã. Bɛyɛ dɛ krataafa biara gye dase fa Agyenkwa no na No dwuma krɔnkrɔn no ho.21 No Werdambɔ na adom ho ntseasee no hyɛ krataafa biara mã. Ɔkã Ahyɛmu Fofor no ho no, Mormon Nwoma no boa hɛn ma yɛtse ase yie siantsir a Agyenkwa no baa bɛgyee hɛn na mbrɛ yebesi botum aba Ne nkyɛn nokwar mu.
Mber bi mu, hɛn Christianfo mfɛfo mu binom, nnhu hɛn gyedzi na hɛn tsirmpɔw yie. Hom mma yɛnye hɔn ndzi dɛw ampaara wɔ gyedzi a yɛnye hɔn kyɛ wɔ Jesus Christ mu na Ahyɛmu Fofor no a hɛn nyina pɛ no. Nda a ɔwɔ enyim mu no, hɔn a wɔgye Jesus Christ dzi no behia anyɛnkoyɛ na bambɔ efi hɔn ho nkorkor hɔ.22
Ber a wiadze nnkã Jesus Christ ho asɛm pii no, hom mma yɛnkã No ho asɛm mbordo. Sɛ hɛn nokwar su dɛ N’esuafo no da edzi a, nkorɔfo pii a woetwa hɛnho ehyia no bɛyɛ krado dɛ wobetsie. Ber a yɛkyɛ kan no a yɛagye efi No hɔ no, Ne kan na No nkwagye tum nwanwa no bɛhyerɛn hɔn a woenya pɛ dɛ wobobue hɔn akoma mu. Jesus see dɛ, “Maaba wiadze dɛ kan.”23
Yɛrepegya Hɛn Pɛ mu dɛ Yɛbɛkã Christ ho Asɛm
Biribiara mmpegya me pɛ dɛ mebɛkã Christ ho asɛm kyɛn morodwendwen ma Ne mbae bɛyɛ. Yennyim ber a Ɔbɛba dze, naaso Ne mbae bɛyɛ ahobow kɛse noara. Ɔbɛba wɔ ɔsor mununkum mu wɔ tumdzi na enyimyam mu a N’abɔfo krɔnkrɔn nyina kã ho. Nnyɛ abɔfo kumaabi mbom N’abɔfoe krɔnkrɔn ne nyina. Iyinom nnyɛ cherebno a n’afon ho kɔben no a Raphael yɛɛ no nsaano mfonyin, a yehu wɔ Valentine nkrataasin do no. Iyinom yɛ mfe ɔha ɔha mu abɔfo no, abɔfo a wɔsomaa hɔn dɛ wombesiw awendadze hɔn ano no,24 wombobue efiadze mbobow no,25 wɔmbɔbɔ N’awoo ho a wɔatweɔn akyɛr no ho dawur,26 wɔmbɛma no awerɛkyekye wɔ Gethsemane,27 wɔmbɛma esuafo no taduasi wɔ No sorkɔ ho,28 wombue asɛmpa nsanananmu no enyimnyam mu no.29
Ana yebotum esusu dɛ woehwim hɛn ma yekehyia No, sɛ nkwamutam n’afã ha anaa afã noho?30 Ɔno nye N’anohoba ma atseneneefo. Sũahu nwanwa yi begya ahyɛnsew wɔ hɛn akra do daapem.
Hɛn enyisɔ hɛn nkɔnhyɛnyi dɔfo, President Russell M. Nelson, a oepegya hɛn pɛ mu dɛ yɛbɔdɔ Agyenkwa no na yɛabɔ No krɔnkrɔnyɛ ho dawur. Meyɛ dasefo a m’enyiwa tuaa Ewuradze Ne nsa a ɔda no do na nyikyerɛ akyɛdze a ɔma no kwankyerɛ no. President Nelson, yɛrotweɔn w’afotu ara yie.
M’anyɛnkofo adɔfo a hom wɔ wiadze nyina mu, hom mma yɛnkã Christ ho asɛm, a hɛn enyi da Ne enyimnyam anohoba no do: “Obiara a ɔbɔbɔ me dzin wɔ nyimpa enyim no, ɔno na … mobobɔ ne dzin wɔ m’Egya … n’enyim.”31 Minyim dɛ Ɔyɛ Nyame ne Ba. Jesus Christ ne dzin mu, amen.