Yoegney Ngak Somoel
Mu tabab e chiney ni ngam “yoegnem ngak Somoel“ ya ngeyag ni nge paer fare Kan Nthothup Rok rom.
Mangil e kadbul, o pi walageg. Gag ni gachalpen e Tathapeg rodaed, ni Yesus Kristus, ma kug falalfalen’ ko re mo’olung ney ni ra garer u dakean ga’ngin e fayleng.
Biney e duw e ba thil rogon. Gag ma ke tabab napan nike yoeg fare Bin Somm’on e President e n’en ni nggu rrin’ ni nggu yibliy nag e temple nib thothup ngak Somoel u Durban, South Africa. Ri dabgu pagtiling fal’ngin ko e re na’un nem. Machane bin ni rib falel’, e dabgu pagtilin rogon nike fal’eg rogon e gidii’ rograed ni rib fal’ rogon ni ngar raned nga lane gin nib thothup. Kar baed ni kar fal’eg rograed ni ngar thapeged e tawa’ath ko n’en nikan Fulweg: na’un rok Somoel nikan yibliy. Kar baed nib sug gum’ircha’raed ko tu’ufwg Ngak nge Bayul Rok. Kar baed nib sug gum’ircha’raed ni yaed be oge magaer ngak e Chitamangdaed nu Tharmiy nike pi e pi gam’ing ni ra gagyeg nigey ko falfalen’. Kar baed ni yaed ba yul’yul’.
Pi temple, e demtrug e gin ni bay riy, yadma tolang ko tin fayleng ban’en. Gubin e Gidii’ nima Fol rok Somoel u dakean e fayleng—168 [ta’areb mira’ay nge nel’ i ragag nge meruk]—ni kar sak’iy gaed ni pow ko mich rodaed u lane yafas nib manemus nge falfalen’ ni yiba’ ko tabinaew rodaed nge Chitamangdaed nu Tharmiy. Temple ni gadaed be yan ngay e be ga’ nag e gonop rodaed mornga’agen fare Godhead nge fare gospel nib manechubog, gelngin ni gadaed ba adag ni ngad pired ngad filed mornga’agen e n’en nib riyul’, nge gelngin ni gadaed ba adag ni ngad laked e kanawo’ rok e Somoel nib Tathapeg rodaed ni, Yesus Kristus.
Wuru’ u doew gubin e temple rok fare Galasia e bay e thin riy nibe ga’ar,“Thothup ngak Somoel.“ Temple e na’un rok Somoel nge gin ni ra ayuwegney ko tin fayleng ban’en. Kan Thothup Rok e bay ko picha’an nibe liyoer u lane pi na’un nem nib thothup. Ke tay e motochiyel ni gadaed be yan ni gadaed e milekag Rok.
Blaine Twitchell, ni chitamangin e bpin rog, e reb e mo’on ni rib mangil ni gu manang, e fil ngog ban’en nib mangil. Gu warow Sister Rasband ngguyew napan nike chugur ni nge m’ay e milekag rok u dakean e fayleng. Napan ni kug waen ngalang nga senggil rok, ma fin ninge chuw e bishop rok. Napan ni gu fangichiyew fare bishop mug leam, “Ba bishop nib mangil. Ke yib ngaray nibe pigpig ko gidii’ nib yul’yul’ u lane ward rok.“
Gu non ngak Blaine, “Ba mangil nike yib e bishop.“
Me sap Blaine ngog me ga’ar, “Rib ga’fan ko bin.“ Ku goeg ngak bishop ni nge yib ni bachane gu ba adag ni ngan interview nigeg ko temple recommend. Gu ba adag ni nggu yoegneg ngak Somoel.” Ma ke rrin!
Binem e thin, “Yoegneg ngak Somoel,“ e ke paer rog. Ke thilyeg rogon e sap rog ko pi toygang’ ko Galasia nima interview nigey. Rib ga’fan fare temple recommend ni lane Galasia ni kakrom, nge taw ko 1891, ma gubin e temple recommend ma ke pi’ e President ko Galasia. 1
Demtrug ko gab bitir fa gab ilal, ma interview ko temple recommend rom e gathi mornga’agen e n’en ni rayog nge n’en ni dabyog. Recommend e gathi ba babyor ni yibe check nag, fa ba pass ko hall, fa ba ticket ko bochi chiya nib ga’fan. Rib gel e ga’fan riy ma rib thothup. Ra ngeyag ngan thapeg e temple recommend, ma ngarim fol ko tin ni yibe fil ko Fare Galasia Rok Yesus Kristus ni Fan ko Gidii’en Got ko Tin Tomur e Rran.
Lane interview rom ma bay e ngiyal’ ni rayog ni ngarim leam nag mornga’agen e birom e mich ngak Yesus Kristus nge Bayul Rok. Bay e tawa’ath rom ni ngam weliy e mich rom ni mornga’agen fare gospel nikan fulweg, gaba’adag ni ngam ayuweg e pi’in nike pining Somoel ni nge gagyeg nag e Galasia Rok, mich rom ko machib ko fare gospel, murwel rom ni gabe rrin’ u tabinaew, gur ni gab yul’yul’, ba ma’ang’ang rogon e paer rom, rogon e salpiy, yul’yul’ rom, nge Falan e Gonop, fare motochiyel ko miligach, nge Raan ko Madnom ni ngan tay nib thothup. Iraram e def ko tin nib ga’fan ko yafos nib sar ngak Yesus Kristus nge murwel Rok.
Temple recommend rom e be dag, rogom ni ri gabe gay rogon ni ngam fol ko pi motochiyel rok Somoel ma gaba’adag e n’en ni Ba adag: sobutan’, munguy, athamgil, tu’ufeg, adag nib machalbog, nge gel e tafney, n’ag fan nge fol. Ma kam tem ni gabe fol ko pi motochiyel nem napan ni gara yoloey fithngan ko re babyor nem nib thothup.
Temple recommend rom e be bing e yoror ko tharmiy ngom nge boech e gidii’ nibay mot’won nge gam’ing nib ga’fan riy nib mu’un e tawfe ngay, nge endowment, nge mabgol, nge chiyliy.
“Yoegney ngak Somoel“ e ngan pogran nigey ni Gidii’ nima Fol rok Got e bay e n’en ni ngar rrin’ed. Blaine, ni chitamangin e bpin rog, e ke guy ni ban’en nibe fal’eg rogoy ko fare rran napan ni ra sak’iy u pow’chen Somoel.
Leam nag Moses ni farteg fare Burey u Horeb nge Somoel ni Jehovah ni m’ug ngak u fithik ba paan nib muruf. Ke ga’ar Got ngak, “Mu chuweg e sus rom, ya gab sak’iy u daken e but’ nib thothup.“ 2
Sus rodaed ni kad luffed u langan e maab ko temple e kad digeyed e tin fayleng ban’en fa tin ni be palog nag daed ko tin thothup ban’en, kad ted e tinef nga orel nikad chuw gaed ko yafos rodaed, kad chuw gaed ko pangin daed ni dani mangil, ma kad gayed e ngiyal’ ni ngad thothup gaed.
Rogon nikan sunmiy nib thothup, ma dowef rodaed e Got e ke sunmiy, ba temple ni fan e ya’el rodad, ma thingar ni ayuweg nib mangil rogon. Rib riyul’ e thin ko fare tang ko Primary, “Dowef rog e temple [nib tu’uf] ni ngarin ayuweg nib fal’ rogon.“ 3 Napan ni m’ug Somoel ko fapi Nephites, me ga’ar, “Nge yog ni ngam machalbog gaed u dakean fare Kan ni Thothup, ni nge yog ni ngam sakʼiy gaed ni dariy thibngimed u pʼoewcheg ko bin tomur e rran.“ 4 “Ba mit i mang gidiiʼ e ngam boeded?“5ke fith Somoel nge me fulweg ni ga’ar, “Ngam boeded gag.“ 5 Ra ngan “yoegney ngak Somoel,“ ma gadaed be athamgil ni ngad boeded Ir.
Gu manang ni kug runga’ag President Howard W. Hunter ni somm’on e general conference rok nike non ni ir e bin 14 President ko fare Galasia. Ke ga’ar: “Rib polo’ u gumircha’eg ni gu ba adag ni nge yaen gubin e gidii’ nib yul’yul’ u lane Galasia ni nge yaen nga langgin e temple. Ra falfalen’ Somoel fa’anra gubin e gidii’ nib yul’yul’—ma be koel—fare temple recommend.” 6 Nggu uneg ngay ni temple recommend ni ta’ab nochi ngiyal’ ni fan ko bitir e ra fal’eg e kanawo’ ko faak daed.
President Nelson e weliy e thin rok President Hunter ni ga’ar, “Re rran nem, ko June 6, 1994, ma fare temple recommend ni gadaed be feek e ke mang ban’en ni rib thil u lane walet rog. Um’on ko binem, ma ban’en ni ra mus. Binem e rogon ni nggu waen ulan fare na’un rok somoel; tomuren ke yoeg biney, ban’en ni ke mang a ma run ni yigo ir. Ke mang e badge rog ni gube fol ko profet rok Got.“ 7
Fa’anra bani ngam thapeg e recommend fa fa’anra ke pag napan e recommend rom, mag sak’iy u langan e maab ko bishop ni woed rogon e Gidii’ nima fol rok Got ni kakrom ni kar sak’iy gaed u langan e maab u Nauvoo Temple ko 1846. 8 Ba’ e gidii’ rog u fithik raed. Kar digeyed e binaew roraed nib fal’ ya’an mar sar gaed ko ngael, machane yaed manang ra buch ban’en nib thothup ngoraed u lane temple. Sarah Rich e yol niba’ u dakean e kanawo’ nib kireb u Iowa nibe ga’ar, “Fa’anra dariy e mich nge gonop nikan pi’ ngomaed u lane re temple nem … , ma milekag romaed e boed … ni gamaed be og nga fithik e lumor.” 9 Iraram e n’en ni dariy rodaed fa’anra gadaed be yaen u lane biney e yafos ni dariy e gonop nge gapas nikan micheg nag u lane temple.
Mu tabab e chiney ni ngam “yoegnem ngak Somoel“ ya ngeyag ni nge paer fare Kan Nthothup Rok rom ma motochiyel Rok e ra pi’ e “gapas ko tafney“ ngom.“ 10
Pi toygang’ rom ko bitir, pi president ko elders quorum, pi president ko Relief Society, nge pi walagem e ra ayuweg nem ni ngam fal’eg rogom, nge bishop rom fa branch president rom e ra gagyieg nem u fithik e tu’ufeg.
N’en nibe buch rodaed e ngiyal’ ney e kan ning e temple fa mutrug rogon nibe murwel riy. President Nelson nge pi’in nima pigpig u barba’ rok, e kug “amith“ gaed ma kug “rus gaed“ napan ni kug thamiyed ni ngan ning e temple. President Nelson e fith ni ga’ar, “Mang e gura yoeg ngak Profet Joseph Smith? Mang e gura yoeg ngak Brigham Young, Wilford Woodruff, nge kuboech e president, nge mada’ ngak President Thomas S. Monson?” 11
Chiney, e ku falfalen’ gaed ni kan bing e temple ni fan ko chiyliy nge endowment nib mutrug rogon.
Machane, temple ni ngan yaen ngay, ni yibe yul’yul’ e daworin taleg. Soen nggu weliy, demtrug ko rayog ni ngam man nga temple fa danga’, ma ba tu’uf ni ngeyog e temple recommend ngom ni ngam paer ko kanawo’ nib mat’aw.
Fare duw nike thimur kug warow ni Sister Rashband nge gag nga New Zealand ni nggu non gow ngak e pi fal’ yangren. Dani moem rogon ni ngan raned ko temple; bin u Hamilton e yibe fal’eg rogon, ma ki yaed be soen nag fare temple u Auckland ni nge m’ay. Machane, ku thamiy ni nggu pi’ e athamgil ngoraed ni ngar bi’ech niged ara ngar thapeged e temple recommend.
Demtrug ni dabyog ni ngar raned ko temple, ma yaed be dag ngak Somoel ni yaed ba ma’ang’ang ma ba fal’ rogon raed ni ngar pigpig gaed Ngak. Temple recommend ni ngan yul’yul’ ni fan e ra ayuweg ney ko mo’oniyan’, ya karim dugliy ngak Somoel mornga’agen e yafos rom, ma kan micheg nag fare Kan Nthothup ni nge paer rom.
Gadaed be rrin’ e murwel ko fare temple napan ni gadaed be gay e gidii’ rodaed ni kakrom ma gadaed pii’ fithngraed ni fan ko pi gam’ing. Napan be ning fapi Temple, ma ku rayog ni ngad gayed e tabinaew rodaed. Fare Kan Nthothup rok Got ni bay u lan gumircha’en daed, nikan pi’ mat’woy, ni gadaed, be sak’iy ni pa’ raed ni ngan “yoegney ngak Somoel.“
Napan ni gube pigpig ni gub Executive Director ko Temple Department, ma baga’ ni guma rung’ag President Gordon B. Hinckley nima yoeg e re thin ney nike yoeg Somoel ni mornga’agen fare Nauvoo Temple: “Mu tay e murwel ko temple rog, nge gubin e murwel ni ku pi’ ngom, ni nge yul’yul’ ni dabi tal; mu pag e yul’yul’ rom, nge athamgil rom, nge murwel rom ni nge gel boech, ma dabi chuw e tawa’ath rom rom, e yoeg Somoel ko Yo’or.“ 12
Murwel rodaed u lane temple e ba mu’un ko tawa’ath rodaed nib manemus. Chiney e yibe sikeng nag daed. Ke pining daed Somoel ni ngad murwel gaed u lane temple u fithik e “yul’yul’ … athamgil nge gapas.“. 13 Ba tu’uf e tin ba’aray ni ngan “yoegney ngak Somoel“. Ngarin yul’yul’ gaed ko fapi motochiyel, ngad ted u waen’ daed e m’ag rodaed u lane temple, man falfalen’ ko n’en ni kube ulul Somoel nibe fil mornga’agen ma gadaed athamgil nge taw ko ngiyal’ ni karin bing biyay e temple.
Napan ni pining daed Somoel ni ngad “gel“ niged boech e murwel rodaed, ma be yoeg ngodaed ni ngad athamgiliyed e tin nib mat’aw. Woed ni, rayog ni ngad gelnag e fil napan ningad ra bi’eg e babyor nib thothup, nge cheppin e tabinaew rodaed ni gadaed be gay, nge meybil ko mich rodaed ni gadaed ra weliy mornga’agen nib tu’uf e na’un rok Somoel rodaed ngak e pi’in nibe fal’eg rograed ni ngar thapeged e temple recommend, baga’ ni tabinaew rodaed.
Gag ni Apostle rok Somoel ni Yesus Kristus e gube micheg nag ngom ni napan ni gara athamgil ni ngam yo’or nag boech e murwel rom, ma gara thamiy nikam bi’ech nag e yul’yul’ rom ngak Got ni Chitamangiy nge Yesus Kristus, ma gara thamiy gelngin fare Kan ni Thothup nibe powi’iyem, ma gara falfalen’ ko pi m’ag rom nib thothup, ma gara thamiy e gapas ni kan “yoegnem ngak Somoel.“ U dakean fithngan Yesus Kristus, amen.