Mich u Wun’ug Ni Bay e pi Angel
Manang Somoel e tin nib momaw’ rodaed. Manangem, gab tu’uf Rok, ma gube micheg ni, ra pi’ e angel ninge yib nge ayuweg nem.
Pi walageg, mich u wun’ug ni bay e pi angel, ma gu ba adag ni nggu weliy boech e n’en nike buch rog ngomed. Ra gube rrin’, ma gube athapeg ma gube meybil ni gadaed ra nang nib ga’ fan e angel u lane yafos rodaed.
“Napan ni gadaed ra non ngak e pi’in ni yaed be pigpig ni pa’ Got, ma yibe pogran ngodaed ni gathi kemus ni angel e bay ko bin migid e yafos. Boech i giyaed e gadaed ma yaen u ta’abang ma gadaed ma non—u roy e chiney, ni gubin e rran. Boech i giyaed e bay u lane binaew rodaed. … Riyul’, nib chugur e tharmiy napan ni gadaed ra guy e tu’ufeg rok Got nibe mug u fithik e mangil nge gol rok e gidii’ nib sug ko ma’ang’ang ni kemus ni angelic e re thin nibe yib ko tafney rog“ (“The Ministry of Angels,” Liahona, Nov. 2008, 30).
Mornga’agen e pi angel ko biney e yafos ni gu ba adag ni nggu weliy mornga’agen. Fapi angel ni bay rodaed u lane myafos rodaed e ba pow ni rib magagyol ko gelngin ni ri gadaed ba tu’uf rok Got.
Pi’in somm’on e angel ni nggu weliy mornga’agen e l’agruw i sister missionary ni kar filew ngog mornga’agen fare gospel napan ni kab fal’ yangreg, Sister Vilma Molina and Sister Ivonete Rivitti. Walageg nib bpin nge gag e ni pining mow ni nggu unew ko ba mukun ni yima tay u lane Galasia ni iraram e gin ni gu mada’ nigew e ra gal angel ney. Danug nang ni chi mukun nem e ra thilyeg roron e yafos rog.
Galabthir rog nge pi walageg e dabun raed ni ngar filed boech mornga’agen e Galasia ko ngiyal’ nem. Dabun raed ni ngeb e missionary nga lane tabinaew roamed, ere guma yaen nga lane Galasia ni nggu motoyil ko missionary. Chi senggil nem u lane galasia e ke mang e “fithik e gak’iy nib thothup“ rog.
Yaen ta’areb e pul nike weliy e re gal angel ney mornga’agen e gospel ngog, mug tawfe. Ragag nge nel’ e duw rog. Machane, dariy e sasing nikan feek ni ya’ag nikan tawfe nigeg, machane bay e sasing ni ya’ag nge walageg nib bpin ni ku unew ko fare mukun. Nggog ko chon mini’ e bay u lane re sasing ney. Gag e cha’an nib n’uw niba’ ko bani mat’aw.
Rayog ni ngam tafney nag, nib momaw’ ni ku gu paer ko Galasia ni kab fal’ yangreg ni kaffini thil rogon e paer rog ma tabinaew rog e dani ta’aborogon e kanawo’ ni yaed bay riy.
Napan ni gube gay rogon ni nggu macham ko bin bi’ech e yafos rog, nge tafagar nib bi’ech, ma guma thamiy ni gub thay nga wuru’. Baga’ ni gu ma thamiy ni i go’ gag ma guma kirbaen’ ni bukun yay. Gu manang nib riyul’ e Galasia, machane momaw’ ni nggu thamiy ni gub mang ngay. Napan ni gube magagawon ma be marwaer e tafney rog ni gube gay rogon ni nggu un nga fithik e bin bi’ech e taliw rog, mug athamgil ni nggu un ko ba conference nifan e gidii’ni yangren ni dalip e rran, ni gu leam nag ni ra ayuweg neg ni nggu nang boech e gidii’. Iraray e ngiyal’ ni kug mada’ reb e angel nikan noeg Mônica Brandão ngak.
Kab bi’ech, kaffin ni yib u bang u Brazil. Papey ni gu nang, ma gu falfalen’, ni mang e fagar rog. Sana ke guy nogeg ni rogog ko bin ni ya’ag u wuru’.
Bachan nike fal’ e thin romow, ma ke yoeg neg ko boech e fagar rok, ni ri manged boech e tafagar rog ni gu falfalen’ gaed ko mukun ni ku un ngay. Pi muku nem e rib ga’fan u lane yafos rog.
Pi fagar ney e kar ayuw gaed, machane fare gospel ni dariy u lane tabinaew rog e kube momaw’ nag boech ban’en ngog. Rogon sap rog ko fare gospel u lane Galasia e ke ga’fan ngog ni gube thil. Me arame, pi’ Somoel l’agruw e angel ni ngar ayuw gow.
Bagyaed e kan noeg Leda Vettori ngak, nib sensey rog ko seminary. Fithik e tu’ufeg rok nge clas rok, ma ki pi’ ngog e “thin rok Got nib mangil“ (Moroni 6:4), nib tu’uf u lane yafos rog. Biney e ke ayuweg neg ninge gel lanin’ug nggu athamgil.
Kureb e angel ni kan pi’ ngog ni nge ayuweg neg i Marco Antônio Fusco, nib president ko Young Men. Ku ir e cha’an ni gomow ma yan ko tabinaew nggu machib gow. Demtrug rogon ni dani yo’or ban’en ni gu manang nge rogon ya’ag, ma yoeg ngog ni nggu sensey u lane lane pi ulung ko priest quorum nge tabinaew ni gomow be guy. Ke pii e kanawo’ ngog ni nggu rrin’ ban’en mug fil ban’en ma gathi kemus ni gag bee’ ni gube yaliy e gospel u orel. Pagan’ ngog, ko gelngin nib pagan’ug ngog.
Kemagar e pi angel ney, nge kuboech nib yo’or napan e pi duw ni kugub bitir, ni ku thapeg e athamgil ni nggu paer ko kanawo’ nib mat’aw napan ni gube thapeg e tin nib riyul’.
Ma, fachi bpinn, i Mônica? Napan ni gu mu’ gow ko mission romow, me mang la’ngig.
Dagur leam nag fagar nib mangil, nge murwel ko Galasia, nge thin rok Got nib mangil ni yibe fil e yug boech ban’en ni be buch ni dariy fan. “Dani moem ni ngan mel’eg ni ngan un ko re Galasia ney. Mu’un e tha’ nikan museg. Fagar ni kan digey. Tin nib michan’ daed ngay ni ri gadaed ba adag ni kad ted nga orel. Ra un e tin ni gadaed ba macham ngay ni ngad taleged. Mu’un e murus nge tafney ni go’ gur rom. Rib tu’uf ni ngan gel nigey napan e ngiyal’ ney nib momaw’ u lane yafos rok e cha’an nike un ko galasia“ (“There Must Be Messengers,” Ensign, Oct. 1987, 5).
Me ulul ni ga’ar, “Ra bag yaed ma ba tu’uf dalip ban’en roared: fagar, murwel, nge “thin rok Got nib mangil“ ni ngan fil. (“Converts and Young Men,” Ensign, May 1997, 47).
Mongfan ni gube weliy e pinn’ey nike buch rog ngomed?
Bin somm’on, ngeyag ni ngan pi’ e mulwol nga e pi’in ni ta’ab ban’en e be yaen u fithik e chiney. Sana gur bee’ ni kafin mu un ko galasia, fa kam sul biyay ko Galasia napan ni kam mul, fa kemus ni bee’ nib momaw’ rok ni nge un nga fithik e yo’or. Wenig, wenig, ri dabi mul e tafney rom ni ngam mang ko biney e tabinaw nib ga’. Ireray bin riyul’ e Galasia rok Yesus Kristus!
Napan ni ra yib ko falfalen’ rom nge thap rom, ma gubin ngiyal’ ma rib mangil ni ngan athamgil. Rib mangil ni ngan athamgil ngan fal’eged rogon e paer rodaed. Manang Somoel e tin nib momaw’ rodaed. Manangem, gab tu’uf Rok, ma gube micheg ni, ra pi’ e angel ninge yib nge ayuweg nem.
Somoel e ga’ar: “Gura yaen u pow’chem.“ Gura paer ko bani mat’aw i pa’am nge bani gilay’, … Kan Nthothup rog e ra paer u lan [gumircha’em], ma pi angel rog e ra liyeg nem, ni nge chubiyem ngalang“ (Doctrine and Covenants 84:88
Bin l’agruw e fan ni gube weliy e pinn’ey nike buch rog e nggu pi’ e mulwol ngak gubin e gidii’ ko Galasia—gadaed gubin. Thingardi tafneyed riy ni dani moem ngak e p’in ni kaffini un ko galasia, nge pi fagar nike sul, nge pi’in nib thil rogon e pear roraed ni ngar uned nga fithik e ma’athuk. Manang Somoel e tin momaw’ ni yaed be yaen u fithik, ma be gay e angel ni ba adag ni nge ayuw. Gubin ngiyal’ me Somoel e ma gay e pi’in ni ba adag ni nge mang e angel u lane yafos rok boech e gidii’.
Fapi walageg, ga ba adag ni ngam mang e talane murwel u lan pa’ Somoel? Ga ba adag ni ngam mang boech e pi angel ney? Ni ngan mang bee’, nike pi’ Got, ko biney e yafos, ngak bee’ nibe magafan’ ngak? Tu’uf e ayuw rom Rok. Ba tu’uf e ayuw rom roraed!
Arrogon, gubin ngiyal’ ma rayog ni ngad pagan’ gaed ko missionary rodaed. Gubin ngiyal’ ma yaed bay u rom, pi’in somm’on ni ngar rrin’ed e biney e murwel ko angel. Machane kemus rad e dani mangil.
Fa’anra gara sapsap ma gara guy bukun e gidii’ nib tu’uf e ayuw roraed. Pi gidii’ ney e rayog ni dar chuw gaed ko kenggin nib wechwech, dress, fa maad ni baga’ ni yima chuw ngay ko Madnom. Rayog ni go’ yaed ni yaed be paer roraed ulan chapel fa singal ko class, ni be thamiy dariy’ e bee’ be sap ngak. Sana rogon piy u loelgen raed e ba thil rogon fa thin roraed e ba thil, machane yaed bay u rom, ma yaed be gay rogon.
Boech e ma tafney nibe ga’ar: “Kugra sul? Kugra gay rogon?“ Boech e ma tafney fa’anra ra borran ma ran adag dakean raed man tu’ufeg raed. “[Gidii’ ni] ri yaed ba mangil ma ba ma’ang’ang ni angel e kemus e re thin nibe yib ko tafney rog [ni nggu weliy mornga’agen raed]“ (Jeffrey R. Holland, “The Ministry of Angels,” 30).
Pi walageg, mich u wun’ug ni bay e angel! Gadaed gubin ma bay u roy e daba’, salthaw ni angel nikan tay raed ko tiney e rran ni tomur, ni ngan machib nag e gidii’ ni pa’ e Tasunmiy. Gube micheg ni fa’anra gadaed ba adag ni ngad pigpig gaed, ma ra pi’ Somoel kanwo’en ngodaed ni ngad manged e pi angel nima pigpig. Manang e pi’in nib tu’uf e angel roraed, ma ra tay raed nga kanawo’ rodaed. Ma tay Somoel e pi’in nib tu’uf e ayuw ko angel roraed nga kanawo’ rodaed ni gubin e rran.
Gub falfalen’ ko bukun e angel nike tay Somoel u lane yafos rog. Ba tu’uf e ayuw roraed. Kugub falfalen’ ko gospel Rok nima ayuweg daed me pi’ e kanawo’ ngodaed ni ngad mangil gaed.
Iraray e gospel ko tu’ufeg, ba gospel ko pigpig. Pin’ney e gube micheg u dakean fithngan Yesus Kristus, amen.