Mu pagaen’dad
Mich rodad nib miyuluy ko fare yalen e gospel ni kan sulweg yarmen ku Yesus Kristus. irram kanawo’en e falfalaen’.
Napan e yafos Rok u fayleng ni arame be chuchgur ngay, me yoeg Yesus Kristus ngak fapi Apostle Rok ni yadra gafgow ko napan nra chuw rorad. 1 Me yoeg bugithin ngorad ni nge pagan’rad: “Bayi gafgow nagmed e fayleng: machane dab mu rusgad; ya kug gel ko fayleng” (John 16:33). Irraray fare mulwol rok far Tathapeg ngak pi fak e en ni Chitamangin nibay u Tharmiy. Irraray fare mulwol nib mangil nifan ngodad u lane biney e yafos.
“Pagan’dad ni dab rusgad” u roy u fayleng ni Kristus nin fosag ko yam’ ni pii’ fapi Apostle ni ngarbad. “Pire’ yay nike ingmad e gafgow ke pir’iymad u gubin yang,” fare Apostle Paul ni yoeg ngak e gidii’ nu Korinth, “machane da gu masengsenggad; yu ngiyal’ e bay n’en ma da ku gu nanged e n’en ni nggu rin’ed, machane der mulan’mad; pire’ e girdi’ ni be togopluw ngomad, machane dariy ba ngiyal’ ndariy ta’abe’ ni fager romad; ba gel e maad’ad ni yibe tay ngomad yu ngiyal’, machane dawor nthang e fan romad” (2 Korinth 4:8–9
L’agruw bbiyu’ e duw nga tomuren make “pire’ yay nike ingey e gafgow nike pir’iy u gubin yang,” ma ka btu’uf e biney e mulwol nifan ngodaed ni ngad pagaen’dad. Somoel e btu’uf pi fak Rok nib ppin nge tin nib tu’uf roraed. Manang e tin ni ga ba’dag, nge tin nib tu’uf rom, nge tin ni gabe rusnag. Somoel e bagel gelngin. Pagan’um Ngak.
Profet Joseph Smith e fil ni “fare murwel, nge rogon ni ngongliy, nge fan e murwel rok Got e dabyag ni ngan thilyeg, fa ngan pag” (Doctrine and Covenants 3:1). Ngak e tin ba’aray pi fak ni yadbe gafgow, i Somoel e ke micheg e tin ba’aray:
“Musapgad, irraray fare micheg rok Somoel ngom, ni i gur fare ta pigpig rok.
“Ere, mu pagaen’dad, ma dab mu rusgad, ya i gag Somoel ni gubay romed, ma bay gu par ni gub sak’iy u charem; ma gamed yoeg ni i gag, fare Yesus Kristus, ni i gag fare Fak fare Got nib fos” (Doctrine and Covenants 68:5–6).
Somoel e bay nib sak’iy u charendad, me ke ga’ar:
“N’en ni gube yoeg ngomed e gube yoeg ni fan ngomed ni gubin, mu pagaen’dad, o pi fakag nib bitir; ya gubuy u lukungunmed, ma daw rug pag tilinmed” (Doctrine and Covenants 61:36).
“Ya tomuren e gafgow e bayi yib e tawa’ath” (Doctrine and Covenants 58:4).
Pi walageg, Gube micheg ni pi tawa’ath ney, nge tin ni buchbuch u fithik e gafgow nge tin nibe buchbuch rom, e bay ni fan ngom nge tin nibe buchbuch e daba’. Bay nifan ngodad ni nge pug oran ngodad ni ngad pagaen’dad ma nge falfalaen’uy ko fare gospel nike polo’ ma gadad be ul’ul’ ni gadad be yan nga m’on u fithik e tin ni gadad be gafgow riy u roy u fayleng.
Gafgow nge tin nibe yib ngodad e ka bayang ko tin nra buch rodad u roy u fayleng. Ere gubin banʼen ma thingari yaeni aw ni bay e togopluw riy ni ka bayang ko fare tonom nib thothup ni nge ayuwegdad ni ngad mon’oggad, 2 ma napan ni be buchbuch e pin’ey, ma bay nike micheg Got ngodad ndabyag ni nge lubegdad e tin ni dabyag rodad. Ayuw Rok ni be pii’ ngodad nib mu’un e mich rodad ngay ma gadad be athamgil, rayag ni gadadra gel. Woed e yafos u fayleng ni kabang riy, gubin e gafgow ni kara m’ay. Ku woed e pi magawon ke yib tomur e mal, ni ga’ar fare president Abraham Lincoln nu Mariken “ku mus, ko biney, ma ra thumur.” 3
Woed ni ga manang, facha’ nima togopluw ni gube weliy mornga’agen—nibay nibe karang ngad pagaen’dad—nibe yib ngodad ni ku woed boech e gidii’, ni woed e gidii’ e chiney nib yo’or nibe gafgow ko fare m’ar nibe garar i yan ko COVID-19. Bchuchgur ko biney, ni be buch u roy u dakean yu Mariken ni bo’or e gidii’ riy ni yad be fananikan rad ni bachan e ngayal’ ni ngan me’eleg e cha’an ni nge mang president ma ngayal’ ney e kari gel e kireb riy ko somm’on.
Gadad gubin, ma bay e tin ni gadad be mo’owar riy ni bay fare togopluw riy ko fayleng, ni woed e gafgow ko salipy, gidii’ nde ta’areb, m’ar ko dowef, pagem ko murwel rom fa kirban’uy, bitir ni bilingtal, mabgol nibe kireb, nge tin ni be buch ni bachan e denen—tin ni gadad be rrin’ fa tin nibe rrin’ e gidii’.
Machane, arrogon nibe buch e tiney, bay fare mulwol nike yib u tharmiy ni ngad pagaen’dad min pir’eg e falfalaen’ ko fapi yalen nge tawa’ath ko fare gospel nge tin ni gadad be rrin’ nib mangil. 4 Biney e mulwol e gubin ngayal’ ma bay, ni fan ngak fapi profet nge fan ngodad ni gubin. Gadad manang e pin’ey ni bachan e tin nike buch rok’ e gidii’ nib m’on rodad nge n’en ni yoeg Somoel ngorad.
Mu tay u wun’um e n’en ni buch rok Fare Profet i Joseph Smith. Fa’an gara sap ngay ni woed rogon nibe sap fare togopluw ngay, yafos rok ke sug ko gafgow ko salipy, ma dubun e gidii’ dakean, nib sug e tabinaw rok ko kiraban’, min lii’ nge yim’. Napan nibe gafgow u kalbus, ppin rok nge pi fak nge ku boech gidii’en e Galasia era gafgow gad nib gel min tuluf rad ngar chuw gad u Missouri.
Napan ni wenig nag i Joseph, me fulweg Somoel ni ga’ar:
“Fakag, nge yib e gapas nga dakean e ya’al rom; ma tomal nge pi lumel rom e ra par ni dab ki n’uw napan;
“Ma tomur, fa’an ni garam athamgil nib gel, ma Got era chibiyem ngalang; ni rib yo’or yay” (Doctrine and Covenants 121:7–8).
Irraray e n’en, ni ayuweg Profet Joseph ni par nib gapas e tafney rok me l’ul nge ayuweg fapi gidiii’ rok me tu’ufeg rad. Irraray e tin ni ayuweg fapi tiyugang’ nge fapi pioneers ni krayag ni nge pii’ e athamgil ngom.
Mu tafney nag e pi gidii’ ney! Bayay nge bayay, ni yibe tuluf rad u bang nge bang. Ma aram ni danki yag rorad mi yad tabab i toy tofen rad nge Galasia rorad u lane luway. 5 L’agruw e duw nga tomren ni taw fapi pioneers ngalan farngi luway nu Great Salt Lake, ma kab momaw’ rogon e par rorad. Oren fapi chongin e galasia kar yul’yul ko milekag fa e dariy e tin nib tu’uf rorad ni ngar fnayed. Machane fapi tiyugang’ nge chongin e galasia e yad falfalaen’ ma yad be par ni bay e athap rorad.
Ni aram rogon fapi Gidii’ ney ndawri fal’ rogon e par rorad, napan e October 1849 ko general conference min pii’ boech e missionaries nga yan nga Scandinavia, France, Germany, Italy, nge South Pacific. 6 Ni dariy fan gelngin e gafgow rorad, ya ra sak’iy gad ngalang ngar rrin’ed e tin nib tu’uf ni ngar rrin’ed. Ma napan dalip e duw nga tumren, ma kun pining 98 e missionaries ni ngar tabab niged fare mukun rok pi u Isreal. Reb e tiyugang’ ko Galasia e yoeg ni mit ney e mission “e woed ni, de n’uw napan; kemus ni gonpa’an dalip i yan ko medlup e duw n’umngin napan.” 7
Sisters, bin Somm’on e Presidency e manang e tin ni gabe gafgow riy. Gamed btu’uf romad ma gamed be meybil ni fan ngomed. Ufithik ta’rogon e ningyal’ ney, gamad be pining e magar ko pi gafgow nibe yib ngalan e yafos rodad—ni dar un fapi duru’ ngay, fapi nifey, nge fapi yiko’—ni dan’i buch rok fapi gidii’ ni yib nib somm’on rodad.
Ko ngayal’ nibe gel e gafgow, nge pagan’uy ngay ni gubin ngayal’ ni “mu pagaen’dad, ya bay gu powi’iyem. Ya fare gil’ilingun e fanam ma fapi tawa’ath riy e tawa’ath rom, nge amrogon fapi fla’ab riy ni manemus” (Doctrine and Covenants 78:18). Uw rogon ni nge buch e biney? Uw rogon ni buch rok fapi pioneers? Uw rogon nra buch e biney e daba’ ko fapi ppin ku Got? Fa’an nran fol ko fapi fanow nib thogthog rok e profet rodad, “ma fare yoror u inferno e dabi yib [ngodad],” ni yoeg Somoel ko fare yi’iy ni yib ko April 1830. “Arrogon,” ni ga’ar, “… fare Got ni’ir Somoel era cheweg gelngin fapi lumor ni nge chuw rom, mara rurug e tharmiy nifan ngom, ma fithingan ni ” (Doctrine and Covenants 21:6 “Dab mu rusgad, o pi fakag; mu rrin’ e tin nib mangil; mag pag e fayleng nge inferno ni ngar ta’areb gow ngom, ya fa’anra kam dumow nga dakean e malang rog, ma dabyag ni ngar gel gow ngom” (Doctrine and Covenants 6:34).
Mu’un fare micheg rok Somoel ngay, ma gadadra “mara sug [gum’richa’en] [dad] ko falfalaen’” (Doctrine and Covenants 25:13), ni “gadad be pining e magar ma be m’ug u owchendad ni gadad ba falfalaen’” (Doctrine and Covenants 59:15), ma gadad ul’ul’ i yan nga m’on u daken fare pi’ i kanawo’ ko motochiyel. Oren ni gadad e dar yib e gafgow ngak nib ga’, ni woed ni ngan digey e tabinaew ngan yan nga bayang nib thil ni woed fapi pioneers. Tin ni gadad be tafney nag ni ngad rrin’ed ni gubin e rran, machane woed rogon ni yoeg Somoel ngodad, “Dab magaf ko murwel nib mangil, ya irraram fare daef ni gabe dumow ngay ko murwel nib mangil. Ya tin nib achig era ga’ ko tin nib baga’” (Doctrine and Covenants 64:33).
Bay gelngin nib gel ko fare yalen e gospel ni kan sulweg yarmen ku Yesus Kristus. Mich rodad nib gel ko fapi gam’ing e irram kanawo’en e falfalaen’. Ra tomilang nag laniyan’dad me pii’ gelngiy ni ngan mithmith. Biney e powi’iy nge tomilang nge gelngin e irraram fare tawa’ath nike micheg e Chitamangdad nibay u Tharmiy. Napan ni gadadra nangfan ma gadad uneg e biney e yalen ngalan e yafos rodad, nib mu’un fare tawa’ath ngay ko kalngan, ma aram ni dab da rusgad ma gadad ul’ul’ ko fare pi’ i kanawo’ nra fekdad ko tin ni ngad rrin’ed nib ga’fan—ni gadadra chagil nga ta’abang ko en ni galibthir rodad nibay u tharmiy.
“Sana bay e gafgow nibe yilegnem nib gel,” Elder Richard G. Scott taught. “Boech i ngayal’ ma rib chuchgur ngom, nib momaw’, ma bay mu thamiy sana dabyag rom. Dam rrin’ ni yigo gur rom. “Mu pagan’um ngak Somol u polo’ i lanin’um, ma ri dab mu toer ko tin ga be finey ni ga manang[Proverbs 3:5]. … Ya kan dugliy ni yafos e bay e gafgow riy, ni gathi fan ni bachan e ngam mul, machane bay ni nge gel nigem.” 8
Ir e bayang ko fare tonom rok Got fare Chitamangiy nge fare Fak, Yesus Kristus, ni’ir e gube pii ngomed e mich rog, ni gube meybil nag ni gadad ra ul’ul’ i yan nga tharmiy, u dakean fithingan Yesus Kristus, amen.