Sisters u Zion
Gur e baga’ fam ni gabe kunuey yu Israel nge gubin ban’en u Zion.
Pi walageg nib tu’uf rog, ru gub tawa’ath ni nggu non ko ngiyal’ ney u lane chep u fayleng. Gubin e rran, ma gadaed be chugur ko ngiyal’ ninge sul biyay e Tathapeg rodaed ni Yesus Kristus. Gadaed manang mornga’agen e tin ni ra buch nib alamrin ni pow riy ni bay yib, machane rib sug gumircha’en daed ko falfalen’ nge pagan ni yi manang e pi n’en ni kan micheg ni ra buch um’on ninge sul.
Gamed ni bpin ni faak e Chitamangiy nu Tharmiy, nge bachaen gamed e pifaak Somoel ni Yesus Kristus u lane gil’ilungun, 1 e bay e murwel ni gara rrin’ ko rran nga m’on. Gadaed manang ni ra yib fare Tathapeg ngak e gidii’ ni kan mukun nga ta’abang ni kar fal’eged rograed ni woed fapi gidii’ ko fare binaew u Enoch. Gidii’ u rom e ke ta’areb nag e mich roared ngak Yesus Kristus ma Karin ma’ang’ang ni kan feek raed nga tharmiy.
Ba aray e n’en nike dag Somoel ni ra buch ngak e gidii’ rok Enoch nge n’en ni ra buch ko biney e rran ni tomur:
“Fare rran e ra yib ni ra gapas, machane re rran nem e ra lumor lane lang, me aw e lumor nga dakean e fayleng; me rurur lane lang, ni ku aram rogon e fayleng; me rib alamrin e gafgow e ra aw nga dakean e gidii’, machane gidii’ rog e gura ayuweg;
“Ma pi’in nib mat’aw e gura pi’ ngeb nga but u tharmiy; ma tin riyul’ e gura pi’ ngeyib u fayleng ni nge weliy e mich ni mornga’agen Fakaag nib T’uf Rog; nike foskoyam’; arrogon, ku aramrogon gubin e gidii’ nike foskoyam’; ma pi’in nib mat’aw nge tin riyul’ e gura pi’ nge garer u dakean e fayleng ni boed e n’ew, ni nge kunuy e pi’in ni kug mel’eg u dakean e fayleng, ko gin ni gura fal’eg rogon, ba Binaew ni Thothup, ni ra m’ag e gidii’ rog e mad roraed, miyad paer ni yaed be soen nag e wub rog; urom ma bay e tabernacle rog, ma yira tunuguy ni Zion, bin Bi’ech e Jerusalem.
“Me ga’ar Somoel ngak Enoch: Ma arame gur nge gubin e gidii’ ko binaew rom e gimed ra mad’eg raed u rom, ma gadaed pining raed u fithik e falfalen’, ma yaed ra guy daed; ma gadaed ra m’ag e bachbach nga ka’angan raed, miyad m’ag e bachbach nga ka’angan daed, ma gadaed fangichiy daed.;
“Ma urom me paer e tirog e gidii’, ma ra mang e Zion, ni ra yib u fithik egubin e tin ni ku sunmiy; me yaen bukun mira’ay e duw ni ra toffan e fayleng.“ 2
Gimed e pi walagmed nib bpin, pifaak med ni bpin, nge pifak fak med, nge bpin ni kam ayuweg ned e ra un ngak fare Tathapeg ko ngiyal’ nem. Gur e baga’ fam ni gabe kunuey yu Israel nge gubin ban’en u Zion ni yaed ra paer u fithik e gapas u lane bin Bi’ech e Jerusalem.
Dakean e pi profet Rok, me Somoel, e ke micheg nag ngom. Napan e kakrom ko Relief Society, me ga’ar Joseph Smith ngak e bpin, “Fa’anra gara paer ni gab yul’yul’, ma dabin tel’ e pi angel ni dabi ayuwegnem.” 3
Binem nib falel’ e bay rom, ma kam fal’eg rogom ni fan ngay.
President Gordon B. Hinckley e ke ga’ar:
“Gimed e sisters … dam paer ni bin l’agruw ko tanam rok e Chitamangiy ni fan ko falfalen’ nib manemus nge tin nib fal’ ngak pifaak. Gur e ri gab ga’fan ko re tanam nem.
“Ra danum moy ma dabyog ni nge fal’ fare tanam. Ra danum moy ma ba chalban e n’en ni yibe rrin’. …
“Ra bigmed ma bpin ni faak Got, nikan tawa’ath nag ko tha’ nib thothup.” 4
President Russell M. Nelson, ni profet rodaed e chiney, e ke weliy e gin ni gara yib ngay napan e wub rok fare Tathapeg:
“Rib momaw’ ningan foleg ga’ngin urngin banan ni … ke rrin’ fapi bpin, ni gathi kemus ni fan ko tabinaew machane fan ko Galasia rok Somoel, niyaed e le’ngiy, mitin, titaw; walagey ni bpin fa anty; sensey fa tiyugang’; ma ribga’ niyaed dag ngodad e susun ko ayuweg fare mich.”
“Biney e ba riyul’ ko gospel napan e rran rok Adam nge Eve. Machane bpin ko biney rran e ba thil ko boech e bpin ni bachane biney e rran e ba thil ko gubin reb e rran. Biney nib thil e bay e kanawo’ riy nge murwel riy.“ 5
Biney e rran e ba thil ni ra powi’iy Somoel nag daed ni ngad fal’eged rogdaed ni ngad boeded fare Donguch u Enoch. Ke weliy u dakean e pi apostle nge profet Rok ko mang e ra thil ko gidii’ ko Zion ni yaed ra rrin’.
Elder Bruce R. McConkie e fil ni ga’ar:
“Rran rok [Enoch] e rib sug ko kireb nge mo’oniyan’ nge togpluw, rran ko mael ni dariy ban’en riy, ba rran ni tharey e fayleng ko raen.
“Machane, Enoch, e ba yul’yul’ ko mich rok. Ke ’guy Somoel,’ ma ke non ngak ’ni kar guyew row’ ni woed nima non e gidii’. (Moses 7:4.) Somoel e pi’ ni nge yoeg ko gidii’ ni ngan kalngan’uy, man nib ngak ngan ’tawfe u dakean fithngan fare Chitamangiy nge fare Faak, nib sug ko garathia nge riyul’, nge fare Kan ni Thothup, nibe micheg mornga’agen fare Chitamangiy nge fare Faak.’ (Moses 7:11.) Enoch e kunuy e pi’in ni kar ngongliyed e m’ag, gubin e pi’in ni kari}thil gaed kar yul’yul’ gaed nike ’yib Somoel nga fithik e gidii’ rok, ma yaed paer u fithik e mat’aw,’ ma kan tawa’ath nag raed u tharmiy. ’Ma fare Somoel e ke pining e gidii’ rok nu Zion, ni bochan e yad nga ta’areb e gumircha’ nge ta’areb e tafney, ma yad be yan u mat’aw; ma dariy beq nib gafgow rorad.’ (Moses 7:18.) …
“Tomuren nike pining Somoel e gidii’ rok ni Zion, me yoeg fare babyor nib thothup ni Enoch e ’toey ba Donguch nib Thothup, nikan noeg e Zion ngay;’ re Zion nem ’e kan feek nga tharmiy’ ni ’thapeg Got nga ngorongren;” ma u ”rom ma kan noeg ni nge, chuw e Zion.’ (Moses 7:19, 21, 69.) …
“Ku re Zion ney e kukun fek nga tharmiy e ra sul … napan ni ra feek biyay Somoel e Zion, ma gidii’ riy e ran un ko fare bin bi’ech e Jerusalem, ni ra ni toey.” 6
Fa’anra ke buch e binem ni kakrom, nike yib fare Tathapeg, ma bpin ni kari m’ing gaed ko m’ag roared ngak Got e ra fal’ rog raed ni ngar pininged e magaer ngak napan ni Ke yib. Machane demtrug urngin, ma n’en ni gabe pi’ ni ngan fal’eg rogon e gidii’ ko binem e Zion e rib mangil.
Gube non ngomed e mich rog u wun’ug e binem. Fare Babyor ku Mormon e be weliy mornga’agen e gidii’ u Zion. Ka gamanang ni tomuren ni kan fanow nag raed, nikan tu’ufeg raed, ma kan yibliy raed rok fare Tathapeg: “Dariy e maleʼeg thin u lan fare nam, ni bachan e fare tʼufeg rokʼ Got ni bay u lan gumʼirchaʼen fapi gidiiʼ.” 7
N’en nike buch rog e ke fil ngog ni bpin ni faak e Chitamangiy nu Tharmiy e bay e tawa’ath roared ni ngar tal’eg ned e cham mar gel niged e tin nib mat’aw ko tu’ufeg roared ngak e Got roared nge tu’uf rok Got nibay roared napan ni yaed be pigpig ngak e gidii’.
Kuguy napan ni gub bitir napan ni bay e branch rog ko tabinaew rog. Walageg nib pagael nge gag e kemus ni gomow e bay fare Aaronic Priesthood romow, ma chitamangig e kemus ni ir e bay fare Melchizedek Priesthood rok. President ko Relief Society ko branch e bee’ ni kaffini un ko galasia ni dani falfalen’ e pumo’on rok ko pigpig rok nima pi’ ko Galasia. Baga’ ni bpin ni yib ilal ni dariy bee’ u lane tabinaew roared nibay fare priesthood rok. Ug yaliy e nina’ rog nge pi sister nem ni ri tu’ufeg ned, ayuweg raed ma yaed be chubiy yaed ngalang, ma yaed be ayuweg ned raed. Ku nang e chiney e ni kuguy boech’uw bang ko fare Zion.
Gu nang boech e bpin ni yaed ba yul’yul’ u lan bochi branch u ko Galasia u Albuquerque, New Mexico. Gu yaliy e bpin rok e branch president, nge bpin rok e district president, nge president ko Relief Society ni ri noned u fithik e munguy ngak e gidii’ nib bi’ech ni kaffin un ko galasia. Fare Madnom ni gu chuw u Albuquerque, nike yan l’agruw e duw ni kuguy rogon e murwel rok e bpin u rom, me sum e bin somm’on e stake u rom. Chiney e ke tay Somoel e temple ngaram.
Gu paer nib chugur ko yu Boston, ni gin ni gu pigpig ni gub district presidency ni gube powi’iy nochi branch nike garer u lane l’agruw e pe state. Bo’or e togpluw ni bukun yay ni bay e bpin nibe ayuw u fithik e tu’ufeg nge n’ag fan kar munguy niged gumircha’ey. Re Madnom ni gu chuw u Boston, me yarmiy fare Bin Somm’on e Presidency e bin somm’on e stake u Massachusetts. Bay e temple u rom e chiney, nib chugur ko gin ni I paer fare district presidency riy. Kan feek nga lane Galasia me ta’aboch riy man pining ni nge mang e stake president me arame mang e mission president, nibay e bpin rok nib yul’yul’ nibe ayuweg.
Pi walageg, kan pi’ ngomed e tawa’ath nib gab faak Got nibay e tawa’ath romed nib mangil. Ke un ngom nga lane yafos rogon ni ngam ayuweg e gidii’ ma ga chubiy nge yib nga lang i yib ko fare tu’ufeg nge ma’ang’ang ni rayog nag ngoraed ni ngar baed nga ta’abang u Zion. Gathi ba oloboch ni Relief Society, bin somm’on nikan fal’eg u lane Galasia ni fan ngak e bpin ni pifaak e Chitamangiy nu Tharmiy, nibay e thin riy ni “Tu’ufeg nib Machalbog e Dabi Mathmit.“
Tʼufeg e fare adag rokʼ Kristus nib machalbog. Mich Ngak nge Bayul Rok nibe murwel e ra ayuweg nem, nge pi’in nib tu’uf rom ni gabe pigpig ngak, ni ngan paer ko fare Zion nikan micheg nag. U rom ma gara mang e sisters u Zion, ni gab tu’uf rok Somoel nge pi’in ni kam fal’eg wa’atham raed.
Gube micheg ni gimed e gidii’ u lan gil’ilungun Somoel u dakean e fayleng. Gimed e bpin ni faak e Chitamangiy nu Tharmiy nib sug ko tu’ufeg, nike pi’em nga donop nibay e tawa’ath rom nikam micheg nag ni gara fal’eg wa’athan boech e gidii’. Gube micheg nag ngom ni ra gagiyeg nigem Somoel u pa’am, u dakean fare Kan ni Thothup. Ra yaen u pow’chem napan ni gabe ayuweg i fal’eg rogon e gidii’ Rok ni ngar manged fare Zion nikan micheg nag. Gube micheg u dakean fithngan Yesus Kristus nib thothup, amen.