U Ta’abang ma Gadaed Thapeg Gelngiy nibay Got Riy
Napan ni gadaed ra gay rogon ngan ta’areb, ma gadaed ra pining gelngin Got nga but’ ni nge fal’egin rogon e murwel rodaed.
Chitinngin Gordon e yoeg ngak ni fa’anra mu’ ko murwel rok u tabinaew, ma ra fal’eg e pie ni nge kay. Bin ni ri ba adag. Ni kemus ni fan ngak. Me yaen Gordon ni nge mu’ nag e mruwel rok, me fal’eg e nina’ rok fare pie. Kathy ni walagen nib ilal e yib nga lane na’un ni yow e fagar rok. Ke guy fare pie me fith fa’anra rayog ni ngar kew bang.
“Danga,“ Gordon e be non, “pie rog. Ke fal’eg nina’ ni fan ngog, ma ku murwel ni fan.“
Me og Kathy ngak e walagen nib bitir. I go’ir ngak ni si’in. Urogon ni rayog ni nge tay rok ni go’ ir?
In e awa nga m’on me bing Kathy e karo ni nge fulweg e fagar rok nga tabinaew, u dakean fare gal chiya ma bay l’agruw e napkin nikan ta’er nib fal’ rogon, l’agruw e fok u dakean, nge l’agruw bang ko fare pie nib ga’ yang. Weliy Kathy e ran’ey ko gam’eyag rok Gordon ni nge dag rogon ni ba adag ni nge thil me dag e nib fal’ gumircha’en ngak e pi’in ni dani fal’ riy.
Lane 1842, ma fapi Gidii’ nima fol rok Got e yaed be murwel nib alamrin ni ngan toey fare Nauvoo Temple. Tomuren nikan pir’eg fare Relief Society u lane March, ma baga’ nima yib Profet Joseph Smith ko mo’olung roared ni nge fal’eg rogon raed, nifan ko pi m’ag ni yaed fa ngongliy ko ta’aboch riy u lane temple.
Lane June 9, fare Profet e “yoeg ni nge machib nag mornga’agen e murunguy[.] Susun ni thin Yesus Kristus nge [fapi] angel ngodaed ni mornga’agen e tin ni darin feek nib ga’fan, mang e nge buch rodaed? Ngarin sug gaed ko murunguy ma gadaed digeyed e tin nib achig ban’en.“ Ke ul’ul’ President Smith ni ga’ar, “Be kirbaen’ug ngay ni darin ayuwegney nib fal’ rogon—fa’anra ta’be’ e ke gafgow ma gubin e gidii’ e ra thamiy—u ta’abang me gadaed ra thapeg gelngiy ni bay Got riy.” 1
Chi thin nem e ke but’ ngog nib alamrin ni woed e uluch. U ta’abang ma gadaed ra thapeg gelngiy nibay Got riy. Biney e fayleng e gathi aragon ni gu ba adag. Bo’or ban’en ni gu ba adag ni nggu fal’eg rogon nge mangil. Ma riyul’, bo’or e tin nib togpluw ko n’en ni gube athapeg, ma boech ngiyal’ ma ku thamiy ni guba mo’owaer. Chiney, ma baga’ nu guma fith e duwer ngog ni ngu ug leam nag: Urogon ni rayog ni nggu nang fan e gidii’ nib liyeg neg? Urogon ni nrayog ni nggu sunmeg e re “thamtham nem ni yib ta’areb“ napan ni ri thilthil e gidii’? Mang gelngin Got e rayog ni nggu thapeg fa’anra gub ta’areb ngak boech e gidii’? Ya’el rog nibe leam, ma bay dalip e n’en nike yib ngog. Sana rayog ni nge ayuwegnem boech.
Murunguy
Jacob 2:17 e be ga’ar, “Mu lemniged [pi walagmed] ni boed ni gimed ma lemniged gimed, mi gimed gol ngoraed ngam piiʼed boech banʼen romed ngoraed, ni gomanga falʼ rograed ni boed gimed.“ Ngad yoen’ed loen ban’en ko murunguy—mu pufpuf ko runguy rom ni ngar boeded gur.
Baga’ ni gadaed ma leam nag e pin’en ni woed e gaan fa salpiy, machane sana ri n’en ni rib tu’uf ko machib rodaed e runguy.
President ko Relief Society rog e kaffini ga’ar: “N’en ni gube … micheg … nag ngom e gura ayuweg nem. … Gura guyem ni rogom ni ri gabe athamgil. … Dab goeg ban’en ni mornga’agem ni dani mangil, ni dabi chubiyem ngalang. Gube yoeg ngom ni kum rrin’ ngog ni aram rogon ya gube rus, ni, gura kireb nag e tafney rom.”
I ga’ar Joseph Smith ngak fapi bpin ko re rran nem ko June 1842:
“Napan ni ra dag bee’ nib munguy ma tay tu’ufeg ngog, O ma ba gel gelngin ko tafney rog. …
“… Ra gadaed be chugur ngak e Chitamangdaed nu Tharmiy, ma gelngin ni gadaed be runguy e pi’in nib mo’owaer—[gadaed be thamiy ni gadaed ba adag] ni ngad ted nga dakean poen daed, ma gadaed yoen’ e denen roared nga dakean kiru’ daed. [Numon rog e fan ko] gubin e Gidii’—fa’anra ga ba adag ni nge runguyem Got ma ngam runguy boech e gidii’.“ 2
Biney e thin e baga’ ni fan ngak e Relief Society. Dabin pufthin niged gadaed fa ni paged e thin rodaed ni nge kireb. Ngad ted fithngan daed ni gadaed be ayuwef man pi’ e tawa’ath ko runguy. 3
Fal’eg e Birom e Tagmachul ko Booch Rom
Lane 1936, ma ulungi gidii’ ni yaed ma maman ko University u Washington e ri chuur gaed nga Germany ni ngar uned ko fare Gosgos ko Olympic. Ba ngiyal’ ni Rib Gel e Kirbaen’ riy. Pi pagael ney e yaed ma murwel ni fan ko salpiy roared ni chi binaew roared nib ta ker e buut e ri pi’ed in e salpiy ya ngeyag ni ngar chuur gaed nga Berlin. Gubin e pi gosgos nem ma boed ni rib momaw’ ngoraed, machane bay ban’en nike buch napan e sagreng. Pi’in nima maman, e yaed ma yoeg e “yoen’ey“ ngay. Motoyil ko re thin ney nike yib ko ba babyor Fapi Pagael u lane Booch:
Bay ban’en nima buch ko boech ngiyal’ ni rib momaw’ ni ngan thapeg ma ba momaw’ ni ngan nang fan. Kanoeg e “yoen’ey“ ngay. Baga’ nima buch napan ni gadaed be maman nib ta’aborogon ni dariy ban’en nibe kireb rogon.
Pi’in nima maman ngar gel niged e tafney roared ma kiyaed be paer ni dabri thil gaed ni gidii’. Sagreng e gathi liyos e be gel nag. Ulung nib mangil—bee’ ni nge gagiyeg nigey, bee’ ni nge koel boch i gelingin ni nge ayuw, bee’ ni nge gel nag e n’en ni yibe rrin’, bee’ ni nge pi’ e gapas. Dariy bee’ nib fal’ ngak bee’, gubin ma baga’ fan raed ko fare booch, machane fa’anra yaed be maman u ta’abang nib fal’ rogon, ma ngar pagan’ gaed ko tin ni yaed be cheag riy—cha’an nib ngoch pa’ e be ki’iyag pa’ nib n’uw yang, ma cha’an nib n’uw pa’ e dar ki’iyag pa’ nge tun.
Tin nib thilthil e rayog ni nge mang nib fal’. Kemus rogon ma rayog ni woed nibe mithmith fare booech dariy e gidii’ riy. Kemus rogon ma rayog amith e ra m’ay. “Yoen’ey nga m’on“ e boed ba thin. 4
Tin momaw’ nikan gel ngay, me yag ni ngar yoen’ed raed nga m’on ngar gel gaed. Fare gold ko Olympic e rib falel’, machane u ta’abang ma ra reb fa picha’ nibe mamon ma ke fil ban’en nib thothup e rofen nem nike paer roraed u lane yafos roraed.
Chuweg e Tin nib Kireb nib Papey Ngeyag Ni Nge Tulug e N’en nib Mangil
Thin u lane Jacob 5, me Somoel ko fare gi milaey’ e yung e gak’iy nib mangil ko gin nib mangil e but riy, machane me kireb me wib wa’amngin ni dani mangil. Me ga’ar Somoel ni yan meruk yay: “ Be kireb anʼug ngay ni ra yimʼ [e] re ke gakʼiy ney.“
Me gaʼar fare tapigpig ngakʼ fare Somoel ko farengi mileay’: “mu tay nge nʼuw napʼan boech. Ma fare Somoel e gaʼar: Arragon, bay gu tay nge nʼuw boech napʼan,” 5
Ma arame yib e thin ni rayog ni ngad feked nga lane yafos rodaed ni ngad nanged mornga’agen wa’amngin e tin mangil bane’n u lane e chi girodaed e milaey’: “Ngam chuweg nge chuw e tin nib kireb ni be yaen u rogon ni be tugul e tin nib mangil.” 6
Ta’areb e gathi ra paer me buch: ba’tuf e murwel riy. Ba wagagay, boech e ningyal’ ma gadaed be skirkireb ngay, ma baga’ nima buch napan ni kad chuweg ned e tin nib kireb nib papey ngeyag ni nge tugul e n’en nib mangil.
Gathi i go’ gadaed rodaed ni gadaed be athamgil ni ngan ta’areb. Jacob 5 e ul’ul’ nibe ga’ar, “fapi tapigpig e ranoed ngar muruwel gaed u poloʼ i gelingraed; ma fare Somoel ko farengi mileayʼ e un ngoraed ko muruwel.” 7
Ra bag daed ma bay e tin nike yaen u fithik ni rib momaw’, pin’en ni susun e dabi buch. Ra bagdaed ma, boech ngiyal’, ma yima pag e ufanthin nge kireb nag e tin mangil rodaed. Machane Yesus Kristus e Tathapeg rodaed ko gubin ban’en. Gelngin e ma thap ko tin but ban’en ma bay ni fan ngodaed napan ni gadaed ra pining. Gadaed gubin ma gadaed ma wenig ni ngan runguy daed ko denen rodaed nge mul rodaed. Ma pi’ nib puf rogon. Ma n’en nima yoeg ngodaed e ngad pi’ed e re runguy nem ngodaed ma gadaed nang fan ned gadaed.
Yesus e ke yoeg nib fal’ rogon: “Mu ta’areb gaed; ma fa’anra danum ta’areb gaed ma gathi gimed mang ngog.“ 8 Machane fa’anra gadaed ba ta’areb—fa’anra rayog ni ngad pi’ed bang e pie rodaed fa ngad uneged e tirok bee’ baen’en ya ngeyag ni nge yan fare booch nib fal’ rogon—ma arame gadaed mang Ngak. Ma ra ayuw ni nge chuweg e tin kireb nib ban’en napan nibe yib e tin mangil.
Pin’en nike Micheg e Pi Profet
Sana daworun taw gaed ko gin ni gadaed ba adag, ma dan moyed ko gin ni gadaed ra aw ngay. Mich u wun’ug ni n’en nib thil ni gadaed be gay rodaed nge pi ulung ni gadaed mang ngay e ra waer me fal’ napan ni yibe gay rogon ni gubin e rran ni ngan nang fan ney. Mang fan? Ya gadaed be toey e Zion—gidii’ ni “ta’areb gumircha’en nge lanin’uy.“ 9
Gadaed e bpin ni kad ngongliyed e m’ag, e baga’ e ayuw rodaed. Binem e ayuw e yima rrin’ ni gubin e rran ko ngiyal’ napan ni gadaed e fagar ni yibe fil ban’en u ta’abang, ni yibe tay e bitir nga bet, ni yibe non ngak bee’ u lane baas, ni gimew bee’ ni gamew be fal’eg rogon e murwel u ta’abang. Bay gelngin daed ni ngad chuweg ned e awaen’ man ta’areb.
Relief Society nge Bpin ni Rugod e gathi kemus nib clas. Rayog ni nge buch e tin ni dabyog ni ngan pagtilin nibay e bpin riy nib thilthil nikan nib nga lan ta’reb e booch man maman nge taw ko ngiyal’ ni kad pir’egned e birodaed e mithmith. Gube pong: ni ngan mang bang ko n’en ni nge thilyeg e fayleng nge mangil boech. Murwel nib motochiyl rodaed ni kad micheged e ngak pigpig gaed, ni ngad chubiyed pa’ay nike mul, man tay e gidii’ nibe magawon nga dakean poen daed fa pa’ daed ni ngan feek raed. Dani momaw’ ni ngan nang ko mang e ngan rrin’, machane baga’ nima chuweg e tin ni gadaed ba adag, ma gadaed ma gay rogon. Bpin u lane biney e Galasia e bay gelngin ni rayog ni nge thilyeg e gidii’. Rib pagan’ug ni tin thothup, napan ni gadaed ra gay rogon ngan ta’areb, ma gadaed ra pining gelngin Got nga but’ ni nge fal’egin rogon e murwel rodaed.
Napan ni falfalen’ e Galasia ko fare yi’iy u lane 1978 ni mornga’agen e priesthood, me President Russell M. Nelson e pi’ e tawa’ath ko profet: “Meybil rog nge tawa’ath rog ni nggu tay nga dakean gubin e pi’in nibe motoyil ni gadaed ra gel ko gubin e tomal ko owan’ man yan nib pagan’uy rok —nge gadaed—u fithik e gapas nge falfalen’.“ 10
Ay gun sap gaed ko biney e tawa’ath rok e profet ma gadaed athamgil ngeyag ngan ta’areb u lane fayleng. Gube yoeg e mich rog ko thin rok Somoel ni Yesus Kristus, ni meybil rok: “Chitamag, Gu be wenignag ngom ni ngam ayuwegrad ngar pired ni yad gubin ni kar ta’rebgad; Mu ayuwegrad ngar pired u fithik’dow, ni bod rogon ni ga bay u fithik’ag, ma gu bay u fithik’am, Mu ayuwegrad ngar ta’rebgad.” 11 U dakean fithngan Yesus Kristus, amen.