Mu Ninged, Mu Gayed, Mu Tugtuguyed e Mab
Bang nib ga’fan ko tonom rok e Chitamangdaed nibay u Tharmiy e rogon nrayag ni ngaed noned Ngak ni demutrug ko ngayal’ ni gadaed ba’adag.
Aningeg e pul kafram, napan ni gube fil mornga’agen fapi thin nib thothup, kug be’eg mornga’agen Alma nge mission ni tay u Ammonihah mu guy e biney u lane Come, Follow Me: “Napan ni gabe be’eg mornga’agen fapi tawa’ath ni pi’ Got ngak fapi gidii’ ni kanoeg e Nephi ngoraed (mu guy ko Alma 9:19–23), mag tafney nag fapi tawa’ath nike pi’ ngom.”1 Kug dugliy ni nggu yoloey nga butt’ urngin fapi tawa’ath nike pi’ Got ngog ngalan farke manual. Dani n’uw napan ngay, ma kug yoloey ragag nge nel’ e tawa’ath nga butt’.
Oran e tin ni kug yoloey nga butt’ e woed e tawa’ath ko fare murnguy rok fare Tathapeg nge fare gafgow ni tay ni fan ngog. Ma kug yoloey nga butt’ urngin e tawa’ath ni gu pi’ ngak e Tathapeg rog ko napan ni gag reb e missionary u Portugal nge, ta’aboch riy, ni un e bpin rog ngog, Patricia, ko fare mission ni gu tew u Brazil Porto Alegre South Mission, ni gu pigpig gaed lal’ mir’ay nge riliw’ nge l’agruw e missionaries. Weliy mornga’agen Patricia, oran e pi tawa’ath ni kug yoloey e rofen nem e woed e tawa’ath ni kug thamiyed u ta’abang ko urngin e duw ni kug mabgol gow ni ke gaman e aningeg i ragag e duw ngay—nib mu’un e m’ag pa’ romow ngay ulan fare temple u São Paulo Brazil, nib mu’un fare dalip i fak mow ngay, nge figirngin nge l’angin raed, nge ragag nge dalip pifak pfak mow.
Ma ki sul e tafney rog ngak e galibthir rog ni ri yow ba yul’yul’, ni yow e kar chugliyew gag ko rogon fapi yalen nibay ko gospel. Ma ki yib ngan’ug rborran riy napan ni un e chitiningig ngog nggu garbug gow nga butt’ u charen e bet rog nggu meybil gow ni go napan e ragag e duw rog. Sana ke thamiy ni fa’anra ba tu’uf ni nge thap e meybil rog ngak e Chitamangig nibay u Tharmiy, ma btu’uf ni nge mo’onog. Ere ga’ar ngog, “Nggu meybil ni somm’on, ma tomren e meybil rog, mag meybil.” Ul’ul’ nge rrin’ e biney ni gubin e nap, nge mada’ ko ngayal’ ni ke nang ni kug nang rogon yalen e meybil nge rogon ni nggu non ngak e Chitamangdaed nibay u Tharmiy. Gubin ngayal’ ma gube og nag e magar ngak nike fil rogon e meybil ngog, ya kug fil ni Chitamangdaed nibay u Tharmiy e ma motoyil ko meybil rog ma kama fulweg tabangin e meybil rog.
Riyul’, ya irraram reb fapi tawa’ath ni kug uneg ko tin ni kug yoloey nga butt’—fare tawa’ath nrayag ni ngam rung’ag mag fol ko ba’adag rok Somoel. Bang nib ga’fan ko tonom rok e Chitamangdaed nibay u Tharmiy e rogon nrayag ni ngaed noned Ngak ni demutrug ko ngayal’ ni gadaed ba’adag.
Be Piningdaed Somoel
Napan ni yib fare Tathapeg nga dakean u Mariken u tomren nike Foskoyam’, me rrin’ ni ku woed rogon ni pining pi gachalpen u Galilee. Me ga’ar ngog:
“Mu ninged, min piiʼ ngomed; mu gayed, ma gimed ra pirʼeg; mu tugtuguyed e mab, min bing ngomed.
“Ya gubin e piʼin ni yaedra ning, e yira piiʼ ngoraed; ma enra gay, e ra pirʼeg; ma enra tugtuguy e mab, e yira bing ngak” (3 Nephi 14:7–8; Muguy ko Matthew 7:7–8).
Profet rodaed, President Russell M. Nelson, e ke piningdaed e daba’ ni ngaed rrin’ed ni ku woed rogon nib chuchgur ko bine’. Ke ga’ar: “Meybil u dakean fithngan i Yesus Kristus ko tin nibay ko tafney rom, tin ni gabe tamdag ngay, nge tin ni gabe mo’owar riy—arrogon, gubin banan nibe suguy gum’ircha’em. Ma aram mag motoyil! Mag yoloey nga butt’ e pi n’en nibe yib ko tafney rom. Mu yoloey e pi n’en ni gabe thamiy mag rrin’ ni arram rogon nikan thogthog nag ngom. Napan ni garam rrin’ e biney u lan reb e rran nge yan ngalan reb e rran, reb e pul nge reb e pul, reb e duw nge reb e duw, ma garam ‘ilal u fithik yalen e yi’iy.’”2
President Russell M. Nelson e uneg ngay, “Fapi rran ni bay yib, dabiyoeg ni nge fos e ya’el rok bee’ ni fa’anra dariy e powi’iy, fa fanow, fa golnag, fa ayuw ko fare Kan Thothup.”6
Mangfan ni yi’iy e rib ga’fan ko tin nib thothup ni ngaed fosaged? Bachan fare fayleng e ba sug ko tin nib ga’ lingan ma bo’or banan riy e danur nangfan, mab sug ko baen nge tin nima yayawiliydaed nga orel. Nu mon rodaed ngak e Chitamangdaed nibay u Tharmiy e ma bing wo’en ko mang e tin nib riyul’ nge tin nib baen, ma dag ngodaed e tin nifan e tonom rok Somoel nge tin ni gathi tirok Somoel. Fare fayleng e kabang nib bo’or e kireb nge kirbaen’ riy. Machane napan ni gadaed ra meybil, ma gadaed ra thamiy e gapas nibe yib rok e Chitamangdaed nibay u Tharmiy me micheg nag ngodaed ni gadaed btu’uf rok ma be guydaed.
Mu Ninged
Somoel e ga’ar “ya gubin e piʼin ni yaedra ning, e yaedra thapeg.” Ngan ning banan e woed nib mom, machane biney e rib gel gelngin ya be dag e tin ni gaed ba’adag nge tin nibe mich u wun’daed. Machane, gathi ta’ab bayay nran gay rogon min nangfan rogon nima non Somoel. Ngaed motoyilgaed ko fapi thamtham nge tafney nibe yib ko tafney rodaed nge gum’ircha’endaed, min yoloey nga butt’, ni woed rogon nike yoeg e profet rodaed ngodaed. Yoloey nga butt’ e pi n’en nibe yib ko tafney rodaed e ir bang nib ga’fan ko thapeg. Ma ayuwegdaed nge pug oran ngodaed, me yib ngan’uy bayay, ma kun thamiy ko mang e be gay rogon Somoel ni nge machib nag ngodaed.
Dawri n’uw napan ngay be ga’ar bee’ ngog, “Mich u wun’ug e yi’iy nibay ni rib riyul’. Mich u wun’ug fare Kan ni Thothup nra dag ngog gubin banan nib tu’uf ni nggu rrin’.4 Mom ngog ni nge mich u wun’ug ko napan nibe yik lan rongreg ni pin’ey e bugi banan nib riyul’ .5 Machane uw rogon nrayag ni nge par fare Kan ni Thothup rog ni arrogon gelngin?”
Ngak e pi gidii’ ni gamaed btu’uf rog ni gamaed gubin, ku mus ngog ma gu ba’adag ni nggu thamiy e biney ni gubin ngayal’ nibe yib rok fare Kan ni Thothup ni gubin ngayal’ mab mom ngog ni nguy e ggin ni nggu sor ngay. Machane gathi arrogon. Machane, n’en ni gadaed ma thamiy ni gubin ngayal’ e irraram fare lam, nib gapas rok Somoel nibe kathkath ko tafney nge gum’ircha’endaed: “Gu ba’ array. Guba’dag med. Man u rogon; gelngin nrayag rom. Gura pi’ e ayuw ngom.” Gathi gubin ngayal’ mab tu’uf ni ngam nang gubin banan fa ngam guy gubin banan.
Fare lam, nib achig laman e ir e be micheg, ma be pi’ e athamgil—oran e ngayal’ e baga’ ni kemus ni array e n’en nib tu’uf ko rofen nem. Fare Kan ni Thothup e ba riyul’, ma tin nibe thogthog nag e ba riyul’—tin nib baga’ nge tin nib achig.
Mu Gayed
Somoel e micheg, “Ma enra gay, e ra pirʼeg.” Ngan gay e be yipfan e tafney nge tin nib thothup ni yibe athamgil riy—rogon ni yibe lemnag, rogon ni yibe sikeng nag, gay rogon, nge rogon ni yibe fil. Gadaed be gay rogon ni bachane be pagaen’daed ngak fapi micheg rok Somoel. “Dariy be’ nra fel’ u wan’ Got ni fa’anra de mich Got u wan’, ya en nra yib ngak Got e thingari mich u wan’ ni bay Got mra tow’athnag e pi’in yad be gay Got” (Hebrews 11:6). Napan ni gadaed ra gay, ma arram ni gadaed be dag ni kabay bo’or banan nib tu’uf ni ka gadaed ra fil, ma Somoel era ga’ nag e llowaen’ road, me fal’ag rogondaed ni ngayag ni ngaed thapegned boech. “Ya must gaed, ba’aray rogon ni yoeg fare Somoel ni Got: Gura pii’ ko gidii’, ni bayil’ nga dakean bayil’, nib yalen nga dakean yalen, ni buch’uw aray nge buch’uw aram; … ya enra fek, e kug ra pii’ borchie ngak’” (2 Nephi 28:30).
Mu Tugtuguyed e Mab
Ma ki, ga’ar Somoel, “ma enra tugtuguy e mab, e yira bing ngak.” Ngan tugtuguy e mab e irraram e pow ko mich. Napan ni gadaedra laek, Somoel era bing wo’en e kanawo’ ngodaed. Bay reb e tang u lane e hymn nib fel’ nibe fil ngodaed ni ngaed “od gaed ngaed rrin’ed boech banan ma gadaed tafney niged e tabinaew [rodaed] u tharmiy. Rrin’ e tin nib mangil e bay fal’ngin, ma bay e falfalaen’ riy nib gel, ni bay e tawa’ath riy ko murwel nge tu’ufeg.”6 Elder Gerrit W. Gong ko fare Quorum ko fare Ragag nge L’agruw e weliy ni yi’iy e ma yib ko ngayal’ ni gadaed be rrin’ e tin nib mangil. Ke ga’ar: “Napan ni gadaedra gay rogon ni ngaed ayuweged e gidii’ nib yilegdaed, gube lemnag ni Somoel e kuma pi’ ngodaed e tu’ufeg rok nib bo’or ni fan ngoraed nge fan ngodaed. Gube lemnag ni gadaed ma rung’ag laman—ma gadaed be thamiy nib thil—ko napan ni gadaedra meybil ni fan ngak e gidii’ nibay u charendaed ya bachane mit ney e meybil e irraray e tin meybil ni ba’adag ni nge fulweg taban.”7
Wo’en ni dag Alma
Biney ni guy u lane Come, Follow Me ni nggu tafney nag fapi tawa’ath rog e ke pi’ ngog e thothup nib munguy nge ku boech e tin nib thothup nib be’ech. Napan ni gu ul’ul’ nggu be’eg mornga’agen e michib rok Alma u Ammonihah, kug pir’eg ni Alma e ke rrin’ ni woed ni ngan ning, min gay, min tugtuguy e mab. Kad be’egned ni “Alma e muruwel u dakean e yaʼel, i cham nag ku Got u dakean e meybil ni almarin, ni nge piiʼ e Kan ni Thothup rokʼ nga dakean fapi gidiiʼ ni yaed bay u lan fare binaw.” Binem e meybil, arram rogon, ndani fulweg taban ni woed rogon ni athapeg, min tuluf Alma nga wuru’ fare binaew. “Ni ke muchuch nga but’ ko kirbaen’,” ba’adag Alma ni dab ki sul nge rrin’ bayay, me yib ba angel nga bi non ngak: “Gur e bafel’ wa’atham, o Alma; ere, mu pug oewchem ngalang ngam falfalaen’, ya gur e ba’fan ni ngam falfalaen’.” Ma fare angel e yoeg ngak ni nge sul bayay ko farngi binaew nu Ammonihah ma ki gay rogon bayay, ere Alma e “sul nib gur.”8
Mang e kad filed ko mornga’agen Alma ni ning, ma be gay, me tugtuguy e mab? Kad filed ni meybil e ba tu’uf fare murwel riy nib thothup, ma gathi gubin ngayal’ ma ma buch ni woed rogon ni kad athapegned. Machane napan ni gadaedra thamiy ni ke kirbaen’daed, Somoel e ma pi’ gelngindaed me ayuwegdaed nib thil rogon. Gathi gubin ngayal’ ma fulweg taban urngin mit e duwer rodaed fa tin ni gadaed be magawon riy; machane, ma pi’ e athamgil ngodaed ni ngaed gayed rogon. Fa’an gadaedra gur nag ni nge ta’areb e murwel rodaed ko tonom Rok, ma ra bing wo’en fare kanawo’ ngodaed, ni woed rogon nike rrin’ ni fan ngak Alma.
Irraray e mich rog ni irraray e tin tomur ko urngin ga’angin fare gospel. Rayag ni ngaed falfalaen’gaed ko fapi tawa’ath ko Bayul rok Yesus Kristus u lane yafos rodaed. Bay fapi thin nib thothup nib bo’or nrayag ni ngaed faned. Be powi’iydaed e profet rodaed nibe fil ngodaed e pi gagiyeg rok Somoel ko ngayal’ ney nib gel e mo’omaw’ u lane yafos rodaed. Ma bay, rodaed ni rayag ni ngaed thapegned e yi’iy ni fan ngodaed ni ngayag ni nge ayuwegdaed Somoel me powi’iydaed. Me ga’ar fare angel ngak Alma, “ba’fan ni ngam falfalaen’” (Alma 8:15). U dakean fithngan Yesus Kristus, amen.