E Yalen Nib Be’ech
Gube pinningmed ningam thilyeg e gum’racha’med, tafnaymed, ma ya’el romed ngak Chitamangdaed nu Tharmiy nge Fak Mo’on, Yesus Kristus.
Pi walageg nib tu’uf rog, gub falfalaen’ ni gadad ba ta’abang ko gali rran ney u lane general conference ko Galasia rok Somoel. Guba’adag woed Elder Jeffrey R. Holland Boed ni ke yog, fapi milwol, pi meybil, nge pi tang ney kan yi’iynog e Somoel ngay. Kug faflaen’ ngak urngin e gidii’ kar ayuweged.
Nap’an e mo’olung ney, Kug lemnog u tafnay rog ni gaba rung’ag ko mo’olung. Kug fith ngak Somoel ninge ayuwegeg ningu nang fan e thamtham romed, e tamra’ romed, fa magawoen romed. Kug lemnag e thin Ningu yoeg ningu ning e mo’olung ney nira pii’med ko laniyaen’med nib faflaen’ ko tin ni bay yib ni ba’adag Somoel ningam thamiyed.
Gadadbe paer u lane mfen nib gaa’fan, ke guy pi profet u kakrom. Araye mfen nem nap’an dariy’ e taw’ath ko ya’el ra tal’eg Somoel ko gidii’ nib mat’aw.1 Dariy’ fan e magawon ko fayleng,2 en Somoel ba’adag ningad sapgaed nga gabul “ufithik e falflaen’.”3 Dabda balyangaen’daed ko tin ni ke buch. Mukun ko Israel ba yaen. En Somoel Yesus Kristus ba powiy’ e tin ko Galasia Rok, ni ra thapeg e muruwel nib thothup rok
E sikeng rodad ningad ayuweg dad ningad thapeged e tin rayog rodad ko tharmiy. Daba’ kad runga’aged marunga’gen “e yalen nib be’ech.” Fa’an gara thapeg e yalen nib be’ech, Gube pinningmed ningam thilyeg e gum’racha’med, tafnaymed, ma ya’el romed ngak Chitamangdaed nu Tharmiy nge Fak Mo’on, Yesus Kristus. Ninge yoeg ni’ir e yalen nib be’ech rom.
Mu thapeg e yalen nib be’ech rom udakaen e kalngaen’ urngin e rran. Mu gay rogon ningam machaelboeg ko urngin e lem, thin, nge ngongol rom. Machibnag ngak reb e gidii’. Fi’leg laniyaen’ ko tin manemus ban’en. Mu puluwnag e calling rom. Ma demturug e magowen romed, pi walageg nib mo’on nge ppin, mu paer urngin e rran ninge yoeg ningam taermedlimed ningam mada’nage Tasunmiy rom.4
Aramfan bay e temple rodad. Pi gam’ing nge michmicheg rok Somoel ma taermedliydaed ni fan e yafas nib manemus, fa bin thabi gaa’ e taw’ath rok Got.5 Gamedma nang, fare m’ar ko COVID ke t’uf ningad tal’eg e sunmiy ko fapi temple ko chingyal’. Nge mu’ kug tababgaed ningad bing, ko boech e rogon. Bay phase 2 chiney ko boech e temple, ke m’ag paa’ bo’or i biyu’ e gidii’ ma bo’or i biyu’ kar thapeged e endowment u boech e pul. Gadadba athapeg fare rran nap’an urngin e chongin ko Galasia nib mat’aw ranoed mar pigpignoged pi gidii’ roraed mar liyoergaed ulane temple nib thothup.
Chiney, Kug falflaen’ ningu yoeg bay nel’ e temple nib be’ech ngan toey u pi nam ney: Tarawa, Kiribati; Port Vila, Vanuatu; Lindon, Utah; Greater Guatemala City, Guatemala; São Paulo East, Brazil; and Santa Cruz, Bolivia.
Nap’an ngad toeyed man ayuweged pi temple, gube meybil ningam toeyed ngam fi’legmed ningam mat’awgaed ningam dared nga temple nib thothup.
Chiney pi walageg nib tu’uf rog, Gube taw’athnagmed ningam suggaed ko gapas ko Somoel ni Yesus Kristus. Gapas Rok ba gaa’ ko nang fan e gidii’.6 Gube taw’athnogmed ningam gaa’nag e laniyaen’med ningam folgaed pi motohciyel rok Got. Gube micheg nap’an ngam rrin’, nira upgnuy pi taw’ath ngomed, arragon e gelbugwaenmed, yi’iy romed, gapas u tabinaew romed, ma falflaen’med nap’an e ningyal’ ko tamra’.
Ninge yoeg ningad dared uta’abang ningad mugu’uliyed e muruwel nu tharmiy—ni taemedliyed daed ma fayleng ko fare Bin La’agruw e Wub ko Somoel. Ma nggu yibliyem, ko fare tu’uf rog ngomed ni gubin, u dakean fithingan Yesus Kristus nib thothup, amen.