Yalaen ku Kristus
Rayag rodaed, arrogon, ni ngaed fanayed e tin yalaen rodaed u fayleng ma kagdaed un ko bin yalaen ni kakrom—fare bin somm’on, nin sunmiy, e yalaen nib manechubog ko fare gospel rok Yesus Kristus.
Mangil e re fayleng ney ni gadaed be paer riy, ya ba fayleng ni tofen e gidii’ ni bo’or mit, nibay e thin nib thilthil riy, yalaen, nge cheppen e gidii’ ni bo’or—nike garar i yaen u dakean e naam nib pag e mir’ay nge biyu’ e gidii’ riy nib thilthil, nra reb mab thilthil yalaen. Gidii’ e ba yo’or banan ni ngar falfalaen’gaed ngay miyaed madnom nag. Gafaerig ni kan fil rogon—ni kad filed ko rogon e yalaen ni kad ilal gaed riy—e rayag ni ra gelnag e yafos rodaed, ma krayag, nra boech i ngiyal’ riy, ma kra momaw’nag e yafos rodaed.
Be ya’an ni fapi yalaene ke par ni ke mang biyang ko tafney rodaed nge gafaerig ma rib momaw’ ni ngaed thilyegned rogon. Irraray, e n’en, ni gadaed ma thamiy ni be yupfandaed ko tin ni gadaed be thamiy ni arram rogondaed e gidii’. Krayag nib alamrin rogon e yalaen nre pii’ daed ngaed sapgaed ngay ni fapi yalaen rodaed e dariy banan nib kireb riy, ma arram nrayag ni dabda piged boech “pi yalen e pi chitamangmaed.” Bachan e ra bee’ mab thilthil rogon e yalaen rok biney e rayag ni nge talag e tin ni fal’ngiy—nib mu’un e tin nib fel’ rodaed—pi n’en nibe yib ko tafney rodaed, nge rogon e pi gafaerig ni yibe tay.
Bay mo’on ni gu manang nib bee’ nib mangil, boech e duw kafram, me buch rok ni arrogon ni bachan fare yalaen. Yan somm’on ni gu mada’nag ulan u Singapore ko ngiyal’ napan kug mang fare sensey u tabinaew rok. Ir e sensey ko Sanskirt nge Tamil, ya bee’ nu South India. Figirngin nge fagli pagan ni fakrow e yaed chonggin fare Galasia, ma ir dariy bi’id ma ke un ko Galasia fa motoyil ko fapi michib ko gospel. Falfalaen’ ngay ngak figirngin nge fagli pagal ni fakrow ko tin ni yaed be un ngay nge pi murwel roraed ni kan pii’ u Galasia.
Napan ni gog ngak ni nggu michibnag ko fapi yalaen e gospel mu gog ngak e tin nib michuwean’daed ngay, me yoeg ni dabun. Ba n’uw napan fini gu nangfan ni dabun: ke thamiy ni fa’anra rrin’ e biney ma woed ni ke pii’ keru’ ko ggin ni yib riy, gidii’ rok, nge cheppen e gidii’ rok! Rogon nibe leamnag, era digey gubin banan ni manang, gubin banan ni ke fil e tabinaew rok ngak, yalaen rok u India. In e puul ngay, fini yag ni nggu weliyed mornga’gaen e ran’ey. Kug nagfan (machane gathi ke ggin owcheg ngay!) rogon fare gospel rok Yesus Kristus ni yag ni thilyeg rogon ni nge guy e pin’ey.
Oren e yalaen ko gidii’ ma kan pir’eg nibay nib mangil fa ba kireb, nbay fal’ngin fa ba kireb fal’ngin.
Oren e kireb ko fayleng e be buch ni bachan e gidii’ ndar ta’areb e tafney roraed nge yalaen nib thilthil. Machane gubin e kireb nge chamcham era chuw ni fa’an fare fayleng era sul ko bin “Somm’on i Yalaen,” ni irraram e bin ni kan pii’ ngorad ni dawri n’uw napan. Biney e yalaen e yan ngani mada’ ko ngiyal’ ni u dmoyed u tharmiy. Ya irraray fare yalaen ku Adam nge Enoch. Ya irraray fare yalaen ni bin somm’on e def ko michib rok fare Tathapeg ko Ngiyael’ ko Meridian, nibay ni fan gubin e ppin nge pumo’on. Ya biney e bthil. Ya irraray e bin yalaen ni “th’abi mangil ko gubin e yalaen” ni yib ko fare tonom ni fan ko falfalaen’, ni ngongliy Got me gelnag Kristus. Ma chagliy nga ta’abiyang ma dabi fo’odnag u but’. Ya irraray e n’en nra fosag ma dabi kireb nag.
Fare gospel rok Yesus Kristus e fil ngodaed nbay fan e yafos. Gadaed ni kadbad nga ray e gathi ke pos me buch! Ya bay fan ni kadbad nga ray.
Biney e yalaen ir fare mich nriyul’ nbay en Chitamanggdaed nibay u Tharmiy nib fos, nbay nib riyul’ ma gadaed btu’uf rok, ni gadaed gubin. Gadaed e “murwel nge gul’il’ungun [Rok’].” 1 Nibe yupfan ni gadaed bta’ab gidii’. Ni dariy bee’ nib tolang fa ba sobut’ nga bee’. Ya, gadaed gubin, ni gadaed ba ulungi walag ni ppin ma pumo’on, ni gadaed bugi thothup ni fak e Chitamangdaed nu Thar—rib riyul’ e ran’ey. Ma dariy e fanaanikan ko laem ni “gadaed nge gamaed” ko biney e yalaen ni “th’abi mangil ko gubin e yalaen.” Gadaed gubin ma “gadaed.” Gadaed gubin ma “gamaed.” Michuwan’daed ngay ni gadaed gubin ma bay e murwel rodaed nib milfan e tirodaed ngodaed, ti rodaed ni gubin, Galasia rodaed, nge fayleng rodaed. Murwel rodaed nib milfan e tirodaed ngodaed ab ga’fan ko rogon ni ngaed mon’og gaed.
Tu’ufeg, ni woed rogon e tu’ufeg rok Kristus, e irraray e dayif ko re yalaen ney. Ni gadaed be ayuweg e tin nib tu’uf ko gidii’ rodaed, tin nu fayleng nge tin nib thothup, min rrin’ e tin ni kan thothognag. Biney e ma chuweg e tolngaen’ nge fanaanikan.
Ma arram ni gadaedra thapeg e yalaen ko yi’iy, nthin rok Got e bay ni lukungun ni yibe thapeg ko fapi profet rok (ni bayni dag ngodaed u dakean fare Kan ni Thothup). Ma gubin mit e gidii’ mara nang e murwel nge tin nbay ko tafney rok Got.
Biney e yalaen e ir fare gel ko yalaen e mel’eg. Rogon ni ngan mel’eg e rib ga’fan ko rogon ni ngaed mon’oggaed nge rogon e falfalaen’ rodaed. Mel’eg ko gonop e rib ga’fan.
Ya irraray e yalaen ni yibe fil mornga’agen. Ma gadaed be fil e llowaen’ nge gonop ko gubin urngin mit banan.
Ya irraray e yalaen ko mich nge ta fol. Michaen’uy ngak Yesus Kristus e irraram e bin somm’on e yalaen rodaed nge fol ko fapi michib Rok nge motochiyel. Irraray e tin nra skul nagdaed.
Ya irraray yalaen e meybil. Michuwaen’daed ngay nra motoyil Got ngodaed, me ayuwegdaed.
Ya irraray e yalaen e motochiyel nge ga’ming, nib gonop rogon e paer, maligach, min n’agfan min kalngaen’uy, nge ayuweg e dogur rodaed. Gubin e pow ko pin’ey e arram rogon e murwel rodaed ngak e en Got.
Ya irraray e yalaen rodaed nibe gagiyeg nag fapi priesthood, gelngin ni ngan rrin’ u tan fithingan Got, fare gelngin Got ni ngayag ni ngan tawa’athnag pi Fak. Biney e ma ayuweg e gidii’ ni ngan mon’og, pi tiyugang’, pi mitin, pi matam, nge gidii’ ni gadaed—ma kama yibliy e tabinaew.
Bay e ma’ang’ang ko biney, fare bin th’abi somm’on e yalaen rodaed, ni irraram fare mich ngak Yesus Kristus, gelngin fare priesthood, meybil, gadaed ni gadaed be mon’og, thil ni kan tay, nge min’agfan.
Ya irraray yalaen e murwel ko ta pigpig. Rib ga’ e puluwan’ riy ko re bee’.
Ko fare yalaen rok Kristus, ppin e yaed bay ni yaed ba tolang ngalang ma bay e liw roraed ni gubinfen. Gathi yaed e yaed bay u tan pa’ e pumo’on, ni woed boech e yalaen nu fayleng e daba’, ya yaed e ta’ab e puuluw roraed u roy nge bin migid e yafos.
Biney e yalaen e ma yibliy gathon e tabinaew. Tabinaew e irraram e bin somm’on e liw ko gubinfen. Tin nib fel’ ko tabinaew ab tu’uf ni ngan ayuweg ni demuturug gelngin e gafgow riy, ni woed rogon nikan fil “ya dariy reb e murwel ni th’abi fel mab tolang nra yon’ luwan e murwel nde m’ag u tabinaew.” 2 Tabinaew e irraram e gin nibay e murwel rodaed riy ni th’abi fel’ ma irraram e gin nibay e falfalaen’ riy nib gel.
Yalaen ku Kristus e bay e tin nib tu’uf ni ngan rrin’ riy—ni yibe sap ko rogon wo’en nge tin nib manechubog. Biney e yalaen e ma sap ko tin ba’aray banan nib baga’ fan! Ya ke yib ko fare gospel rok Yesus Kristus, ni’ir e ba manechubog, me be weliy fare “fan,” “mang” nge “ngan” ko fan ni gadaed bay u roy u fayleng. (Ya fan ngak gubin, gathi kemus nri in’ e gidii’.) Bachan e biney e yalaen e ke yib rok fare michib rok e en Tathapeg ma be pii’ e ayuw ni nge fosag e fayleng rodaed ko ngiyal’ ni kari tu’uf.
Ba tawa’ath e ran’ey ni ngan mang bang ko biney e yafos ni th’abi fel’! Ra nge mang bee’ ko biney, ko fare bin Th’abi Fel’ e Yalaen, mab tu’uf ni nge thil nsomm’on. Fapi profet e kar filed nib tu’uf ni ngaed digeyed e yalaen rodaed ni kab kakrom nibe talagdaed ko fare Yalaen Kristus. Machane dar yupfan ni ngaed digeyed gubinbanan. Ma fapi profet e kar yoegned ni kan piningdaed, ni gadaed gubin, ni ngaed feked e mich rodaed nge tin ni gadaed ba salap riy—gubin banan nbay u lane yafos rodaed nge pi yalaen rodaed—nge un ngodaed, min “uneg” e tin ko Galasia ngay u dakean fapi mulwol ko fare gospel. 3
Galasia e gathi kemus ni fan e tin ba’aray e gidii’ ni kanoeg e “western” ngoraed fa kemus ni gidii’ nu Mariken. Ya irraray e Galasia ni fan ga’angin yang u fayleng, ya irraray rogon nin ngongliy ko somm’on riy. Ya ba yalaen, nin ngongliy u tharmiy. Chonggin e galasia u dakean ga’angin yang u fayleng e ma fek e fla’ab, gidii’ nib thilthil, nge falfalaen’ ngalan e tabinaew rodaed. Gidii’en Got ko tin tomur e Rran e ki yaedra ul’ul’ ngar madnom niged mi yaed tayfan e gidii’ roraed ni kakrom, machane chiney e kar manged nga banan ni bgel e ga’ riy. Fare Yalaen ku Kristus e ma ayuwegdaed ngaed guyed ko gadaed mini’, ma napan ni gadaedra guy ni woed rogon e tin nib manechubog, ma arram nra ayuwegdaed ni ngaed rrin’ed e tin murwel ni fan ko fare tonon ko falfalaen’.
Ere, mang ke buch ko tafagar rog? Ere, ni michibnag ngak ko fapi lesson me un ko Galasia. Ma gathon e tabinaew rok era seal gaed u temple ni kanoeg e Sydney Temple ngay. Kemus nike digey in banan—ma ke yag ngak e gubin. Ke pir’eg ni krayag ni nge madnom nag cheppen ni kakrom, ma krayag ni nge tayfan e gidii’ rok ni kab kakrom, musik ko nam rok nge churu’ nge thin, gaan rok, nge binaew rok nge pi gidii’en. Make pir’eg ni dariy banan nib kireb riy nike uneg boech e yalaen rok ko fare bin Th’abi Fel’ ko Yalaen. Ke pir’eg ni ra fek e tin nib riyul’ mab mat’aw ko bin somm’on e yafos rok nge uneg ko bin be’ech e yafos rok e chiney ma ke gelnag ni’ir bee’ ni Gidii’en Got me ayuweg ngar ta’arebgaed e gidii’ nu Tharmiy.
Rayag rodaed, arrogon, ni ngaed fanayed e tin yalaen rodaed u fayleng ma kagdaed un ko bin yalaen ni kakrom—fare bin somm’on, nin sunmiy, e yalaen nib manechubog ko fare gospel rok Yesus Kristus. Biney e ba yalaen ni gadaed gubin ma rayag ni ngaed fanayed. U dakean fithngan Yesus Kristus, amen.