![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fd1%2F62%2Fd16219aaad9aee7c709e59e2bac3d6542c1d9eec%2Fd16219aaad9aee7c709e59e2bac3d6542c1d9eec.jpeg/full/!250,/0/default)
Añetegua potĩ, Doctrina potĩ ha rrevelasiõ ipotĩva
Pejapomi ko conferencia-gui peteĩ ára penderory haĝua umi Ñandejára mensáhepe oúva Hembiguaikuéra rupive.
Che hermano ha hermanakuéra pejehayhuetéva, tapeĝuahẽporãite conferencia general-hápe! Avy’aiterei aime haguére penendive! Peime memékuri che akãme ko’ã sei mese ohasava’ekuépe. Añembo’e pende rehe ha penderehehápe. Ko’ã semana ohasava’ekuépe añembo’e’asy ko conferencia ha’e haĝua peteĩ rrevelasiõ ha jepy’amongeta ára opavave ohekávape ĝuarã umi jehovasa.
Orerory roñe’ẽ jeývo peẽme Centro de Conferencias guie. Heta umi apyka nandi gueteri, ha katu jaguerekóvo Coro del Tabernáculo miembrokuéra ko’ápe ha’e peteĩ jeguata’imi tenonde gotyo hechapyrãitéva. Pomoĝuahẽ porãite ko conferencia virtual guasúpe, peime peimehápe.
Ñañorairõ gueteri hína umi mba’e vai COVID-19 ha ivariantekuéra ogueruva’ekue reheve. Roaguijeme’ẽ peẽme pesegi haguére ore konsého ha umi momarandu médico experto ha gobierno-gua oficial-kuera pene komunidápe ome’ẽva.
Rojapo káda conferencia general Ñandejára oisãmbyhyháicha.1 Pe formato oñemoambue ohóvo umi ary ohasávo. Chemitãverõguare, conferencia hi’aréjepi mbohapy térã irundy ára. Upe rireve, conferencia oñemombyky mokõi árape. Káda mensáhe, upérõ ha ko’áĝa, ha’e pe ñembo’e’asy ha ñembosako’i espiritual oguerúva.
Umi Autoridad General ha Oficiales Generales oñe’ẽtava omombytéta imensahe ñande Salvador, Jesucristo, Iporiahuvereko, ha Ipu’aka rredentór ijapyra’ỹvape. Ndaipori’akue araka’eve ko mundo rembiasakuépe peteĩ époka pe ñande Salvador kuaapy oñeikotevẽve ha imba’eguasuve jave personalmente káda tekove ángape ĝuarã. Peimo’ãmi mba’éichapa pya’ete oñesolusionáne umi ñorairõvaiete oĩva opa ko múndope, ha ñande rekove personal-pe, opavave jaiporavórõ jasegitaha Jesucristo-pe ha jajesarekóta Hekombo’ekuérare.
Upe Espiritupe, poinvita pejesareko haĝua mbohapy mba’e rehe ko conferencia aja: añetegua potĩ, doctrina potĩ ha rrevelasiõ potĩ. Oĩrõ jepe odudáva, añetehápe oĩ peteĩ mba’e upe oĩporã ha oĩvaiva. Añetehápe oĩ pe añeteguaite—pe añetegua opave’ỹva. Peteĩ plága ñande árapegua ha’e sa’i tekove oikuaaha moõpa ohekakuaa upe añetegua.2 Añetehápe pehendútava ko árape ha ko’ẽrõ ha’e añeteguaite.
Cristo doctrina potĩ ipu’akapa Omoambue maymáva rekove ontendéva ha oñeha’ãva oipuru hekovépe. Cristo doctrina ñanepytyvõ jajuhu ha japyta haĝua konveniokuéra rapépe. Japytárõ upe tape po’i ha katu hesakãporãvape, ipahápe ñanembosako’íta jahupyty haĝua opa mba’e Tupã oguerekóva.3 Mba’eve imba’eguasuvéne opa ñande Ru oguerekóvagui!
Ipahápe, rrevelasiõ potĩ umi porandu oĩvape pene korasõme ĝuarã ojapóta ko conferencia-gui hechapyrã ha hesarai’ỹva. Ndapehekáirõ gueteri Espiritu Santo ministrasiõ penepytyvõ haĝua pehendúvo Ñandejára oipotáva pehendu ko’ã mokõi árape, poinvita pejapo haĝua ko’áĝa. Pejapomi ko conferencia-gui peteĩ ára penderory haĝua umi Ñandejára mensáhepe oúva Hembiguaikuéra rupive. Peñemoarandu mba’éichapa peipurukuaa pende rekovépe ára ha ára.
Kóva ha’e Jesucristo Tupao Santokuéra Ára Pahapegua. Ñande ningo Itavayguakuéra konveniogua. Ñandejára he’i ombopya’etaha Hembiapo hi’árape,4 ha upéicha ojapo hína ipya’eveháicha ohóvo. Jareko priviléhio ñamba’apóvo Hembiapo marangatúpe.
Ajerure’asy peteĩ jehovasa opavave umi ohekávape ĝuarã tesape tuichavéva, kuaapy ha añetegua. Aipota peikuaa pohayhuha peteĩ teĩme, Jesucristo réra sagrádope. Amén.