![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F61%2F41%2F61411c9333fbacaf4efe080c02ca9cca22dc6cf2%2F61411c9333fbacaf4efe080c02ca9cca22dc6cf2.jpeg/full/!250,/0/default)
Oñeñe’ẽvo akã resãire.
Pehejami takomparti penendive heta mba’e ahechava’ekue ore familia ohasa aja umi prueba- re.
Jepeve ore familia ohupyty heta jehovasa roguata aja vy’ápe konveniokuéra rapére, rombohovái avei yvytykuéra ijyvatevéva. Akompartise tembiasa ipersonálva akãmegua mba’asykuéra rehegua. Umíva apytépe oĩ depresiõ clínica, ansieda mbarete, trastorno bipolar, TDAH ha sapy’ánte opa umívagui jopara Akomparti ko’ã tembiasa kyrỹi umi ohasava’ekue ohejágui chéve.
Che ministerio aja ajuhu ciento umi tekove ha familiakuéra oguerekóva tembiasa ojojoguáva. Sapy’ánte añeporandu umi “mba’asy vai” ojaho’ítava yvy apytépe oje’eháicha Escritura-kuérapepa ndoikeichéne avei umi akã mba’asy.1 Upéva ningo mundial, oĩ opa kontinénte ha kultúrape, opoko opavavére—mitã, tuja, ipirapire hetáva ha imboriahúvare. Tupaogua miembrokuéra nokañýi upévagui.
Upéicha avei, ñane doctrina ñanembo’e ñañeha’ãva’erãha ha’e haĝua Jesucristo-icha ha ñañemoĩporã Ipype. Ñane mitãnguéra opurahéi: “Añeha’ã ha’e haĝua Jesúicha.”2 Hi’ãnte ñandéve ñandeperfecto jepeve ñande Ru Yvagagua ha Ita’ýra Jesucristo iperféctoicha.3 Umi akã mba’asy ikatúgui omopa’ũ jahechaháicha pe perfección, py’ỹieterei peteĩ tabu gueteri. Upévagui, oĩ hetaiterei mba’e ojekuaa’ỹva, hetaiterei jehasa’asy kirirĩ ha hetaiterei py’aropu. Heta, oñeñanduvaívo nokumplírigui umi norma-ndi ojehechaháicha, oimo’ã avy nahendaiha ko tupaópe.
Jaity haĝua yvýre upe jejavy iporã ñanemandu’a “Salvador ohayhuha peteĩteĩ Itúva ra’ykuérape. Ha’e oikũmby pe ñembyasy ha lúcha heta tapicha ohasáva oikóvo opáichagua akã mba’asy reheve. Ha’e ohasa ‘ñembyasy, jeiko’asy ha py’ara’ã opaichaguáva; … [ojapyhývo] hi’ári umi itavayguakuéra ñembyasy ha mba’asykuéra.’(Alma 7:11; enfasis oñemoivéva; tojehecha avei Hebreos 4:15–16; 2 Nefi 9:21). Ha’e oikũmbygui opaite jeiko’asy, Ha’e oikuaa mba’éichapa ‘omonguerakuaa umi ikorasõ rasývape’ (Lucas 4:18; tojehecha avei Isaías 49:13–16).”4 Umi desafio py’ỹi ohechauka oñeikotevẽha tembiporu ha jepytasove ha ndaha’éiha peteĩ karácter defecto.
Pehejami takomparti penendive heta mba’e ahechava’ekue ore familia ohasa aja umi prueba- re.
Peteĩha, oĩ heta tapicha hasẽtava ñanendive; ha’ekuéra nañandehusgamo’ãi. Oguerekógui pániko atáke, ansieda ha depresiõ vai, ore ra’y ou jey imisiõgui ógape irundy semána rirénte. Ituvakuéraicha hasy oréve rombohovái upe desilusiõ ha ñembyasy heta roñembo’éguikuri osẽporãmba haĝua chupe. Opa tuvakuéraicha, ore roipota ore ra’yrakuéra toñakãrapu’ã ha tovy’a hikuái. Peteĩ misiõ ha’étakuri peteĩ mba’e guasuete ore ra’ýpe ĝuarã. Avei roñeporandu mba’épa opensáne ambue tapichakuéra.
Roikuaa’ỹre, ore ra’y jeju jey ivaietereivékuri chupe ĝuarã. Ohecha ha’e ohayhuha Ñandejárape ha oserviseha, ha katu ndaikatúi, umi mba’e hasývare ontende haĝua. Pya’ete ojejuhu oguereko’ỹre mba’evéichagua esperanza, oñorairõvo peteĩ kúlpa pypuku reheve. Noñeñanduvéima aceptado, ha katu espiritualmente oĩ ñeñandu’ỹme. Ipu’aka hese umi ñemano rehegua temiandu.
Oĩ aja upe estado irracional-pe, ore ra’y oguerovia oĩha peteĩ mba’énte ha’e ikatúva ojapo, ojejuka. Oñeikotevẽkuri Espiritu Santo ha peteĩ legión anhelkuéra mokõive vélo yképe ojesalva haĝua chupe.
Oñorairõ aja hekovére upe ára hasyetévape, ore familia, barrio-gua lider-kuéra, umi miembro ha agirũnguéra osẽ iguatágui oreipytyvõ ha oreministra haĝua.
Araka’eve nañandúiva peichagua mborayhu ñeñohẽ. Araka’eve nañandúi mbareteveiva’ekue ha forma personal-háicha pe he’iséva pemoangapyhy umi oikotevẽvape angapyhy. Ore familia akóinte ome’ẽ aguyje upe ñeñohẽre.
Namombe’upakuaái umi milagro ojeipapakuaa’ỹva ouva’ekue umi oikóva reheve. Aguyjevepópe, ore ra’y oikove, ha katu ogueraha heta ára ha médico ñeñangareko, terapia ha pytyvõ espiritual-re okuera haĝua ha oikuaa haĝua ojehayhu, ojevalora ha oñeikotevẽha hese.
Ahechakuaa ndaopavavéi umichagua káso opa ore mba’éicha. Ambyasy umi operdepya’etereiva’ekuére umi ohayhúvape ha opyta ko’áĝa ñembyasy reheve, ha avei heta porandu ñembohovai’ỹre.
Ambue che momarandu ha’e ikatuha hasy tuvakuérape ohechakuaa ita’yrakuéra jehasa’asy, ha katu ñañehekombo’eva’erã ñandejupe. Mba’éicha ikatu jahechakuaa diferencia oĩva pe desarrollo normal apytèpe ha umi mba’asy séña. Tuvakuéraicha jareko pe tembiapoukapy sagrádo ñaipytyvõva’erãha ñande ra’yrakuérape ombohovái haĝua ko tekove py’ara’ã; ha katu pokã ñande apytépe oikuaa porãva akã resãi rehegua. Upevére ñañangarekova’erã ñande mitãnguérare ñaipytyvõvo chupekuéra oñekontenta haĝua iñepia’ã añete rehe oñeha’ã aja okumplívo umi expectativa oĩporãva. Peteĩ teĩ ñande jaikuaa ñane kangy personal rupi pe kakuaa espiritual ha’eha peteĩ proceso ohomeméva.
Ko’áĝa jaikuaa “ndaipóriha peteĩ pohã simple jahupyty haĝua pe ñeimeporãmba emocional ha mental. Jahasáta estrés ha py’arasy, jaikógui peteĩ múndo ho’apyréva ha jaguereko peteĩ tete ho’ava’ekue. Avei, oĩ heta mba’e ikatúva ogueraha oñediagnostika haĝua umi akãmegua mba’asy . Independientemente ñane ñeimeporã mental ha emocional-gui, hesãive ñamañávo pe jekakuaáre ñamaña rãngue umi ñande defecto-re.”5
Che rembireko ha chéve ĝuarã pe akóinte orepytyvõva’ekue ropyta aĝuive ikatuháicha Ñandejáragui. Romañávo tapykue, rohecha ko’áĝa mba’éichapa Ñandejára oremoarandúkuri mbeguekatu umi py’amokõi tuichaite árape. Hesape oregueraha paso a paso umi aravo iñypytũvéva rupi. Ñandejára orepytyvõ rohecha haĝua peteĩ ánga repy tuichaveha upe plan japyra’ỹvape ambue tembiapo térã jehupyty terrenal-gui.
Peteĩ jeyve, ñañemoarandúvo umi akãmeguaa mba’asýpe ñanembosako’i ñañepytyvõ haĝua ñandejupe ha ambuekuéra oikotevẽvape. Umi ñemongeta ojepe’a ha isinsérova oipytyvõta ko téma ohupyty haĝua pe jesareko oikotevẽva. Opáicha, momarandu ou inspirasiõ ha rrevelasiõ mboyve. ko’ã py’ara’ã ndojehecha py’ỹiva ikatu ojehu oimeraẽvape ha ñambohovakuévo ndaikatúivaicha jasupera.
Peteĩha mba’e jaikuaava’erã ha’e nañaimeiha ñaneaño. Aikuave’ẽ peẽme tapeñemoarandu salud mental-pe pe Biblioteca del Evangelio sección Ayuda para la vida-pe. Ñemoarandu oguerúta ñeikũmby porãve, tuichave aceptación, poriahuvereko ha mborayhu. Ikatu omopokãve pe tragedia ha upévo ñanepytyvõ ñamongakuaa ha ña’ajdministra haĝua umi ñeha’arõ hesãiva ha jegueraha hesãivéva.
Che momarandu paha: tekotevẽ ñañangareko meme ojuehe. Jajoayhuva’erã ojupe ha pokãve ñañe’ẽ’api , especialmente ndoikói pya’éirõ jaipotaháicha. Ñaipytyvõva’erã ñane mitã ha mitãrusukuérape oñandu haĝua Jesucristo mborayhu hekovépe, hasyrõ jepe chupekuéra ojehayhu ijupe. Elder Orson F. Whitney, oservíva’ekue Cuórum de los Doce Apóstoles miembro ramo, ohekombo’e tuvakuérape mba’éichapa oipytyvõkuaa hikuái umi mitã ohasa’asývape: “Peñembo’e pende…mitãnguérare; ojejagarra atã hesekuéra nde fe reheve.”6
Py’ỹi ajepy’amongeta mba’épa he’ise jajejagarra hesekuéra jerovia reheve. Aguerovia he’iseha jajapo umi mba’e isensíllova ohechaukáva mborayhu, mirĩ, py’aporã ha rrespéto. He’ise jaheja chupekuéra tokakuaa irritmoitépe ha ñame’ẽ testimonio ñaipytyvõvo chupekuéra oñandu haĝua ñande Salvador mborayhu. Upéva oikotevẽ ñapensave hesekuéra ha pokãve ñandejehe térã ambuekuérare. Upéva he’ise heta jey ñañe’ẽ pokãveva’erã ha ñahendu heta, hetave. Jahayhuva’erã chupekuéra, ñamombareteva’erã ha py’ỹi ñamomba’eguasuva’erã iñeha’ã ojapoporã haĝua ha ijeroviareko haĝua Tupãndi. Ha ipahápe, jajapova’erã opa ikatumíva ñañemo’aĝui haĝua hesekuéra, ñañemo’aĝuiháicha Tupãre.
Opavave umi ombohovakévape hína personalmente umi akãmegua mba’asy, pejejoko atã pene konveniokuérare, napeñandúirõ jepe hína Tupã mborayhu. Pejapo opaite ikatumíva ha upéi “pepyta py’aguapýpe… pehecha haĝua Tupã salvasiõ ha Ijyva ojehechauka haĝua.”7
Atestifika Jesucristo ha’eha ñande Salvador. Ha’e ñandekuaa. Ha’e ñanderayhu, ha oñangarekóta ñanderehe. Ore familia jehasa’asy aja ahechakuaa Ha’e hi’aĝuieteha ñandehegui. Umi ipromesakuéra añetegua:
Ani pekyhyje, aime penendive ha eskúdota che,
Ha’égui Che pende Tupã ha sokórro peguerekóta;
ha pu’aka ha tekove ha py’aguapy ame’ẽta, …
Ha sálvo ivaívagui peẽ pepytáta.
Jaikuaávo mba’éichapa imbarete ñane pyenda, vy’apópe taja’e:
Pe ánga ohekava py’aguapy che arekóva,
Ndaipotái, ndahejaséi tembiapovaípe;
Che roguenohẽta pytũmbýgui tesaperãme, …
Ha akóinte amo’ãta tuicha mborayhúre!8
Jesucristo rérape. Amén