![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F39%2F73%2F39733e48bb8ac5153af577d05ae7c71cc5a815f6%2F39733e48bb8ac5153af577d05ae7c71cc5a815f6.jpeg/full/!250,/0/default)
Jeheka Jeroviapýpe Oñemyengoviava’ekue
Che a’invita opavavépe ñambotuicha meme hag̃ua ñande jerovia Cristo-re, omoambuénteva ohóvo opa umi Chupe ohekáva rekove.
Ary 1846 ñepyrũme, hetaiterei kuimba’e, kuña, ha mitã pionéro oho’akue kuarahyreike gotyo, Sion-pe. Ijerovia tuicha omokyre’ỹ ipy’aguasukuéra opa’ỹva. Algúnope g̃uarã, upe viáhe araka’eve ndopái, omanógui hikuái tapére. Ambuéva, ombohovakévo tuicha jehasa’asy, oñemotenonde jeroviápe.
Ha’ekuéra rupi, heta ñemoñare’aty rire, che familia oguerovy’a Jesucristo evanhélio añetegua jehovasakuéra.
Ambue mitãrusucha, añe’ẽtavare tenondeve che areko’akue 14 áño añepyrũvoguare amba’eporandu religión ha che jeroviáre. Ahákuri ambue religión-gua tupaópe oĩva che róga ypýpe, ha katu añanduva’ekue avisitaseha heta ambue tupao.
Peteĩ ka’aru, ahecha mokõi karia’y traje oscuro hũ ha corbata morotĩre oikéva che róga vesindáriope. Ko’ã mitãkaria’y ha’ete—ijespesialva.
Upe ára ko’ẽme ahechaa che vesína, Leonor Lopez-, ha aporandu chupe ko’ã mokõi kuimba’ére. Leonor he’i chéve ha’eha hikuái Jesucristo Tupao Santokuéra Ara Pahapegua misionero. Vy’ápe ha’e omombe’u chéve ifamilia oñemongaraihague Tupaópe peteĩ ary upe mboyve. Ohechávo añe’interesaha, Leonor che invita aikuaa hag̃ua misionero-kuérape ha pe Tupao rehegua.
Mokõi ára rire, añembyaty familia López-ndi aikuaa hag̃ua misionero-kuéra. Oñepresenta hikuái Elder John Messerly, Ogden, Utah-gua, ha Elder Christopher Osorio, Walnut Creek, California-gua ramo. Araka’eve ndacheresaráiva chuguikuéra.
Che arekógui 14 áñonte, Elder Messerly he’ijeyjey roho hag̃ua che rógape, oĩva ijykére, che sy oikuaa hag̃ua mba’épa chembo’e hína hikuái. Upépe, torýpe ha’e omyesakã ouha hikuái okomparti hag̃ua peteĩ mensáhe Jesucristo rehegua, ha ojerure che sýpe ikatúpa chembo’e hikuái. Mamá omoporã ha oĩ jepe orendive chembo’e aja hikuái.
Misionero-kuéra, primero ojerure Leonor-pe oñembo’e hag̃ua. Kóva opoko mbarete cherehe, iñembo’e ndaha’égui peteĩ ñe’ẽ oñememorisapyre ojerrepetíva, ha katu osẽva ikorasõgui. Che añandu añetehápe ha’e oñe’ẽha hína Itúva Yvagaguápe.
Upéi Misionero-kuéra orembo’e Jesucristo rehegua. Ha’ekuéra ohechauka peteĩ ta’anga Hesegua che impresionáva, ha’e rupi peteĩ Cristo oikovejey ha oikovéva ra’anga.
Okontinua hikuái, orembo’évo mba’éicha Jesús omoĩ’akue Itupao ára ymáme, Hendive iñakãme, doce apóstol-ndi. Ore mbo’e hikuái Apostasía rehegua—mba’éicha pe añetegua ha pe Cristo autorida ojepe’ava’ekue yvy árigui, Ijapostolkuéra omano rire.
Omombe’u hikuái oréve peteĩ mitãkaria’y 14 áño orekóvare, hérava José Smith, siglo 19 ñepyrũme, ovisitava’ekue heta tupao ohekávo pe añetegua. Ara ohasávo, José oñekonfundivéntema. Omoñe’ẽ rire Bíblia-pe, ñande ikatuha “ñaporandu Tupãme”1 tome’ẽ ñandéve arandu, José, jeroviápe ojapóvo, oho peteĩ yvyratýpe oñembo’e hag̃ua, ha oporandu hag̃ua máva tupaópe oikeva’erã.
Peteĩ misionero omoñe’ẽkuri José ñemombe’u mba’épa ojehu ha’e oñembo’évo:
“Ahechákuri peteĩ tesape pu’ã, kuarahýgui ojajaivéva, che akã’ariete; ha ko tesape oguejy mbeguekatu opyta peve che ári.
“… Opytávo che ári upe tesape, ahechákuri yvate che ári, mokõi Tekove, hesape ha iglória ndaikatúiva oje’e. Peteĩva oñe’ẽ chéve, cherenóivo che réra rupi, ha he’i, ohechaukávo ambuévape—Kóva ha’e che Ra’y Ahayhuetéva: Ehendu Chupe!”2
Upe lección aja, pe Espíritu okonfirma chéve heta añetegua.
Peteĩha, Tupã ohendu opa Ita’yrakuéra ñembo’e añete, ha pe yvága ojepe’a opavavépe—ndaha’éi mbovýpe añónte.
Mokõiha, Tupã pe Túva, Jesucristo, ha pe Espíritu Santo ha’e mbohapy tekove separádo, ojoajúva Ipropositokuérape “ojapo hag̃ua yvypóra inmortalida ha vida eterna”3
Mbohapyha, ñande jajejapo Tupã ra’angápe. Ñande Ru Yvagapegua ha Ita’ýra, Jesucristo, oguereko tete, to’o ha kangueguigua, ñandéicha, ha katu Ha’ekuéra ojeglorifikapyre ha hekoporãmbapyre, ha pe Espíritu Santo ha’e peteĩ tekove espíritu-guigua.4
Irundy, José Smith rupive, Jesucristo omoĩjey Iñevanhélio ha Tupao añetegua ko yvy ári. Sacerdocio autorida oñekonferi’akue Cristo apóstol-kuérape ojapo 2.000 ary, ha’e peteĩchagua sacerdocio oñekonferi’akue José Smith ha Oliver Cowdery-pe, Pedro, Santiago ha Juan rupive.5
Ipahápe, roikuaákuri ambue Jesucristo testamento-gui: Pe Mormón Kuatiañe’ẽ. Profetakuéra yma ohaiva’ekue, oñe’ẽ tavayguakuéra oiko’akuére América-pe, Jesús onace mboyve, hekove aja ha upe rire. Pévape jaikuaa mba’éicha ha’ekuéra oikuaa, ohayhu ha otupãitũ’akue Cristo-pe, ojehechauka’akue chupekuéra Salvador oikovejeýva ramo.
Pe Espíritu opoko pypuku cherehe aikuaávo Salvador he’iva’ekue chupekuéra: “Péina ápe, Che haʼe Jesucristo, profetakuéra otestifikahague outaha yvórape”.6
Misionero-kuéra ome’ẽ orevéve Mormón Kuatiañe’ẽ ore mba’erã. Romoñe’ẽ ha romoneĩkuri invitasiõ ojejuhúva Mormón Kuatiañe’ẽ pahápe, he’íva:
“Ha pehupyty vove koʼã mbaʼe, Che haʼese peẽme peporandu hag̃ua Tupã, pe Túva Ijapyraʼỹvape, Cristo rérape, añeteguápa koʼã mbaʼe; ha pejeruréramo korasõ añetépe, peipotáramo añetehápe, peguerekóvo jerovia Cristo rehe, haʼe ohechaukáta peẽme koʼãva añeteguaha, Espíritu Santo puʼaka rupive.
“Ha Espíritu Santo pu’aka rupive ikatúta peikuaa añetegua, opa mbaʼe rehegua”.7
Ohasáma 45 áño che sy ha che roikuaa ypyhague vy’a ha pu’aka oguerúva jareko hag̃ua jerovia Cristo-re. Ijerovia rupi Cristo-re, familia Lopez okomparti’akue ijerovia pyahu chendive. Ijerovia rupi Cristo-re, ko’ã mokõi misionero ohejava’ekue hóga Estados Unidos-pe, orejuhu hag̃ua chéve ha che sýpe. Ha’ékuri opa ko’ã angirũnguéra ojehayhúva jerovia, oñotỹ’akue ore pype peteĩ mostasa ra’ỹi jerovia rehegua, upe ára guive okakuaáva oiko hag̃ua chugui peteĩ yvyramáta ipu’akapáva, jehovasa ijapyra’ỹva rehegua.
Ko’ã ary ojehovasapyrépe, ore roikuaákuri, Presidente Russell M. Nelson he’i haguéicha: “Opa mba’e iporãva ko vida-pe—opa jehovasa orekóva signifikádo eterno—oñepyrũ jerovia reheve. Jahejávo Tupã ipu’aka ñande rekovépe oñepyrũ, jerovia reheve Ha’e oĩha dispuesto ñande guiá hag̃ua. Pe arrepentimiento añetegua oñepyrũ jerovia reheve, Jesucristo orekoha pokatu ñanemopotĩ, ñanemonguera ha ñanemombarete hag̃ua”.8
Che ainvita opavavépe ñambotuicha meme hag̃ua ñande jerovia Cristo-re, omoambue’akue che ha che sy ahayhuetéva rekove, ha omoambuénte ohóvo opa umi Chupe ohekáva rekove. Che aikuaa José Smith ha’eha pe Profeta de la Restauración, Presidente Nelson ha’eha ñande proféta ko aragua, Jesús ha’eha pe Cristo oikovéva ha ñane Redentor, ha pe Túva Yvagapegua oikove ha ombohovái opa Ita’yrakuéra ñembo’e. Atestifika ko’ã añeteguáre Jesucristo réra marangatúpe. Amén.