![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fe7%2F21%2Fe7212c757d809603bc1ab2556b9fad76ad37dada%2Fe7212c757d809603bc1ab2556b9fad76ad37dada.jpeg/full/!250,/0/default)
Ha’e hag̃ua peteĩ Cristo segihára
Ha’e peteĩ Cristo segihára he’ise ñañeha’ã ñamoĩ ñane rembiapokuéra, ñande reko ha ñande rekove ñande Salvador-ndi.
Che estudio personal Escritura-kuéragui, añeimpresiona Saulo de Tarso konversiõgui, upe rire ojekuaáva Pablo ramo, he’iháicha Biblia-pe.
Pablo ha’ekuri peteĩ kuimba’e omỹiva omuña hag̃ua tupao ha cristiano-kuérape. Ha katu yvága pokatu ha Jesucristo expiasiõ rupive, Ha’e iñambuepaite ha oiko chugui peteĩ umi Tupã siervo tuichavéva. Imodélo hekovépe ha’e Salvador Jesucristo.
Peteĩ umi imbo’epýpe Pablo oinvita umi corintios-pe, ha’e hag̃ua isegiharakuéra, ha’e voi ha’e haguére peteĩ Cristo segihára (tojehecha 1 Corintios 11:1). Kóva ha’e peteĩ invitación añete ha ovaléva Pablo époka guie ko’ág̃a peve: taha’e Cristo segihára.
Añepyrũ ajepy’amongeta mba’épa he’ise peteĩ Cristo segihára. Ha iñimportantevéva, añepyrũ añeporandu, mba’éicha ikatu a’imita chupe?
Ha’e peteĩ Cristo segihára he’ise ñañeha’ã ñamoĩ ñane rembiapokuéra, ñande reko ha ñande rekove ñande Salvador-ndi. Ha’e jajapyhy mba’eporã. Ha’e taha’e peteĩ Jesucristo discípulo añete.
A’estudia umi aspecto Salvador rekovégui ha añongatu, che mensaje párte ramo ko ára, irundy umi kualida añeha’ãva aimita ha akompartíva penendive.
Pe Salvador kualida peteĩha ha’e umilda. Jesucristo iñumildeitereiva’ekue hekove aja yvýpe. Yvagagua konsíliope, ohechakuaa ha oheja pe Tupã volunta toprevalese salvasiõ upe plan humanidad-pe g̃uarã. Ha’e he’i, “Túva, tojejapo ne volunta, ha taha’e nemba’e upe gloria akoiete g̃uarã” (Moisés 4:2).
Jaikuaa Jesucristo ombo’ehague umilda ha oñeumilla oglorifika hag̃ua Itúva.
Jaiko umildáre oguerúgui py’aguapy (tojehechaDoctrina y Convenios 19:23). Umilda ou gloria mboyve, ha ogueru Tupã favor ñande ári: “Peñesomete opavave peteĩva ambuépe ha peñemonde umildágui: Tupã ombohovái umi ijejapóvape, ha ome’ẽ gracia umi iñumíldevape” (1 Pedro 5:5). Umilda ogueru ñembohovái rory. Ha’e pe karácter joja fuente .
Elder Dale G. Renlund ombo’e:
Umi oñemomirĩva oguata hag̃ua Tupã ndive, imandu’a ñande Ru Yvagagua ha Jesucristo ojapova’ekuére hesekúera.
Jaha tekopotĩme Tupã ndive jaguatávo umilda reheve Hendie”(“Ejapo ijojáva, ehayhu poriahuvereko ha eguata umilda reheve Tupã ndive,” Liahona, Nov. 2020, 111, 109).
Pe Salvador kualida mokõiha ha’e py’aguasu. Apensávo Jesucristo 12 áño orekópe, oguapy Tupã templo-pe umi léipegua doctor-ndi ha ombo’évo chupekuéra umi mba’e divino, ahechakuaa Ha’e orekómaha, voiete Hekovépe, peteĩ py’aguasu porã sentido, peteĩ py’aguasu ijojaha’ỹva. Oimérõ jepe heta ohechaséva peteĩ imitãva oñembo’érõ umi léi rehegua doctor-re, ha’e ombo’e chupekuéra “ha’ekuéra ohenduháicha ha oporanduháicha chupe” (José Smith Traducción, Lucas 2:46[pe Lucas 2:46, nóta c]).
Roservi peteĩ misión de tiempo completo Misión Mbuji-Mayi República Democrática del Congo-pe 2016 guie 2019 peve. Ojejapoháicha viáhe misión-pe peteĩ tenda ambuégui ha’e karretéra rupive. Ojehu peteĩ fenómeno upe zona-re, bandido-kuéra oñearmáva kysére oike karretérape ha omyangekói umi viahérope.
Cinco misionero oviaháva peteĩ zona-gui ambuépe ovahápe hikuái ha’ekuri víctima ko’ã mba’égui. Ha’eva’ekuéramo víctima ko fenómeno-gui sapy’ánte, roñepyrũ rokyhyje opa ore rekove ha segurida-re, uvei roduda roviahátapa umi tapére rovisita hag̃ua misionero-kuérape ha rojapo conferencias de zona. Ndoroikuaái mboýpa hi’aréta. Ajapo peteĩ informe, amboúva Presidencia de Área-pe, ha amombe’u kyhyje sentimiento rorekóva roviaha hag̃ua upe tapénte oĩgui rog̃uahẽ hag̃ua ore misionero-kuéra rendápe.
Iñembohováipe, élder Kevin Hamilton, ha’éva ore presidente Área África Sudeste-pegua, ohai chéve: “Che konsého ha’e ejapo iporãve ikatuháicha. Nearandu ha eñembo’e. Ani peñemoĩ peẽ ni pene misionero-kuéra peligro-pe, ha katu upe jave pesegi tenonderã fe reheve. “Tupã nome’ẽigui ñandéve kyhyje espíritu; ha katu pu’aka, ha mborayhu, ha peteĩ apytu’u hesãiva’ (2 Timoteo 1:7).”
Ko ñemoñe’ẽ tuicha oremombarete ha opermiti oréve rokontinua roviaha ha roservívo py’aguasúpe ore misión paha peve rohendúre Túva Yvagagua dirección ko’ã Escritura pasaje rupive.
Escritura-kuéra ko’ag̃aguápe, jalee umi profeta José Smith ñe’ẽ inspirádo ohechaukáva Ñandejára ñemokyre’ỹ ñandéve g̃uarã: “Hermano-kuéra, nañakontinuamo’ãi piko peteĩ káusa tuichaitépe? Peñemotenonde, pejevyrãngue”. Ánimo, hermano-kuéra; ha jaha tenonderã, victoria-peve!” ( Doctrina ha Konveniokuéra 128:22).
Tañandepy’aguasu jajapo hag̃ua iporãva, uvei ha’éramo jepe impopular, upe py’aguasu ñadefendévo ñande fe ha jajapo fe reheve. Tajareko valor ñañearrepenti hag̃ua ára ha ára, py’aguasu ja’aseptávo Tupã volunta ha ñaneñe’ẽrendu Imandamientokuérare. Tajareko py’aguasu jaiko jojávo ha jajapo oñeha’arõva ñandehegui umi heta ñande responsabilida ha posición-kuérape.
Pe Salvador kualida mbohapyha ha’e perdón. Iministerio terrenal aja, Salvador ndohejái peteĩ kuña ojepillava’ekue oporomoakãratĩvo tojeita’api. Ha’e onkarga chupe “tereho, ha anive repeka” (Juan 8:11). Kóva omomýi chupe arrepentimiento-pe ha ipahápe perdón, he’iháicha umi Escritura-pe, “pe kuña oglorifika Tupãme upe ára guie ha oguerovia hérape” (José Smith Traducción, Juan 8:11 [pe Juan 8:11, nóta c]).
Peteĩ devocional Navida aja diciembre 2018-pe, ñande presidente jahayhuetéva Russell M. Nelson oñe’ẽ irundy umi don jarresivívare Salvador-gui. He’i pe jopói oikuave’ẽva Salvador ha’eha upe kapasida ñeperdonarã:
Iñexpiasiõ opave’ỹva rupi, ikatu peperdona umi umi ojapovai’akuére penderehe ha ikatúva araka’eve oasepta upe responsabilida penendive.
“Akóinte, ndahasýi ñaperdona pe oheka añete ha umilda reheve ñane perdón Ha katu Salvador ome’ẽta peẽme kapasida peperdona hag̃ua oimeraẽ ojapovai’akue nderehe oimeháicha”(“Irundy don Jesucristo oikuave’ẽva[Primera Presidencia Devocional Navidagua, diciembre 2, 2018-pe], broadcasts.ChurchofJesusChrist.org).
Ñañoperdona añete ojupe ikatu hag̃uáicha jahupyty perdón Túvagui. Perdón ñanemosãso ha ñanemopotĩ japarticipa hag̃ua Santa Cena-gui opa domingo jave. Oñeikotevẽ perdón ha’e hag̃ua Jesucristo discípulo añete.
Pe Salvador kualida irundyha ha’e sacrificio. Upéva ha’e pe Jesucristo evangelio párte. Salvador ome’ẽ sacrificio tuichavéva Hekove ñanderehe ikatu hag̃uáicha ñanerredimi Oñandúvo sacrificio hasýva, ojerure Túvape toipe’a upe kópa, ha katu oho ipahaite peve upe sacrificio ijapyra’ỹva. Kóva ha’e Jesucristo expiasiõ.
Presidente M. Russell Ballard ombo’e kóva: “Sacrificio ha’e jehechauka mborayhu ipotĩvévagui. Mba’eichaite pevépa ñane mborayhu Ñandejárare, Evangelio ha ñande rapicháre ikatu oñemedi umi ñaimévare dispuesto jasacrifika hesekuéra” (“Umi sacrificio rovasapy,” Ensign, May 1992, 76).
Ikatu jasacrifika ñane tiempo ñaministra hag̃ua, jaservi ambuekuérape, jajapo iporãva, jajapo historia familiar rembiapo ha ñambotuicha ñane llamamiénto Tupaópe.
Ikatu ñame’ẽ ñane medio económico-gui japagávo diezmo, ofrenda de ayuno ha ambue donacion-kuéra oñemopu’ã hag̃ua Tupã rréino yvy ári. Ñaikotevẽ umi sacrificio-re ñañongatu hag̃ua konveniokuéra jajapova’ekue Salvador-ndi.
Che ñembo’e jasegívo Jesucristo-pe ha ja’aprovecha umi Iñexpiasiõ rovasapy, tañaneumildeve jahávo, tañandepy’aguasu, tajaporoperdonave ha tajajesacrifikave irréinore.
Atestifika ñande Ru Yvagagua oikoveha ha ñandekuaaha peteĩteĩme, Jesús ha’eha pe Cristo, presidente Russell M. Nelson ha’eha Tupãa proféta ko árape. Atestifika Jesucristo Tupao Santokuéra Ára Pahapegua haãeha Tupã rréino yvy ári ha ombosakoãiha Salvador jejujey mokõiha. Jesucristo rérape, ñane Redentor, Amén.