![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fda%2F7a%2Fda7a8b9c38eade24f1f1b3a136d5974b56b9336e%2Fda7a8b9c38eade24f1f1b3a136d5974b56b9336e.jpeg/full/!250,/0/default)
Tekove potĩ ndaha’éi tekove perfecto
Eñandúramo efrakasahague hetaite jey eñeha’ãramo jepe, nemandu’áke Cristo expiasiõ ha Igrásia rupi ikatúva ehupyty añeteguaha.
Peteĩ jey arahauka peteĩ mensáhe che rajy ha che yerno-pe aipurúvo pe función ñe’ẽmegua orekóva che teléfono. Che ha’ékuri, “Ha upéi, mba’éteko péime. Segúro pohayhuete.” Ha’ekuéra orresivi, “Ndapohayhuiete. Pohayhuva’erãmo’ã.” Ajépa jaguerovia’ỹ haguáicha mba’éichapa peteĩ mensáhe oĩporãva pya’ete oñeinterpreta vai? Péicha avei oiko jepi Tupã mensáhe arrepentimiénto ha dignida reheguáre.
Oĩ orresivíva ko mensáhe avýramo arrepentimiénto ha ñemoambue nañaikotevẽiha. Tupã mensáhe ha’e ko’ãva iñesensialha.1 Ha katu, ¿Tupã piko nañanderayhúi jarekóramo ñane mba’e’avy? ¡Añetehápe! Ha’e ñanderayhu porãite. Ahayhu che nieto-kuérape, opa imperfección reheve, ha katu péva nde’isei ndaipotaiha ha’ekuéra hekoporãve ha toiko chuguikuéra opa mba’e ikatúva. Tupã ñanderayhu ñande rekoveháicha, ha avei ñanderayhueterei ñandereja haĝua jaikove péichante.2 Jakakuaa Tupãme ĝuarã he’ise mortalida.3 Ñemoambue ha’e pe he’iséva Cristo expiasiõ; Cristo ndaha’éi ñanemoingovénteva, ñanemopotĩ, ñanembopy’aguapy, ha ñanemonguera, sino opa mba’e rire, Ha’e ikatu ñanemoambue jajoguave haĝua Chupe.4
Oĩ orresivi vaíva ko mensáhe he’iva ko arrepéntimiento ha’eha peteĩ evénto añónteha. Tupã mensáhe ha’e, Presidente Russell M. Nelson ombo’eháicha: “Arrepentimiénto … ha’e peteĩ proceso.”5 Arrepentimiénto ogueraha tiempo ha ñeha’ã jey jey,6 péicha avei umi tembiapovai jeheja7 ha ndajajaposevéima haĝua “mba’evai ha katu jajapomeméntema mba’e iporãva”8 ha’éva tekove pukukue jeporeka.9
Ko tekove ha’e peteĩ jeju ha jeho ñúre. Ndaikatúi ñaĝuahẽ ñaĝuahẽsehápe peteĩ gasolina tánkerente. Ñamyenyhẽva’ẽrã ñande tánke heta jey. Santa céna-pe jeparticipa ha’eta ñaĝuahẽ estación de servicio-pe. Ñañearrepenti ha ñambopyahúramo ñande konvéniokuéra, ña-promete ñaneñe’ẽrendutaha Hembiapoukapykuérare, ha Tupã ha Cristo ñanderovasáta Espíritu Santo rupive.10 Ipahápe, ñapromete jahátaha tenonde ñande raperãre, ha Tupã ha Cristo opromete omyenyhẽtaha ñane tánke.
Oĩ ohenduvaíva pe mensahe ha oimo’ã ha’ekuéra ndaikatuiha opartisipa porã ko Evanhéliope noĩmbai rupi libre umi jepokuaavaígui. Tupã mensahe ha’e tekove marangatu ndaha’éi tekove iperféctova.11 Tekove marangatu ha’e tekove ijapu’ỹva ha oñeha’ãva. Nañandejapúiva’erã Tupãme ha ñande líderkuéra sacerdocio-peguándi ha ambue tapicha ñanderayhúvandi,12 ha ñañeha’ãva’erã ñaneñe’ẽrendu Tupã rembiapoukapykuérare ha ani araka’eve ñane py’akangy ñanepysyrỹi jave.13 Élder Bruce C. Hafen ombo’e ojereko haĝua karácter Cristo orekóva “oñeikotevẽve paciencia ha perseverancia perfección rãngue.”14 Ñandejára he’i umi Espíritu don “oñeme’ẽha ohovasa haĝua umi chehayhúvape ha iñe’ẽrendúva che rembiapoukapykuérare, ha umi ojaposéva.”15
Peteĩ mitãrusu ahenóitava Damon ohai, “Akakuaa aja, cheguereko asy pornografía. Akóinte atĩ ndaikatuiha peve ajapo porã che rembiapokuéra.” Damon ipysyryĩ jave, oñeñanduvai’ete ohechakuaa asy peve iky’agueteriha ohupyty haĝua Tupã grásia, ha perdón térã oportunida jey ikatúva Tupã ome’ẽ. Ha’e he’i, “Che adecidi añeñanduvaíva’erãha ha opa árajave.” Aimo’ã Tupã ndacherayhúiha ndaikatúigui añeha’ãve asuperapa haĝua ko’ã mba’evai. Ohasa peteĩ semána ha heta jey peteĩ mes, ha upéi ha’a jey ha apensa, ‘araka’eve ndajapoporãmo’ãi, upévare mba’erã piko añeha’ãta?’”
Upe moménto ijetu’uve jave, Damon he’i ilíder sacerdocio peguape: “Ndahavéintemarãmo’ã tupaópe.” “Che kane’õma che róva mokõi haguere.”
Ombohovái chupe ilíder: “nde nande róva mokõi eñeha’ã rupi emboja’o nde rekove jepokua ivaíva.” Nderovamokõi remokañýramo, ndejapu térã reñaha’ãramo reñekonvense Tupao orekoha kúlpa ohupi yvatete haguére umi iñestándar. Ndaha’éi tovamokõi nandejapúiramo ne rembiapokuérape ha esegíramo tenonde. Péva ha’e peteĩ discípulo.”16 Pe líder ombo’e élder Richard G. Scott mbo’epy, “Ñandejára ohecha ambue tekove kangy ndaha’éiva ñemopu’ãháicha. …” “Ñandejára oñe’ẽvo tekovekangýgui, akóinte ojapo poriahuverekóre.”17
Upe perspectiva ogueru esperanza Damon-pe ĝuarã. Ha’e oikuaa, Tupã ñoimo’ãiha upépe he’i haĝua, “Damon ombyai jeýma.” Ha katu, oiméne Ha’e he’ita, “Emañami Damon moõite pevéma oĝuahẽ.” Ko mitãrusu naitĩndyvéima otĩgui térã oheka excusa ha justificacion-kuéra. Ha’e oheka ñepytyvõ yvatégui oúva, ha otopa.18
Damon he’i, “Ymave aheka jave Ñandejárape ha’e ajerure haĝua chupe perdón, ha ko’áĝa avei ajerure grásia—‘Ipokatu ñanemopotĩva’ [Biblia rehegua Diccionario, “Gracia”]. “Araka’eve nañandúiva’ekue ko’ã mba’e. Ko’ã árape sa’ive ahasa ndajehayhúihápe chejupe opa mba’evai ajapóvare ha hetave ára ahasa ahyhúvo Jesus-pe opa mba’eporã Ha’e ojapóvare cherehe.”
Ojehechávo Damon heta ára ohasaha oñorairõvo, sa’i oipytyvõ túva ha líderuéra he’ívo “araka’eve jey” pya’eterei térã omoĩ yvatete umi norma anive haĝua hembiapovai ojehecha haĝua chupe “ipotĩetemaha.” Uvei ha’ekuéra oñepyrũ omoĩ méta sa’i sa’i ikatúva ha’e ohupyty. Ha’ekuéra oheja umi espectativa opavave térã mba’evégui ha oñemoĩve umi jekakuaa mbeguekatúpe, upéva rupi Damon opu’ã ohupyty hetave éxito ofrakasa rãngue.19 Ha’e, umi Limhi isaso’ỹva tavapeguáícha, oikuaa ikatutaha “okakuaa mbeguekatu.”20
Élder D. Todd Christofferson omomarandu: “Jajapo haĝua umi mba’e túichai[véva], ikatu ñañepyrũ ñamba’apo sa’i sa’i. …. Ñamoñepyrũ haĝua jepokuaaporã pyahúre, térã jaheja haĝua jepokuaavai térã vísiore, ikatu ñaikotevẽ ñañeha’ã ko ára, upéi ko’ẽrõ ha upéi ambuépe, ikatu heta ára aja uvei mes ha áño. … Ha katu ikatu jajapo ñande jajeruréramo Tupãme … tañanepytyvõ ára ha ára.”21
Péichaite, hermano ha hermana-kuéra, ko pandemia COVID-19 hasy opavavépe g̃uarã, ha katu pe ógape jepyta ha’éva cuarentena restrisiõ ijetu’uve umi oñorairõvandihína jepokuaavaíndi. Pendemandu’áke ikatu ñemoambue ikatuha, arrepentimiénto ha’eha peteĩ proceso ha tekopotĩ ndaha’eiha tekove perfecto. Pe mba’eguasuvéva, pendemandu’ake Tupã ha Cristo ñanepytyvõse ko’áĝa ha ko’ápe.22
Oĩ ojavýva oimo’ãvo Tupã mensáhe ha’e oha’ãrõtaha ñanepytyvõ haĝua ñañe arrepenti rire. Tupã mensahe ha’e ñanepytyvõtaha ñañe’arrepenti ramo. Igrásia ikatu jahupyty “ñaime ñaimehápe ko ñe’ẽrendu rapére.”23 Élder Dieter F. Uchtdorf ombo’e: “Tupã noikotevẽi umi iperféctovare.” Ha’e oheka umi ome’ẽséva ‘ikorasõ ha apytu’ũ ha’evéva’ [Doctrina ha konvéniokuéra 64:34], Ha’e omohenda ‘porãta chupekuéra Cristo-pe’ [Moroni 10:32–33].”24
Heta oĩ ikorasõ ku’íva ha ohasa’asýva familia-kuéra relacion ojekáva térã oĩvaíva upévare hasýva chupekuérape ĝuarã ojerovia Tupã poriahuvereko ha py’aporãre. Oñeha’ã ohecha haĝua Tupã Ha’eha, peteĩ Tupã oporohayhúva ha ñandejuhúva ñaikotevẽ jave25 ha “ome’ẽta kuaa mba’e porã umi chupe ojerurévape.”26 Igrásia ndaha’éi peteĩ jopói imarangatúvape ĝuarã añónte. Pe “ñepytyvõ yvagagua” Ha’e ome’ẽ ñanepytyvõ haĝua ñanepotĩvévo. Ndaha’ei peteĩ jopói hekojojávape ĝuarã añónte. Ha’e pe “don imbaretéva” Ha’e ome’ẽva pe ñanepytyvõva ha ñanderekojoja haĝua.27 Ndajaguatái ñañe’año Tupã ha Cristo rapére. Ñande jaguata Hendivekuéra.28
Opa tupaóre mitãkuña ha mitãkaria’ykuéra orresita léma Mujeres Jóvenes ha cuórums Sacerdocio Aarónico-pegua. Nueva Zelanda-guie España-peve, ohasávo Etiopía ha Japón rupive, mitãkuñanguéra he’íjojáva: “Ahayhu pe arrepentimiento don.” Chile guie Guatemala peve ha Moroni, Utah, umi imitãva he’i, “Añeha’ãvo aservi, aipurúvo fe, añe’arrepenti ha che rekoporãve ára ha ára, ahupytýta templopegua jehovasa ha vy’a ojapyra’ỹva Evanhélio oguerúva.”
Che apromete ko’ã tovasapy ha vy’apavẽ opa umi iñe’ẽrendúva tembiapoukapykuérare ha “oñeha’ãva péicha ojapo haĝua.”29 Peñandu jave efrakasaha hetaite jey peñeha’ãramo jepe, pegueromandu’a Cristo expiasiõ ha grasiare ikatúva añetehápe pehupyty.30 “[Ijyva] poriahuvereko ojepyso aja peẽme.”31 Rejehayhu—ko árape, 20 áñope, ha opa ára ĝuarã. Jesucristo rérape, Amén.