Ang Pagkatakos Dili ang Pagkawalay Tatsa

Ni Bradley R. Wilcox

Ikaduhang Magtatambag sa Kinatibuk-ang Kapangulohan sa Young Men

Kon imong gibati nga napakyas ka sa makadaghang higayon aron padayon nga maningkamot, hinumdomi nga ang Pag-ula ni Kristo ug ang grasya nga gihimo niini nga posible kay tinuod.

Makausa nagpadala ko og mensahe sa akong anak nga babaye ug umagad nga lalaki gamit ang voice-to-text nga feature sa akong cellphone. Miingon ko, “Kumusta, kamong duha. Sigurado nga gihigugma ko kamo.” Ang ilang nadawat, “Nasilag ko ninyong duha. Kinahanglan higugmaon ko kamo.” Dili ba makapakurat kon unsa ka sayon nga ang usa ka positibo ug maayo og intensyon nga mensahe mahimong masayop og sabot? Mao kini ang mahitabo usahay sa mga mensahe sa Dios sa paghinulsol ug pagkatakos.

Ang uban masayop sa pagsabot sa mensahe nga ang paghinulsol ug pag-usab wala kinahanglana. Ang mensahe sa Dios mao nga kini mahinungdanon kaayo.¹ Apan dili ba ang Dios nahigugma kanato bisan pa man sa atong mga pagkulang? Siyempre! Siya nahigugma kanato sa hingpit. Akong gihigugma ang akong mga apo, apil ang ilang mga pagkadili hingpit ug tanan, apan wala kana magpasabot nga dili ko ganahan nga sila molambo ug mamahimo sa tanan nga sila angay nga mahimo. Ang Dios nahigugma kanato kon unsa kita, apan Siya nahigugma usab kanato og maayo nga gitugotan kita nga magpabilin kon unsa man ang atong pagka kita.² Ang magtubo ngadto sa Ginoo mao ang katuyoan sa mortalidad.³ Ang kausaban mao ang katuyoan sa Pag-ula ni Kristo. Si Kristo dili lang kay makapabanhaw, makalimpyo, makahupay, ug makaayo kanato, apan atol sa proseso sa pagkalimpyo, Siya makausab kanato aron nga mahimo nga mas mahisama Kaniya.⁴

Ang uban masayop sa pagdawat sa mensahe nga ang paghinulsol mahitabo sa usa ra ka higayon. Ang mensahe sa Dios mao nga, sama sa gitudlo ni Presidente Russell M. Nelson, “Ang paghinulsol … usa ka proseso.”⁵ Ang paghinulsol mahimong magkinahanglan og panahon ug balik-balik nga paningkamot,⁶ busa ang pagpahilayo gikan sa sala⁷ ug ang pagka “wala nay hilig sa pagbuhat og da[o]tan, apan sa pagbuhat og maayo sa kanunay”⁸ mga tinguha sa tibuok kinabuhi.⁹

Ang kinabuhi sama sa usa ka layo kaayo nga biyahe libot sa tibuok nasod. Kita dili makaabot sa atong destinasyon sa usa lang ka tangke nga gasolina. Kita kinahanglan nga magbalik-balik og patubil. Ang pag-ambit sa sakramento sama sa paghunong sa gasolinahan. Samtang kita maghinulsol ug mobag-o sa atong mga pakigsaad, kita mosaad sa atong kaandam sa paghupot sa mga sugo, ug ang Dios ug si Kristo mopanalangin kanato sa Balaang Espiritu.¹⁰ Buot ipasabot, kita mosaad nga magpadayon sa unahan sa atong panaw, ug ang Dios ug si Kristo nagsaad sa pagtubil sa atong tangke.

Ang uban masayop sa pagdawat sa mensahe nga sila dili takos sa pagsinati sa mga panalangin sa pagsunod sa ebanghelyo tungod kay sila dili hingpit nga nakalingkawas sa daotan nga mga gawi. Ang mensahe sa Dios mao nga ang pagkatakos dili ang pagkawalay tatsa.¹¹ Ang pagkatakos mao ang pagkahimong matinuoron ug mapaningkamoton. Kita kinahanglan nga magmatinuoron sa Dios, mga lider sa pagkapari, ug sa uban kinsa nahigugma kanato,¹² ug kita kinahanglan nga maningkamot sa paghupot sa mga sugo sa Dios ug dili mohunong tungod kay kita nasayop.¹³ Si Elder Bruce C. Hafen miingon nga ang pagpalambo og Kristohanong kinaiya “nanginahanglan og pasensiya ug paglungtad labaw pa sa panginahanglan niini sa pagkawalay tatsa.”¹⁴ Ang Ginoo miingon nga ang mga gasa sa Espiritu “gihatag alang sa kaayohan niadto kinsa nahigugma kanako ug naghupot sa tanan nakong mga sugo, ug siya nga nangita sa mao aron sa pagbuhat.”¹⁵

Usa ka batan-ong lalaki nga akong tawgon og Damon misulat: “Nagdako ko, nga nanglimbasog sa pornograpiya. Ako kanunay nga mibati og dakong kaulaw nga dili nako mahimo ang mga butang nga maayo.” Sa matag higayon nga si Damon makahimo og sayop, ang kasakit sa pagmahay grabe kaayo, nga iyang gihukman ang iyang kaugalingon nga dili takos sa bisan unsa nga matang sa grasya, pagpasaylo, o dugang nga mga kahigayonan gikan sa Dios. Siya miingon: “Ako nakadesisyon nga angayan ra gayod ko nga mobati og dili maayo sa tanang higayon. Akong nahunahunaan nga ang Dios tingali nasilag kanako tungod kay dili ko ganahan nga molihok og maayo aron nga permanenteng mabuntog ang tentasyon. Makahimo ko og usa ka semana ug usahay gani usa ka bulan, apan human niana mobalik na usab ko og dayon maghunahuna, ‘Wala na gayod koy ayo, mao nga unsa man ang kapuslanan sa pagpaningkamot?’”

Usa sa mga higayon nga siya mibati nga nawad-an og paglaom miingon si Damon sa iyang lider sa pagkapari: “Tingali kinahanglan na ko nga moundang sa pagsimba. Gikapoy na ko sa pagka hipokrito.”

Ang iyang lider mitubag: “Dili ka hipokrito tungod kay ikaw adunay bati nga gawi nga imong gipaningkamotan nga mahunong. Ikaw hipokrito kon imo kining itago, mamakak bahin niini, o mosulay sa pagkumbinser sa imong kaugalingon nga ang Simbahan adunay problema tungod sa pagmintinar nianang taas nga mga sumbanan. Ang pagkahimong matinuoron bahin sa imong mga lihok ug paghimo og mga lakang aron moabante dili pagkahimong hipokrito. Kini mao ang pagkahimo nga disipulo.”¹⁶ Kini nga lider mikutlo ni Elder Richard G. Scott, kinsa mitudlo: “Lahi ang pagtan-aw sa Ginoo sa mga kahuyang kay sa pagtan-aw Niya sa pagsupak. … Kon ang Ginoo maghisg[o]t bahin sa mga kahuyang, kanunay inubanan kini sa kaluoy.”¹⁷

Kana nga panglantaw naghatag ni Damon og paglaom. Nakaamgo siya nga ang Dios wala didto sa ibabaw nga mosulti, “Si Damon napakyas na usab.” Imbes, Siya tingali moingon, “Tan-awa kon unsa na kadako ang paglambo ni Damon.” Ang batan-ong lalaki sa kataposan mihunong sa pagduko tungod sa kaulaw o paglingi-lingi aron mohimo og mga pasumangil o mga pangatarongan. Mihangad siya alang sa balaang tabang, ug siya nakakaplag niini.¹⁸

Si Damon miingon: “Ang bugtong higayon nga miduol ko sa Dios sa nangagi mao ang pagpangayo og pasaylo, apan karon nangayo usab ako og grasya—ang Iyang ‘makapatugot nga gahom’ [Bible Dictionary,“Grace”]. Wala pa nako kana mabuhat sukad. Karong mga adlawa naggahin ko og mas gamay nga panahon sa pagkasilag sa akong kaugalingon tungod sa unsay akong nabuhat ug mas daghan pa nga oras sa paghigugma ni Jesus tungod sa kon unsay Iyang gibuhat.”

Kon ikonsiderar ang gitas-on sa pagpanlimbasog ni Damon, dili makatabang ug dili reyalidad alang sa mga ginikanan ug mga lider nga miabag kaniya nga dali kaayo nga mosulti og “dili na gyod mausab” o sa mopasagad lang sa paghimo og pipila ka sumbanan sa paglikay aron makonsiderar nga “takos.” Imbes, sila nagsugod sa gamay, daling makab-ot nga mga tumong. Gitangtang nila ang tanan-o-wala nga mga gilaoman ug mitutok sa hinay-hinay nga paglambo, diin mitugot ni Damon nga makatukod og nagsunod nga mga kalamposan imbes nga mga kapakyasan.¹⁹ Siya, sama sa naulipon nga katawhan ni Limhi, nakat-on nga siya mahimong [mo]uswag sa hinay-hinay.”²⁰

Si Elder D. Todd Christofferson mitambag: “Aron makasagubang sa dako [kaayo] nga butang, tingali kita kinahanglang magtrabaho niini sa ginagmay, inadlaw nga mga paagi. … Ang paglambigit sa bag-o ug maayo nga mga naandang buhaton ngadto sa atong kinaiya o pagbuntog sa dili maayo nga mga naandang buhaton o mga pagkaadik [labing] kasagaran nagpasab[o]t nga usa ka paningkamot karon nga pagasundan sa lain pagkaugma ug dayon sa lain, tingali sulod sa daghang mga adlaw, gani mga bulan ug mga tuig. … Apan ato kining mabuhat tungod kay makapangamuyo kita sa Dios … alang sa tabang nga gikinahanglan nato sa matag adlaw.”²¹

Karon, mga kaigsoonan, ang COVID-19 nga pandemya dili gayod sayon alang ni bisan kinsa, apan ang pagkahibulag nga may kalabotan sa mga restriksyon sa quarantine labing nakapalisod sa kinabuhi alang niadtong nakigbisog sa dili maayo nga mga gawi. Hinumdomi nga ang kausaban posible, ang paghinulsol usa ka proseso, ug ang pagkatakos dili ang pagkawalay tatsa. Labing importante, hinumdomi nga ang Dios ug si Kristo andam nga motabang nato dinhi mismo ug karon.²²

Ang uban masayop sa pagsabot sa mensahe nga ang Dios maghulat sa pagtabang hangtod human kita maghinulsol. Ang mensahe sa Dios mao nga siya motabang kanato kon kita maghinulsol. Ang Iyang grasya anaa alang kanato “bisan asa pa kita diha sa dalan sa pagkamasul[o]ndon.”²³ Si Elder Dieter F. Uchtdorf miingon: “Ang Dios wala magkinahanglan sa mga tawo nga walay tatsa. Siya nangita niadtong kinsa mohalad sa ilang ‘kasingkasing ug sa usa ka andam nga hunahuna’ [Doktrina ug mga Pakigsaad 64:34], ug Siya mohimo nila nga ‘hingpit diha ni Kristo’ [Moroni 10:32–33].”²⁴

Daghan kaayo ang nasakitan tungod sa nabungkag ug naabusahan nga mga relasyon mao nga lisod alang nila nga motuo sa kaluoy ug pagkamainantoson sa Dios. Sila nanlimbasog sa pagkakita sa Dios kon unsa Siya—usa ka mahigugmaon nga Amahan kinsa motabang kanato sa atong mga panginahanglan²⁵ ug nakahibalo unsaon sa “[pag]hatag sa mga maayo nga butang ngadto kanila nga mangayo kaniya.”²⁶ Ang Iyang grasya dili lang usa ka premyo alang sa mga takos. Kini mao ang “balaang panabang” nga Iyang gihatag nga motabang kanato nga mahimong takos. Dili lang kini usa ka ganti alang sa mga matarong. Kini mao ang “gasa sa kalig-on” nga Iyang gihatag nga motabang kanato nga mahimong matarong.²⁷ Dili lamang kita naglakaw padulong sa Dios ug ni Kristo. Kita naglakaw uban Kanila.²⁸

Sa tibuok Simbahan, ang batan-ong mga tawo nag-recite sa mga Tema sa Young Women ug sa Korum sa Aaronic nga Pagkapari. Gikan sa New Zealand ngadto sa Spain ngadto sa Ethiopia ngadto sa Japan, ang mga batan-ong babaye moingon, “Akong hatagan og bili ang gasa sa paghinulsol.” Gikan sa Chile ngadto sa Guatemala ngadto sa Moroni, Utah, ang mga batan-ong lalaki moingon, “Samtang maningkamot ko sa pagserbisyo, magbaton og pagtuo, maghinulsol, ug maglambo sa matag adlaw, ako mahimong angayan sa pagdawat sa mga panalangin sa templo ug sa malungtar[o]ng kalipay sa ebanghelyo.”

Ako mosaad nga kadto nga mga panalangin ug hingpit nga kalipay tinuod ug makab-ot ra gayod alang niadtong naghupot sa tanan nga mga sugo ug “kaniya nga nangita sa mao aron sa pagbuhat.”²⁹ Kon imong gibati nga napakyas ka sa makadaghang higayon aron padayon nga maningkamot, hinumdomi nga ang Pag-ula ni Kristo ug ang grasya nga gihimo niini nga posible kay tinuod.³⁰ Ang “[Iyang] bukton sa kal[u]oy gitunol nganha kaninyo.”³¹ Ikaw gihigugma—karon, sa 20 ka tuig, ug hangtod sa kahangtoran. Sa ngalan ni Jesukristo, amen.