Angangen Misineri A Efeiochu Manauei Feinfeino
Ua iotek pwe ami anuon me fopun me sememi me inemi oupwe kuna me sinei ifa usun angangen misineri epwe efeiochu manauemi feinfeino.
Kinisou, Preseten Nelson, ren om oporousa sefani ngenikich ena kapasen ourour usun angangen misineri.
Pwi me fefinei, ekkoch ier a no nupwen ai afanafan non mwichenap, ai kuna me non peniefefinen mesei a mwitir tori ew semwenin non mas, minne a ngaweno mwirin me use chiwen tongeni kuna me non ena mas.
Nupwen ai ua achocho ngeni ai upwe tou seni ei osukosuk, ngang ua unusen kinisou ren ekkoch sokkun nemesepwi, mi pachenong nemesepwi ren ekieki me nom me ekieki met ururun upwe fori pun epwe epeti osukosuken ei fansoun . Nupwen ua nenesefaniti non manauei, ua fen tufichin kuna ekkoch mettoch mi fis minne ra fori ew popun sokofesen. Ew me nein ekkei mettoch mi fis ifa usun ai angangen misinieri non England nupwen ai we emon anuon a efeiochu manauei me anapanapa nonnomui non pekin ngun.
Ua fen ekiek sefani ifa usun ewe osukosuken pekin moni mi akoko ngeni ewe Watten Netipengaw non ekkewe ier1930 a emwen ngeni ew ukukun osupwang ngeni semei me inei me am we famini. Semei we a unusen chok weires an epwe weweiti ne tumunu an pekin amomo taraku me anisi an famini non ei aweiresin fansoun ina minne ren ew mwochomochen fansoun semei me inei we rese fiti fan.
Ika mo am ewe famini ese fiti fenin mwichefen, ena ese epeti seniei ai upwe fiti chienei kewe ne fiti fan fan ekkoch.
Non ekkena ran, feinno ngeni angangen misineri ngang mi mochen fori nge ese pochokun ai ekieki, nge esap ew mettoch ua kapas usun ngeni semei me inei.
Nupwen ua fiti college, ngang me ekkoch chienei aua finata aupwe angangen misineri. Ua churi nei we pisop, ua amwosowa nei we toropwen misineri nupwen inei me semei ra no seni ewe town. Nupwen semei me inei kewe ra niwin, ua amairur ren ewe porous pwe ua fen kokko ngeni ai upwe no angangen misineri non Great Britain. Ua men kinisou ren ar chengenin aninis ren met ua finata, me ren chiechiei mi och ekewe ra anisiei ne finata ai upwe angangen misineri.
Ai angangen misineri a amonnaeita ai upwe emon murinon mwan mi pupunu me emon sam me ai upwe fetanoch non business. A pwan amonnaeita ren ew angang ai upwe angang ngeni ewe Samon non An Mwichefen ren unusen manauei.
Non ewe Mwichenap April 1985, ra ewisa ngeni ai upwe kapas non ewe mwichen pristut. Ua awena ai kewe kapas ngeni ekkewe anuon. Ua kapas usun amonnetan angang usun emon misineri. Ua apasa, “Me nein ekkewe pekin kaeo ua angei non wisei non Mwichefen, ese wor ew a kon auchea ngeniei nap seni ewe pekin kaeo ua angei ai we emon elter engon me tiu ieri ai angangen misin.”1
Ewe Samon mi sinek. Nupwen ka anganga om misin, kopwe weri mettoch minne epwe anisuk om kopwe sineochu I. Kopwe marita non pekin ngun non om angang ngeni I. Non Itan, repwe tinukono om kopwe fori angang ngeni ekkoch. I epwe ngonuk mettoch epwe fis fiti ourour seni ewe Ngun mi Fel. Ewe Samon epwe mutata om kopwe afanafan non Itan. En mi tongeni pwar ngeni I pwe I mi tongeni nukuk me anongonong wom.
Nap seni nimu maram a no, Elter Jeffrey R. Holland me Elter Quentin L. Cook, ir repwan angangen misineri non ekkewe fonuen Britain, ra fitiei ne churi ekkewe chon Mwichefen me misineri non ena ningeochun fonu. Nupwen am nom ikewe, ua ekiek sefaniti won ekkewe mettoch a fis ngeniei nupwen ai anuon misinieri. Ua pwarata pwe ai ewe misin ikana ia ewe ua sinei pwe Semei won Nang me ai Chon Amanau Jises Kraist ir mi sinei ei me tongei ei.
Uwa feioch pwe a wor ruemon nei presetenin misin., Selvoy J. Boyer me Stainer Richards, fiti chiener kewe mi nikitu non wiser Glady Boyer me Jane Richards. Nengensefaniti, ua tongeni kunaochu pwe ir mi nukuei me tongeiei. Ra aitiei ewe kapas allim. Ra witiwiti chommong seniei. Ra ngeniei chommong wis mi aweires me wisen emwen sou emwen an epwe anisiei ai upwe marita me monneta ngeni ew manauen angang.
Ua pwan chemen sefani ai kokko me ren Preseten Spencer W. Kimball ai upwe nemenem won ewe Canada Toronto Misin fiti punuwei we achengicheng, Barbara, me noum kewe ir mi fitikem. Preseten Kimbal a kori kem am aupwe angang non April 1974, ekis chok fansoun mwirin an awora an ewe afanafan usun misineri itenapan “Nupwen ewe Fonufan Epwe Siwin.”2 Non ena porous Preseten Kimball a awewei an nemesepwi ren ifa usun ewe kapas allim epwe no ngeni unusen ewe fonufan. A kokkori pwan chommong misineri seni unusen fonufan. A achema ngenikich usun an ewe Samon witiwit“pwe mwan meinisin repwe … apasata ew mwongungun ammon ngeni chon fonufan meinsin.”3 An Preseten Kimball afanafan usun witiwit fan iten ekkewe anuon ar repwe feinno fori angangen misineri winiti eu itenapen non aporous non imw won unusen fonufan. Ena witiwit esamo siwin. Ua men kinisou pwe Preseten Nelson a pwan apungano sefan an ewe Samon awitiwit non ei soran.
A arap ngeni 10 ier seni ewe atun Preseten Thomas S. Monson a esinei usun kekisitiwen ierin misineri ren anuon me fopun.4 Non ai nenengeni, ew aucheanapen popun ei siwin an epwe awora ngeni chommong nouch sarafo ewe tufichin siwini manau ar repwe angangen misineri.
Ren wisei emon Aposel fan iten ewe Samon Jises Kraist, iei ua kokkori kemi anuon—me ekkewe fopun ra mochen anganga ew misin—oupwe poputa iei ne porous ngeni sememi me inemi usun angangen ew misin. Ua pwan tingorei kemi pwe oupwe kapas ngeni chienemi kewe usun angangen ew misin, me ika emon nein chienemi kewe ese kon fat usun misin, peser ar repwe kapas ngeni nour pisop.
Pwon ngeni kemi me ngeni Samach won Nang pwe oupwe anganga ew misin me seni ei fansoun feino oupwe achocho ne tumunu netipemi, poumi, me ami ekiek repwe nimenimoch me fich ngeni. Ua tingorei kemi oupwe angei ew pochokunen kapasen pwarata usun ewe kapas allimen Jises Kraist mi niwinsefanito.
Semen me inen ekkei murinon serafo, mi wor wisemi mi auchea non ei angangen amonnata. Poputa ikenai oupwe porous ngeni noumi kewe semirit usun angangen misineri. Sia sinei pwe ewe famini ina ewe akkaewin pochokunen aninis ngeni nouch anuon me fopun ne monnata.
Ika ami mi chiwen nom non ewe kinikinin ierin angangen misineri nge ousa mwo fori angangan pokiten ewe pandemic ika ekkoch popun, ua tingor oupwe anganga iei. Porous ngeni noum ewe pisop, me monneta ar repwe fori ewe angang ngeni ewe Samon.
Ua pesei kemi pisop ami oupwe anisi anuon me fopun meinisin ekkewe ra arap ngeni ierin misineri pwe repwe monneta ar repwe fori ewe angang, me ua pwan pesei kemi pisop oupwe esinna ekkewe a tori ierir nge resamo fori ewe angang. Tingorei emon me emon anuon an epwe winiti emon misineri, me pwan emon me emon fopun epwe mochen fori ewe angang.
Ngeni ekkewe misineri ami oua angang iei, sia kinisou ngenikemi. Ami misin a fis fansoun ei semwen mi fis unusen fonufan. Iwe pungunon, nonnomun ami misin rese usun ai we misin ika nonnomun ekkewe misineri ra anganga ei angang me mwen 2020. Ngang mi sinei ese mecheres. Nge pwan mwo non ekkei fansoun weires, a fen wor ew an ewe Samon angang fan itom om kopwe fori, me ka fen aweseochuono. Ren awewe, oua nounou technology non ekkoch napanap ne kutta ekkewe ra monneta ne kaeo usun ewe Niwinsefaniton ewe kapas allimen Jises Kraist. Nupwen oupwe nikitu ne angang me anongonong won ami tufich, ngang mi sinei pwe ewe Samon a pwapwa ren ami achocho. Ngang mi sinei pwe om angang epwe efeiochu manauom.
Nupwen ka wes seni om misin, chechemeni pwe kose wes seni mwokutukut non ewe Mwichefen. Oueta won ekkewe murinon oruni ka kaeo me non om misin, sopweno ne apochokuna om kapasen pwarata, angang weires, iotek, me aneasosich ngeni ewe Samon. Afona ekkewe pwon mi pin oua fen fori. Sopweno ne efeiochu me angang ngeni ekkoch.
Ua iotek pwe ami anuon me fopun me sememi me inemi kewe oupwe kuna me sinei ifa usun angangen misineri epwe efeiochu manauemi feinfeino. Amwo oupwe sinei non ami ekiek me mefi non netipemi ewe manamanen ewe tingor ewe Samon a ngeni ekkewe murinon misineri noun Mosaia. A apasa, “Feino … me forano ai kapas; nge inamo oupwe nikitu non nakatamen riaffou me weires pwe oupwe pwarano murinnon nenien appiru … non ngang, iwe upwe fori ew pisekin aninis senikemi me non pei non amanauen chommong aramas.”5
Amo Kot epwe efeiochu ekkewe sarafon ewe Mwichefen ar repwe mochen ne amonata me angang ngeni I ina ai tekisosonun iotek, minne ua awora non ei soran non iten ewe Samon mi pin Jises Kraist, amen.