Echikara ewe Fonufan
Kinas me sokofesen ra tongeni chikar nupwen sia eningano Kot, ewe Sam ngeni kich meinisin, me Jises Kraist, Noun At.
Pwi me fefinei, non ei fansoun Paska mi unusen ningoch sia fokkun feioch ne churi me angei pesepes me emwen seni noun Kot kewe chon angang.
Emwen me asukun mi pin seni Samach won Nang a anisi ne emweni manauach non ekkei fansoun mi uren efeiengaw. Usun ekkewe osini, “ekei, me sosot,” “mwoun, osukosuken mwoun, me ekkewe chechin fonu,” “me ekkewe sokkun ngaw,”1 “semwen,”2 “nengita, me wonungaw”3 ra eriafou famini, choo, me fonu meinisin.
Mi pwan wor ew a pwan eriani unusen fonufan: a efeiengawa om me ai pusin finata ren namanam. A wateno ei napanapen kuta an epwe wau namanam me nuku non Kot me non ekkewe nenien mwicheichen aramas, sukun, nonomun choo, me pekin kaeo. Sokonon ewe pusin finata ren namanam ra kuta ar repwe amonano met ekkewe memefin netiper. Rapwan esita me asokano ekkewe orenien nuku.
Sokun manauen aramas, an emon me emon nongonong, sokofesen, sufon, manauen ngun, me kinamwen nonomun emon.
Met pusin finata ren namanam?
Ew pusin finata ne pin ngeni non sokkun napanap meinisin: pusin finata ren emwicheichen aramas, pusin finata non met ka mochen apasa, pusin finata ren fofforun an emon me emon nuku, me pusin finata ren an ekkoch pwan fori usun. Pusin finata ren namanam a mut ngeni emon me emon kich ren ach nuku, usun nonomuch, me ach foffor anongonong won ach nuku, me met Kot a mochen rech.
Ach angangen ekisano mokutun mwichefen esapw och mettoch mi minafo. Non unusen osini, aramas mi wor ar nuku ra riafou ren mokutun ekkoch. Memperun Ewe Mwichefenin Jises Kraist ren Aramas mi Pin non Fansoun Soponon rese sokono.
Seni nepoputan, chommong chon kuta Kot ra feito ngeni ei Mwichefen pokiten ekkewe afanafan usun ekkewe annuk mi pin, pachenong nuku non Jises Kraist me An we Achasefan, aier, ewe kokoten pwapwa, me ewe Oruwen Niwinsefanito an ach Samon.
Sokofesenin, nini, me osukosuk, ngeni nouch we aewin soufos non fansoun soponon, Joseph Smith, me chiechian kewe.
Nukanapen ewe osukosuk non 1842, Joseph a pwarata 13 nongonongen nuku ren maritan ewe Mwichefen, pachenong ei eu: “Sia pwarata pwe ei tufichin pin ngeni ewe Kot mi tekia anongonong won met sia nuku me weweiti, me mut ngeni meinisin aramas ei tufich, mut ngenir repwe pin ren ifa usun, ian, ika met ra mochen.”4
Non an kapas a pachenong mettoch meinisin, pichino, me sufon. Ina ewe auchean pusin finata ren namanam.
Ewe Soufos Joseph Smith a apasau:
“Ua pochokun ne pwarata mwen Nang pwe ua fen moneta ai upwe mano non ai epeti met mi pung ren eu Fenin Presbyteria, eu paptis, ika emon aramas mi och seni eu me nein ekkewe mwichefen; ren pwan ewe chok nongonong mine ra okufatiw ewe pung ren ekkewe … Souneng ra okufatiw ewe pung ren ekkewe chon Rom katinik, ika seni ew me ew ekkewe mwichefen mine ese pwan fat me mi apwangapwang ar repwe tumunur.
“Iei ewe tongen pichino [a] anisi nguni—pichinon mwuun me namanam ngeni mwokutun unusen aramas meinisin.”5
Iei, ekkewe souneng akom ra nini me towaweno non ngorou mwain, seni New York ngeni Ohio ngeni Missouri, ikewe ie ewe mwuun ra wau ewe annuk pwe sounengin ewe Mwichefen “repwe winit chon .”6 Ra su ngeni Illinois, nge ewe riafou mi chok sopwosopwono. Ew mob ra nieno ewe Soufos Joseph, ra ekieki pwe ar nieno epwe tano ewe Mwichefen me paras ekkewe chon nuku. Nge ekkewe chon nuku ra nukuchar. Mwirin Joseph Smith, Brigham Young, a achocho sopweno ne emwen non 1,300 mwain (2,100 km) ngeni otiw ngeni me ikenai iten ewe Fonuen Utah.7 Ai kewe newo ir chochon ekkewe akaewin souneng me akkom.
Seni ekkewe fansoun riafou, an ewe Samon ei Mwichefen a fokkun pochokun me napono a tori ukukun 17 million souneng, ren pochokun a nap seni esopw aramas ra nom nukun Fonuwen Merika.8
Non April 2020 ach Mwichefen a apwapwai ewe 200th achechemen ewe Niwinsefaniton ewe Kapas allim ren ew pwarata ngeni unusen fonufan, a amoneta seni nouch we Aewin Presetensi me Mwichen Engon me Ruemon Aposel. A poputa, “Aua ennetin pwarata pwe Kot mi tongei Noun semirit non muun fonufan meinisin.”9
Nouch achengicheng soufos, Russell M. Nelson, a pwan sopweno ne apasa:
“Sia nuku non ngaseno, kirekiroch, me fofforuch fan iten meinisin noun Kot kewe semerit.
“Kich meinisin pwipwi me momongeang, kich emon me emon noun ewe Sam won Nang mi uren tong. Noun At, ewe Samon Jises Kraist, a tingor ngeni meinisin repwe feito ren, ‘chon me pwech, fofo me pichino, mwan me fefin.’ (2 Nephi 26:33).”10
Fiti ei ne ekieki ruanu anen an mwichen aramas me emon me emon tufich seni pusin finata namanam.
Aewin. Pusin finata namanam ra epini ewe aewin me oruwen annuk mi nap, wanong Kot epwe nemeni non unusen manauach. Sia anea non Matthew:
“Kopwe tongei ewe Samon om Kot ren unusen nenukom, ren unusen ngunum o ren unusen om ekiek.”11
“Me ewe aruan annuk mi fokkun auchea usun ewe aewin, Kopwe tongei monun unukum ussun ka pwisin tongek.”12
Ese nifinifin ika non imwen fan, non sinakok, mosque, ika non imwen os, noun Kraist kewe chon kuno, me ekkewe chon nuku ra tongeni pwarano ar nuku non Kot ren ar pin ngeni I me pwapwaiti ne angang ngeni Noun semirit.
Jises Kraist ewe unusochun nenien apiru ren tong me angang. Non an we fansoun afanafan fetan, Amen tongei ekkewe mi osupwang,13 echikara mi semwen14 me mi chuun.15 A amongoni mi echik,16 etiwa ekkewe kukun semirit,17 me epichano ekkewe ra ngaw ngeni I, me ekkewe chon irapengesi.18
Ekkewe pukefel ra tichikietiw pwe Jises “a fori sokkun murino meinisin.”19 Iwe sipwe pwan.
Oruan. Pusin finata ren namanam an pesei fefeitan nuku, apinukunuk, me kinamwe.
Ren ew mwichefen, sia fiti ren ekkoch namanam ra tumunu aramas ren nuku meinisin me echimw, me ar pung ne kapas ren mefier. Ei esapw wewen nge sia etiwa ar nuku, ika ach, pwe mi chommong met sia taitap won nap seni ekkewe ra mochen ach sisapw kapas.
Ua keran chok tupuni ewe Mwichefen non ewe mwichen sokkun nuku meinisin G20 non Italy. Ua unusen pesepes, me chimweta, nupwen ua churi chon ewe mwuu me ekkewe souemwenin nuku non unusen fonufan. Ua mefi nge ekkewe kinas me sokofesen ra tongeni chikar nupwen sia eningano Kot, ewe Sam ngeni kich meinisin, me Jises Kraist, Noun At. Ewe Chon Echikar mi Nap ngeni meinisin ach we Samon me Chon Amanau, Jises Kraist.
A men ameseik non ewe fansoun ua asopwano ai we afanafan. Ekkewe fumon chon afanafan akom mwei rese asopwano non eu me nein ekkewe orenien nuku ika non iten ewe Kot. Nupwen ua kapas, ua ekieki, “Mwa upwene chok apasa kinisou me mwotiw, ika upwe asopwano ‘non iten Jises Kraist’?” Ua chechemeni ngang ion, me ua sinei pwe ewe Samon epwe mochen upwe apasa Itan non ai asopwano ai we kapas. Iwe ua apasa. Nesefaniti, ewe fansoun ai tufichin ai upwe pwarano ai nuku; me a wor ai pusin finata ren ai namanam ne pwarata Itan we mi pin.
Ounungatin. Namanam a anisi aramas ar repwe anisi ekkoch.
Nupwen namanam epwe wor an fansoun me pusin finata ne fori, chon nuku repwe fori mecheresin me fan ekkoch repwe fori angangen aninis. Ewe kapasen nom an chon Sus “tikkun olam,” wewen “siwin me echikara fonufan,” a kuna sokkun ikenai chommong ra fori. Sia chiechi ngeni Catholic Charities, ekkewe a fat pwe iter Caritas International, Islamic Relief, me ekkoch seni Jewish, Hindu, Buddhist, Sikh, me mwichen Souneng usun ewe Salvation Army me ewe National Christian Foundation. Chufengen sia anisi minion ekkewe ir mi osupwang, napengeni ekkewe pisekin mwoun ren tento, chotan anut, me peirakin mongo,20 me awora sokkun safei, pachenong polio21 me COVID.22 Ewe tetenin met afen wes amen tam, nge ikei met mi auchea.
Ese wor kapas eis, aramas mi nuku, angang fengen, a tongeni efista ew aninis mi amwarar. Pwan non ewe chok fansoun, ew me ew angangen aninis ese kon monefich ika sineno nge amen chok ekesiwin manauen aramas.
Ua ekieki ew nenien apiru non Luke nupwen Jises Kraist a anisi ewe ese wor punuwan. Jises, me nein ekkewe mwichen aramas, ra feito ngeni ewe angangen ireirenon noun ewe ese wor punuwan we anaemon at. Me nukun noun we at, a fokkun kuna netipengaw, non ngun, me pwan non an osupwangen mwoni. Jises, a kuna an mese kechiw, a apasa, “Kosapw kechiw.”23 Iwe A atapa ewe oponun porun mi ma a nom ewe inis non, me ekkewe chon anganga ra kouno.
“Anuon mwan,” A annuku me apasa, “Ua apasa ngonuk, Pwataa.
“Me ewe a mano a pwataa, me poputa ne kapas. Me [Jises] a uweano ren inan we.”24
Amanawata mi mano ew manaman, nge meinisin fofforun umoumoch me oureki ekkoch non ar riaffou ina ewe anen pwon emon me emon kich sia pwan tongeni “[fori] mi och,” pwarano pwe “Kot [mi] nonom [rech].”25
Me oruanun. Pungun finata namanam ra mokut ren ar ochufengeni me chufengen ne napanapen met mi auchea me namot.
Non ewe Testament Sofo sia anea usun chommong ra kunuseni Jises Kraist, ngunungunu an kewe annuk, “Iei a weires ne apasa; ion epwe tongeni rong?”26
Ena kechiw kich mi chok rongorong ikenai seni ekkewe ra kuta ar repwe towaw seni namanam ren met ra kuna me ar netipengaw. Ika namanam ese nom an epwe anisi me ekesiwini manauen aramas me chachari ekkewe fansoun weires, ion epwe? Ion epwe afanafana ennet, kinisou, omusano, me nikitu? Ion epwe ani ewe tong mi ennet, tong, umoumoch ngeni ekkewe mi mwanecheno me ekkewe mi turutiw? Ion epwe etiwa ekkewe ir mi sokono won ar weweiti, ngenir pun ir meinisin noun Kot semirit? Ion epwe suki poun ngeni ekkewe mi osupwang me rese mochen repwe angei niwinin ar angang? Ion epwe osufonu kinamwe me aneasosich ngeni ekkewe annuk nap seni ekkewe kokoten ikenai? Ion epwe ponueni an ewe Chon Amanau we tingor “Feino, me fori usun met ua fori”?27
Sipwe! Ewer, pwi me fefinei, sipwe.
Ua tingor om kopwe pochokun ne anisi ewe pungun finata namanam. Iei ew angangen pwarano ewe nongonongen finata meren- Kot.
Pungun finata namanam a wato anonnopokun aninis ngeni kich ach sipwe tongeni sokkun tipachem. Ewe ochun namanam, an aninis , me ewe fofforun tong iteitan mine namanam a anisi chommong nupwen sia tumunu ewe pung ne fori me angang won nongonongun ach nuku.
Ua pwarata pwe Russell M. Nelson i noun Kot soufos mi manau. Ua pwarata pwe Jises Kraist a emweni me tumunu ei Mwichefen. A mano fan iten ach tipis, a mano won ewe irapenges , me a manausefan mwirin unungat ran.28 Pokiten I, sia tongeni manau sefan ren manau ese much; me ekkewe ra mochen ra tongeni non ren Samach non Nang. Ei ennet ua pwarata ngeni unusen fonufan. Ua men kinisou ren ei pusin finata ua tongeni fori. Non iten Jises Kraist, amen.