Nukuchar non ekkewe Monumon
Nupwen ekkewe monumonun manau ra fis, en mi tongeni nukuchar pokiten en mi uta won ewe foun om nuku non Jises Kraist.
Achengicheng pwi me fefinei, sia fen feioch ikenai ach ausening ngeni noun Kot chon angang ar ngeni kich ourour me pesepes. Emon me emon kich, ian chok sia nom ia, mi sinei pwe sia nom non fansoun mi napeno efeiengaw. Ai iotek pwe amo epwe anisi kemi ne uta nukuchar non ekkewe monumon sia weri, fiti netip mi uren kinamwe.1
Ewe neni sipwe poputa me ia ina sipwe chechemeni pwe emon me emon kich i noun Kot achengicheng me mi wor Noun chon angang mi kefinita. Ekkena chon angang noun Kot ra fen osini usun ekkei fansoun sia nom non. Ewe Aposel Paul a makkei ngeni Timothy, “Kopwe chechemeni pwe epwe fakkun weires ekkewe fansoun non ekkewe ran nesoponon.”2
Ion mi wor ren mas ne kuna ekkewe esissinen ekkewe fansoun me sening an epwe rongorong kapasen ekkewe soufos mi sinei pwe mi ennet. Ekkewe osukosuken watten efeiengaw ra fis ngeni kich seni angangen fofforungaw. Ekkena angangangaw ra watteno. Iwe epwe kon weiresino, esap mecheresino, ne afona ekkewe pwon mi pin sipwe fori me apwonueta ach sipwe manaueni ewe kapas allimen Jises Kraist.
Ren kich ekkewe sia aureki pwisin kich me ekkewe sia tonger, mi wor apinukunuk non ewe pwon Kot a fen fori usun ew nenien tumun seni ekkewe monumon mwach.
Iei ew kapas mi awewei usun ena neni. Soufos mi manau ra fen anniwini ne anapanapa. Ren awewe, ren met a makk non ewe Puken Mormon, emon semenap mi uren mirit me tong a ereni noun kewe at ifa usun repwe aora pochokun rer ar repwe uta nukuchar non ewe monumonun ran mwer: “Iwe iei, nei anuon, chechemeni, chechemeni pwe ina won ewe foun ach Chon Angasano, i ewe Kraist, ewe Noun Kot, ewe mi auchea oupwe aueta ami nongonong won; pwe nupwen ewe tefin epwe tinato an asepwan mi pochokun, ewer, an kewe assefich non ewe ewuniar, ewer, nupwen an kewe pungun foun ais meinisin me an monumon mi pochokun repwe wichi kemi, esap wor an nemenem womi ne etekinikemitiw ngeni ewe pwangen riaffou me riaffou esemuch, pokiten ewe fau minne oua kauuta won, minne a ew nongonong mi nukuchar, … ew nongonong won minne ika aramas ra kauuta won resap tongeni turutiw.”3
Ewe riaffou me netipengaw esemuch minne i a kapas usun ir ekkewe niwinin tipis mi ngaw ika sisap ennetin aier senir. Ekkewe monumon ra watteno ir ekkewe sossot me ekkewe fiu mi napeno an Setan. Ese mo wor ew fansoun a namwot nap seni iei ach sipwe weweiti ifa usun sipwe kauuta won ena nongonong mi ennet. Me rei, ese wor neni mi murino ai upwe nengeni me nukun ewe amuchunon afanafan an King Benjamin, mi pwan mak me non ewe Puken Mormon.
An King Benjamin kewe kapasen soufos ir mi murino ngeni kich non ach fansoun. I mi sinei ren an pwin weri ekkewe anoninenin maun. I a fen peni noun kewe aramas non maun, mi anongonong won ewe manamanen Kot. I a fen kunaochu ewe pochokunen Lucifer mi ngaw an sotuni, an sossot ne nemeni, me aora tipwemwaremwar ngeni noun Kot semirit.
I a etiwa noun aramas me kich ach sipwe kauuta won ewe chok foun tumun mi ennet, i ewe Chon Amanau. I a affatochu pwe kich mi ngas ne finata nefinen pung me mwan sise tongeni emonungaw seni pungun met sia finata. A kapas awenewen ngeni me a pochokun pokiten i mi sinei met netipengaw epwe fis ngeni ekkewe resap rong me ausening ngeni an fon.
Iei usun an awewei mwirimwirin finiach kewe epwe meni sipwe tapweno mwirin emwenien ewe Ngun ika tapweno mwirin porous mi ngaw minne ra feito seni Setan, ewe an mochen pwe epwe sotuni me atakicheno.
“Pun nengeni, mi wor ew riaffou a fen affateno won i ewe a finata pwe epwe aneasochisi ena ngun [mi ngaw]; pun ika i a finata an epwe aneasochisi i, me nonnom me mano non an kewe tipis, epwe pwan unumi riaffoun poutmwanino esemuch ngeni pwisin ngunun; pun a angei ew niwinin tipis esemuch pwe niwinin an foffor, a fen atai ewe annukun Kot me ungeni pwisin an mirit. …
“Iei minne ika ena aramas esap aier, me a nonnom me mano non an koum ngeni Kot, ekkewe mochenin pungoch seni nang ra annenoi ngunun we ese tongeni mano ngeni ew mwitirin memefin pwisin an niemam, minne a fori i an epwe nurusefan seni me mwen ewe Samon, me a aurano fan mwarin ren niemam, me metek, me riaffou, minne a usun chok ew ekkei ese tongeni kununo, ngetengetin a feita feinfeino me esemuch.”
King Benjamin a sopweno ne apasa, “O, ami chinnap mwan meinisin, me pwan ami kukkun at, me ami kukkun semirit ekkewe oua tongeni weweiti ai kewe kapas, pun ua fen kapas non fatafatoch ngenikemi pwe oupwe tongeni weweiti, ua iotek pwe oupwe neno ngeni chechemenien ewe anoninenin nikinikin ekkewe ra fen turunong non atai annuk.”4
Me rei, ewe manamanen ena fon ach sipwe aier a efisata non ai ekiek ewe fansoun nupwen en me ngang sipwe uta me mwen ewe Chon Amanau mwirin ei manau. Sia mochen non netipach pwe sisap nurufengen nge sipwe fen nenengeni I, kuna An amenimen, me rong ngeni I an apasa, “Fokun murino, en emon chon angang mi murinno o nikitu: … tonong [non].”5
King Benjamin a affataochu ifa usun sia tongeni angei ewe apinukunuk ne rongorong ekkena kapas ika sipwe kuna ewe aan non ei manau ren ach sipwe siwini napanapach me ren ewe Achasefan an Jises Kraist. Ina chok ewe aan sia tongeni aueta won ewe nongonong ennet me uta pochokun fansoun ekkewe monumonun sossot me riaffou mwach. King Benjamin a awewei pwe ena siwin non ach napanap ren kapasen itan a ku netipei. Soufos non fite ngerou ier me pwisin ewe Samon ra nounou ena kapas awewe. Iei ewe awewe: sipwe fokkun winiti usun emon semirit—emon kukkun semirit.
Ren ekkoch, esap mecheres ne etiwa. Napengeni kich meinisin sia mochen sipwe pochokun. Meni sipwe ekieki pwe ika sipwe usun emon semirit sipwe apwangawpang. Napengeni sam me in ra asuku ewe ran nupwen nour kewe semirit repwe wesino foforur usun semirit. Nge King Benjamin, ewe mi weweiti usun aramas mi weweiti met wewen an emon mwan epwe pochokun me pwaracho, a affataochu pwe ach sipwe usun emon semirit esap wewen sipwe foffor usun semirit. Ina epwe usun ewe Chon Amanau, ewe a iotek ngeni Saman we fan iten pochokun an epwe tongeni fori mochenin Saman we me achasefani tipisin noun Saman kewe meinisin me a fori. Napanapach epwe siwin ach sipwe winiti usun semirit ach sipwe angei ewe pochokun mi auchea ne uta nukuchar me kinamwe non fansoun riaffou.
Iei an King Benjamin mwasangasangen anapanapen ifa usun ena siwin epwe fis: “Pun ewe inisin aramas i ewe chon koum ngeni Kot, me a fen ina usun seni ewe turutiwen Adam, me epwe chok fis, feinfeino me esemuch, tiwenon chok ika a fang ngeni ekkewe pesepesen ewe Ngun mi Fel, me poutano ewe inisin aramas me winiti emon souneng seni ewe achasefanin Kraist ewe Samon, me winiti usun emon semirit, fangoch, mosonoson, tipetekison, songomang, uren tong, tipemecheres ne fang ngeni mettoch meinisin minne ewe Samon a ekieki pwe mi öch epwe efisi wor, pwan mwo usun emon semirit a fang ngeni seman we.”6
Sia angei ena siwin nupwen sia fori me asofosefani pwon mi pin ren Kot. Ena a wato ewe manamanen an Kraist Achasefan an epwe mutata ew siwin non netipach. Sia tongeni mefi iteiten fansoun sia angei ewe sakrament, fori angangepinen tempel fan iten ach neuo a mano, afanafan usun emon chon pwaratan ewe Chon Amanau, ika tumunu emon mi osupwang usun noun Kraist chon kuno.
Non ekkena mettoch a fis, fansoun epwe fefeito sipwe winiti usun emon semirit non ach tufichun tong me aneasochis. Sia feito sipwe uta won ewe nongonong ennet. Ach nuku non Jises Kraist a uwei ngeni kich ew aier me ach apwonueta An kewe annuk. Sia aneasochis, me angei pochokun ne ungeni sossot, me sia angei ewe pwonen chiechian ewe Ngun mi Fel.
Nikinikich a siwin an epwe winiti usun emon kukkun semirit, mi aneasochis ngeni Kot me uren tong. Ena siwin epwe atufichi kich ne pwapwaiti ekkewe niffang minne ra feito seni ewe Ngun mi Fel. Ach annomu chiechian ewe Ngun epwe aururu, emweni, me apochokuna kich.
Ua fen sinei ekkoch me nein met King Benjamin a fosun nupwen a apasa pwe kich mi tongeni winiti usun emon kukkun semirit me mwen Kot Ua fen kaeo seni met a fen fifis ngeni ei pwe ewe Ngun mi Fel a kapas fan chommong non ew mongungu mi neukukkun, a chok mecheres ne rong nupwen netipen emon mi mosonoson me fangefangoch, usun emon semirit. Non ennetin, ewe iotek ena mi angang ewe “Ngang uchok mochen met En ka mochen. Kopwe chok ereni ei met ena. Upwe fori.”
Nupwen ekkewe monumonun manau ra fis, en mi tongeni nukuchar pokiten en mi uta won ewe foun om nuku non Jises Kraist. Ena nuku epwe emwenuk ngeni aier iteiten ran me ewe nikitu ne apwonueta pwon mi pin. Iwe kopwe chechemeni I fansoun meinisin. Me non ekkewe monumon me koput me fofforungaw, kopwe mefi nukuchar me epinukunukoch.
Nap seni ena, kopwene kuna om pwisin achocho ne anisata pwan ekkoch won ewe foun nuku. Fansoun meinisin nuku non Jises Kraist a emwen ngeni ew watten apinukunuk me memefin tong ennet ngeni ekkoch, minne ina ewe ennetin tong an Kraist.
Ua apasata ai ennetin pwarata pwe ewe Samon Jises Kraist a fen ngonuk ewe tingor “Feito rei.”7 I a etiwok, ren an tongeok me ekkewe ka tonger, pwe sipwe feito ren I ren kinamwe non ei manau me manau esemuch non ewe fonufan mwach. I mi sineochu ekkewe monumon kopwe weri non om sossot non kinikinin ewe kokkoten pwapwa.
Uwa sio ngeni kemi ne etiwa an ewe Chon Amanau tingor. Usun emon semirit mi mosonoson me uren tong, a etiwa An aninis. Fori me apwonueta ekkewe pwon mi pin I a awora non Ewe Mwichefenin Jises Kraist ren Aramas mi Pin non Fansoun Soponon. Repwe apochokunok. Ewe Chon Amanau mi sinei ekkewe monumon me ekkewe nenien tumun won ewe aan ngeni imwach ngeni I me Samach won Nang. I a sinei ewe aan. I chok ewe Aan. Ua pwarata non itan Jises Kraist mi pin, amen.