Non Mwar ren Kraist me An Kapas Allim
Amo ewe achechem ren met masach ra fen kuna me netipach a fen mefi epwe anapano ach mwar ren an ewe Chon Amanau asoren achasefan.
A wor emon chienei emon mi sinenap, emon chon osukun non university a ritaer, angangoch non makken mettoch, me, nap seni meinisin, emon noun Jises Kraist chon kuno mi achocho. I a fen chuno ren ewe Fonu mi Pin fan chommong an epwe fiti mwich, me emweni angangen pekin sukkun, me wisen emweni chon katon fetan ewe neni. Poraus seni i, iteiten fansoun a chuno ren ewe fonu ikewe Jises a fetan ie, a mwar pokiten ese wor an tipemwaramwar ne kaeo ew minefon mettoch, eingeingan, me amwararan ussun ewe Chon Amanau, An angangen afanafan non an manau, me Fonuan ewe achengicheng. Ewe mwar chieneiwe a pwarano nupwen a porous ussun meinisin a kaeo me non ewe Fonu mi Pin mi choufetan, me ei eingeingen memef a fen foruta non wachimuken mettoch non an achocho ngeni an sukun non manauan.
Atun ua rongorong ngeni porousen met a fisi ngeni me mefi ussun an pochokunen memefin pwapwa, Ua fen nengen sefani won ukukun amwararan non pekin ngun, sipwe chok ura, pwe kich mi tongeni me sipwe mefi ren ewe kapas allimen Jises Kraist a afanafana me ewe sokofesen a tongeni fori non ach winiti emon chon kaeo me non ach sai ngeni manau ese much. Ewe amwarar u kapas ussun ina ewe memefin inis, mwar, ika ingeno mi wor ren meinisin ion mi ounusa netiper ne anonga manauer an ewe Chon Amanau me An kewe afanafan me ion a esinna non tekisoson An nom non manauer. Ussun ew memefin amwarar, a amwasanga kich seni ewe memefin ewe Ngun mi Fel, a pesei ewe mochen ne aponueta ewe annukun Kraist.1
Ekkewe pukefen ra masoweni ekkoch minen awewen ika ifa ussun ei memefin inis a pwano. Ewe soufos Isaiah, awewe chok, a pwarano anononun an kinisou ngeni ewe Samon me ren an wachimuken pwapwa non I.2 Ekkana ra rong an Jises afanafan non ewe sinakok ren Capernaum ra ingeno ren An annuk me ewe pochokun minne a fiti An afanafan.3 Pwan ei chok memef ewe a kuu meinisin pekin ngasangasen ewe onuon Joseph Smith nupwen a annea seni ewe Paipen ewe aewin sopun non puken James, a emweni i an epwe kutta ewe miritin Kot.5
Pwi me fefinei achengicheng, nupwen sipwe ennetin nom non mwar ren Jises Kraist me An kapas allim, a napeno ach pwapwa, a napono ach mwasangasang ren an Kot angang, me sia esinna angangen poun ewe Samon non mettoch meinisin. Kapachetan, ach kaeo ngeni an Kot kewe kapas a fokkun napeno weweochun; ach kewe iotek, a fokkun wor popun; ach fen ngeni, a wateno mosonoson; ach angang non muun Kot, a napeno achochon. Meinisin ekkei foffor ra pesei pochokunen ewe Ngun mi Fel an nom fan chommong non manauach.5 Ren ei, ach kapasen pwarata ren ewe Chon Amanau me An kapas allim repwe pochokunono, sipwe anomu Kraist epwe manau non kich,6 me sipwe manaueni ach manau “fotonong me forita non i, me foruno non ewe nuku, … napono non fiti kinisoun.”7 Nupwen sia nom non ei nikinik, a napeno ach pochokun non pekin ngun me angei tumun seni ach sisap turunong non ewe sarin tumunungaw non pekin ngun.
Ei tumunungaw a napanapan ren ewe a mangeno ach sipwe chiwen pwapwaiti ren sipwe fiti ewe kapas allimen ewe Samon. Napengeni a poputa nupwen sia mefi pwe sia fen angei ekkewe mettochun mirit mi namwot me ekkewe feioch fan iten ach pwapwa non manauach. Ei esikesik, sia porous ussun, a fori ach sipwe angei ekkewe nifangen ewe kapas allim nge ese wor kinisoun, iwe seni ena feino, sia omokutu ewe feiengawen nikitano me ruu ach fansoun mwono non ennetin auchean ewe kapas alllim an Jises Kraist8 me ekkewe pwon sia fen fori. Pokiten ei, sia atowawakicheno seni ewe Samon, apwangapwangeno ach tufich ne “ausening ngeni I.”9 a winiti tumunungaw me eseor ekiekin ngeni ewe auchean ren An angang. Tipemwaramwar ussun ekkewe ennet sia fen angei a tonong non ach ekiek me netipach, a fori ach sipwe mecheresin nom non feiengaw ngeni ewe sosot an ewe chon u ngeni.10
Pastor Aiden Wilson Tozer, emon chon mak mi itefouno me emon Chon nuku non Kraist mi pochokun, a makkei, “Watten memmefin kinamwe a eu nikinikin mano ngeni fefeita won pekin ngun.”11 Nge esap ei met a fiis ngeni ekkewe chon Nifai mwirin chok ewe uputiwen Kraist? Ra “poputa ne kisino me kisino ar mwareiti ew sain ika ew amarar seni nang, … [nukunukumang] mettoch meinisin minne ra fen rongorong me kuna.” Ren ena popun Setan “a ochuna meser me emwenir seni ar repwe nuku pwe ewe pwon an Kraist ew umwesin me namotongawen mettoch.”12
Pwi me fefinei kana, non An tong mi unusoch me ese wor nemuchun me a sinei nonomuch aramas,13 ewe Chon Amanau a fen forata ewe an fan itach pwe sisap turunong non ewe sarin tumunungaw seni pekin ngun. Ewe Chon Amanau a tingor ngeni kich ew watten mirit, akkaewin ika sipwe ekieki ewe fitikokon fonufan minne sia nom non: “Kaeo ussun ngang, me rongorong ngeni ai kewe kapas; fetan non tipetekisonun Nguni we, o epwe wor om kinamwe non ngang.”14 Nupwe sia etiwa an ewe Chon Amanau we tingor, sia pwarano ach tekison, ach mochen kaeo, me ach epinukunuk pwe sipwe winiti ussun chok I.15 Ei tingor mi pwan pachenong ach angang ngeni I me iamwiri noun Kot kewe “ren unusen [netip] ach, tongeni, ekiek me pochokun.”16 Nukanapechikin ach achocho non ei sai, ewer, ekkewe ruu annuk napanap: ne tongei ewe Samon ach Kot me tongei chon aruch ussun pusin kich.17
Ei sokkun nikinik ina kinikinin nonnomun napanapen Jises me a pwano non mettoch meinisin I a fori non fansoun An ewe angangen afanafan won fonufan.18 Ina minne, nupwen sia pukupukun finata me ennetin fangeno kich ren nenengeni I me kaeo seni An nenien apiru mi unusoch,19 a tongeni murinono ach sipwe sinei I. Sia marita non mwasangasang me mochen ne uweanong non manauach ewe omuchunon nongonongun ifan ussun sipwe manau, ewe nenien apiru sipwe forata, me ekkewe annuk sipwe aponueta. Sia pwan tongeni anapano wewe, mirit, murinonon napanapach, me chen ngeni Kot me ekkewe chon aruch.20 Ua tongeni ennetin apasa ngeni kemi pwe ach tufichin mefi met ewe Chon Amanau a fofori me tong epwe napano non manauach, anapano ach nuku, ach mochen sipwe fofor murinno, me ewe popun mochen ne angang ngeni I me ekkoch.21 Non kapachetan, ach kinisoun ren ekkewe feioch me sosot mi tori kich non ei manau iei epwe apochokunano me winiti kinikinin ach ennetin fen ngeni.22
Chiechiei achengicheng, ekkei mettoch meinisin ra apochokuna ach ingeno ren ewe kapas allim me omokutu kich ngeni pwapwa ne aponueta ekkewe pwon sia fori me ren ewe Samon—pwan mwo nge non nukanapen ekkewe sossot me osukosuk a fis ngenikich. Ewer, ren ekkei pungun mettoch an epwe fis, sipwe fokkun chok ammonono inisich ren nuku me ennetin popun non ekkewe afanafan an ewe Chon Amanau,23achocho ngeni ne apachanong Ar kewe foffor murinno non manauach.24 Non kapachetan, a murinno sipwe akkana kich ngeni I ren aier,25 kutta An omusomusen tipis me An manamanen angasa non manauach me aponueta An kewe annuk. Ewe Samon won pusin Inisin a pwon pwe I epwe emweni ach kewe an ika sia tongeni nuku non I fiti unusen netipach, etiwa I non meinisin ach mokutukut me sisap anongongon won pusin ach weweiti.26
Emon mwan uwa karan chok churi, ewe minne itan Wes me ion a fiti ewe mwich ikenai, a etiwa an Kraist tingor an epwe kaeo ussun I me An ewe kapas allim me a poputa ne kuna ewe amwarar ren An tong mwirin 27 ierin an atowaweno inisin seni ewe anen pwon. Atewe a ureniei pwe ew ran i a churi emon misineri won faceboook, Elter Jones, ewe a chok mochomoch an fansoun an angang non ewe neni Wes me mwen epwe feinno ngeni pukutan ikewe epwe angang ian non Panama. Nupwen Elter Jones a kuna an Wes ewe peich won facebook, nge ese mo fen sinei pwe a fen choni ewe Mwichefen, a mefi ewe Ngun mi Fel a emweni me sinei pwe epwe mwitir kokori Wes. I a mwitir ne mokutukut won ei memef. Wes a fokkun mairu ren ei kokko ese tepereni me a poputa ne esinna pwe ewe Samon a sinei i inamo ika a towaweno seni ewe anen pwon.
Seni ena atun feinno, Wes me ekkewe misineri ra poputa ne kakapas fengen iteitan. Elter Jones me an ewe companion ra awora mokutukutun angangen aninis iteiten wik me porous non pekin ngun ewe a anisi Wes an epwe eniwini sefani an mwar ren ewe Chon Amanau me An kapas allim. A angeta sefani ewe ngetan an kapasen pwarata ussun ewe ennet me an ewe Chon Amanau ewe tong fan itan. Wes a mefi ewe kinamwe ena a feito seni ewe chon Oururu me anapano ewe pochokun i a mochen an epwe niwin sefan ngeni ewe mwich. I a ureniei pwe met ei a fis a uweisefani ngeni manau non pekin ngun me pekin memefin netip me a fen anisi an epwe poutano ekkewe memmef mi kipwin mi kochu fengen non ekkewe ier pokiten aweiresin met kewe mi fisi ngeni.
Nupwen chiechien nei ewe sensen university ua fen founi me akkom mi ekiek murinno a fen katon, iteitan mi chok wor mettoch mi murinno me amwasangasang ne kaeo ussun Jises Kraist me An kapas allim.27 Ewe Samon a fen fori ekkewe pwon mi murinno ekkewe ra chouno ngeni meinisin ekkena, pachenong kich, ion kewe ra kukuta ar repwe kaeo ussun I me wanong An kapas non manauer. Ngeni Enoch I a apasa, “Nengeni Nguni [epwe nom] womi, ina minne meinisin om kapas upwe pwarata; me ekkewe chuk repwe su me mwom, me ekkewe chonupupu repwe kun seni aner; me kopwe nom non ngang, me Ngang non en.”28 Seni Noun chon angang King Benjamin, I a afata, “ami oupwe iteni noun Kraist semirit, noun at, me noun nengin; iwe nengeni, ei ran i a fen monukikemino non pekin ngun; pun ouwa apasa pwe netipemi ra siwin seni nuku won itan; ina minne, ouwa uputiw meren i me ouwa fen winiti noun at me noun nengin.”29
Ina minne, nupwen sia ennetin me sopweno ne achocho ngeni ne kaeo ussun ewe Chon Amanau me apiru An nenien apiru, Ua pwon ngenikemi, non Itan, pwe An kewe fofor murinno repwe mak non ekiekich me netipach,30 pwe sipwe winiti ussun chok I, me sipwe fiti I ne fetan.31
Pwi me fefinei achengicheng, ua iotek pwe sipwe uta non amwararen Jises Kraist me An tong mi unus, ese wor ne muchun, me unusochun tong. Amo ewe achechem ren met masach ra fen kuna me netipach a fen mefi epwe anapano ach mwar ren an ewe Chon Amanau asoren achasefan, minne ewe a tongeni echikara kich seni ach kewe kinasen ngun me kinasen memefin inis me anisikich ach sipwe arap ngeni I. Amo sia mwareiti ekkewe wachemuken pwon ra nom non Poun ewe Sam me a amonata fan iten ekkana ra nikitu:
“Ewe muu epwe ami me ekkewe feioch repwe pwan ami, me unusan pisekisekin fansoun ese much repwe pwan ami.
“Nge ion epwe etiwa ekkei mettoch meinisin non ennetin an kinisou epwe ning.”32
Jises I ewe Chon Angasano ewe fonufan, me an ei Mwichefen. Ua pwarata ren ekkei ennet non ewe amwararen-mwasangasang, pin, me tekian iten ach Chon Amanau, Jises Kraist, amen.