Nge Kich Sise Ekieki Usur
Pwon mi pin me angangepin ra anisi kich iteitan ach sipwe chechemeni ach pachengeni ewe Samon Jises Kraist nupwen sia fefeita won ewe anen pwon.
Punuwei we, Susan, noum kewe unumon at me punuwer, noun noum kewe meinisin, me Elter Quentin L. Cook, chiechiei ne wis non ewe Mwichen Engon me Ruemon Aposel ren ukukun 15 ier, ir meinisin repwe mwitir tipew ne affata pwe use ngioch ne kon. Inamo ika ese wor ai sinenap non kon, ua sani ai konu ekkewe kon mi fel usun ewe Niwinsefanito. Ewe ochufengenin ekkewe kapas me amwararen ngingin a anisiei ai upwe kaeo auchean nongonongen kapas allim me a omokutu netipei.
Echo kon mi fel a fen efeiochu manauei non napanap mi amwarar ewe kon “Sipwe Nikitu.” Arapeto chok ua kan ekipwichi me kaeo usun ekkoch kapas me non ena kon mi fel ir mi kan eniwin. “Sipwe kun seni anon chon nukun pwe anon chok Jises sipwe fiti.”1
Sipwe kun seni.
Nupwen ua konu “Sipwe Nikitu,” ua kan soun ekieki ekkewe aramas non an Liai we nemasepwi ar nikitu ne feinno mwer won ewe aan mi emwen ngeni ewe iran manau ekkewe rese chok “kamwochuno”2 nge ra “kamwochunuk ngeni ewe wok mecha, tori ar ra feito me turuno me ochoch seni ewe foun uwan ewe ira.”3 Liai a awewei ewe mwicheich non ewe watten me wamongun imw ra itini ewe autun koput ngeni [i] me ekkewe … ra ochoch seni ewe foun ira .”4 An ponueni ngeni ekkewe esit me fosongaw a fokkun murinno me esap monukuno: “Nge am ouse ekieki usur.”5
Ua iotek pwe ewe Ngun mi Fel epwe efeiochu me asarama emon me emon kich nupwen sipwe ekieki fengeni ifa usun sipwe tongeni pochokun ne “kun seni” emwen mi ngaw me mongungun turunufasen ewe fonufan sia nom non.
Kun Seni
Ewe kapas “kun” a pwari usun ach apareni ika ekieki emon ika och mettoch. Iwe, ekkewe kapasen ewe kon mi fel “Sipwe Nikitu” a pesei kich pwe sipwe apungano ach finata pwe sisap eteneki “anon chon nukun.” Iwe Liai me ekkewe aramas mi nom ren ekkewe ra ochoch seni foun uwan ewe ira a awora ew pochokunen appiru usun ach sisap eteneki ewe turunufas me koput ra soun feito seni ewe watten me wamongun imw.
Ewe nongonongen Kraist mi mak “me ren ewe Ngunun Kot mi manau … non [netipach]”6 a anapano ach tufichin “kun seni” chommong aosukosuk, asong, me afitikoko non ach ei fonufan mi turutiw. Awewe chok, nuku mi anonga non me won ewe Samon Jises Kraist a apochokuna kich ren pochokun non pekin ngun. Nuku non ewe Chon Amanau a eu nongonongen foffor me pochokun. Nupwen sia mokutukut non ach tipeew ngeni ekkewe ennet ren An kapas allim, sia feioch ren ewe tufich me wewe non pekin ngun ne feinno mwach ach sipwe tou seni ekkewe sosotun manau nupwen sia anonga ach ekiek won ekkewe pwapwa ewe Chon Amanau a awora ngeni kich. Ennetin, “ika sia fori met mi pung esor popun sipwe nuokus, pwe ewe Samon ach chon anisi mei nom rech.”7
An Emon Pwisin Pachengeni ren Pwon mi Pin
Tonong non pwon mi pin me nimenimoch ne angei angangepin an pristut a emecheresi kich me foti kich ngeni ewe Samon Jises Kraist me Samach non Nang.8 Ei a chok wewen pwe sia nuku non ewe Chon Amanau pwe i chon peni kich9me chon affor10me sia anongonong won An murino, umoumoch, me chen11fansoun ewe sai non manau. Nupwen sia tipepos ne feito ren Kraist me sia chu ngeni I, sia angei ekkewe feiochun enimenim, echikara, me opochokun meren An Achasefan esemuch me feinfeino.12
Ach manaueni me tongei pwon mi pin a fori ew riri ngeni ewe Samon ewe mi anonnon ren pwisin emon me pochokun non pekin ngun. Nupwen sia afona ekkewe annukun pwon mi pin me angangepin, sipwe arap ngeni I ekis me ekis13 me mefi pochokunen An pin me ennetin nonnom non manauach. Iwe Jises epwe winiti mi nap seni chok ewe akkaewin ionapen non ekkewe porousen pukefel; An nenien appiru me afanafan ra pesei meinisin mochen, ekiek, me foffor.
Ennetin ese wor rei ewe tufich ne aweweiochu ewe wesewesen napanapan me pochokunen ach pwon mi pin mi pachengeni ewe Noun Kot mi manausefan me manau. Nge ua pwarata pwe ewe pachefengen ngeni I me Samach non Nang mi ennet me ir ekkewe ennetin popun epinukunuk, kinamwe, pwapwa, me ewe pochokunen ngun minne mi otufichi kich ach “sisap niweiti chon oput kich.”14 Kich chon fori me apwonueta pwon mi pin kich chon kuno noun Jises Kraist, kich mi tongeni feioch ne “pwaracho, pwe ach Samon a anisi kich”15 me sisap eteneki emwen mi ngaw me mokutungawen fonufan.
Nupwen ai churi chon ewe Mwichefen non ewe fonufan, ua soun eisinir ei kapaseis: met a anisuk ne “kun seni” echimwen fonufan, turunufas, me koput? Ponuwan kewe me rer ra men aninisoch.
Chon mwichefen mi pwaracho ra soun affatano ewe auchean ach etiwa ewe manamanen ewe Ngun mi Fel non manauach seni auchean kaeo pukefel, ennetin iotek, me amonnefichin ach fiti ewe angangepinin ewe sakrament. Ra pwan soun apasa usun ewe aninisin pekin ngun seni faminien mwichefen me chiechier mi wenechar, ekkewe auchean nesen ra kaeo seni ar iamwir me angang non an ewe Samon Mwichefen mi niwinsefan, me ewe tufichin esinna namotongawen mettoch non me seni ewe watten me wamongun imw.
Ua fen esinna non an ekkei chon mwichefen ponuwen kapaseis ew tichikin etetten minne mi fokkun auchea. Aewin me akkauchean, ekkei chon kuno a wor ar pochokunen pwarata usun an Samach non Nang kokkoten pwapwa me wisen Jises Kraist we ussun ach Chon Angasano me Chon Amanau. Me oruwan, ar mirit non pekin ngun me pwisin ar nuku, emon me emon, me a tichik ngenir; rese ochunapa meinisin me ew ekiek chok. Ua ausening ngeni ekkei aramas mi nikitu ar kapas usun an pwon mi pin awora pochokun ne akkufu mettoch mi ungenir me ar pachengeni ewe Samon mi manau a anisir non fansoun och me ngaw. Ngeni ekkei aramas, Jises Kraist i ennetin Chon Amanauen emon me emon.
An ewe kapas allim pwon mi pin me angangepin ra angang non manauach usun chok ew kampas. Ew kampas ina ew mettoch sia nounou an epwe affata ewe nongonongen emwen ren ennefen, eor, otiw, me notou ren popun sai me akokkotun maapen neni. Non ena chok napanap, ach pwon mi pin me angangepin ra emweni kich me anisi kich iteitan ach sipwe chechemeni ach pachengeni ewe Samon Jises Kraist nupwen sia fefeino won ewe aanen pwon.
Ewe nongonongen emwen fan itach meinisin non ei manau pwe sipwe feito me unusochuno non Kraist.16 Pwon mi pin me angangepin ra anisi kich ne amochu ach ekiek epwe anonga ewe Chon Amanau me achocho, ren An chen,17 ne winiti usun I. Ekennetin, “ew [manaman] ese pwano epwe anisiei me en non ewe ningen popun ennet.”18
Kamwochunuk ngeni ewe Wok Mecha
Ach pwon mi pin mi pachengeni Kot me Jises Kraist ina ewe aan minne sia tongeni angei ewe tufich me pochokun ne “kun seni.” Me ei fofo a pochokunono nupwen sipwe soposopono ne kamwochunuk ngeni ewe wok mecha. Nge usun pwin Nifai kewe ra apasa, “Met wewen ewe wok mecha minne samach we a kuna … ?
“Iwe [Nifai] a apasa ngeni ir pwe ina ewe kapasen Kot; iwe ika ion epwe aneasochis ngeni ewe kapasen Kot, me kamwochunuk ngeni, resap tongeni mano non ngun; iwe pwan ekkewe sossot me ekkewe nikappich mi ngetenget an ewe chon ungeni rese tongeni nemenireno me ochunnereno, an epwe emmwenireno ngeni kiteter.”19
Ouse mochen oupwe sinei pwe ewe tufichin ungeni ekkewe sossot me ekkewe nikkapich mi ngetenget an ewe chon ungeni kich mi pwon ngeni ir ekkewe ra “kamwochunuk ngeni” nap seni ekkewe ra chok “kamwoch” ewe kapasen Kot.
Mi amwarar pwe, ewe Aposel John a awewei Jises Krasit pwe i ewe Kapas.20
“Nepoputan ewe Kapas, a fen nonnom ewe Kapas a nom ren Kot, me ewe Kapas i Kot. …
“Mettoch meinisin ra for seni i; wewen pwe Kot ese mo fori och mettoch me nukun i. …
“Me ewe Kapas a winiti aion, me a nonnom neich, (me sia kuna an ning, ewe ning usun ewe anamon noun ewe Sam,) mi uren chen me ennet.”21
Ina minne, ew me nein iten Jises Krasit kewe ina “Ewe Kapas.”22
Non kapachetan, ewe awanuen Nongonongen Achifouaa apasa, “Sia nuku ewe Paipen pwe ina ewe kapasen Kotika pwe ewe awewen mei pung; sia pwan nuku ewe Puken Mormon pwe kapasen Kot.”23
Nge, ekkewe afanafan ewe Chon Amanau, usun mi mak non ekkewe Pukefel, ir pwan “ewe kapas.”
Upwe pesei pwe kamwochunuk ngeni ewe kapasen Kot mi pachenong (1) asamonu, me apochokuna ach we pwisin riri ngeni ewe Chon Amanau me Seman we ren ach pwon mi pin and angangepin me non ewe kapas allim mi niwinsefan, me (2) ennetin, me soun nounou ekkewe pukefel me afanafanen soufos me aposel mi manau pwe ir ekkewe popun ennet mi pwano. Ren ach nukuchar me “kamwochunuk” ngeni ewe Samon me sia siwin ren ach manaueni An nongonong,24 ua pwon pwe emon me emon ika kich meinisin sipwe efeioch ne “uta non neni mi pin, me sisap mwokut.”25 Ika sia nonnom non Kraist, iwe I epwe nonnom rech me fitikich ne fetan.26 Ennetin, “non ekkewe ranin sossot noun Souneng i epwe emweirer, me efisiochu ewe popun ennet.”27
Kapasen Pwarata
Soposopono Kamwochunuk. Kun seni
Ua pwarata pwe nukuchar ngeni ekkewe pwon mi pin me angangepin an ewe Chon Amanau kapas allim mi niwinsefanito a atufichi kich ne nikitu non an ewe Samon angang, ne kamwochunuk ngeni I pwe i ewe Kapasen Kot, me sisap kun ngeni ekkewe otuputup an ewe chon koum. Non ewe fifiu ren pung, amwo emon me emon kich sipwe fiu ren ewe ketinas, pwan “ewe ketinasen pung,”28 non ewe it mi pin iten ewe Samon Jises Kraist, amen.