Tong, Aea fengen, Akoko
Nupwen sia tong, aea fengen, me akoko, sia angang non ewe waten me murinon angang ewe a amonata ewe fonufan ren ewe niwinsefan an ewe Messaia.
Fiti ei ne ekieki, ren ew fansoun, uta won ewe chuk non Galilee, pwarata ewe murinon me ningen ewe Chon Amanau mi manau sefan a feito churi Noun kewe chon kuno. Ifa me amwararen-amwasangasangen om kopwe pusin rongorong ekkei kapas, minne I a aiti ngenir, An auchean tingor ngenir “oupwe feinno, o afanafana aramas meinisin won fonufan, papataiser non iten ewe Sam, me ewe Nau, me ewe Ngun mi Fel.”1 Ennetin ekkei kapas repwe nemeni, amwasanga, me omokutu emon me emon kich, usun ra fori ngeni Noun kewe Aposel. Mi pung, ra nikitu ren unusen manauer ne fori chok ena.
Amwararan, esapw chok ekkewe Aposel mine ra wanong an Jises kewe kapas ngeni netip. Chon ewe Mwichefen akkom, seni ewe minefo ngeni ewe wesewesen fansoun, ra fori ar angang non an ewe Chon Amanau ewe angang, aporousa ekkewe porous mi murinno ren ewe kapas allim ngeni ekkewe ra churir me siner. Ewe pekin mochen ne aea fengen ar kapasen pwarata ren Jises Kraist a anisi An minafon foritan Mwichefel epwe mammarino.2
Pwan kich, noun Kraist kewe chon kuno, a wor tingor ngenikich ach sipwe fiti An we angang ikenai, ussun nge kich mi nom won ewe chuk non Galilee ikewe ie A akkaewin afanafana. Ei aurour a poputa sefan non 1830, nupwen Joseph Smith a ewisa pwin ewe Samuel an epwe aemonun misineri ren ewe Mwichefenin Jises Kraist.3 Seni ena fansoun, nap seni 1.5 minion misineri ra sai fetan non unusen fonufan ne afanafana unusen muu meinisin me papataisi ekkewe ra etiwa porous mi och ren ewe kapas allim mi niwin sefanito.
Iei ach annuk. Ach ennetin mochen.
Seni nouch kukkun semirit tori ekkewe waten neich, sia mochen ewe fansoun nupwe sia tongeni tumunoch ngeni an ewe Chon Amanau we koko me aporousa fetanei ewe kapas allim ngeni unusen muu meinisin non fonufan. Ua sinei pwe ami anuon at me fopun nengin oua pwan mefi ei apochokun seni nouch ewe soufos naneu nupwen a tingorekemi ami oupwe amonneta ngeni angangen misineri usun chok met ewe Chon Amanau a fori ngeni Noun kewe Aposel.
Ussun ekan chon sa ikewe ia repwe poputa me ia, sia witiwit fiti osukusuku ewe pungunon kokko, wesochunon ren an ewe soufos siknicher, a esisinata poputan ewe kitir! Ei memefin mochen mi mwirino me a feinto seni nang; nge, sipwe ekieki ei kapaseis: pwata kich meinisin sise poputa iei?
Meni kopwe eis, “Ifa ussun ai upwe emon misineri nge ese wor ai pach?” Ika sipwe eisini kich, “Ekkewe misineri ra angei ar efeioch me kefinita ar repwe fori ei angang. Ngang mi mochen aninis nge meni ekiseno nupwen manauach epwe ekis mososonetiw.”
Pwi me fefinei, amen mecheres seni ena! Kinisou, an ewe Chon Amanau watten angang a tongeni wesino seni mecheresin nongonong mi weweoch emon me emon kich sia kaeo seni nekukunuch: tong, aea fengen, me akoko.
Tong
Ewe aewin mettoch sia tongeni fori ina tong usun an Kraist tong.
Netipach a chou ren an aramas riaffou me osukosuken ekiek sia kuna non unusen fonufan non ach kei fansoun. Nge, sia tongeni pwan pesepes seni pwanon umoumochun tong me angangen anisi aramas mi pwa me ren aramas ekis meinisin ren ar mochen ne anisi ekkewe mi osupwang—ekkana ese wor imwer, ekkewe ra imuseni ar famini, ika ekkewe ra mefi sokkun napanapen netipengaw me noninen.
Ekiseno we chok, ekkoch porous ra repotei usun ew mwichen inenap non Poland, ren ar aureki siongawen famini ra sufetan, ra nikiti kewe wan monukon mi ur ren pisek won ew nenien train non ew tettenochun nain, ra mwoneta ngeni inenap me semirit ir mi katou seni fonuer ekkewe epwe auchea ngenir ekkei pisek non ena neni nupwen repwe tetiw seni efoch train. Ewer, Samach won Nang a emenimen ngeni ekkewe fofforun tong ren ekkei mettoch, nupwen sia anisi ekkoch ren ar chourek, sia “aponueta ewe annuk an Kraist.”4
Nupwen sia pwarano usun an Kraist tong ngeni chon oruch, sia afanafana ewe kapas allim—ina mwo ika sise apasa ew kapas.
Tong ren ekkoch ina ewe amwararen napanap usun ewe oruwen annuk napanap kopwe tongei chon orum;5 a pwano usun an ewe Ngun mi Fel angang non ngunuch. Ren ach pwomweni usun an Kraist we tongei ekkoch, meni sipwe fori an ekkewe ra kuna ach angang och ne “eningano [samach] we non nang.”6
Sia fori ei nge sise ekieki sipwe angei niwinin.
Ach epinukunuk, ewer, pwe repwe etiwa ach tong me ach porous, nge ren ussun ar mokutukut sise tongeni nemeni.
Met sia fori me ika kich wesewesen ion.
Seni an Kraist we manauen tong fan iten ekkoch, sia afanafana ewe mwirino, manauen-ekkesiwin ren ewe kapas allimen Kraist, me sia fiti ne aponueta non An ewe waten angang.
Aea fengen
Ewe oruwen mettoch sia tongeni fori aea fengen.
Fansoun poputan maramen ewe semwen COVID-19, Brother Wisan seni Thailand a mefi an epwe aporousa ngeni kich usun met a mefi me ingeno ren met a kaeo non an kaeo ewe Puken Mormon non an we nenien churi aramas won kampiuter. Non ew me nein an kewe mak a pacheta, a aporousa ussun ekkewe ruemon misineri non Puken Mormon, Alma me Amulek.
Pwin we, Winai, mi pwan pochokun non pwan an we nuku ren an we mwichefen, a memef ren met a makei me a ponuweni, ese fen mo nukufit nge a tingor, “Ngang mi tongeni upwe angei ew na puk non fosun Thai?”
Wisan a ekiekoch ne tingorei ekkewe sister misineri repwe uwei ngeni ew kapin ewe Puken Mormon, ekkewe ra poputa ne afanafan ngeni pwin we.
Wisan a fifiti sukkun non pekin won line, pwan fansoun ei a aporousa met a mefi usun ewe Puken Mormon. Winai a kaeo ren an iotek me annea ren an ennetin-kuta ewe ngun, an epwe etiwa me komochnuku ewe ennet. Non ekkewe maram, Winai a paptais!
Mwirin Wisan a apasa, “Mi wor wisach ach sipwe chon angang me nepoun Kot, me sipwe fokkun monne ngeni I ne fori An angang non An an non kich.” Manaman non ar we famini a fis pokiten Wisan a aporousa ewe kapas allim non ew aan meinisin ra kan foffori.
Kich meinisin sia kan aea fengen mettoch ngeni ekkoch. Sia fori iteitan. Sia kan aprousa met kachito ika mongo sia sani, mettoch mi atakirikir sia kuna, neni sia no ngeni, mettoch sia sani, kapas sia kaeo seni.
Epwe ifa usun ach sipwe apachata ngeni ewe tetenin mettoch sia fen aporousa met sia tongei usun ewe kapas allimen Jises Kraist?
Elder Dieter F. Uchtdorf a awewei: “Ika emon a eisinuk ren omw wiiken, kosapw amangano omw kopwe kapas usun met ka kuna non fan. Kapas usun kewe kukkun semirit kewe ra uta mwen ewe mwichen chon fan me ra koon fiti ar mwochen ar repwe ussun Jises. Kapas usun ewe mwichen sarafo kewe ra anisi kewe chinap non kewe imwen asoso ren ar repwe angei pworousen ar neuo.”7
Aea fengen esap ussun “amomo” ewe kapas allim. Kosapw pwan makei ew afanafan ika apungu an ekkoch foffor ese pung.
Nupwen epwe tori usun angangen misineri, Kot ese mochen om kopwe emon Noun chon masa sopw; Nge, I a mochen, a tinogr pwe kopwe Noun chon oporousa.
Ren ach aporousa fengeni mettoch mi murino non ewe kapas allim ngeni ekkoch, sia fori an ewe Chon Amanu ewe waten angang.
Akoko
Ewe aunungatin mettoch ka tongeni fori kopwe akoko.
Sister Mayra emon a keran chok ekkesiwin seni Ecuador. An pwapwa non ewe kapas allim a chok mwitir mwirin an we paptais a kokori chienan me ekkewe a men tonger seni an kapas won kampiuter. Chommong famini me chienan ra kuna an mak ra ponuweni ren kapas eis. Mayra a kapas ngenir, iteitan a etiwer ngeni imwan ar repwe chuffengen ne churi ekkewe misineri.
Inen me semen Mayra kewe, pwin me mongean, tetenin inan, ruemon tetenin pwin, me ekkoch chienan ra paptais pokiten an pochokun ne kokorireto repwe “feito me nengeni,” “feito me angang,” me “feito me choni.” Seni pusin an achocho me kokorireto, napeseni 20 aramas ra etiwa an kokorireto ar repwe paptais me choni ewe Mwichefenin Jises Kraist. Ei a fis pokiten Sister Mayra a mochen kokori ekkoch ar repwe pwan mefi ewe pwapwa a mefi ren an emon chon ewe Mwichefel.
Mi wor pukuwen kokko sia tongeni achouano ngeni ekkoch. Sia tongeni kokorato ekkoch repwe “feito me nengeni” ew angangen sakrament, ew mokutukut an wart, fitio won kampiuter mine a awewei ewe kapas allimen Jises Kraist. “Feito me nengeni” mi tongeni epwe ew kokkon annean ewe Puken Mormon ika feino ngeni ew minefon tempel atun kunokun an epwe suk me mwen epwe efeioch. Fan ekkoch ewe pekin akokorato a och mettoch sia wau non—ew etiwetiw ngeni pusin kich, a ngeni kich ach sipwe nenengeni me kuna ekkoch tufich mi nom unukuch, sipwe fori.
Non ach ei ierin mettoch ra chok fis foforun won compiuter, chon choni rakan chok aea fengen porous won kompiutr. Mi wor pukuwen, ika esapw ngoroun, fefeitan mettoch epwe anisi ekkoch repwe tongeni aea fengen won. Ei kokkoten tingor ne, “feito me kuna,” “feito me angang,” me “feito me choni.”
Nupwen sia korato ekkoch ar repwe kaeo chommong usun ewe kapas allimen Jises Kraist, sia anganga an ewe Chon Amanau we koko repwe fori An we angang.
Nesoponon
Pwi me fefinei achengicheng, ikenai sia fen kapas usun unungat mettoch mi murino—mettoch mi mecheres—menisin ir mi tongeni fori. Mettoch en mi tongeni fori! Nge meni kafen fofforir—Ina mwo ika kose wesewesen mefi pwe en ena!
Ua korukoto om kopwe ekieki anen om kopwe tongeni tong, aea fengen, me akoko. Ika pwe ka fori ei, kopwe mefi waten pwapwa sinei pwe ka angei ewe kapas an ach we achengicheng Chon Amanau.
Met ua tingoreok kopwe fori esap och minefon mettoch. Kafen rong ekkei nongonong me mwan. Esap iei ewe “waten mettoch mwirin” ewe Mwichefen a tingoreok kopwe fori. Ekkei unungat mettoch ra pwari me anapano pwe kich noun Jises Kraist chon kuno.
Ese namot pachin it ika mesen mak.
Ese pwan wor ew sokkun koko a namot.
Nupwen ekkei unungat mettoch repwe winiti kinikinin met sia foffori non manauach me nonnomuch, repwe winiti pwe epwe chok pusin fis, sipwe pwarano ewe ennetin tong.
Usun ekkewe chon kuno noun Kraist ra chufengen ne kaeo seni I non Galilee 2,000 ier ano, sia pwan tongeni etiwa met ewe Chon Amanau a fori me feino non unusen ewe fonufan ne afanafana ewe kapas allim.
Nupwen sia tong, aea fengen, me akoko, sia angang non ewe waten me murinon angang ewe a amonata ewe fonufan ren ewe niwinsefan an ewe Messaia.
Pwe sipwe eteneki an ewe Chon Amanau we koko me nikitu ne fori An we waten angang ina ai iotek non iten Jises ewe Kraist, amen.