14:47

Tong Echipwer non an ewe Sam Kokkot

Seni Preseten Dallin H. Oaks

Aemonun Chon Aninis non ewe Aewin Presetensi

Ewe popun ekkewe nongonong me fofforun ewe Mwichefen mi niwinsefanito pwe epwe amonata ekkewe noun Kot ngeni angasenon ngunur me manauta non ewe muun selestial me manau ese much non ewe aewin napanap mi tufich.

Ewe kokkoten kapas allim a pwarano an Samach won Nang tong fan iten Noun semirit. Ren ach sipwe weweiti ei, sipwe kutta ne weweiti An kokkot me An annuk. I a fokkun tongei Noun semirit ina minne I a fangeno Noun we Anamon, Jises Kraist, pwe epwe ach Chon Amanau me Chon Anagasano, epwe riaffou me mano fan itach. Non ewe Mwichenfenin Jises Kraist ren Aramas mi Pin non Fansoun Soponon mi niwinsefanito, a wor ach weweiti mi sokkono usun an Samach won Nang we kokkot. Ei a ngeni kich ew napanap mi sokkono ren ach nenengeni ewe popun manau won fonufan, ewe kapung mi murino mwirin, me ewe amuchunon ningen fetanin noun Kot semirit meinisin.

Ua tongei kemi, ami pwi me fefinei. Ua tongei noun Kot semirit meinisin. Nupwen ra eisini Jises, “menni nein ekkewe annuk a fakkun nap seni meinisin?” A aitikich pwe ach tongei Kot me tongei chon oruch ir ewe akkaewin me nein an Kot kewe annuk mi nap.¹ Ekkena annuk ra akkom pokiten ra etiwa kich ne marita non pekin ngun ren ach kutta ne appiru an Kot tong ngeni kich. Ua anean pwe amo ita a wor ach weweochuti usun ewe nongonongen tong me annuk Samach won Nang me Noun we, Jises Kraist, ra forata me non ewe Mwichefenin Jises Kraist ren Aramas mi Pin non Fansoun Soponon. Met ua apasa ikei a achocho me affata ifa usun an Kot tong a awewei ena nongonong me ekkena annuk mi pin an Mwichefen.

I.

Ew mettoch sia wewengaw ngeni usun ewe kapung mi tapweto mwirin ei manau pwe aramas mi och ra no ngeni ew neni itan nang me aramas mi ngaw ra no ngeni ew neni esemuch itan hell. Ei nuku mi muan usun ru chok neni sipwe no ngeni a ngeni kich ewe ekiek pwe ekkewe rese tongeni aneasochisi meinisin ekkewe annuk mi namot ach sipwe no nang repwe no ngeni hell.

Samach won Nang mi tong a wor ew an kokkot mi murino fan iten Noun semirit. Ewe nongonongen ewe Mwichefen mi niwinsefan an Jises Kraist a aiti kich pwe meinisin noun Kot—fiti esap pwachenong ese kon or popun esap nom ikkeia—repwe no ngeni ew muun ning.² “Mi chommong rum non imwen Semei,”³ Jises a aitikich. Seni pwarata ikenai sia sinei pwe ekkena neni ra nom non unungat sokkun muu mi ning. Non ewe Amuchunon Kapung emon me emon kich sipwe kapung anongonong won ach angang me mochenin netipach.⁴ Me mwen ena, epwe namwot sipwe riaffou ren ach tipis sise aier seni. Ekkewe pukefel ir mi fatoch won ena.⁵ Mwirin nouch we Sou Apung mi wenechar epwe mut ngeni kich neniach me non ew ekkei muun ning. Iwe, usun kich mi sinei seni pwarata ikenai, meinisin “repwe kapung … ,me emon me emon aramas epwe angei anongonong won an pwisin angang, an pwisin nemenem, non ekkewe imw minne ra mwonneta.”⁶

Ewe Samon a finata an epwe pwari ekis usun ru me nein ekkei muun ning. Non sokonon, ewe Samon a pwari watte usun ewe tekian muun ning, minne ewe Paipel a a awewei pwe usun ewe “ningen ewe akkar.”⁷

Non ewe ningen “selestial”⁸ a wor unungat ukukun ika kinikinin.⁹ Ewe tekian me nein ekkei ina ewe manau tekia non ewe muun selestial, ikewe ia sia tongeni winiti usun Samach we me Noun we, Jises Kraist. An epwe anisi kich ne amari ngenikich napanapen kot me ewe siwin non wesetan nikinikin fonufan mi namot ach sipwe angei tufichich mi echipwer, ewe Samon a pwari nongonong me awora annuk mi anongonong won annuk esemuch. Iei met sia afanafana non ewe Mwichefenin Jises Kraist ren Aramas mi Pin non Fansoun Soponon pokiten popun ewe nongonong me annukun ei Mwichefen mi niwinsefan ina sipwe amonnata noun Kot semirit ngeni manau non ewe ningen selestial me, akkaewin ngeni manau tekia non ewe tekian kinikin.

Ekkewe pwon mi pin ra for me ekkewe feioch mi pwon ngeni ekkewe mi tupwen non ekkewe tempel an Kot ir ekkewe kii. Ei a awewei ewe auchean ach foruta temple, usun minne ewe mwichen kon ra fen kon mi unusen ningoch. Ekkoch ra osukosuk ren ei apochokun, rese weweiti pwe ekkewe pwon mi pin me angangepinen non ewe tempel ra emweni kich ngeni ach sipwe angei manau tekia. Ei a tongeni chok epwe weweoch me non ewe kokkoten ennet mi pwano usun unungat kinikinin ning. Pokiten an Samach won Nang tong mi napanap ngeni Noun meinisin, I a awora ekkoch muun ning—usun Elter Quentin L. Cook a awewei naneu— ir meinisin ra fokkun amarar nap seni met sia tongeni weweiti.¹⁰

Ewe Achasefan an Jises Kraist a fori meinisin ekkei repwe tufich. I a fen pwari pwe I a“mwareiti ewe Sam, me tumunu meinisin angangen poun.”¹¹ Pwe manau ese much mi kawor non sokopaten ekkewe muun ning. Kich mi sinei seni pwarata ikenai pwe “meinisin muu a wor annukun.”¹² Akkauchean:

“I ewe ese tufichin etiwa ewe annukun ew muun selestial esap tongeni etiwa ew ningen selestial.

“Me i ewe ese tongeni etiwa ewe annukun ew muun terrestrial esap tongeni etiwa ew ningen terrestrial.

“Me i ewe ese tongeni etiwa ewe annukun ew muun telestial esap tongeni etiwa ew ningen telestial.”¹³

Non ekkoch kapas, ewe muun ning sia angei non ewe Amuchunon Kapung a foruno me ren minne ekkewe annuk sia fini sipwe manaueni me non an Samach won Nang kokkot mi uren tong. Fan ena kokkot mi wor chommong muu pwe meinisin Noun semirit repwe tongeni ewis ngeni ew muu ikewe ra tongeni “etiwa.”

II.

Ekkewe afanafan me annukun an ewe Samon Mwichefen mi niwinsefan ra aea ekkei ennet esemuch non ew napanap mi tongeni weweoch chok me non an Samach won Nang kokkot fan iten meinisin Noun semirit.

Ina minne, sia asufonu an emon me emon pungun finata. Napengeni ir mi apareni an ei Mwichefen achocho ne apochokuna pungun finata ren namanam. Ekkei pekin apochokuna ra anisi an Samach won Nang kokkot. Sia kutta ne anisi meinisin Noun semirit—esap chok nouch memper —ne pwapwaiti ewe auchean ngaseno ne finata.

Usun chok, fan ekkoch aramas ra eisini kich pwata sia tinano misineri ngeni chommong muu, pwan nein chon nuku Kraist. Ra pwan eisini kich pwata sia awora watten pekin aninis ngeni aramas esap ir chon ach Mwichefen me nukun ach apachangeni ach angangen misineri. Sia fori ei pokiten ewe Samon a aiti kich pwe sipwe asamonu meinisin Noun semirit pwe ir pwich me fefinach, me sia mochen aea fengen ach feiochun ngun me feiochun pisek ngeni meinisin.

Nongonong esemuch a pwan awora ew sokonon ekiek won semirit. Seni ei ekiek sia kuna pwe ewe nounoun me tumunun semirit ina kinikinin ewe kokkot mi echipwer. Ei ew wis mi apwapwa me pin an ekkewe mi kawor ngeni ewe manaman ne fiti. Ina minne, sia angei annuk pwe sipwe asukuna me eppeti ekkewe nongonong me foffor mi awora tettenoch ngeni maritan me pwapwan semirit fan an Kot kokkot.

III.

Amuchunon, Ewe Mwichefenin Jises Kraist ren Aramas mi Pin non Fansoun Soponon a men sineno pwe ew Mwichefen mi ionapei famini. Nge met sise kon weweochuti pwe ewe ennetin pwe ionapen ach famini ese aukuk ngeni nefinach chok won fonufan. Nefinen aramas esemuch ir mi pwan auchea ngeni ach namanam. Ewe popun ewe Mwichefen mi aniwinsefanito pwe epwe anisi meinisin noun Kot kewe repwe tongeni angei met Kot a ennetin mochen ngenir. Me ren ewe achasefan mi kawor seni ewe Achasefan an Kraist, meinisin aramas mi tongeni angei manau ese muuch (manau tekia non ewe muun celestial), mine Inenap Eve a apasata, “Kot a ngeni meinisin ekkewe mi anneasochis.”¹⁴ Ei a nap seni manau ese much. Preseten Russell M. Nelson a achema ngeni kich “non an Kot kokkot ese much, amanau ina wisen emon me emon; [nge] manau tekia ina wisen famini.”¹⁵

Auchea ngeni kich ina an Kot pwarata pwe manau tekia a tongeni chok tufich ren ach nukuchar ngeni ekkewe pwon mi pin ew apupunu esemuch nefinen emon mwan me emon fefin.¹⁶ Ena nongonong mi echipwer ina popun sia asukuna pwe “an emon at are nengin mi eu kinikinin manauen emon me an popun ren manau me mwen ei fonufan, manau iei, me feinfeino.”¹⁷

Ina pwan popun ewe Samon a anamwota An Mwichefen epwe ungeni pochokunen mwicheich me muu ne suseni An nongonongen apupunu nefinen emon mwan me emon fefin, me ungeni siwin me aosukosuka ika siwini emon at are nengin ika achufengeni sokofesenin mwan me fefin.

An ewe Mwichefen mi niwinsefan ekiek won ekkei auchean nongonong nap ngeni mi aora chon ungeni. Sia weweiti ena. An Semach won Nang kokkot a atufichi epwe wor “ungeni non mettoch meinisin,”¹⁸ me an Setan we nananpen ungeni a nongonong won met mi kan auchea ngeni ena kokkot. Nge pokiten ei, a kutta ne epeti fefeita ngeni manau ese much ren osukosuken opupunu, foos ngaw usun nounou semirit, ika osukosuka nikinikin at me nengin. Nge inamo, kich mi sinei pwe mwirin fansoun nangatam, ewe popun me kokkot mi echipwer an Samach won Nang mi uren tong esap siwin. Napanapach pwisin mi tongeni siwin, me an Kot kokkot a namwot pwe non fansoun wesino, ekkewe mi nukuchar mine ra apwonuneta ar kewe pwon mi pin repwe tongeni angei meinisin ekkewe feioch mi pwon.¹⁹

Ew afanafan mi sokkono me auchea epwe anisi kich ne monetta ngeni manau esemuch, “ewe mi nap seni an Kot niffang meinisin,”²⁰ina ewe esinesin non 1995 won famini.²¹ A apasa pwe mi, ennetin, sokkono seni ekkoch ekkewe annukun fonu iei, me foffor, me mochen, usun nomefengen aramas me opupunu nefinen mwan me mwan ika fefin me fefin. Ir ekkewe rese unusen weweiti an ewe Sam kokkot mi tong fan iten Noun kewe mi tufich repwe ekieki ei kapasen pwarata ese nap seni eu chok kapasen nongonongen foffor mi tongeni siwin. Sokonon, sia affata pwe ewe esinesin ngeni famini, a for me won nongonong ese tongeni siwin, a awewei ewe sokkun nefinen famini ikewe ewe auchean kinikinin ach marita esemuch a tongeni fis.

Ina ewe kokkot ren ewe nongonong mi sokkono me annukun ewe Mwichefenin Jises Kraist ren Aramas mi Pin non Fansoun Soponon mi niwinsefanito.

IV.

Non chommong nefin me nonnomun aramas non ei manau, emon me emon kich sipwe manau ren sokofesenin manauach seni ekkoch. Ren kich chon tapweno mwirin Kraist sipwe tong ngeni chon unukuch, sipwe manau kinamwe ngeni ekkewe rese nuku usun kich. Kich meinisin noun ewe Sam won Nang mi tong. Ren kich meinisin, A akokkota manau mwirin mano me amuchunon, ew muun ning. Kot a mochen kich meinisin pwe sipwe achocho ngeni An kewe tekian feioch ren ach aponueta An tekian annuk, pwon mi pin, me angangepin, ir meinisin ra tekia me non An tempel mi pin ra foruta non unusen fonufan. Sipwe wesen kutta ne aea fengen ngeni ekkoch ekkei ennetin manau esemuch. Nge ren ewe tong mi wor rech fan iten chon oruch, sia soun etiwa met ra finata. Usun emon soufos non ewe Puken Mormon a aitikich, sipwe nikitu, ren “ew tongen Kot me aramas meinisin.”²²

Usun Preseten Russell M. Nelson a affata non ach we mwichenap a no, “Ese mwo wor ew fansoun non uruon fonufan nupwen sinenap usun ach Chon Amanau a kon auchea me fich ngeni meinisin ngunun aramas. … Ewe nimenimochun nongonongen Kraist mi unusen manaman. A siwini manauen meinisin ekkewe ir mi weweiti me kutta ar repwe aea non manauer.²³

Amo ita kich meinisin sipwe aea ena nongonong mi pin non pwisin manauach, ua iotek non iten Jises Kraist, amen.