Siwin ngeni ewe Mochenin Kot
Pusin ach siwin won winikapach a apachanong ewe wis ne aporousa ewe kapas allimen Jises Kraist ngeni fonufan.
Ua kinisou ren an Preseten Russell M. Nelson unusen manamanen pungun kokko ngeni angangen misineri me an Preseten M. Russell Ballard me Elter Marcos A. Aidukaitis’s porousen misineri non ei soran.
Ew angangen misineri ngeni Great Britian nesopon ewe ier a no a ngeniei ai upwe nengen sefani ekkewe mettoch mi fis ir ekkewe foun nongonongen ai finata ai upwe fori angangen misineri.1 Nupwen ai ua 15 ier, pwi ewe achengicheng a watte seniei, Joe, a 20—ewe ierin tufichin an epwe angangen misineri. Non United States, pokiten ewe osukosuk an Korea, a chok mumuta chokukun ar repwe angang. Ekoch chok seni ew me ew kewe wart a tongeni kokko iteiten ier.2 A ew amairu nupwen neum ewe pisop a kori Joe an epwe ekieki ei tufich ren semem we. Joe a fen amonata noun taropwe ren sukunen pekin safei. Semem ewe, ese pochokun non ei Mwichefen, a fen fori amonen pekin mwoni an epwe anisi i me ese pwapwaiti an Joe epwe no fori angangen misineri. Papa a ekieki pwe Joe a tongeni watte an angangoch ika a no ngeni sukunen pekin safei. Ei a ew watten osukosuk non am ewe famini.
Non ew auchean poporous ngeni pwi we watte mi mirit me unusen murinno, am ouwa awesano pwe an finata ika epwe angangen misineri me amangano an sukun a anongonong won unungat kapaseis: (1) met Jises Kraist mi anneasochisi Kot? (2) Met ewe Puken Mormon ewe kapasen Kot? me (3) Met Joseph Smith ewe Soufosun ren ewe Niwinsefanito? Ika ponuen ekkei kapas eis a ura pwe u, a fat pwe Joe a tongeni fori chommong mettoch mi murinno an epwe uwei ewe kapas allimen Jises Kraist ngeni fonufan nap seni an epwe mwitir ne winiiti emon tokter.3
Ena pwinin ua iotek ren ennetin popun me fiti pochokunen ai nuku . Ewe Ngun, non ew an mi ennetin unusen manaman, a opochokuna ngeniei pwe ponuen ekkewe unungat kapaseis a uu. Iei ew mettoch mi fis a pochokunono ekesiwinin me mwirin nupwen a watteno Ua mefi pwe meinisin ai finata upwe fori non unusenn manauei epwe ekesiwin ren ekkei ennet. Ua pwan sinei pwe upwe angangen misineri ika e kawor ngeniei ewe tufich. Non unusen manawen angang me met uwa sinei non pekin ngun, ua weweiti pwe ennetin siwin ina met a pwano ren ewe memefin etiwa ewe mochenin Kot me sia tongeni emwen non ach kewe mokutukut seni ewe Ngun mi Fel.
A fen wor ai kapasen pwarata ren ewe Jises Kraist pwe I Chon Amanauen Fonufan. Ena pwinin ua angei ew kapasen pwarata non pekin ngun ren ewe Puken Mormon4 me ewe Soufos Joseph Smith.
Joseph Smith I a emon noun ewe Samon chon angang.
Ami kapasen pwarata repwe pochokunono nupwen ouwa sinei non netipemi seni ami iotek pwe ewe Soufos Joseph Smith a emon noun ewe Samon chon angang. Non fansoun ewe wanu ier a no, ew me nein ai kewe angangen non ewe Mwichen Engon me Ruemon Aposel upwe cheki me anneani meinisin kewe akaewin auchean taropwen Joseph Smith me toropwe me ewe angangen kutta porous minne a emweni ngeni forun Saints kewe puk.5 Ai kapasen pwarata me mwareiti ren ewe Soufos Joseph smith a fen pochokununo me napeno mwirin ai anneani ewe usun tichikin manauan me usun an angangen soufos mi kefinita me mwen ei manau.
An Joseph chiakuni ewe Puken Mormon seni ewe niffang me manamanen Kot a unusen nongonong ngeni ewe Niwinsefanito.6 Ewe Puken Mormon mi tettenoch, makkefichino, me mi masoweni ponuweni ekkewe kapaseisen manau. Pwan iei ew kapasen pwarata ussun Jises Kraist. Ua pwarata pwe Joseph Smith mi tupen, me uren nuku, me an angang ngeni ewe Samon non an a ueato ewe Puken Mormon.
Ekkewe pwarata me mettoch mi fis ra rekot me non ewe Doctrine and Govenants a awora ekkewe kii, angangepin, me pwon ra murinno fan iten amanau me manau tekia. Esap chok ekkewe auchean mettoch mi namot ngeni forutan ewe Mwichefen nge pwan awora nongonongun memefin netip epwe mut ngenikich ach sipwe weweiti popun ach manau me ngeni kich ew tufichin ach sipwe weweiti non fochofoch.
Ew me nein ekkewe chommongun kapasen awewen osini ren wisen Joseph Smith ussun emon chon angangen ewe Samon a pwa non ewe Fik me Onuen kinikinin ewe Doctrine and Covenants. Mi ew fatafatochun rekotun ewe nemesepwin nang, pachonong ekkewe muun ning, minne ewe Soufos Joseph Smith me Sidney Rigdon feioch ren ar ra angei won February 16, 1832. Non ena fansoun, ewe watten ukukun chommongun mwichefen ra afanafana pwe an ewe Chon Amanau ewe Achasefan esap wato amanauen chommong aramas. Ra nuku pwe ekkoch chok repwe manau me ewe watten ukukun chommongun repwe koturunong non hell me rochopwak, pachenong ese wor nemuchun eriafoun “ewe a kon enieput me sise fen mwenin kapas ren eriaffoun.”7
Ewe pwarata a masoweni ewe Fik me Onuen kinikin a awora ew ningen nemesepwin ewe kinikinin ning ikewe ewe watten ukukun chommongun noun Samach won Nang semirit ekkewe mi nikitu non ar manau me mwan non nenier ra feioch mwirin ewe omuchunon kapung.8 Ewe nemesepwi ren ekkewe unungat muun ning, ewe fachikin ewe minne a “nununo seni wewe meinisin,”9 ew awenewenen amuanin ewe nongonong mi pochokun nge mi mwan pwe chommong repwe turunong non hell me riaffoun niwinin tipis.
Nupwen ka esinna pwe Joseph Smith a chok 26 ierin, ese naf an sukun, pwe ese sisinei ekkewe sokun kapasen fonu minne ekkewe ra chiaku non ewe Paipen, i a ennetin emon noun ewe Samon chon angang. Non ewe 17th en uwokisin kinikin 76, i a angei memef an epwe ne nounou ewe fos ese pung nap seni eriaffoun niwinin tipis ese much ena sia nounou non ewe Kapasen Allimen John.10
A men amwarar pwe 45 ier mwirin emon sou emwenin ewe Mwichefen Anglica me mi chon sukun mi sinenap me tipachem,11Frederic W. Farrar, ewe a makkei Ewe Manauen Kraist,12 a afata pwe ewe wewen eriaffoun niwinin tipis non ewe Tappin King James ren ewe Paipen ina ewe pwano pwe ewe chiakun mi mwan seni Hebrew me Greek ngeni fosun Merika.13
Non ach ei fansoun, chommong ra fen apiru ewe ekiek pwe esap wor met epwe fis ren tipis. Ra anisi ewe mumutan tipis ese wor ne kaukun nge ese wor aier sefan. Ach nongonong mi affat ese chok anetata ewe ekiek mi mwan pwe chommong aramas repwe koturunong non hell feinfeino me eriafoun niwinin tipis nge pwan afataochu pwe an emon me emon pusin aier sefan mi auchea ne angei ewe Achasefan an ewe Chon Amanau me angei ewe muun selestial.14 Ua pwarata pwe Joseph Smith emon ennetin chon angang noun ewe Samon a wato ewe Niwinsefaniton An ewe kapas allim!
Pokiten ewe Niwinsefaniton ewe kapas allimen Jises Kraist, sia weweiti namoten ir me ruu aier sefan me ekkewe “angangen wenechar.”15 Sia weweiti watten auchean ewe Achasefan an ewe Chon Amanau me An kewe angangepin ngaseno me pwon mi pin, pachonong ekkana a fis angangan non ewe tempel.
Ekkewe “angangen wenechar” ra feitto seni met ekkewe uwan siwin. Ennetin siwinin netipach ngeni Kot a fis me ren ach etiwa me mochen fori ewe mochenin Kot.16 Ekkewe mwirimwirin me feioch ra feito seni ach ennetin siwin ir mi pung me kinamwe fochofoch me an emon me emon pwonen omuchunon pwapwa17— ikamo a wor osukosuken ei manau.
Ennetin siwinin netipach ngeni ewe Chon Amanau a ekesiwini mochenin inis ngeni ew epinipin, upusefan, aramas mi nimenimoch—emon minefon aramas non Jises Kraist.18
Chommong Ra epet senir ewe Ennet Pokiten Rese Sinei Ian Repwe Kuna Me Ian
Met ekkewe angang ra mokut seni siwin? Non ewe nenien kanapus Liberty, ewe Soufos Joseph Smith a makkei pwe chommong “ra chok epetir seni ewe ennet pokiten rese sinei ian repwe kuna me ian.”19
Non an ewe Samon kapasen awewe ngeni ewe Doctrine and Covenants, ew watten niosun esinesinin an ewe Samon popun fann itach a fen foruno I a afata, “Ina minne, Ngang ewe Samon, ua sinei ewe osukosuk ewe epwe feittiw won ekkewe chon nom won fonufan, ua kokori nei ewe chon angang Joseph Smith, Jun, and porous ngeni i seni nang me ngeni i ekkewe annuk.” I a pwan sopweno ne awewei, “Pwe ewe unusochun ai kapas allim epwe affat meren ekkewe mi apwangapwang me ekkewe ir mi mecheres ngeni ewe soponon ewe fonufan.”20 Ena a pwan pachenong misineri mi ounusa ierin ar angang. Ena a pwan apachanong emon me emon kich. Ei epwe ew awenewenochun ekiek ngeni meinisin ion ewe a wor an feiochun ew siwin ngeni ewe mochenin Kot. Ewe Chon Amanau a kirekiroch ne korikich ach sipwe An mongungu me pouni Poun.21 Ewe tong an ewe Chon Amamnau epwe ach saramen emwen. Ewe Chon Amanau a afanafana ngeni Noun kewe chon kuno, “Oupwe feinno, o afanafana unusen fonufan.”22 Me ngeni Joseph Smith, I a afata, “Afanafana ai kapas allim ngeni meinisin aramas ion kewe rese mo angei.”23
Ew wik mwirin ewe epinipinin ewe Kirtland Tempel non April 3, 1836, ewe Raninifenin Paska me pwan Passover, ewe Samon a pwa ngeni Joseph Smith me Oliver Cowdery non ew amwararen nemesepwi. Ewe Samon a tipeew ngeni ewe tempel me afata, “Iei poputan ewe feioch minne epwe ninitiw won mokuren nei kewe aramas.”24
Mwirin an ei nemesepwi a kesipeno, Moses a pwato “me wato … ekkewe kien ewe ioisefanin Israel seni ekkewe ruanu kinikinin fonufan, me ewe emwenin ewe engon einang seni ewe fonuen enefen.”25
Presetent Russell M. Nelson, nouch ewe achengicheng soufos ikenai a omochu pwan ekkei chok ki, a aitikich non ei soran: “Anuon ra fen tumun ngeni ei fansoun nupwen ewe pwonen ionfengeni Israel a fis. Nupwen oupwe misineri, mi fakkun auchea wisemi non ei mwokutukut mi amwarar ese fifis me nom!”26
Ren an ewe Chon Amanau mutata ne aporousa ewe kapas allim an epwe winiti kinikinin ion kich, a auchea sipwe winiti siwin ngeni ewe mochenin Kot; a auchea sipwe tongei chon oruch, aporousa fengeni ewe kapas allimen Jises Kraist mi niwinsefanito, me korato meinisin repwe feitto me kuna. Pokiten kich chon ei Mwichefen, sipwe aucheani an ewe Soufos Josep ponueni ngeni John Wentworth, ewe chon fori ewe Chicago Democrat, in 1842. I a tingor porousen ewe Mwichefen. Joseph a omuchano an ponueni ren an nounou ewe “Nongonongun Ennet” pwe ew kapasen awewe ngeni ekkewe engon me unungatin Nongonongun Nuku. Ewe nongonong a wato, non chok mwochomoch, met epwe kawesino:
“Ese wor pau a tongeni akouono ewe angang seni an epwe fefeita; rochongaw epwe napeno, mwichen aramasangaw repwe kochu, soufiu repwe chufengen, kewe mei chofona repwe eitengawa, nge ewe ennetin Kot epwe chok fokkun feinno won winikapan, tori an epwe tonong non meinisin watten fonu, churi meinisin fonu me fan nang, no ngeni kewe kukun fonu, me mongungunong non sening meinisin tori meinisin ekkewe auchean popun an Kot repwe taweochuno, me ewe Jehovah mi Napanap epwe apasa ewe angang a wes.”27
Iei ewe fatafatochun kokko fan iten tappin misineri ren Aramas mi Pin non Fansoun Soponon Non ewe ngunun ewe “ Nongunongun ren Ennet,” sia kinisou pwe nukanapen ew pandemic won unusen fonufan, ekkewe misineri mi nikitu ra aporousa fetanei ewe kapas allim. Misineri, am ouwa tongekemi! Ewe Samon a tingor ngeni emon me emon kich pwe sipwe aporousa fetanei An kapas allim non kapas me angangan. Pusin ach siwin won winikapach a apachanong ewe wis ne aporousa ewe kapas allimen Jises Kraist ngeni fonufan.
Ekkewe feiochun aporousa fetanei ewe kapas allim a pachenong napanon ach siwin ngeni ewe mochenin Kot me mut ngeni Kot epwe nom non manauach.28 Sia efeiochu ekkoch ar repwe sinei ew “watten ekesiwinin” netip.29 Mei wor ennetin pwapwa fochofoch non aninisin ne uweato aramas ngeni Kraist.30 Angang ren ewe siwin ren pusin kich me ekkoch ina ewe angang mi auchea.31 Ua pwarata non itan Jises Kraist, amen.