Iei Ewe Awa
Iei ewe fansoun sia tongeni kaeo. Iei ewe fansoun sia tongeni aier. Iei ewe fansoun sia tongeni efeiochu ekkoch.
Pwi me fefinei kewe mi achengecheng, ei mwichenap a fen auchea non fitu sokkun napanap. Sia fen feioch me ren ekkewe iotek, poraus, me kon minne ra fiis. Sia fen angei feiochun ngun seni ekkewe chon angang noun ewe Samon.
Sia fen angei auchean emwen fan iten ewe fansoun mwach. Ai iotek pwe ewe Ngun a fen foos ngonuk pwisin usun met ewe Samon a mochen en kopwe fori.
Ewe fansoun mwach ese fatafatoch. Asepwan a ekkesiwin. Mwokutukukun niwinin moni sise tongeni sipwe sinei me mwen. Weseatan osukosuken fonu, me semwen pwisin ir mi tongeni mwitir ne ekesiwini manauch. Ekkei foffor napengeni ese tufich sipwe siwinir. Nge mi wor ekkoch mettoch sia tongeni ekesiwini, pachenong ifa usun ach aea ach fansoun iteiten ran.
Uwa kan sani ei kuukuun kapas seni Henry Van Dyke, mi maak won eu minen asinei fansoun me Wells College non New York. A anea:
Ewe chuno fan outui
A aimuono ewe fansoun mwach seni fansoun me nom:
Me mwan, ewe awa ese mwo fiis a mour
Non rochopwak, me nukkun ai tufich:
Nesokurun ewe fansoun ese niwin,
Ewe awa a keran fiis, esap chiwen nouch:
Eu awa chok mi nom non poum,—
Ewe IEI minne ewe chuno a nommono won.1
Ewer, kich mi tongeni kaeo seni fansoun nom, me ewer, kich mi tongeni sipwe monneta fan iten ewe fansoun mwach. Nge iei chok sia tongeni fori. Iei ewe fansoun sia tongeni kaeo. Iei ewe fansoun sia tongeni aier. Iei ewe fansoun sia tongeni efeiochu ekkoch me “eitieta poumi kana mi ititiw.”2 Usun Mormon a auroura ngeni noun we at Moronai, “Sipwe achocho ne angang; … pun mi wor eu angang sipwe fori [nupwen] kich mi nom non ei inisin puun, pwe sipwe tongeni akkufu ewe chon koum ngeni unusen wenechar, me asosoi ngunuch non ewe muun Kot.”3
Ewe chon koum ese tongeni epwe anut. Iteitan mi chok wor sokofesenin ewe ennet. Uwa apasa sefani ai tingor seni nesosorei pwe oupwe fori ekkewe mettoch minne epwe anapano ami fefeita ochun ngunumi, pwe oupwe sopweno ne fetan me non ami sokkun weires me feioch epwe tori kemi.
Fefeita ochun ngun epwe napono ren ami pin non ewe tempel me awatteno ach weweiti usun ewe mamarinon watten me anononun ekkewe feioch sia angei ikenai. Uwa titingor ngenikemi oupwe fiu ngeni napanapen ewe fonufan ren ekkewe feioch rese muuch non ewe tempel. Om fansoun ikewe epwe ngonuk om feioch ese much.
Usun mwarinon Mwichefen, sipwe achocho ne awora fansoun ren chommong tempel. Faik me ruanu minefo tempel iei ir mi chiwen akangang wor. Chommong me neir ra forsefan. Ua iotek fan iten ekkewe chon angang murino fan iten ekkei sokkun angang non unusen fonufan.
Non ewe ngunun iotekin kinisou, Upwe tipetekison ne apasau ach kokot ren koutan minefon tempel non eu me eu ekkei neni mi tetenitiw: Wellington, New Zealand; Brazzaville, Republic of the Congo; Barcelona, Spain; Birmingham, United Kingdom; Cusco, Peru; Maceió, Brazil; Santos, Brazil; San Luis Potosí, Mexico; Mexico City Benemérito, Mexico; Tampa, Florida; Knoxville, Tennessee; Cleveland, Ohio; Wichita, Kansas; Austin, Texas; Missoula, Montana; Montpelier, Idaho; me Modesto, California.
Ekkei 17 tempel epwe efeiochu chommong aramas non me ruepek ewe mangaku. Ua tongei kemi, achengecheng pwi me fefinei. Akauchean, ewe Samon amen tongei kemi. I ami we Chon Amanau me ami Chon Angasono. I a emweni me ouroura An Mwichefen. Ita sipwe eu mwichen aramas mi nimenimoch ngeni ewe Samon, minne a apasa, “Ami oupwe nei kewe aramas, me ngang upwe noumi Kot.”4
Ren ei ua iotek non ewe it mi pin iten Jises Kraist, amen.