Nefinach ngeni Kot
Ese nifinifin met nonnomuch won fonufan epwe fis, sia tongeni nuku Kot me kuna pwapwa non I.
Usun Job non ewe Testament Noom, non ew fansoun riaffou ekkoch repwe mefi pwe Kot a nikitireno. Pokiten kich mi sinei pwe mi wor an Kot manaman ne eppeti ika awesano och riaffou, meni sipwe mochen ngunungun ika pwe i esap fori, meni sipwe eis, “Ika Kot esap awora ewe aninis ua ioteki, ifa usun upwe nuku non I?” Och kinikinin fansoun non an kewe sossot mi nap, Job mi tupwen a apasa:
“Iwe oupwe sinei pwe Kot a amwanniei me a fori ew ssar pwe epwe niapeni ei.
“Inamo ua siongaw, ‘ka amwanniei!’ Use angei ponuwan; inamo ua kokko ren aninis, ese wor pung.”1
Non An ponuweni Job, Kot a eis, “Kopwe opunguei pwe kopwe tupwen?”2 Ika non ekkoch kapas, “Kopwe pwan mwo amwanniei? Kopwe opunguei pwe kopwe pung?”3 Siowa a pochokun ne achema ngeni Job usun An unusen pochokun me sinenap, me Job non an tekison a fangeta pwe ese wor pisekin mi arap ngeni ewe mirit, manaman, me wenecharen Kot me ese tongeni uta non kapungun ewe mi Nap:
“Ua sinei pwe ka tongeni fori mettoch meinisin,” a apasa, “me ese wor ekiek a tongeni monono sonuk.
“… Ua porous ussun ekkewe mettoch use weweiti me ekkewe mettoch mi amwarar use tongeni upwe sinei. …
“Iwe ua saw ren ekkewe mettoch ua apasa o non ai noninen me aiersefan ua fanangei mokurei.”4
Nesoponon, Job a tufich ne kuna ewe Samon, me “ewe Samon a afeiochu manauen Job we murin nap seni an afeiochu me noom.”5
Mi ennetin umwes me rech ren ach kuna chok mettoch mi kaneto ach sipwe ekieki ne apungu Kot, ne ekieki, ren awewe, “Ngang use pwapwa, iwe menin Kot a fori mettoch mi muan.” Me rech, Noun semiriten fonufan non ew fonufan mi tur, ekkewe ir mi sinei chok ekis usun nom, iei, me mwach, A affata, “Mettoch meinisin mi nom ren, pun i mi siner meinisin.”6 Jacob a ourour non mirit: “Ousap achocho ne auroura ewe Samon, nge oupwe angei aurour seni poun. Pun nengeni, ami pwisin oua sinei pwe i a aurour non mirit, me non pungoch, me non umoumoch esemuch, won an angang meinisin.”7
Ekkoch ra wewengaweiti ekkewe pwon an Kot pwe wewen ita aneasochis ngeni I epwe awora tichikin pungun mi foruno. Meni repwe ekieki, “Ika ua achocho ne serve ew misin, Kot epwe efeiochuei ren ew pupunu pwapwa me semirit,” are “Ika usap fori angangen sukun non Raninfel, Kot epwe efeiochuei ren grade mi och,” are “Ika ua moni unusen ew ne engon, Kot epwe efeiochuei ren ew angang ua awitiwiti.” Ika manau ese fis non ei napanap ika anongonong won ew kokkot mi foruno, meni repwe mefi pwe Kot a nikitireno. Nge mettoch rese fis non pwisin ar napanap. Sisap ekieki pwe an Kot we kokkot ew an nang mwesin pisekisek ikewe sipwe (1) fini ew feioch sa mochen, (2) wanong ukukun meen angangoch, me (3) ewe mochen epwe mwitir kawor.8
Kot ennetin epwe asufonu An kewe pwon mi pin me pwon ngeni emon me emon kich. Sisap aureki usun ena.9 Ewe manamanen ewe achasefan an Jises Kraist—ewe a feitiw fan mettoch meinisin me mwirin feita won tekia10 me ewe a wor ren unusen manaman non nang me won fonufan11—epwe apungano pwe Kot mi tongeni me epwe apwonueta An pwon. A fokkun auchea ach sipwe epini me aponueta An kewe annuk, nge esapw iteiten feioch epwe fis ren ponuetan an kewe annuk12 ren napanapan, pwomwan, me kunokun anongonong won ach ekiek. Sipwe fori ach tongeni nge mut ngeni I ewe akokkoten efeioch, ren pekin inis me ngun.
Preseten Brigham Young a awewei pwe an nuku ese fis me won ekkoch pungunon mettoch ika feioch nge won an pwarata usun me nefinan ngeni Jises Krasit. A apasa: “Ai nuku ese nom won an ewe Samon angang won ekkewe fonuen neset, won an wato ekkewe aramas ikei, … ika won feioch a wata won ekkei aramas ika won ekkenan aramas, esap pwan ren ika sia feioch ika sise feioch, nge ai nuku a nom won ewe Samon Jises Kraist, me ai mirit ua fen angei seni i.”13
Ach aier me anneasochis, ach angang me fangeno ir mi auchea. Sia mochen nom nein ekkena Ether a wewei pwe ir mi soun “angang mi och fansoun meinisin.”14 Nge esap kon pokiten ekkoch iteita mi isois me non uruon puken selestial. Ekkei mettoch mi auchea pokiten ra anomu kich non an Kot angang me ir kewe popun sia chungeni I non ach pwisin siwin seni inisin aramas ngeni souneng.15 Met Samach won Nang a fang ngeni kich ina pwisin I me Noun we, ew nefinach ngeni Ir mi arap fengen me nikitu seni ewe chen me affor an Jises Kraist, ach Chon Angasano.
Kich noun Kot semirit, sia ewis ngeni manau fochofoch me manau esemuch. Nonnomuch mwach pwe sipwe winiti Noun, “fiti Kraist ne angei minne Kot a isoni fanasengesin.”16 Samach mi mochen epwe emweni emon me emon kich won An we aanen pwon fiti eipweipw mi for ngeni met mi auchea ngeni kich me affout ngeni An kokkot fan iten ach pwapwa ren I. Kich mi tongeni esuku ew maritan epinukunuk me nuku non ewe Sam me ewe Nau, ew napenon ach afani Ar tong, me ewe ourur me emwen iteiten fansoun seni ewe Ngun mi Fel.
Ina mwo, ei aan ese mecheres ngeni emon me emon kich. Mi auchea watten enimenimoch epwe fis an epwe mecheres. Jises a apasa:
Ngang ewe ira mi ennet o Semei we chon tumunu.
“Panei kewe meinisin rese uwa, Semei we epwe ukufi seniei, iwe a nimeti ekkewe mi uwa meinisin pun repwe nimoch o uwa chommong.”17
Ewe angangen an Kot nimeti me enimenimochu kich, mi namot, epwe weires me ammetek fan ekkoch. Achema an Paul memef, sia “fiti Kraist ne angei minne Kot a isoni fanasengesin; ika pwe sipwe fiti ne riaffou, pwe sipwe pwan chufengen non an ning.”18
Iwe, nukanapen an ei chon nimeti ekkei, me nukun om kopwe fen song ngeni Kot, kopwe arap ngeni Kot. Kokkori ewe Sam non iten ewe Nau. Fetan Rer non ewe Ngun, ran me ran. Mut ngeni Ir non fansoun ar repwe pwari Ar Nukuchar ngonuk. Ennetin sinei Ir me ennetin sinei pwisin en.19 Mut ngeni Kot epwe nemenem.20 Ewe Chon Amanau a epinukunuku kich:
“Ausening ngeni I ewe a peni kich ngeni ewe Sam, ewe a tingor pwetete fan itom mwen i—
“Apasa: Samei, nengeni riaffoun me manon ewe emon ewe ese mo wor tipisin, non I ka men menemen ren; nengeni chaan noum we At a surutiw, ewe chaan ewe emon ka fangeno pwe en pwisin kopwe ningeno;
Ina minne, Semei, angasa ekkei pwi [me fefinei] ekkewe ra nuku non itei, pwe repwe tongeni feito ren me manau feinfeino.”21
Ekieki ekkoch awewe ren nukuchar mwan me fefin ra nuku non Kot, epinukunuk pwe An kewe pwonen feioch epwe nonnom rer non ei manau ika non ar mano. Ar nuku ese chok nongonong won met Kot a fori ika ese fori non pukutan manauer ika eu fansoun nge ar sinei I Semer we a efeiochur me Jises Kraist ar we Chon Angasano mi nukuchar.
Nupwen Abraham ita epwene asorota me ren ewe pristen Egypt, a sio ngeni Kot an epwe angasano, me I Kot a fori.22 Abraham a manau ne winiti ewe Semenapen ekkewe ra nukuchar mwirimwiriton meinisin famini non fonufan ra anni feioch.23 Nge akkom, won ei chok pwan rong, ena chok pwan prist a asorata unumon fopun ekkewe “pokiten ar nimenimoch … rese chappetiw me fen ngeni ekkewe koten ira ika fau.”24 Ra mano ikewe an aramas nireno.
Joseph minen noom, a amomono ren an epwe emon chon angang me nekukunun seni pwin kewe, non an riaffou a kun ngeni Kot. Ekis me ekis, i a winiti mi auchea me non imwen an we masta non Egypt nge an kewe fefeita mi koturungawono pokiten ewe tipitip mwan an punuwen Potiphar we. Joseph mi tongeni ita ekieki, “Iwe kanapus ina met niwinin ai apwonueta ewe annukun nimenimoch.” Nge a soposopono ne kun ngeni Kot me a feioch me non kanapus. Joseph a pwan mefi weires me netipengaw nupwen ewe chon kanapus a chiechi ngeni, ina mwo a pwonei pwe epwe anisi Joseph, i a monuki usun i mwirin chok an we a niwiniti wisan we non nenien Pharaoh we. Mwirin chok, usun ka sinei, ewe Samon a ekieki pwe epwe wanong Joseph non ew wis tekia ren nuku me manaman unukun Pharaoh, a atufichi Joseph epwe angasa ewe imwen Israel. Ewer Joseph a tongeni pwari “pwe mettoch meinisin God a fori fanasengesin mi murinno ren ir ekkewe mi tongei i.”25
Apinatai a mochen apwonueta wisan mi pin. Nge ua awesano ai porous,” a apasa, “iwe mwirin ese auchea [met epwe fis ngeniei], ika pwe upwe manau.”26 I ese ngas seni mano, nge ennetin i a ngaseno me non ewe muun Kot, me noun ewe chon siwin mi auchea, Alma, a siwini uruon ekkewe chon Nifai ngeni wareton Kraist we.
Alma me Amulek ra ngaseno seni imwen kanapus non Ammonaia ren ponuwen ar sio, me ekkewe chon ninni ir ra mano.27 Akkom, nge, ekkei chok pwan chon ninni ra aturanong fefin me semirit mi uren nuku non ew ekkei. Alma, a kuna ewe anoninenin mettoch non metek a pesepes me ren ewe Ngun pwe esap aea ewe manamanen Kot ne “angaser seni ekkei,”28 pwe repwe ketiw ngeni Kot non ning.29
Ewe Soufos Joseph Smith a riaffou non imwen kanapus non Liberty, Missouri, ese wor an pochokun ne anisi ekkewe Souneng nupwen ra feiengaw me katou seni imwer ngeni non riaffoun patapat. O Kot, ifa i en? Joseph a sio. “Ifa tamen fansoun omw kesap awora aninis?”30 Ren ponuwan, ewe Samon a pwonei: “Om weires me riaffou repwe chok mwochomoch; iwe mwirin, ika kopwe engino ngeni, Kot epwe etekioketa. … Kose mwo usun Job.”31
Nesoponon we, Joseph a tongeni apasa fiti Job, Inamo [Kot] epwe nieino, nge upwe chok apinukunuk non i.32
Elter Brook P. Hales a aporousa porousen Sister Patricia Parkinson, ewe a uputiw ren an kunaochu nge nupwen an 11 ierin a chununo.
Elter Hales a aporousa: “Ua fen sinei Pat ren chommong ier me uwa ereni pwe uwa men ingeiti ren an ekiek murinno me pwapwa fansoun meinisin. A ponueni, ‘Nge, kose mo nonnom rei neim fan ew, ka fen? A wor ai fansoun netipengaw. A fen wor ai fansoun netipengaw, a chommong ai kechiw.’ Inamo, a apachata, ‘Seni ewe fansoun ua poputa ne chun, a men awosukosuk, nge uwa sinei pwe Samach won Nang me ewe Chon Amanau ir mi nonnom rei am me ai we famini. … Ngeni ekkewe ra eisiniei ika ngang mi song pokiten uwa chun, ua ponueni: ‘ion upwe song ngeni? Samach won Nang mi fitiei non ei; use mo akanamon. I a nonom rei fansoun meinisin.’”33
Nesoponon, ewe feiochun ai arap ngeni me nonnom ren ewe Sam me ewe ewe Nau ewe ua kukutta. A fori epwe auchea me angangan mi fochofoch mi fokkun namot. Sipwe fiti Paul ne pwarata “pwe ach riaffou non ei fansoun non [fonufan] ese tongeni akkarap ngeni ewe ningoch epwe pwa me non kich.”34 Ua pwarata pwe ese nifinifin met nonnomuch won fonufan epwe fis, sia tongeni nuku Kot me kuna pwapwa non I.
“Kopwe epinukunuku ewe Samon ren unusen netipom. Kosap epinukunuku met ka ekieki pwe ka sinei.
”Kopwe chechemeni ewe Samon non mettoch meinisin ka fori, iwe epwe pwar ngonuk ewe aan mi pung.”35
Non iten Jises Kraist, amen.