Usa ka Sistema sa mga Lagda alang sa Personal nga Pagpadayag

Ni Elder Dale G. Renlund

Sa Korum sa Napulog Duha ka Apostoles

Kinahanglan natong masabtan ang sistema sa mga lagda diin molihok ang Espiritu Santo. Kon molihok kita sulod sa sistema sa mga lagda, ang Espiritu Santo makapagawas og makapahibulong nga panabot.

Sama sa daghan kaninyo, naimpluwensiyahan gayod ako ni Elder Dieter F. Uchtdorf sa paglabay sa katuigan. Kana nagpasabot, sa bisan og bahin lang, sa unsay akong isulti.¹ Mao nga, mangayo ko og pasaylo kaniya …

Ang maayong nabansay nga mga piloto sa eroplano mopalupad sulod sa kapasidad sa ilang eroplano ug mosunod sa mga direksiyon gikan sa mga air traffic controller kabahin sa paggamit sa tugpahanan ug subayon nga rota sa eroplano. Sa yanong pagkasulti, ang mga piloto motrabaho sulod sa usa ka sistema sa mga lagda. Dili igsapayan kon unsa sila ka maalamon o matalento, pinaagi lamang sa paglupad sulod niini nga sistema sa mga lagda nga ang mga piloto luwas nga makapagawas sa dako kaayo nga potensiyal sa usa ka eroplano aron matuman ang milagroso nga mga katuyoan niini.

Sa susama nga paagi, makadawat kita og personal nga pagpadayag sulod sa usa ka sistema sa mga lagda. Human sa bunyag, gihatagan kita og halangdon apan praktikal nga gasa, ang gasa sa Espiritu Santo.² Samtang maningkamot kita nga magpabilin diha sa dalan sa pakigsaad,³ ang “Espiritu Santo [mao ang] mopakita nganha [kanato] sa tanan nga mga butang nga kinahanglan [natong] buhaton.”⁴ Kon kita dili segurado og wala mahimutang, kita makapangayo og tabang sa Dios.⁵ Ang saad sa Manluluwas dili hilabwan sa kaklaro, “Pangayo ug kamo hatagan; … kay ang mangayo hatagan.”⁶ Uban sa tabang sa Espiritu Santo, kita makapausab sa atong diosnong kinaiya ngadto sa atong mahangtoron nga kapalaran.⁷

Ang saad sa personal nga pagpadayag pinaagi sa Espiritu Santo makapahingangha, sama kaayo sa usa ka eroplano nga naglupad. Ug sama sa mga piloto sa eroplano, kinahanglan natong masabtan ang sistema sa mga lagda diin molihok ang Espiritu Santo aron sa paghatag og personal nga pagpadayag. Kon molihok kita sulod sa sistema sa mga lagda, ang Espiritu Santo makapagawas og makapahibulong nga panabot, direksiyon, ug kahupayan. Gawas niana nga sistema sa mga lagda, bisan unsa pa kita ka maalamon o matalento, mahimo kitang mailad ug mapakyas sa paagi nga makapasakit ug makadaot.

Ang mga kasulatan nagporma sa unang elemento niini nga sistema sa mga lagda alang sa personal nga pagpadayag.⁸ Ang pagbusog sa mga pulong ni Kristo, sama sa makita diha sa mga kasulatan, makapaaghat og personal nga pagpadayag. Si Elder Robert D. Hales miingon: “Kon kita gustong makigsulti sa Dios, mag-ampo kita. Ug kon kita gusto nga Siya makigsulti kanato, mosiksik kita sa mga kasulatan.”⁹

Ang mga kasulatan nagtudlo usab kanato kon unsaon sa pagdawat og personal nga pagpadayag.¹⁰ Ug kita mangutana kon unsay husto ug maayo¹¹ ug dili kon unsay sukwahi sa kabubut-on sa Dios.¹² Kita dili “[mag]dinaotan [sa] pagpangamuyo,” nga adunay dili husto nga mga motibo aron sa pagpasiugda sa atong kaugalingon nga pagpamintaha o aron sa pagtagbaw sa atong kaugalingon nga lulinghayaw.¹³ Labaw sa tanan, kita gikinahanglan nga mangayo sa Langitnong Amahan pinaagi sa ngalan ni Jesukristo,¹⁴ nagtuo nga kita makadawat.¹⁵

Ang ikaduhang elemento sa sistema sa mga lagda mao nga kita makadawat lamang og personal nga pagpadayag alang sa atong kaugalingon ug sa atong mga responsibilidad ug dili alang sa uban. Sa laing mga pulong, kita molupad ug motugpa sa atong gitakda nga tugpahanan. Ang kaimportante sa maayong pagkatakda nga mga tugpahanan sayong nakat-onan sa kasaysayan sa Pagpahiuli. Si Hiram Page, usa sa Walo ka Saksi sa Basahon ni Mormon, nangangkon nga nakadawat og mga pagpadayag alang sa tibuok Simbahan. Pipila ka miyembro ang nailad ug sayop nga naimpluwensiyahan.

Agig tubag, ang Ginoo mipadayag nga “walay usa nga itudlo sa pagdawat og mga sugo ug mga pagpadayag niini nga simbahan gawas sa akong sulugoon nga si Joseph Smith … hangtod nga Ako motudlo … og lain diha sa iyang dapit.”¹⁶ Ang doktrina, mga sugo, ug mga pagpadayag alang sa Simbahan mao ang eksklusibo nga katungod sa buhi nga propeta, kinsa nagdawat niini gikan ni Ginoong Jesukristo.¹⁷ Kana mao ang tugpahanan sa propeta.

Pipila ka tuig kaniadto, nakadawat ko og tawag sa telepono gikan sa usa ka indibidwal kinsa gidakop tungod sa paglapas [trespassing]. Siya misulti kanako nga kini gipadayag ngadto kaniya nga dugang nga kasulatan ang gilubong ilawom sa ground floor sa usa ka gambalay nga gisulayan niya og sulod. Siya nangangkon nga kon makuha niya ang dugang nga kasulatan, siya nasayod nga iyang madawat ang gasa sa paghubad, mopagawas og bag-o nga kasulatan, ug moimpluwensiya sa doktrina ug direksiyon sa Simbahan. Ako siyang giingnan nga nasayop siya, ug siya nangamuyo kanako nga mag-ampo kabahin niini. Ako siyang giingnan nga dili nako buhaton. Siya nahimong abusado sa berbal nga paagi ug gitapos ang tawag sa telepono.¹⁸

Ako dili kinahanglang mag-ampo kabahin niini nga hangyo alang sa usa ka yano apan mahinungdanon nga rason: ang propeta lamang ang makadawat og pagpadayag alang sa Simbahan. Mahimong “supak kini sa mga lagda sa Dios”¹⁹ nga ang uban makadawat niana nga pagpadayag, nga nahisakop sa tugpahanan sa propeta.

Ang personal nga pagpadayag husto nga ilaha sa mga indibidwal. Kamo makadawat og pagpadayag, sama pananglit, mahitungod asa mopuyo, unsa nga dalan sa panarbaho ang sundon, o kinsa ang minyoan.²⁰ Ang mga lider sa Simbahan mahimong motudlo og doktrina ug mopaambit og dinasig nga tambag, apan ang responsibilidad alang niini nga mga desisyon anaa kaninyo. Kana mao ang inyong pagpadayag nga madawat; kana mao ang inyong tugpahanan.

Ang ikatulo nga elemento sa sistema sa mga lagda mao nga ang personal nga pagpadayag mahiuyon sa mga sugo sa Dios ug sa mga pakigsaad nga atong gihimo ngadto Kaniya. Hunahunaa ang usa ka pag-ampo nga murag sama niini: “Langitnong Amahan, laay ang mga tulumanon sa Simbahan. Mahimo bang mosimba ko Kanimo atol sa Igpapahulay diha sa mga bukid o sa baybayon? Mahimo bang dili nalang ko moadto sa simbahan ug moambit sa sakramento apan makabaton gihapon sa gisaad nga mga panalangin sa pagbalaan sa Adlaw nga Igpapahulay?”²¹ Agig tubag ngadto niana nga pag-ampo, kita makapaabot sa tubag sa Dios: “Akong anak, gipadayag na Nako ang akong kabubut-on kabahin sa Adlawng Igpapahulay.”

Kon mangayo kita og pagpadayag mahitungod sa usa ka butang diin gihatagan na sa Dios og klaro nga direksiyon, atong gibuksan ang atong kaugalingon sa sayop nga pagsabot sa atong mga pagbati ug sa pagkadungog sa unsay atong gusto nga madunggan. Usa ka tawo kausa misulti kanako mahitungod sa iyang mga panglimbasog aron sa pagpalig-on sa pinansiyal nga sitwasyon sa iyang pamilya. Siya nagkaideya nga mangawkaw og mga pundo isip usa ka solusyon, nag-ampo mahitungod niini, ug mibati nga nakadawat siya og positibo nga pagpadayag aron sa pagbuhat sa ingon. Ako nasayod nga siya nalimbongan tungod kay nagtinguha siya og pagpadayag nga sukwahi sa usa ka sugo sa Dios. Si Propeta Joseph Smith mipasidaan, “walay mas dako og kadaotan ngadto sa mga anak sa tawo kay sa mahimutang ubos sa impluwensiya sa usa ka mini nga espiritu [samtang] sila nagtuo nga anaa kanila ang Espiritu sa Dios.”²²

Ang uban tingali moila nga si Nephi milapas og sugo sa dihang gipatay niya si Laban. Apan, kini nga eksepsiyon wala mosupak sa lagda—ang lagda nga ang personal nga pagpadayag mahiuyon sa mga sugo sa Dios. Walay yano nga pagpasabot niini nga hitabo nga hingpit nga makatagbaw, apan tugoti ko nga hatagan og gibug-aton ang pipila ka aspeto. Ang panghitabo wala nagsugod kang Nephi nga nangutana kon mahimo ba niyang patyon si Laban. Kadto usa ka butang nga dili niya gustong buhaton. Ang pagpatay kang Laban dili para sa personal nga kaayohan ni Nephi apan aron sa paghatag og mga kasulatan ngadto sa usa ka umaabot nga nasod ug katawhan sa pakigsaad. Ug si Nephi segurado nga kadto pagpadayag—sa pagkatinuod, niini nga sitwasyon, kadto usa ka sugo gikan sa Dios.²³

Ang ikaupat nga elemento sa sistema sa mga lagda mao ang pag-ila kon unsa ang personal nga gipadayag na sa Dios kaninyo, samtang magmahimong bukas sa dugang pa nga pagpadayag gikan Kaniya. Kon ang Dios mitubag og pangutana ug ang mga sirkumstansiya wala mausab, nganong magdahom man kita nga mahimong lahi ang tubag? Si Joseph Smith nakasinati niining problemado nga sitwasyon niadtong 1828. Ang unang bahin sa Basahon ni Mormon nahubad na sa dihang si Martin Harris, usa ka maghahatag ug nahauna nga tigsulat, nangayo og pagtugot kang Joseph nga dad-on ang nahubad nga mga pahina ug ipakita kini ngadto sa iyang asawa. Dili sigurado kon unsay angayang buhaton, si Joseph nag-ampo alang sa giya. Ang Ginoo misulti kaniya nga dili tugotan si Martin nga dad-on ang mga pahina.

Si Martin mihangyo kang Joseph nga mangutana pag-usab sa Dios. Gibuhat kini ni Joseph, ug ang tubag mao, dili ikatingala, mao ra gihapon. Apan si Martin nagpakiluoy kang Joseph nga mangutana sa ikatulo nga higayon, ug gibuhat kini ni Joseph. Niining higayona ang Dios wala miingon og dili. Hinuon, kadto ingon og ang Dios miingon, “Joseph, nakahibalo ka kon unsa ang akong gibati kabahin niini, apan ikaw adunay kabubut-on sa pagpili.” Mibati nga natangtangan siya sa pagpugong, si Joseph mihukom sa pagtugot kang Martin sa pagdala sa 116 ka pahina sa manuskristo ug sa pagpakita niini ngadto sa pipila ka sakop sa pamilya. Ang nahubad nga mga pahina nawala ug wala na gayod makuha pag-usab. Ang Ginoo grabeng mibadlong kang Joseph.²⁴

Si Joseph nakakat-on, sama sa gitudlo sa propeta sa Basahon ni Mormon nga si Jacob: “Ayaw pagsulay sa pagtambag sa Ginoo, apan pangayo og tambag gikan kaniya. Kay … siya nagtambag diha sa kaalam.”²⁵ Si Jacob mipasidaan nga alaot nga mga butang ang mahitabo kon kita mangayo og mga butang nga dili angay natong pangayoon. Siya nanagna nga ang katawhan sa Jerusalem magtinguha “niana nga mga butang nga sila dili makasabot,” motan-aw “lapas sa tumong,” ug hingpit nga mobalewala sa Manluluwas sa kalibotan.²⁶ Nasayop sila tungod kay nangayo sila og mga butang nga wala nila sabta ug dili nila masabtan.

Kon kita nakadawat og personal nga pagpadayag alang sa atong sitwasyon ug ang mga sirkumstansiya wala mausab, ang Dios mitubag na sa atong pangutana.²⁷ Pananglitan, usahay balik-balik kitang mangayo og kasegurohan nga kita napasaylo na. Kon nakahinulsol na kita, napuno na sa hingpit nga kalipay ug kalinaw sa tanlag, ug nakadawat og kapasayloan sa atong mga sala, kita dili na kinahanglang mangayo og usab apan makasalig sa tubag nga gihatag na sa Dios.²⁸

Bisan mosalig kita sa kanhi nga mga tubag sa Dios, kinahanglan kitang mahimong bukas sa dugang nga personal nga pagpadayag. Sa kataposan, talagsa ra nga mahitabo ang kinabuhi sumala sa giplano ug kini napuno sa wala damha nga mga panghitabo. Kita kinahanglang moila nga ang personal nga pagpadayag mahimong madawat “pagtulon-an human sa usa ka pagtulon-an,”²⁹ nga ang gipadayag nga direksiyon mahimo ug kanunay nga anam-anam.³⁰

Ang mga elemento sa sistema sa mga lagda alang sa personal nga pagpadayag magsapaw ug magpalig-on sa usag usa. Apan sulod niana nga sistema sa mga lagda, ang Espiritu Santo mahimo ug mopadayag sa tanan nga atong gikinahanglan aron mouswag ug magpadayon sa pagpakabuhi diha sa dalan sa pakigsaad. Mao nga kita mapanalanginan pinaagi sa gahom ni Jesukristo aron mamahimo kon unsa ang gusto sa Langitnong Amahan nga kita mamahimo. Ako modapit kaninyo nga magbaton og pagsalig sa pag-angkon og personal nga pagpadayag alang sa inyong kaugalingon, sa pagsabot kon unsa ang gipadayag sa Dios, pinasubay sa mga kasulatan ug sa mga sugo nga Iyang gihatag pinaagi sa Iyang gitudlo nga mga propeta ug alang sa inyong kaugalingong kabubut-on ug sa inyong mga responsibilidad. Ako nasayod nga ang Espiritu Santo mahimo ug mopakita kaninyo sa tanan nga mga butang nga kinahanglan ninyong buhaton.³¹ Sa ngalan ni Jesukristo, amen.