Enye Ekeme Ndikɔk MiUdɔŋɔ!
Odudu Andinyaŋa ndikɔk nyuŋ nnɔ ufak ebeŋe unɔmɔ otode ndudue, idiɔk ubiere, mfana, ye oruk idomo ekededi—ukem ntre ke mme idiɔk nkpɔ nyin.
Moroni ama ɔnɔ enwɔŋɔ ete edieke nyin idikotde Nwed Mormon ndien ibup Abasi Nsinsi Ete, ke esit akpanikɔ, inyene eti udɔng, inyene mbuɔtidem ke Christ mme enye edi akpanikɔ, Abasi eyeyarade akpanikɔ esie oto ke odudu Edisana Spirit.1 Ata ediwak owo ema eda enwɔŋɔ emi esin ke edinam enyung ebɔ osongo ntiense eke Edifiak mmen ɔyɔhɔ-ɔyɔhɔ ikɔ Abasi Jesus Christ ndi.
Moroni ekpep nyin ete, nte nyin ikotde Nwed Mormon, yak “iti nte Jehovah ekeyenede mbɔm abaŋa nditɔ owo, tɔŋɔ ke ini ekebotde Adam tutu edisim ini [emi], … inyung ikere enye ke esit [nyin]”2 Mme mbuk ye ukpepŋkpɔ ke Ŋwed Mormon eti nyin onyuŋ edi ntiense abaŋa ima ye mbom Andniyaŋa.
Ete mi ekebe efep ke April 2013. Nte ami mbeŋede idem nditiŋ ikɔ ke ikpɔ esie, ami mma nkut edidiɔŋ eke ami mbɔde ke ndifiɔk nyuŋ mma mme nwed Abasi emi enye ekesimade. Enye ama abuana mmɔ ke mbono ufɔkemana, enye onyung okot mmɔ ye ami kini ami nyomde item, ndausuŋ, mme ndisɔnŋɔ mbuɔtidem mi. Ami mma nkop nte enye abuanade mmɔ ke ini enye enɔde utiŋ iko ye ke mme ubiɔŋ utom. Ami mfiɔkke mmɔ kpɔt, edi Ami nsuk nteti uyo ikɔ esie ye ntuk spirit eke Ami nkeyenede nte enye abuanade mmɔ. Oto ke edibuana ŋwed Abasi ye ekikere, ete mi ama anwam mi ndisiak nsɔŋɔnda itiat idakisɔŋ eke mbuɔtidem ke Obɔŋ Jesus Christ.
Ete mi ke akpan-akpan ama-ama mbuk abaŋade nte Andiyaŋa akakada ekese mbon Nephi.3 Edisana mbuk emi abaŋa Ↄbɔŋ Jesus Christ emi ama ekeset ke mkpa onyuŋ obɔ edimenere. Enye ama ɔnwɔŋ ndot-ndot cup onyuŋ ɔbɔ ufen ke kpukpru ŋkpɔ man nnyin ikubɔ ufen edieke nyin idikabarede esit.4 Enye ama aka ke obio ekpo onyuŋ ɔkɔtɔŋɔ utom ukwɔrɔ ikɔ Abasi do.5 Enya ama eset ke mkpa, ndien Enye ama odu ye Abasi onyuŋ ɔbɔ mbet oto ete man edibuana ye mbon Nephi emi edidiɔŋde ubon eyo iso.6 Ema emenere Enye ndien enyene kpukpru nsinsi odudu ye ukeme. Nnyin imikeme ndikpep nto kpukpru ntim-tiŋ ukpepnkpɔ Esie.
Ke 3 Nephi 11, nyin ikɔt nte Andiyaŋa ɔkɔsuhɔde oto enyɔŋ edikpep mbon Nephi ete ke Imɔ idi Jesus Christ, emi mme prophet eketiede ntiense ebaŋa ete ke eyedi ke ererimbot. Enye eketiŋ anwa-anwa ete ke Imɔ idi Unwana Ererimbot ndien ke imɔ iminɔ Ete ubɔŋ ke ndimen mme idiɔk nkpɔ ererimbot ndori ke idem imɔ . Ndien Enye ama okot mbon owo ete edisin ubɔk mmɔ ke nkaŋ Esie enyuŋ etuk mme ndo ɔkpu-ukwak ke mme ubɔk ye ukot Esie. Enye okoyom mmɔ efiɔk ete ke Enye edi Abasi Isreal, emi eke ekewotde ke ntak idiɔknŋkpɔ ererimbot. Mbon owo ema ebɔrɔ ikot oro, esaŋa owo kiet-kiet eka iso tutu kpukpru mmɔ etuuk enyuŋ ekut ete ke akpanikɔ ke edi Enye emi mme prophet ekewetde ebaŋa ete ke eyedi ke ererimbot.7
Jesus ama ekpep mbon Nephi abaŋa ufɔn ndikabare esit, abaŋa ndikabare ntie nte eyenɔwɔŋ, ye ufɔn kabaŋa ndina baptism nto owo emi enyenede unen Esie. Enye ndien ama ekpep ediwak ukpepnkpo emi nyin ikpepde isua emi ke Obufa Testament.
Ke 3 Nephi 17, nyin ikot ite ke Jesus ama ɔdɔhɔ mbon owo ete ke ini ekem Enye ndiyɔŋ mbine Ete ye ndiyuŋ nda idem Esie nkowut ufok eke Isreal emi ekesopde.8 Nte Enye emenere enyin Esie ese otu owo, Enye okut ete ke mmo edu ke mmɔŋeyet, ewok enyin ese Enye nte mmo ekpebeŋede Enye ete odu esisit ebighe.9
Ibɔrɔ Andiyaŋa ɔkɔnɔde mbon Nephi ekedi emi otukde owo ke esit onyuŋ esinede ukpepŋkpo. Enye ɔdɔhɔ ete “Sese esit Mi ɔmɔyɔhɔ ye mbɔm ɔnɔ mbufo”10
Ami mmenim ke akpanikɔ nte ke mbɔm Esie ama okpon akan ibɔrɔ Enye ɔnɔde kabaŋa mmɔŋeyet emi mbon owo eketuade. Etie nte Enye ama ekeme ndikut mmɔ oto ke enyin usio-isop Esie. Enye ama okut ubiak, ukut ye idomo mmɔ. Enye ama okut mme udɔŋɔ mmɔ. Enye ama okut mmem-idem mmɔ, ndien Enye onyuŋ ɔfiɔk oto ke okpɔsɔŋ ufen Esie ke Gethsemane ye ke Golgotha nte Enye edinɔde ndɔŋesit emi ekemde ye mmem-idem mmɔ.11
Kpa ntre, kini Andiyaŋa nyin, Jesus Christ, osukde enyin ese nyin, Enye okut onyuŋ ɔfiɔk ubiak ye mbiomo idiɔk ŋkpɔ nyin. Enye okut mme idiok ido emi nyin iyakde idem inɔ ye mme mfana nyin. Enye okut oruk enwan ye ukut nyin ekededi—ndien Enye ɔyɔhɔ ye mbom abaŋa nyin.
Eti ikoot Esie emi ɔkɔnɔde mbon Nephi ama etiene: “Ndi mbufo emenyene mbon udɔŋɔ ndomokiet ke otu mbufo? Eda mmɔ ekpere. Ndi mbufo emenyene owo ndomokiet emi edide mbuŋɔ, mme nnan, mme owo enyenede unɔmɔ, mme owo akpa-mfia, mme mbon akpaubeŋ, mme inan, mme owo emi enyene oruk ukut ekededi? Eda mmɔ ekpere ndien Ami nyekɔk, koro Ami mmeyene mbɔm mbaŋa mbufo; esit mi ɔyɔhɔ ye mbɔm.”12
Ndien otu owo esaŋa edi “ye kpukpru mbon emi enyene oruk ukut ekededi, ndien Enye ɔkɔk kpukpru owo emi ekedade ewɔrɔ esɔk Enye.”13
Ke 1990 nyin ikoduŋ ke ekpri obio Sale, ke Victoria, Australia. Ke inemesit nyin imainam utom ke ufɔkiduŋ, Ufɔk Abasi, ye ke itie-utom. Ke ediye uwemeyo Saturday kiet mbemiso usen ukabade-isua, nyin ima ibiere ndika itie udia uwem ye mben inyaŋ emi nyin isimade. Ke ima ikokure ndikop inem ke ediye usen oro ndibre mbre nte ufɔkemana, nyin ima itaŋ kpukpru owo isin ke mkpɔisaŋ itɔŋɔ ndiyɔŋ ufɔk. Nte nwatde nka, Ami ma nde idap ke ata esisit ini ndien ke ndudue mma nkɔtɔ mkpɔisaŋ efen. Esisit ini ebede ke imaikikop nsɔngidem, Ami nsaŋa nkanare nse mkpɔisaŋ oro. Nwan mi, Maxine ama ɔbuŋ ukot inyuŋ ikemeke ndiwek ibifik. Enye ama ɔbuŋ ɔkpɔ ke esit-idem. Ndito iban nyin ita ekedu ke ntimede idem edi ima inɔ ekɔm koro nkpɔ ikinamke mmɔ. Ami mma nyene ekpri unan. Edi eyeneren nyin emi ekedide ɔfiɔng ita ikisioroke uyo aba.
Ke ufɔt mfina ye ndutime ke itie unɔmɔ-ndudue oro, mkpon-nkan eyenanwan nyin, Kate emi ekedide enyen isua Duopekiet, eting ke usɔp ete, Ete, akpana nte afo ɔnɔ Jarom edidiɔŋ. Ke inwannade esisit, eyenanwan mi ye ami ima ikeme ndiwɔrɔ ke moto oro. Maxine ikikemeke ndisaŋa. Ami mma mmenere Jarom suŋ-suŋ ke enyɔŋ; ndien kini nnade nnim edem mi ke isɔŋ, ami ndori enye suŋ-suŋ ke esit mi nyuŋ nnɔ enye edidiɔŋ eke itie oku. Kini moto unɔ-unwam edisimde ke nkpɔ nte minute aba ebede, Jarom ama afiak ɔfiɔk idemesie.
Ke okoneyo oro, ami mma mkpɔŋ mbon ufɔkemana mi owo ita ke ufɔkibɔk nyung nduk taxi ke ndopuyo ye nditɔ iban mi iba nyɔŋ ufɔk. Ke ofuri anyan okoneyo oro, ami mma mbeŋe Ete eke Heaven nte anwam mbon ufɔkemana mi ye mbon eken ekedade unan ke mkpɔisaŋ eken ekop nsɔŋidem. Ke mbɔm, ema eboro akam mi ye akam emi ediwak mbon efen ke ebɔŋde ke ofuri esit. Kini ebede kpukpru owo ema ebɔ edikɔk, akwa edidiɔŋ ye ifure-ifure mbɔm.
Edi ami mma nkaiso ndinyene ntutungɔ ekikere ubiom ikpe ye ndot-ndot mkpɔfiɔk ke ndinam idiok unɔmɔ emi etibe. Ami nyedemere idap ke okoneyo nyuŋ nkere mbaŋa idiok nkpɔ-ntibe oro. Ami mma-nwana ke ediwak isua ndifen nnɔ idem mi nyuŋ nnyene emem. Ndien,nte adaibuot eke itie oku, nte nwamde mbon efen ndikabare esit nyuŋ nwam mmɔ ndikop mbɔm ye ima eke Andinyaŋa, mi mma nkut nte ke Enye ekeme ndikɔk mi.
Odudu Andinyaŋa ndikɔk nyuŋ nnɔ ufak ebeŋe unɔmɔ otode ndudue, idiɔk ubiere, mfana, ye oruk idomo ekededi—ukem ntre ke idiɔk nkpɔ. Nte ami nsede Enye, ekikere ubiom-ikpe ye mkpɔfiɔk mi ama ebe suŋ-suŋ efep ke itie emem ye ndoɔk-odudu.
President Russell M. Nelson ama ekpep ete: “Ke ini Andinyaŋa ɔkɔduɔkde iyip ɔnɔ ofuri ubon owo, Enye ama eberede usuŋ ete kpukpru mbon etienede Enye enyene edikɔk, ukeme, ye odudu erifak Esie. Mme ufaŋ spirit emi odu ɔnɔ kpukpru mbon emi eyomde ndikop nto Enye nyuŋ ntiene Enye.”14
Nditɔ eka iren ye iban, ekpededi afo obiom mbiomo idiɔknkpɔ emi muyakke uduɔk, omum idiɔk nkpɔ emi ekenamde fi ke anyan ini ebede akama, mme anwana ndifen nnɔ idem fo ke ndudue unɔmɔ otode fi, afo emekeme ndibɔ edikɔk ye odudu erifak eke Andinyaŋa Jesus Christ.
Ami mmetie ntiense nte ke Enye odu uwem. Enye edi Andinyaŋa ye Andifak nnyin. Enye ama-ma nnyin. Enye enyene mbɔm abaŋa nnyin, Enye ɔyɔhɔ ye mbɔm, Enye onyung ekeme ndikɔk fi. Ke enying Jesus Chrst, amen.