Utom Temple ye Family History—Utom Kiet ye Ukem Utom oro
Ata utom eke uduak eke Ete Heaven nnyin edi ndidian ufɔkemana ɔtɔkiet ke uwem emi ye ke nsinsi.
Ami menehede nkop inemesit ke nkaiso edibɔp temple ke “akwa-ini eke uyɔhɔ ini emi” (Doctrine te Covenants 128:18). Tɔŋɔ ke mme akpa ini ekemende Ufɔk Abasi emi efiak edi, nti Ndisana owo ema enam ediwak nwaidem man ebɔ mme edinam ye ediomi eke temple. Etienede akwa uwutŋkpɔ mmɔ, ke 1995, ke ema ekenam nwaidem ŋkpɔ okuk ke edisaŋa nto Obio Mexico ndisim, edima ŋwan mi, Evelia ye ami, emi ikasaŋade ye ete ye eka nnyin, ema edian nnyin ndɔ nte ebe ye ŋwan ke Mesa Arizona Temple. Usen oro, nte ekediande nnyin ke odudu-unen itie-oku ke ufɔk Jehovah, nnyin ima inehede ikut ndukpɔŋ eke heaven.
Utom ye Ntak eke mme Temple Edude
Ifiɔk-ukpep oro ama anam mi nehede nnɔ ekɔm ɔfɔn ke, ke ɔkpsɔŋ-utom ye akwa nwaidem isua ita ama ekebe, Ndisana owo ke Kirtland, Ohio, ke akpatre ema ekure edibɔp ediye temple mmɔ ke ini-editɔŋɔ-nsehe-eto eke 1836—akpa ini ke emana emi. Ke ɔfiɔŋ March eke ukem isua oro, ewakde ebe tɔsin owo kiet ekeboho ke temple ye mme usuŋ-ediduk esie kini mbono edidiɔŋ temple oro. Prophet Joeseph Smith ama adhah-ada ndinɔ akam edidiɔŋ, emi enye ɔkɔbɔde ke eriyarare (se Doctrine ye Covenants 109). Ke edidiɔŋ oro enye ama emen owut ediwak ikpɔ edidiɔŋ emi eyakde enɔ mbon emi edotde edibe-nduk ke mme temple Jehovah. Edikem nkaikwɔ ekekwɔ ikwɔ “Spirit Abasi” ndien otuowo ekeda ndien enɔ Mfiori Hosanna “ye oruk [odudu nte oro] ebietde … nte akpayarake ɔkɔm eke ufɔk oro” (Teachings of Presidents of the Church: Joseph Smith [2007], 307).
Ke ufaŋ udua kiet Prophet oro edimen-owut nte Jehovah ɔkɔbiɔŋɔre ke temple oro, emi ɔdɔhɔde ete:
“Ndien sese, ami mmebɔ ufɔk emi, ndien enyiŋ mi eyedu mi, ndien ami nyeyarade idem mi nnɔ ikɔt mi ke mbɔm ke ufɔk emi. …
“Ndien etop ufɔk emi eyetara ekesim esen idut, ndien emi edi ntɔŋɔ edidiong emi ediduɔhɔde ke ibuot ikɔt mi” (Doctrine ye Covenants 110:7, 10).
Ke emi ye mme nkukut ama ekebe, prophet Elijah, emi emi ekemede edɔk eka heaven mbak editabi mkpa, ama ɔbiɔŋɔre kiso Prophet Joseph Smith ye Oliver Cowdery ndien ɔdɔhɔ ete:
“Sese, ini ekem ɔyɔhɔ-ɔyɔhɔŋ, emi eketiŋde ebaŋa ke inua Malachi—etiŋde ikɔ ntiense ete ke eyedɔŋ enye [Elijah] [prophet oro] edi, mbemiso akwa ye enyene-ndik usen Obɔŋ edisim—
“Man ɔwɔŋɔde esit mme ete ɔnɔ nditɔ, ye esit nditɔ ɔnɔ mme ete, ke midige ntre ofuri ererimbot edi-du ke isuŋi—
“Mmɔdo, eyak mme ukpɔhɔde akwa-ini emi esin ke ubɔk mbufo, kemi mbufo ekpefiɔk ete ke akwa ye enyene-ndik usen Obɔŋ ekpere, kpa mi ke enyin usuŋ.” (Doctrine ye Covenants 110:14–16).
Temple ye Family History
Ke Abasi ama akafiak-iyak mme ukpɔhɔde edidian-kiet inɔ Joseph Smith, utom erinyaŋa-ukpɔŋ ke ikpehe nkaŋ mbiba ama ɔtɔŋɔ ke akwa-ini nnyin emi (se Akpa Nwed Corinth 15:22, 29; Doctrine ye Covenants 128:8–18
President Boyd K. Packer ekekpep ete ke “idiɔŋɔ edinam emi ama akaiso edi ererimbot ikopke, edi oro eyesɔŋɔ akaŋa eke ofuri ukpɔŋ emi ekedude mme eke edidude ke isɔŋ. Mme ŋkpɔ ama ɔtɔŋɔ editibe suŋ-suŋ. Ufɔk Abasi edi ufɔk Abasi emi esibɔpde-temple.
Mme temple ke ererimbot ediwɔrɔ ada ke ediwak ebiet, ke usuŋ ekerede ete ke inyeneke ntak, mme owo ye nka ye obio enyene-udɔŋ ke ediyom ntɔŋɔ-ubon. Kpukpru emi akada itie tɔŋɔ ke Elijah ɔbiɔŋɔre ke Kirtland Temple” (The Holy Temple [1980], 141).
“Tɔŋɔde ke ata usen oro, April 3, 1836, esit eke nditɔ ama ɔtɔŋɔ ediwɔŋɔre nnɔ mme ete mmɔ. Ke oro ebede mme edinam-ikɔ Abasi ikidige ke ndomo-nse aba, edi ke nsinsi. Odudu edidian-kiet okodu ye nnyin. Iduhe odudu-unen ekekande enye ke ufɔn. Odudu oro ɔnɔ inyene ye nsinsi ndaha ke kpukpru edinam emi enamde ye nnen-nnen unen enɔ mme odu-uwem ye akpa-mkpa” (Ndibeŋe-idem man Oduk Edisana Temple [2002], 28).
Ndima nditɔ-eka irenowo ye iban, edibɔp ye editim-nkama temple ekedi ke akwa-ini ekededi idiɔŋɔ kiet eke Ufɔk Abasi akpanikɔ Jesus Christ. Ke ema ekediɔŋ Salt Lake Temple ekure ke 1893, President Wilford Woodruff edidɔŋ mbon Ufɔk Abasi ete eyom nwed eke mbon-ntɔŋɔ-ubon mmɔ man ewet udim-ubon mmɔ ke edifiak nka edem nte ekemede man otodo ekeda mme enyiŋ edi temple enyuŋ enam mme edinam erinyaŋa-ukpɔŋ ye edimenede (se Teachings of Presidents of the Church: Wilford Woodruff [2004], 174).
Family History ye Utom Temple—Utom Kiet
Isua kiet edikem (1894), ukem-ukem President Woodruff oro ekedi andise-enyin ke edibɔp Genealogical Society eke Utah. Ke isua Ikie kiet edikem, ke 1994 Elder Russell M. Nelson, kini oro ekedi owo Eboho mme Apostle Duopeba ɔdɔhɔ ete, Mme edinam eke nwɔrɔ-nda isua oro ɔkɔtɔŋɔ ediduŋɔre family history te utom -unwam eke temple nte utom kiet ke Ufɔk Abasi” ((“Spirit eke Elijah,” Ensign, Nov. 1994, 85).
Utom eke Family History
Ndima nditɔ-eka irenowo ye iban, Abasi ɔdɔŋ nnyin nte mbon Ufɔk Abasi Esie ete inim family history nnyin ɔfɔn, man ikpep ito mbon-ntɔŋɔ-ubon nnyin, inyuŋ inam ndutim eke odotde inɔ mmɔ man ebɔ mme edinam ikɔ Abasi ke temple man anwam mmɔ ndikɔri ke usuŋ ediomi, emi edidiɔŋde mmɔ isin ke nsinsi ufɔkemana kiet. Oro edi ata utom eke uduak eke Ete Heaven nnyin, ndidian ufɔkemana ɔtɔkiet ke uwem emi ye ke nsinsi.
Eke mbufo emi ekerede ke unyeneke ukeme edi-nam utom emi, akpana afo ɔdiɔŋɔ ete ke afo udige ikpɔŋ. Kpukpru nnyin imikeme ediwɔŋɔde nda mme ŋkpɔ-utom emi Ufɔk Abasi ekenimde ndien edikut oro ke FamilySearch centres, emi nnyin ikisidiɔŋɔ-ke nte family history centers. Enam FamilySearch centers emi enehede ɔfɔn man otodo ofuri owo, ye ekpri unwam, ekeme edikut etop-mbuk eke mbon-ntɔŋɔ-ubon mmɔ onyuŋ enim mmɔ ɔfɔn man otodo mmɔ ekeme edida oro nka ufɔk Jehovah. Mbɔk sobo mme consultnt eke family history ke ward ye branch mbufo, emi editemede fi ke ofuri ndaha eke ŋkpɔ emi.
Nte nnyin itienede ndausuŋ eke mme prophet inyuŋ ikpep nte idinamde family history nnyin ndien inam mme edinam temple inɔ mbon-ntɔŋɔ-ubon nnyin, nnyin iyekut akwa idara ikesim ndaha eke nnyin miyomke editre ke ndinam utom oro. Spirit oro eyefiɔrɔ ke esit nnyin, edemede mfre nnyin man inam oro, onyuŋ eteme nnyin ke nte nnyin iduŋɔde iyom enyiŋ mbon-ntɔŋɔ-ubon nnyin. Edi yak nnyin iti ete ke family history okpon akan ndiyom mme enyiŋ, usen ɔfiɔŋ, ye ebiet. Oro edi edidian mme ufɔkemana ye ekikere idara emi otode ke edinɔ mmɔ edinam ikɔ Abasi.
Ami mmema eti ukpepnkpɔ eke edima prophet nnyin, President Russell M. Nelson, emi eketiŋde ete ke: Temple ana ke ufɔt edisɔŋɔ mbuɔtidem nnyin ye ukeme ŋkpɔ-spirit koro Andinyaŋa ye ukpepnkpɔ Esie edi ata akpan-ntak emi temple odude. Kpukpru mme ŋkpɔ emi ekpepde ke temple, oto ke item ye ke Spirit, enam ifiɔk nnyin abaŋade Jesus Christ ɔkɔri. Mme akpan edinam Esie edian nnyin ye Enye oto ke mme ediomi itie oku. Ekem, nte nnyin inimde ediomi nnyin, Enye eyediɔŋ nnyin ye ɔsɔŋɔ erikɔk, odudu Esie ” (“The Temple and Your Spiritual Foundation,” Liahona, Nov. 2021, 93–94).
Ke akpanikɔ, utom temple ye family history edi utm kiet ye ukem-ukem utom ke Ufɔk Abasi.
Ami mmetie ntiense mbaŋa mme akpanikɔ emi. Ami mmediɔŋɔ ke emi edi Ufɔk Abasi eke Obɔŋ Jesus Christ, Andinyaŋa ye Andifak nnyin, emi nnyin itide inyuŋ ikponode kini Easter emi. Ami mmediɔŋɔ ke Enye ama nnyin, ndien kini nnyin inimde ediomi nnyin ndien inyene mbuɔtidem ke Enye, Enye eyediɔŋ nnyin ye odudu erikɔk ye ɔsɔŋɔ Esie. Ke enyiŋ Jesus Christ, amen.