![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fd4%2F6a%2Fd46aebf772a094721d06d86a30a831d6183c2595%2Fd46aebf772a094721d06d86a30a831d6183c2595.jpeg/full/!250,/0/default)
Obɔŋ Jesus Christ Ekpep Nnyin ete Inɔ-unwam
Diana ye unwam eke Andinyaŋa nnyin, nnyin imikeme edima mme ɔsɔŋurua erɔŋ Esie inyuŋ inɔ mmɔ unwam nte Enye akpanamde.
Obɔŋ Jesus Christ ɔdɔhɔ ete:
“Ami ndi eti ekpeme-erɔŋ; eti ekpeme-erɔŋ ayak uwem Esie ɔduɔk kabaŋa mme erɔŋ. …
“Kpa nte Ete ɔfiɔkde Mi, Ami nnyuŋ mfiɔkde Ete; mmɔ nyuŋ nyak uwem Mi nduɔk ke ibuot mme erɔŋ.”1
Ke erikabarae ikɔ Greek eke itie ŋwed Abasi emi, ikɔ oro eke eti nko ɔwɔrɔ “ediye, ediyama.” Ntre, mfin emi, ami nyom editiŋ mbaŋa Eti Ekpeme-erɔŋ, Ediye Ekpeme-erɔŋ, Ediyama Ekpeme-erɔŋ, kpa Jesus Christ.
Ke Obufa Testament, ekot Enye “akwa ekpeme-erɔŋ,”2 akwa Andikpemerɔŋ,”3 ye “Andibɔk ye Andikpeme ukpɔŋ [mbufo].4
Ke Akani Testament, Isaiah ekewet ke “enye eyebɔk ikɔt esiemɔ nte ɔbɔk ufene.”5
Ke Nwed Mormon, ekot Enye “eti ekpeme erɔŋ”6 ye “akwa ye ata ekpeme erɔŋ.”7
Ke Ŋwed Doctine ye Covenants, Enye ofiori ete, “Mmɔdo, Ami ndu ke ufɔt mbufo, ndien Ami ndi eti ekpeme-erɔŋ.”8
Ke eyo nnyin, President Russell M. Nelson eketiŋ ke: Eti Ekpeme-erɔŋ enehede ekpeme ofuri erɔŋ eke otu-erɔŋ Esie, ndien nnyin idi ata mkpri andikpeme-erɔŋ Esie. Ufaŋ nnyin edi ndinɔ ima Esie nnyuŋ ndian ima eke nnyin nnɔ mme ufan ye mbɔhiduŋ—ndibɔk, nse-enyin, nnyuŋ nwam mmɔ—nte Andinyaŋa oyomde ete nnyin inam.”9
Ata mmi-mmi-emi, President Nelson ɔkɔdɔhɔ ete ke: “Idiɔŋɔ eke akpanikɔ ye odu-uwem Ufɔk Abasi Obɔŋ kpukpru ini eyesuk edi eboho, ukeme ndausuŋ ke ndisin unwam nnɔ nditɔ Abasi kiet-kiet ye ufɔkemana mmɔ. Koro emi edi Ufɔk Abasi Esie, nnyin nte isuŋutom Esie iyesin unwam inɔ owo kiet-kiet, ukem nte Enye akanamde. Nnyin iyenwam ke enyiŋ Esie, ke odudu ye unen, ye ke mbɔm-ima Esie.”10
Kini mme Pharisee ye scribe esukde uyo ebaŋa Obɔŋ, “ete, Owo emi adadara mme idiɔk owo onyuŋ adia ŋkpɔ ye mmɔ,”11 Enye ɔkɔbɔrɔ ke editiŋ inem mbuk ita nwut emi nnyin ididiɔŋɔke nte nke-mbuk eke erɔŋ osopde, nke-mbuk eke ekpri-okuk osopde, ye nke-mbuk eke idiɔk udɔ.
Enem edifiɔk ete kini Luke, andiwet Gospel, ɔkɔtɔŋɔke ediwet mbuk ita emi, enye akada ikɔ oro nke-mbuk ke ikɔ-kiet, idige ke ediwak-ikɔ.12 Oro ebiet ke Ↄbɔŋ ekekpep ata ukpepŋkpɔ kiet ye mbuk ita—mme mbuk emi owutde nsio-nsio ibat, erɔŋ Ikie, okuk Duop, ye nditɔ iren Iba.
Akpan ibat ke mbuk kiet-kiet emi, nte ededi, edi ibat kiet. Ndien ukpepŋkpɔ eke nnyin ikpidade ito ibat oro edi ke mbufo emekeme edidi mkpri-ekpeme-erɔŋ enɔ mme elder ye mbon-ekedidide elder Ikie ke elders quorum mbufo mme ɔnɔitem kiet nnɔ nkaiferi iban Duop mme andikpep kiet nnɔ nditɔŋwɔŋ Primary Iba, edi afo ke kpukpru ini, ana ɔnɔ mmɔ unwam, ekpeme mmɔ, onyuŋ ama mmɔ kiet kiet, ke owo ke owo. Afo udutiŋke ete, “Nso ndisime erɔŋ edi emi” mme “Nte ededi, ami ntimke nyom ekpri-okuk oro” mme “Nso ɔsɔŋ-ibuot eyeneren ke enye edi.” Edieke ami ye afo inyenede “ata ima Christ,”13 nnyin, nte erenowo oro ke mbuk eke erɔŋ osopde, iye “yak erɔŋ anaŋ ye efurenaŋ … ndien ika ikoyom erɔŋ emi osopde, tutu [… tutu … tutu nnyin] ikut enye.”14 Mme nte ŋwan oro ke mbuk eke ekpri-okuk osopde, nnyin iye “domo utuenikaŋ, ikpɔri ufɔk itim iyom [… itim iyom] tutu [ … tutu … tutu nnyin] ikut enye.”15 Edieke nnyin inyenede “ata ima Christ,” nnyin iyetiene uwutŋkpɔ eke ete ke mbuk idiɔk udɔ, emi kini eyeneren oro “odude kaŋa ke nsan-nsan, … okut enye, onyuŋ atua enye mbɔm, efehe, awaŋa enye ke itɔŋ, oynuŋ otim enye inua.”16
Nte nnyin imikop enye-nyik-udɔŋ ke esit erenowo emi erɔŋ esie kiet kpɔt okosopde? Mme enye-nyik-udɔŋ ke esit ŋwan emi okuk esie kiet okosopde? Mme ata ima ye esit-mbɔm ke esit eke ete idiɔk udɔ?
Nwan mi, Maria Isabel, ye ami ikanam-utom ke Central America, emi ikodude ke Obio Guatemala. Do ami mma nnyene eti ifet edisobo Julia, eti owo Ufɔk Abasi. Ami ndinyene ntuuk ndibup mbaŋa ufɔkemana esie. Eka esie akakpa oto cancer ke 2011. Ete esie ekedi eti adausuŋ ke stake esie, anam-utom nte bishop ye nte ɔnɔitem ɔnɔ stake president esie ke ediwak isua. Enye ekedi ata ekpri-ekpeme-erɔŋ ɔnɔ Abasi. Julia editiŋ ɔnɔ mi abaŋa ukeme utom esie ke edikise, nnɔ-unwam, nnyuŋ nam-utom Abasi. Enye ama enehede adara ke edibɔk nnyuŋ mkpeme nsɔŋurua erɔŋ Abasi. Enye ama afiak ɔdɔ-ndɔ onyuŋ esin-ifik ke utom Ufɔk Abasi.
Esisit isua ifaŋ, enye ama ɔwɔrɔ-ndɔ, ndien idahaemi enye edifiak edi ufɔk Abasi ikpɔŋ. Enye ikopke inem ndien ekere ke ubak owo ekesua-sua enye oto ke uwɔrɔ-ndɔ esie. Enye editre edi-di ufɔk Abasi ke nte ndiɔi ekikere ediyɔhɔde esit esie.
Julia etiŋ ufɔn eke eti ekpri-ekpemerɔŋ emi, emi ekedide ɔsɔŋidem, enyene-ima, ye enyene-esit-mbɔm erenowo. Ami menehede nti ke ekikere enye-nyik udɔŋ ama oduk esit mi kini enye eketiŋde abaŋa erenowo oro. Ami nkoyom ndinam nkpɔ kiet kpɔt nnɔ erenowo oro, erenowo emi akanamde ediwak nkpɔ ata ɔnɔ ediwak owo ke ofuri mme isua oro.
Enye ama ɔnɔ mi phone number esie, ndien ami ntɔŋɔ edikot enye, ndikere ke nyenyene ufaŋ ndisobo ye enye ke idem esie. Ke ediwak udua ye ediwak, ediwak edikot ke phone ama ekebe ke misimke enye, ke akpatre ke usen kiet enye ediyere ikoot phone oro.
Ami ndidɔhɔ enye nte ke ami mma nkut Julia, eyen-anwan esie, ndien ke ami mmekop inemesit ke usuŋ nte enye akanamde utom, ɔnɔde-unwam, onyuŋ amade mme ɔsɔŋurua erɔŋ Abasi ke ediwak isua. Enye ikikereke oruk ikɔ itoro ebietede oro. Ami ndɔhɔ enye ke ami nkoyom edisobo ye enye enyin ke enyin, iso-ye-iso. Enye edibup mi ntak eke ami nyomde oruk edisobo oro. Ami mbɔrɔ nte, “Ami mmoyom edisobo ye ete eke ɔfɔn-ido eyen-anwan oro.” Ekem ke esisit ibio-minit ndomo ama odu ke phone ibio-minit eketiede nte nsinsi ɔnɔ mi. Enye ete, “Ini ewe ye ke mmɔŋ?”
Usen eke ami nkosobode ye enye, ami mma nkot enye nte etiŋ ɔnɔ mi ubak ifiɔk-ukpep esie ke edikise, nnɔ-unwam, nnyuŋ nam-ŋkpɔ nnɔ mme ɔsɔŋurua erɔŋ eke Abasi. Nte enye etiŋde usuk nti mbuk oro, ami nkop ukpuhɔre ke uyo esie ndien ukem spirit emi enye okokopde ke ediwak ini nte ekpri-ekpemerɔŋ ama afiak odu. Idahaemi enyin esie ɔkɔyɔhɔ ye mmɔŋeyet. Ami mma ndiɔŋɔ ke eti ini edi emi ɔnɔ mi, edi ami ndikut ke ami mfiɔkke ikɔ se mkpetiŋde. Ami ndibɔŋ-akam ke esit mi nte, “Ete mi, nyaŋa mi.”
Ke ndo-ndo oro, ami nkop nte ami ndɔhɔde nte, Brother Florian, nte isuŋutom Abasi, ami mmeseme mkpe-ubɔk koro nnyin ikoduhe do ndinwam fi. Mbɔk, fen nnɔ nnyin. Fiak nnɔ nnyin ifet man iwut fi ke nnyin iminehede ima fi. Koro nnyin imoyom fi. Koro afo emenyene ufɔn ɔnɔ nnyin.”
Enye ama afiak edi Ufɔk Abasi ke Sunday emi eketienede. Enye ama enyene anyan ini nneme ye bishop esie onyuŋ esin-idem ke utom ufɔk Abasi. Esisit ɔfiɔŋ eken enye ama ebe efep—edi enye ama afiak ediduk ufɔk Abasi. Enye ama afiak edi. Ami mmetie ntiense nte ye unwam eke Andinyaŋa nnyin, nnyin imikeme edima mme ɔsɔŋurua erɔŋ Esie inyuŋ inɔ mmɔ unwam nte Enye akpanamde. Ke ntre, do ke Obio Guatemala Ↄbɔŋ Jesus Christ afiak ada ɔsɔŋurua erɔŋ kiet esin ke otu-erɔŋ Esie. Ndien Enye ama ekpep mi ukpepŋkpɔ kiet kabŋa edinwam eke ami midifreke. Ke enyiŋ Eti Ekpeme-erɔŋ, Ediye Ekpeme-erɔŋ, Ediyama Ekpeme-erɔŋ, kpa Ↄbɔŋ Jesus Christ, amen.