Eyom mme Anam Emem
Mbufo emenyene ufaŋ ndimek utɔk mme ndikpe emem. Ami ndɔhɔ mbufo nte emek ndidi anam emem, idahaemi ye kpukpru ini.
Ndima nditɔ eka mi iren ye iban, edi inemesit ndidu ye mbufo! Ke ɔfiɔŋ itiokiet emi ebede, menyene mbufo ke esit ye ke akam mi. Ami mbɔŋ akam nte Edisana Spirit eyeteme se Abasi oyomde nte mbufo ekop nte ami ntiŋde ikɔ.
Ke ini nkekpepde nte esiakde owo idem ke ediwak isua emi ebede, ami mma ŋwam asiak owo idem emi ekesibede owo ujot emi ekenyenede udɔŋɔ. Utom oro ama ɔsɔŋ. Ndien, ke ndidian ke mfina oro, owo kiet ke otu mme asiak owo oro anam ndudue, ndien akamba owo oro ayat esit. Ke ufɔt mfina emi, enye otop ikwa esie emi ɔkɔyɔhɔde ye udɔŋɔ. Enye ɔduɔ mi ke ubɔk!
Kpukpru owo ke ubet oro—ibɔhɔke ayat-esit asiak owo idem oro—ema efehe ndik ke ntak ubiat ibet usiak owo idem oro. Ke mfɔn iso, udɔŋɔ ikibehe mi. Edi ŋkpɔ emi ama otuk mi ke anyan ini. Ke ata ini oro, mma ŋwɔŋɔ nnɔ idem mi nte se ikpidedi ke ufɔk ibɔk mi ami ndiyatke esit. Ami ŋko mma ŋwɔŋɔ ke usen oro nte ke nditopke ŋkpɔ ndomo kiet ke ikɔ.
Kpa idahaemi, ke ediwak isua ema ekebe, ami nkere nte mme ikwa oro emi ekenyenede udɔŋɔ emi ɔkɔduɔde mi ke ubɔk ama ɔdiɔk akan idiɔk emi odude ke inua ikɔ mme ebuana nnyin mfin. Eti ido ye mfɔn ido esop ke eyo ubahare ye utɔk emi.
Ndedehe ikɔ, ndikut ndudue, ye nditiŋ idiɔk mbaŋa owo efen awak tutu. Ediwak mme ɔfiɔk ŋkpɔ, mme ebre mbre ukara, mme ɔnɔ owo imam, ye mbon efen esɔŋ mme owo enyin kpukpru ini. Afina mi ete ke ediwak mme owo enyime ete ke ɔfɔn ndibiere idiɔk ikpe, ntiŋ idiɔk, nyuŋ ŋwed idiɔk mbaŋa owo ekededi emi mikwe se mmɔ ekutde. Ediwak esɔp ndibiat edu mbon efen ke ndiwet enyene mbɔm ye idiɔk ekikere!
Akananam iyaresit ikpakke. Utɔk inamke owo ndomo kiet ɔkɔri. Utɔk inamke mfina etre. Ke ndiɔk-iso, usuk ini nnyin imikut ido utɔk kpa ke ufɔt nnyin. Nnyin imikop ibaŋa mbon esede ke mbio mbon ndɔ mmɔ ye nditɔ mmɔ, emi edade iyaresit eda mbon efen usuŋ, ye mbon emi emiade mbon ufɔk mmɔ ufen ye “ndop-uyo.” Nnyin imikop ibaŋ nditɔ ye nditɔ-ɔŋwɔŋ emi emiade kiet eken ye mme anam utom kiet emi ebiatde mme ufan mmɔ.
Ndima nditɔ-eka mi iren ye iban, emi inaha edi ntre. Nte mme mbet Jesus Christ, ana nte nnyin idi uwut-ŋkpɔ nte edude uwem ye kiet eken—akpan akpan ke ini nnyin ikerede ŋkpɔ nsio nsio. Mmem mmem usuŋ kiet ndifiɔk ata anditiene Jesus Christ edi nte owo oro enyenede mbɔm abaŋa mbon efen.
Andinyaŋa ama emi aŋwaŋa ke mme ukwɔrɔ ikɔ Esie ɔnɔ mme mbet Esie ke mme ererimbot iba. “Ↄfɔfɔn ɔnɔ mme ekpe emem,” Enye ɔkɔdɔhɔ.1 “Owo ekededi emi amiade fi ke mbaŋ nnasia, ŋwɔŋɔre ŋkaŋ oko nnɔ enye ŋko.”2 Ndien, ke akpanikɔ, Enye ama ɔnɔ item emi ɔkɔkpuhɔre kpukpru nnyin: “Ema mme asua mbufo, ediɔŋ enye emi esuŋide mbufo, enam eti enɔ enye emi asuade mbufo, enyuŋ ebɔŋ akam enɔ enye emi otukde onyuŋ ɔkɔbɔde mbufo.”3
Mbemiso Enye akpa, Andinyaŋa ama ɔnɔ mme Apostle Duopeba Esie uyo ete ema kiet eken nte Enye akamade mmɔ.4 Ndien Enye adian ete, “Ke emi ke kpukpru owo edifiɔk ete ke mbufo edi mbet mmi, edieke enyenede ima enɔ kiet eken.”5
Etop Andinyaŋa aŋwaŋa: Mme ata mbet Esie ebɔp, emenere, enɔ nsɔŋɔ, ekpak, enyuŋ enɔ nsɔŋ-idem—isehe nte mfina oro etiede. Mme ata mbet Jesus Christ edi mme anam emem.6
Mfin edi Palm Sunday. Nnyin ibeŋe-idem ndidara edinam emi okponde akan emi ewetde ke ererimbot, emi edide Mkpa Erifak ye Ediset ke Mkpa Ɔbɔŋ Jesus Christ. Usuŋ kiet emi ɔfɔnde akan emi nnyin ikemede ndikpono Andinyaŋa edi ndidi anam emem.7
Mkpa usio isop Andinyaŋa ama anam edi mmem mmem ɔnɔ kpukpru nnyin ndikan idiɔk—ye utɔk. Ekunam ndudue: utɔk edi idiɔk ŋkpɔ! Jesus Christ ama ɔdɔhɔ ete mbon enyenede “spirit utɔk” idihe Esie edi edi “eke satan emi edide ete utɔk, ndien [satan] edemere esit mme owo nditɔhɔ ke iyaresit, kiet ye eken.”8 Mbon etɔŋɔde utɔk esio ikpa ŋwed kiet ke ŋwed mbre Satan, mme mmɔ ema mme imaha. “Owo ndomo kiet ikemeke ndinam utom nnɔ ete-ufɔk iba.”9 Nnyin ikemeke ndida ye Satan ke ikɔ utɔk nyuŋ nkere ke imikeme ndinam utom nnɔ Abasi.
Ndima nditɔ eka iren ye iban, nte nnyin ikpepde kiet eken ŋkpɔ edi akpan akpan! Nte nnyin itiŋde ikɔ ye inyuŋ ibaŋa mbon efen ke ufɔk, ke ufɔk Abasi, ke itie utom, ye ke ofum edi ata akpan ŋkpɔ. Mfin, ami ndɔhɔ yak nnyin idu ye mbon efen ke ediye ye eti usuŋ. Mbɔk etim ekpaŋ-utɔŋ. “Edieke odude se ifɔnde, se iyede, mme se inyenede eti etop mme se etorode”10 oro ke ana nnyin itiŋ idian mbon efen—ke iso mme ke edem esie—oro ana edi udomo nnyin ke nneme.
Edieke nwan ye ebe ke ŋkan-ŋkuk fo ediaŋare ndɔ, mme ekpri missionary abak ɔnyɔŋ mission, mme ekpri eyen enyene eyikhe abaŋa ikɔ ntiense esie, mmɔ iyomke ubiere ikpe mbufo. Ana nte mmɔ ekut ima Jesus Christ ke mme ikɔ ye edinam mbufo.
Edieke ufan ke ofum enyenede ɔkpɔsɔŋ ekikere abaŋa mbre ukara mme ŋkpɔ obio emi abiatde kpukpru se mbufo ekerede, iyaresit, ye idiɔk inua ikɔ idinwamke. Ndinam emem oyoyom se iwakde ikan oro oto mbufo, edi oro edi se ufan fo oyomde.
Utɔk ebin Spirit efep—kpukptu ini. Utɔk ɔsɔŋɔ idiɔk ekikere ɔdɔhɔde ete ke enwan ediusuŋ ndinam emem; edi idihe ntre. Utɔk edi edimek. Unam emem edi edimek. Mbufo emenyene ufaŋ ndimek utɔk ye ndikpe emem. Ami ndɔhɔ mbufo nte emek ndidi anam emem, idahaemi ye kpukpru ini.11
Nditɔ eka iren ye iban, nnyin imikeme ndikpuhɔre ererimbot—owo kiet ye neme kiet ke ini. Didie? Ke ndinam nwut adaŋa ndinam nenen ukpuhɔre ekikere ye ukem ukem ukpono ye enyene ukpono neme.
Ukpuhɔre ke ekikere edi ubak kiet ke uwem. Ami nnam utom kpukpru usen ye mme etiŋ isuŋ-utom Abasi emi misikwe ŋkpɔ ke ukem ukem usuŋ ke usuk ini. Mmɔ efiɔk ke moyom ndikop ekikere mmɔ akpanikɔ kabaŋa kpukpru se nnyin inemede—akpan akpan mme akpan ŋkpɔ.
Mme nti mme ɔnɔ item mi iba, President Dallin H. Oaks ye President Henry B. Eyring, edi nti uwut-ŋkpɔ ke usuŋ mmɔ etiŋde ikɔ—akpan akpan ke ini mmɔ minyemeke ye kiet eken. Mmɔ enam ntre utɔk ye ata ima enɔ kiet eken. Owo ndomo idɔhɔke ke imifiɔk ikan kiet eken ndien ke ntre ke edinen ido ekpeme ndaha esie. Ndomo kiet iwutke ete ke edi mbuba ye kiet eken. Koro kiet kiet ɔyɔhɔ ye ima, “ata ima Christ,”12 ineme nnyin ɔyɔhɔ ye Spirit Abasi. Ami mmema nyuŋ mkpono ikpɔ owo iba emi!
Ima edi ibɔk ɔnɔ utɔk. Ima edi enɔ spirit emi anwamde nnyin isio owo nte obot edide ifep, emi edide ekere idem, ndikpeme idem, nkohode idem ye ufip. Ima edi ata akpan edu eke ata anditiene Jesus Christ.13 Ima anam efiɔk anam emem.
Ke ini nnyin isuhɔre idem ke iso Abasi inyuŋ ibɔŋde akam ye ofuri odudu ke esit nnyin, Abasi ɔyɔnɔ nnyin ima.14
Mbon emi enyenede saŋa saŋa enɔ emi enyene ime ye ima. Mmɔ inyeneke ufip inɔ mbon efen inyuŋ itaŋke idem. Mmɔ isɔpke ndiyaresit inyuŋ ikereke idiɔk ibaŋa mbon efen.15
Nditɔ eka iren ye iban, ata ima Christ edi usɔbɔ ɔnɔ utɔk emi ɔdɔŋɔde nnyin mfin emi. Ima anam nnyin “ibiom mbomo kiet eken”16 utuke idori mbon efen mbiomo ke ibuot mmɔ. Ata ima Christ ayak nnyin “ida nte ntiense inɔ Abasi ke kpukpru ini ye ke kpukpru ŋkpɔ”17—akpan akpan ke mme ɔkpɔsɔŋ ini. Ima ayak nnyin iwut nte iren ye iban Christ etiŋde ikɔ enyuŋ enamde ŋkpɔ—akpan akpa ke ini idomo.
Idahaemi, ami ntiŋke ikɔ mbaŋa “ke ekɔm urua ekededi.”18 Ami ntiŋ mbaŋa ndinam ye mbon efen ke mme usuŋ emi asaŋade ye ndinim ediomi emi afo akanamde kini adiade udia ɔbɔŋ. Nnyin imenwɔŋɔ nditi Adinyaŋa kpukpru ini . Ke mme ndaha emi enehede oyom onyuŋ ɔyɔhɔde ye enini, ami nkot mbufo nte eti Jesus Christ. Bɔŋ akam ndinyene uko ye ifɔk nditiŋ mme ndinam se Enye akpanamde. Nte nnyin itienede Ɔbɔŋ Emem, nnyin iyide mme anam emem Esie.
Idahaemi, mbufo eyekere ke etop emi eyetim anyaŋa owo emi mbufo efiɔkde. Ekeme ndidi ke mbufo ekere ke eayanwam enye ndifɔn ido ye mbufo. Mekere ke eyedi ntre! Edi ami ŋko nkere ke mbufo eyetim ese esit mbufo ndise me emenyene ntaŋidem me ufup emi akpande mbufo ndidi anam emem19
Edieke mbufo esinde ifik ebaŋa ndibok Israel ye ndibɔp mme ebuana emi edidude ke nsi nsi, idahaemi edi ini ndisio idiɔk esit mfep. Idahaemi edi ini nditre ndidɔhɔ ke unyimeke. Idahaemi edi ini nditre ndinam mme ŋkpɔ emi enamde mme owo ekpeme idem man idinam mbufo eyaresit. Idahaemi edi ini ndiduɔŋɔ mme ŋkpɔ ekɔŋ mbufo.20 Edieke inua mbufo eyɔhɔde ye mme usɔŋ-enyin ye udori-uyo, idahaemi edi ini ndiduɔŋɔ mmɔ.21 Mbufo eyedaha eda nte mkpɔsɔ spirit iren ye iban Christ.
Temple ekeme ndinwam nnyin ke udɔŋ emi. Do ke enɔ nnyin odudu Abasi, emi ɔnɔde nnyin ukeme ndikan Satan, andisiak ofuri utɔk.22 Esio enye efep ke mme ebuana mbufo! Efiɔk ete ke nnyin ŋko imikpan andidiɔk kpukpru ini nnyin inamde emem mme isinde ndiyaresit. Edi, nnyin imikeme ndiwut mbɔm emi edide edu mme ata mbet Jesus Christ. Mme anam emem ekan andiduɔk.
Yak nnyin nte mme owo idi unwana ke obot—unwana emi owo “mikemeke ndifuk.”23 Yak nnyin iwut ite ke emem, usuŋ ukpono odu ndiyɔ mme mkpɔsɔŋ mfina ye eti usuŋ ndinam emem. Nte mbufo ewutde ima emi mme ata nditiene Jesus Christ enyenede, Abasi ɔyɔdiɔŋ mme utom mbufo nte enamde.
Iyire ikɔ Abasi edi mkponkan iyire ke ererimbot. Abasi okot kpukpru owo ete edi etiene Enye, “afia ye obubit, ifin ye eyen isɔŋ, eren ye wan.”24 Ufaŋ odu ɔnɔ kpukpru owo. Edi, ufaŋ iduhe inɔ isin-enyin, idiɔk ubiere ikpe, mme utɔk ekededi.
Ndima nditɔ eka iren ye iban, se ifɔnde ikan idihe kaŋa inɔ mbon emi ebiatde ini mmɔ enɔ ndimenere mbon efen. Mfin emi ami mokot mbufo nte ese nte edide mbet ke usuŋ nte mbufo enamde ŋkpɔ ye mbon efen. Mɔdiɔŋ mbufo nte enam ukpuhɔre emi eyomde man ido mbufo edi eti, enyene ukpono, onyuŋ ada ɔnɔ ata anditiene Jesus Christ.
Mɔdiɔŋ mbufo nte esio idiɔk esit eda ikot, esio iyaresit eda emem, ndien esio utɔk eda mbɔm.
Abasi odu uwem! Jesus edi Christ. Enye ada ke ibuot Ufɔk Abasi Esie. Nyin idi mme isuŋutom Esie. Enye eyenwam nnyin idi mme anam emem Esie. Ami ntiŋ ikɔ ntiense emi ke edisana enyiŋ Jesus Christ, amen.