![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F86%2Fa8%2F86a895147de9b1f2278f6707f9778d1957bbee37%2F86a895147de9b1f2278f6707f9778d1957bbee37.jpeg/full/!250,/0/default)
Se Jesus Christ
Obɔŋ Jesus Christ edi ibɔrɔ ɔnɔ mme mfina nnyin, edi ana nnyin imenede enyin nnyin inyuŋ idibede enyin nnyin man ikut Enye.
Ete mi ekesitiŋ ɔnɔ mi ete, “Ku unehede use mme mfina fo eke afo mukemeke edikut ibɔrɔ.”
Ami ntiŋ ikɔ ntiense nte Obɔŋ Jesus Christ edi ibɔrɔ ɔnɔ kpa ata mme mkpɔsɔŋ mfina nnyin. Akpan-akpan, Enye ama akan mfina mbinaŋ emi nnyin owo kiet-kiet ikutde emi nnyin owo kiet-kiet mikpikemeke edibɔrɔ ke idem nnyin:
-
Akpa mfina edi mkpa ikpɔkidem Nnyin imikeme edi-nam oro ebighi mme edifep-enyin mbaŋa oro, edi nnyin ikemeke edikan oro ke idem nnyin. Jesus Christ, nte ededi, ama akan mkpa ɔnɔ nnyin, ndien ke ntak oro, kpukpru nnyin iyeset ke usen kiet.1
-
Udiana afanikɔŋ esine mme ukut, mkpɔsɔŋ ifiɔk-ukpep, mfuhɔ, ubiak, ye unana-edikut-unen eke ererimbot emi. Jesus Christ ama akan kpukpru emi. Eke mbon emi edomode editiene Enye, Enye ke usen kiet “eyekwɔhoɔde kpukpru mmɔŋeyet efep” onyuŋ anam ofuri nkpɔ afiak edi nnen-nnen.2 Ke ini emi, Enye ekeme edisɔŋɔ nnyin idem man ibe mme idomo nnyin ke uko, eti-esit ye emem.3
-
Oyɔhɔ mfina ita edi mkpa eke spirit otode ke idiɔknkpɔ. Jesus Christ ama akan mfina emi ke edimen ndori ke Idemesie ufen man nnyin ikut emem.”4 Otode ke uwa ufak Esie, nnyin imikeme ebibɔɔ ufin otode ke mme utip idiɔknkpɔ nnyin edieke nnyin inyeneke mbuɔtidem ke Andinyaŋa, inehede ikabare-esit, inyime ediomi emi Ete ɔnɔde nnyin oto ke mme akpan edinam oruk nte baptism, inyuŋ iyɔ isim utit.5
-
Oyɔhɔ mfina inaŋ edi esisit, unana-mfɔnmma uduot-obot nnyin. Jesus Christ enyene ibɔrɔ ɔnɔ mfina emi nkmo. Enye isɔhike mme ndudue kpɔt isio onyuŋ anam nnyin ifiak inana ndudue. Enye ekeme edi-nam “akwa ukpuhɔre ke … esit nnyin, ndien nnyin ikenyeneke udɔŋ aba ndinam idiɔ, edi ndinam se ifɔnde kpukpru ini.”6 Ekeme ndinam nnyin ifɔn-ima oto ke mfɔn Christ ndien usen kiet ikabare itie nte Enye.7
Ke ndiɔkiso, nnyin imisiwak edinehede nse mme mfina nnyin esinde nnyin itre edise se idi ibɔrɔ, Andinyaŋa nnyin, Jesus Christ. Didie ke nnyin idifep ndudue oro? Ami mmonim ke ibɔrɔ ɔkɔŋɔ ke ediomi emi ekotde ete nnyin inam ye Enye ye Ete nnyin ke Heaven.
Ndise Jesus Christ oto ke Ediomi
Ediomi nnyin anwam nnyin ediwuk enyin, ekikere, ye edinam nnyin ke Christ. Nte nnyin “iyiride ke ediomi emi [nnyin ika] namde,” nnyin iyekeme edikut “mme nkpɔ ererimbot emi” eke anade nnyin “isa-na iyak” ye “mme nkpɔ eke eti [ererimbot]” emi nnyin ikpinehede iyom.
Oro edi se mbon Ammon ekenamde ke Nwed Mormon. Nte mmɔ ekpepde ebaŋa Jesus Christ enyuŋ etɔŋɔ ediyak uwem mmɔ nnɔ Enye, mme edifiɔk ete ke mmɔ enyene edibuk nkpo-ekɔŋ mmɔ ndien ekabare enam akpanikɔ mfɔn-mfɔn ndien “eyak ɔkpɔsɔŋ udɔŋ mmɔ enɔ Abasi.”9
Ndinim ediomi anam nnyin iyom nkpɔ ekededi emi adade odudu Spirit edi onyuŋ esin nkpɔ ekededi emi ebinde spirit osio—“koro nnyin imidiɔŋɔ ete edieke nnyin ikemeke edidot man Edisana Spirit odu, nnyin nko imikeme edidot man iduŋ kiso Ete Heaven ye Eyene Esie, Jesus Christ.”10 Emi ekeme ediwɔrɔ ete ke ana nnyin ikpuhɔ ikɔ usem nnyin, itiŋ mme ifure-ifure ikɔ. Oro ekeme ediwɔrɔ edinyene mbufa edu emi ɔsɔŋɔke ebuana nnyin ye Abasi ke nde ndiɔi edu-uwem, oruk nte edibɔŋ-akam ye edikot nwed Abasi kupkpru usen, ke idem nnyin ye mme ufɔkemana nnyin.
President Russell M. Nelson etiŋ ete ke “owo kiet kiet emi anamde eŋwɔŋɔ ke ebiet una baptism ye ke mme temple—ndien enim mmɔ—enyene ata nkɔri ke edikut odudu Jesus Christ. …
“Utip ke ndinam ediomi ye Abasi edi odudu eke heaven—odudu emi anamde nnyin inehede ikan iyɔ mme idomo, mfina, ye mme ubiak.”11
Edifiak nam ediomi nnyin kini udia-ubɔŋ ke Sunday kiet-kiet edi akamba eti-ifet man iduŋɔre idem nnyin12 inyuŋ ifiak-iwuk uwem nnyin ke Jesus Christ. Ke edidia udia-ɔbɔŋ, nnyin ibiere ete ke nnyin “iyeti enye ke kpukpru ini.”13 Ikɔ oro kpukpru ini ada ɔnɔ ata akpan nkpɔ. Oro ediwut adaŋa odudu Andinyaŋa ke ofuri nde ke uwem nnyin. Nnyin itihe Enye ke ufɔk Abasi mme kini akam usenubɔk mme kini nnyin idude ke mfina ye kini nnyin iyomde nkpɔ kpɔt.
Ihn, nnyin ke ubakini imisifep enyin ise nkpɔ efen. Nnyin imisifre nkpɔ. Nnyin imisinana ntiŋ-enyin. Edi edifiak-nam ediomi nnyin ɔwɔrɔ ete ke nnyin iyom editi Andinyaŋa kpukpru ini, ke nnyin iyedomo ndinam ntre ke ofuri udua oro, ndien ke nnyin iyefiak isin-ifik inyuŋ ifiak ise Enye ke okpokoro udia-ɔbɔŋ ke udua efen.
Ndise Jesus Christ ke Ufɔkiduŋ Nnyin
Nte anwaŋade, ediwuk enyin ke Jesus Christ enyene ediwak nkan ke Sunday kiet, ke edinam-mbre eke ufɔk Abasi. Ini emi President Nelson ɔkɔtɔŋde Edi, Etiene Mi ke 2018, enye etiŋ ke, “Ini edi emi ɔnɔ Ufɔk Abasi edidu-ke-ufɔkiduŋ.”14 Enye ete ke nnyin inyene “edikpuhɔre ufɔkiduŋ [nnyin] nsin ke itie-ukpono eke mbuɔtidem” ye “eboho-itie edikpep ikɔ Abasi.” Ndien enye akanam nti enwɔŋɔ inaŋ ɔnɔ nnyin edieke nnyin idinamde oro.15
Akpa enwɔŋɔ: “Usen Sabbath mbufo eyedi eyenehede edi usen idara.” Oro eyekabare edi usen kiet emi nnyin idikperede Andinyaŋa nnyin. Nte nkaiferi nnwan otode Peru etide ete, “Usen Abasi edi usen eke ami nsinehede mbɔ mme ibɔrɔ nto Abasi.”
Udiana enwɔŋɔ: “Nditɔ mbufo eyenem esit ke edikpep nyuŋ nam ukpepnkpɔ eke Andinyaŋa.” Ntak edi oro emi “nnyin itiŋde ibaŋa Christ, idarade ke Christ, ikwɔrɔ Christ, … man nditɔ nnyin ekpefiɔk oruk usuŋ emi ekpeyomde edifen ke idiɔkŋkpɔ mmɔ.”16
Nnyin inam emi man ke usen kiet, ini emi eyen-eren nnyin ediwɔrɔde anwa ikanam utom mme ikedɔk mme nkɔŋ-nkɔŋ obot mme ikoyom mme unam ke akai-ikot, nte Enos akanamde, enye ekpeti se nnyin ikekpepde enye kabaŋa Christ ye kabaŋa idara ke edi-nam ikɔ Abasi. Ndien anie owo ɔdiɔŋɔ? Ekeme ndidi emi edi-di usen oro kini enye ke akpatre edikopde nsat-itɔŋ nkpɔ-Abasi ndien ɔwɔŋɔre etiene Jesus Christ man enye ekeme edikop uyo Abasi ɔdɔhɔde enye ete, “Emefen mme idiɔknkpɔ fo, ndien afo eyebɔ edidiɔŋ.”17
Oyɔhɔ enwɔŋɔ ita: “Odudu andidiɔk ke uwem mbufo ye ke uwem ufɔkiduŋ mbufo eyesuhɔre.” Ke ewe ntak? Koro nte nnyin iwukde enyin ke Jesus Christ okpon, ntre ke odudu idiɔknkpɔ osuhɔre.18 Nte ufɔkiduŋ nnyin ɔyɔhɔde ye unwana Christ, esisit ubet-ufɔk edidu ɔnɔ ekim eke andidiɔk.
Oyɔhɔ enwɔŋɔ inaŋ: “Nti ukpuhɔre-nkpɔ eyesɔp nditibe ke ufɔkemana nnyin onyuŋ odu ebighe.” Ke ewe ntak? Koro ukpuhɔre-nkpɔ emi Jesus Christ adade esin edi “akwa ukpuhɔre-nkpɔ.”18 Enye eyekpuhɔre ata uduot-obot nnyin, nnyin ikabare idi “mbufa obot.”20 Nnyin suŋ-suŋ ikabare itie nte Andinyaŋa, iyɔhɔ ye edisana ima Esie inɔ kpukpru nditɔ Abasi.
Anie owo mikpiyomkemme enwɔŋɔ emi ɔwɔrɔ-osu ke uwem mmɔ ye ke ufɔkemana mmɔ? Nso ke nnyin iyom ndinam man inyene mmɔ? Ibɔrɔ edi“edikpuhɔre ufɔkiduŋ nnyin nsin ke itie-ukpono eke mbuɔtidem ye eboho-itie edikpep ikɔ Abasi. Ndien didie ke nnyin inam oro? Ke ediwuk-enyin ke Ete Heaven ye Jesus Christ, inam Mmɔ edi eboho-itie uwem ufɔkemana nnyin, ata akpan odudu ke ufɔkiduŋ nnyin.
Ami mmekeme edinɔ ekikere eke afo editɔŋɔde ke edi-nam ikɔ Christ, emi ekutde ke nwed Abasi, edi ubak nkpɔ eke kpukpru usen ke uwem mbufo? Iduhe eneneim usuŋ ke ata edikot nwed Abasi. Oro ekeme edi-di minit ition mme duop ke usen—kiet-kiet mme akande oro edieke afo ekemede. Oro ekeme edi-di ibuot kiet mme esisit ufaŋ ke usen. Ubak ufɔkemana enyime edikot ke usenubɔk mbemiso mmɔ eka ufɔknwed mme utom. Mbon eken enyime man ekot ke okoneyo mbemiso eduk idap. Ubak mbufa ebe ye nnwan eketiŋ enɔ mi ke mmɔ esikot ke owo-ke owo ke usuŋ emi mmɔ ekade utom ndien ekem ebuana ifiɔk mmɔ ye kiet eken ke text ntem ewewet mme ikɔ ye nneme mmɔ enim.
Edi, Etiene Mi ɔnɔ ediwak ekikere abaŋa mme edinam ye nkpɔ-utom emi ekemede edinwam mme owo ye ufɔkemana ekpep nkpɔ ikɔ Abasi eto nwed Abasi. Mme ndise-video eke Bible ye Nwed Mormon nko ekeme edi-di eti nkpɔ-utom man enam enehede enyene nwed Abasi ke ufɔkemana mbufo. Iwaad ye nditɔ-ŋwɔŋ esiwak edibɔ nti-ifiɔk oto mme mbuk edi-ti emi odude ke nwed Abasi. Mme mbuk ye item ikɔ Abasi emi mmɔ ekpepde eyedu ye nditɔ mbufo, nte nti ufan, kini mmɔ eyomde nti uwutnkpɔ eke utom-unwam, eti-ido, nkopitem, ime, nsin-ifik, eriyarare eke idem owo, ata-ima, nsuhɔre-idem, ye mbuɔtidem ke Jesus Christ. Ke ini akade iso, nsɔŋɔ-nda mbufo ke edikot ikɔ Abasi eyenwam nditɔ mbufo ekɔri esaŋa ekpere Andinyaŋa. Mmɔ eyedidiɔŋɔ Enye ekan ke akpa ini.
Obɔŋ Jesus Christ odu-uwem mfin emi. Enye ekeme edi-di ɔsɔŋɔ, nka-iso usen-ku-usen ke uwem nnyin. Enye edi ibɔrɔ ɔnɔ mme mfina nnyin, edi ana nnyin imenede enyin nnyin inyuŋ idibede enyin nnyin man ikut Enye. Enye eketiŋ ete, “Ese mi ke kpukpru ekikere; ekunyene eyighe, ekufehe ndik.”21 Nte nnyin isede Enye ye Ete nnyin ke Heaven, inam inyuŋ inim ediomi ye Mmɔ, ndien inam Mmɔ edi ata akpan odudu ke ufɔkiduŋ ye ufɔkemana nnyin, nnyin iyekabare oruk owo emi President Nelson okokutde abaŋa nte: “Mme owo emi ekemede, ebeŋe-idem, enyuŋ edot man enyime Jehovah kini Enye edifiakde edi, mme owo emi ema ekebem-iso emek Jesus Christ ekan idiɔk ererimbot emi, mme owo emi edarade ke mbumek mmɔ man eduŋ ke edikɔŋ, edisana ibet eke Jesus Christ.”22 Ke enying Jesus Chrst, amen.