![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fb6%2Fa5%2Fb6a503cdf2d3aecd45370ed1dc009c97801f94ba%2Fb6a503cdf2d3aecd45370ed1dc009c97801f94ba.jpeg/full/!250,/0/default)
“Iduhe Nkpɔ Ndomo-kiet Emi Eyede Onyuŋ Enemde nte Idara Mi”
Edikabare-esit kusen-kusen nyuŋ ndi ntiene Jesus Christ edi usuŋ edinyene idara—idara emi akande ekikere nnyin.
Ke ofuri ukwɔrɔ ikɔ Esie ke isɔŋ, Andinyaŋa ama enyene ata mbɔm ɔnɔ nditɔ Abasi—akpan-akpan ɔnɔ mbon emi ekebɔde ukut mme ekekpɔŋde usuŋ. Kini mme Pharisee ekebiomde enye ke edinyene ebuana ye nyuŋ ndia-udia kotu mme anam idiɔknkpɔ, Jesus ɔkɔbɔrɔ ke edikpep nke-mbuk ita emi nnyin ifiɔkde.1 Ke nke-mbuk kiet-kiet emi, Enye emen owut ufɔn ediyom mbon emi ekekpɔŋde usuŋ ye idara emi ekopde kini mmɔ efiakde enyɔŋ edi. Nte uwutnkpɔ, ke nke-mbuk eke erɔŋ osopde, Enye ete, “[Akwa] idara eyedu ke heaven abaŋa idiɔk owo kiet emi akabarede esit.”2
Udɔŋ mi edi ndisɔŋɔ ebuana ke ufɔt idara ye erikabare esit—ata akpan-akpan, idara emi otode kini nnyin ikabarede esit ye ekikere idara emi nnyin inyenede ke nte nnyin ikotde mbon efen ete editiene Christ enyuŋ ebɔ uwa ufak Esie esin ke uwem mmɔ.
Nnyin Idi Man Nnyin Idinyene Idara
Ke nwed Abasi, ikɔ oro idara ke akpanikɔ okpon akan ekpri ndaha uyuhɔ mme kpa ekikere inemesit. Idara ke ndaha emi edi ido eke Abasi, emi ikutde ke uyɔhɔ esie kini nnyin ifiakde inyɔŋ ikoduŋ kiso Abasi.3 Oro enehede okpon, emenede, ebighe, onyuŋ enyene ukpuhɔre akan inem mme idɔŋesit ekededi emi ererimbot emi ekemede edinɔ.
Ekebot nnyin man inyene idara. Oro edi akaŋa emi nnyin ikiyomde nte nditɔ eke edima Ete eke Heaven. Enye oyom edibuana idara Esie ye nnyin. Prophet Lehi ekekpep ete ke uduak emi Abasi enyenede ɔnɔ nnyin owo kiet-kiet edi “man nnyin inyene idara“4 Koro nnyin idu ke idiɔk ererimbot, edibighe idara mme nsinsi idara ebiet nte idara esibe ɔkpɔŋ ndaha nnyin. Edi ke ata udiana ufaŋ ŋwed oro, Lehi aka-iso ndinam-anwaŋa ete ke “Andinyaŋa [ekedi man] … erifak [nnyin] osio ke iduɔ.”5 Erifak, otode onyuŋ asaŋade ye Andinyaŋa Jesus Christ, anam idara odu.
Etop ikɔ Abasi edi etop idorenyin, eke “eti mbuk akwa idaresit,”6 ye usuŋ emi kpukpru owo ekemede edikut emem ye mme ndaha idaresit ke uwem emi enyuŋ ebɔ uyɔhɔ idara ke uwem emi edidide.7
Idara emi nnyin itiŋde ibaŋa edi enɔ emi enyenede mme anam-akpanikɔ, edi enye asaŋa ye ekɔm-urua. Idara imemke-urua mme edinɔ ke nte ededi. Edi, ekedep oro “ye nsɔŋ-urua iyip [Jesus] Christ.”8 Edieke nnyin ikpitimde ifiɔk ufɔn ata, idara eke Abasi, nnyin ikpebiatke ini ediyak inyene ererimbot ekededi mme edi-nam ukpuhɔde nkpɔ ekededi ke uwem man ibɔ idara oro.
Okpɔsɔŋ edi osuhɔre-idem edidem kiet ke Nwed Mormon ama ɔfiɔk emi. Enye obup ete, “Nso ke ami mkpenam,” “man ami mkpemana ke Abasi, man esio idiɔk spirit emi ke esit mi efep, nyuŋ mbɔ Spirit esie, man ami mkpeyɔhɔ ye idara … ? Enye ete, Sese, ami nyeyak kpukpru nkpɔ se nnyenede, ihn, ami nyesin obio-ubɔŋ mi, man ami mkpebɔ akwa idara emi.”9
Ke edibɔrɔ mbume eke edidem emi, Aaron andikwɔrɔ-ikɔ ete, “Edieke afo oyomde emi, … suhɔre ibuot fo kiso Abasi … [yuŋ] kabare esit ke kpukpru idiɔknkpɔ fo.”10 Erikabare esit edi usuŋ esimde idara11 koro enye edi usuŋ emi adade ekesim Andinyaŋa Jesus Christ.12
Idara Edi oto Ata Erikabare-esit
Eke ubak owo, edikere mbaŋa erikabare esit nte usuŋ adade aka idara ekeme edibiet nkpɔ-eneni. Erikabare esit, ke usuk ini, ekeme edisne ubiak onyuŋ ɔsɔŋ. Oro oyom edinyime ke usuk ekikere ye edinam nnyin—kpa usuk nkpɔ emi nnyin inimde-ke-akpanikɔ—ekedi ndudue. Erikabare esit oyom edikpuhɔ, emi, ke usuk ini, ekeme edinana inem. Edi idaresit ye idɔŋesit idihe ukem-ukem nkpɔ. Idiɔknkpɔ—esinede idiɔknkpɔ eke usuhɔre-itie—osusuhɔre idaresit nnyin.
Nte andiwet psalm etiŋde, “Ntua-eyet eyedaŋ ke okoneyo, ndien idara edi ke usenubɔk.”13 Nte nnyin ikabarede esit ke idiɔknkpɔ nnyin, ana nnyin ise akwa idara emi editienede. Okoneyo ekeme edibighe, edi usenubɔk eyedi, ndien oh, emem ye idara emi nnyin ikopde edinem onyuŋ eye didie ke Erisio-isop eke Andinyaŋa ɔkpɔkde nnyin osio ke idiɔkŋkpɔ ye ukut.
Iduhe Nkpɔ Ndomo-kiet Emi Eyede Onyuŋ Enemde
Kere-baŋa ifiɔk-ukpep eke Alma ke Nwed Mormon. Ema “etuhɔre enye ye nsinsi ndutuhɔre,” ndien ukpɔŋ esie “ama abiara” oto ke idiɔknkpo esie. Edi inikiet emi ɔwɔŋɔre etiene Andinyaŋa oyom mbɔm, enye “ikemeke editi mme ubiak [esie] aba.”14
Enye ofiori ete, “Ndien oh, ewe idara ye akwa unwana ke ami nkokut; ihn, … iduhe nkpɔ ndomo-kiet emi eyede onyuŋ enemde nte idara mi”,15
Emi edi oruk idaresit ekedude ɔnɔ mbon emi edide etiene Jesus Christ ke nkabare esit.16 Nte President Russell M. Nelson ekekpepde ete:
“Erikabare esit ada nnyin usuŋ ekesim odudu Erisio-isop eke Jesus Christ. …
“Ini emi nnyin imekde edikabare-esit, nnyin imimek ndikpuho! Nnyin imenyime Andinyanga ɔkpuhɔ nnyin esin ke ata-nti uduot eke idem nnyin. Nnyin imek ndikɔri ke spirit nyuŋ mbɔ idara—idara erifak nto Enye. Ini emi nnyin imekde erikabare-esit, nnyin imek ndikabare mbiet Jesus Christ!17
Erikabare esit ada idaresit edi koro enye ebeŋe esit nnyin man ɔbɔ odudu Edisana Spirit. Ediyɔhɔ ye Edisana Spirit ɔwɔrɔ ediyɔhɔ ye idara. Ndien ediyɔhɔ ye idaresit ɔwɔrɔ ediyɔhɔ ye Edisana Spirit.18 Idaresit nnyin eyekpon nte nnyin inamde utom ofuri usen ndida Edisana Spirit nsin ke uwem nnyin. Nte prophet Mormon ekekpepde ete: “Edi mmɔ ema esitre udia enyuŋ ebɔŋ-akam, enyuŋ enehede esɔŋɔ ke nsuhɔre-idem mmɔ, ndien enehede ewuk mbuɔtidem [mmɔ] [ke] Christ, ekesim ediyɔhɔ ukpɔŋ mmɔ ke idara ye ndɔŋesit.”19 Jehovah ɔnwɔŋɔ ɔnɔ kpukpru mbon eketienede Enye ete, “Ami nyeyak Spirit … mi nnɔ mbufo, emi ediyamade ekikere mbufo, emi ediyɔhɔde ukpɔŋ mbufo ye idara.”20
Idaresit ke Edinwam Mbon Efen Ekabare-esit
Ke nnyin ima ikikop idara eketode ata erikabare-esit, nnyin inehede iyom edibuana idara oro ye mbon efen. Nte nnyin inamde ntre, idaresit nnyin eyekpon. Ata ukem se iketibede inɔ Alma edi oro.
Enye ete, “Emi edi ubɔŋ mi”, “man ami mkpedi nkpɔ-utom ke ubɔk Abasi ndinam usuk ukpɔŋ ekabare-esit, ndien idaresit mi edi emi.
“Ndien sese, kini ami nkutde ediwak nditɔ ete mi enehede etua-mkpɔfiɔk, enyuŋ edi etiene Jehovah Abasi mmɔ, ekem ukpɔŋ mi ama ɔyɔhɔ ye idara; do ke ami nketi se Jehovah akanamde ɔnɔ mi, … ihn, do ke ami nketi ubɔk mbɔm esie emi enye akanyande [ɔnɔ] mi.”21
Ndinwam mbon efen ekabare-esit edi ata ediwut esit-ekɔm nnyin nnɔ Andinyaŋa, ndien oro edi ntɔŋɔ akwa idaresit. Jehovah ɔkɔnwɔŋɔ ete:
“Ndien edieke edide man mbufo enam-utom … eda, kpak ukpɔŋ kiet esɔk Mi, idara mbufo edikpon didie ye enye ke obio-ubɔŋ eke Ete Mi!
“Ndien idahaemi, edieke idara mbufo edikponde ye ukpɔŋ kiet emi mbufo edade esɔk Mi, … , didie ke idara mbufo edikpon edieke mbufo edidade ediwak ukpɔŋ isɔk Mi!”22
Didie ke Idara Esie Edikpon ke Ukpɔŋ Emi Akabarede-esit
Ami mmokut ke oro anwam ke edidomo edikere idaraesit oro Andinyaŋa ekerede kini kiet-kiet emi nnyin ibɔde edidiɔŋ eke uwa isop Esie isin ke uwem nnyin.23 Nte President Nelson eketiŋde,24 Apostle Paul ke Nwed esie ewetde ɔnɔ mbon Hebrew abuana ndimem ifiɔk esie ete: “Eyak ofuri … idiɔknkpɔ emi esifinade mbufo enim, … ese Jesus anditɔŋɔ ye utit mbuɔtidem nnyin; emi ke ntak idara oro emi ekenimde kiso esie okobiomde cross oro … ndien etie ke ubɔk nnasia eke ebekpo Abasi.”25 Nnyin imisiwak editiŋ mbaŋa ubiak ye ufen eke Gethsemane ye Calvary, edi isiwakke nditiŋ mbaŋa akwa idara Andinyaŋa ekekerede abaŋa ke nte Enye akayakde uwem Esie ɔnɔ nnyin. Ntem, ubiak ye ufen Esie ekedi ke ntak nnyin, man nnyin ikpifiɔk idaraesit eke edisaŋa ye Enye nyɔŋ nka iso Abasi.
Ke ama ekekpep mbon America eke eset okure, Andinyaŋa okowut akamba ima Esie ɔnɔ mmɔ ke edidɔhɔ ete:
“Idahaemi, sese, idara mi okpon, ekesim uyɔhɔ, ke ntak mbufo … ; edi ntre, ndien Ete nko adara, nko ye kpukpru ndisana angel. …
“… Ke ntak [mbufo] Ami ndu [ke] ɔyɔhɔ idara.”26
Edi Etiene Chtist enyuŋ Ebɔ Idara Esie
Nditɔ-eka irenowo ye iban, ami nyetre ke edibuana ntiense eke idem mi, eke ami nkerede-mbaŋa nte nsasana enɔ. Ami ntiŋ ikɔ ntiense ke Jesus Christ edi Andinyaŋa ye Andifak ererimbot. Ami mmɔdiɔŋɔ ke Enye ama nnyin owo kiet-kiet. Ata akpan ntiŋenyin esie, “Utom [Esie] ye ubɔŋ [Esie],”27 edi man anwam nnyin ndibɔ ɔyɔhɔ idaresit ke Enye. Ami ndi ntiense ke edikabare-esit kusen-kusen nyuŋ ndi ntiense ke Jesus Christ edi usuŋ edinyene idara—idara emi akande ekikere nnyin.28 Oro edi ntak emi nnyin idude mi ke isɔŋ. Oro edi ntak emi Abasi akanamde akwa uduak inemesit ɔnɔ nnyin. Ke akpanikɔ Jesus Christ edi “usuŋ, ye akpanikɔ, ye uwem”29 ye nkokure enyiŋ emi enɔde ke idak enyɔŋ emi ekemede ndinyaŋa owo ke obio ubɔŋ Abasi.”30 Ami ntiŋ ikɔ ntiense emi ke edisana enyiŋ Jesus Christ, amen.