![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fa9%2F02%2Fa9020b09238e412a97e3ff044a9a542f9f98783b%2Fa9020b09238e412a97e3ff044a9a542f9f98783b.jpeg/full/!250,/0/default)
Esit Alma Ama Eyire omum Ekikere Emi abaŋade Jesus Christ.
Nte mbufo ekade-iso etiŋ-enyin ekere ebaŋa Jesus Christ, ami ŋwɔŋɔ ke mbufo idibɔhɔ ndausuŋ heaven kpɔt edi eyebɔ odudu heaven.
Ke ediye ini Easter emi, ami mfiori ebeŋe eke inem ikwɔ emi nte, “Kpeme nnyin, akwa Jehovah.”1
Inem mbuk kiet odude ke Nwed Mormon etiŋ abaŋa akparawa kiet, emi otode eti ufɔkemana kiet, ekotde Alma, emi nwed Abasi owutde nte idiɔk unana andinim ke akpanikɔ.2 Enye ekedi ɔfiɔk-nkpɔ ye owo ntabi-inua, adade abiaŋa man ekpek mbon efen ete etiene enye. Ke mkpaidem, angel kiet ama ɔbiɔŋɔre ɔnɔ Alma ye mme ufan esie. Alma ama ɔduɔ ke isɔŋ ndien okop ata mmemidem ekesim nte ekemende enye eka ufɔk ete esie. Enye ama odu ke ndaha unana-edidiɔŋɔ idem ke usen ita.3 Edikem, enye anam-anwaŋa ete kini enye ebietde nte idiɔŋɔke-idem kiso mbon owo emi ekedude do, esit esie okosuk ɔfɔfiɔk nkpɔ ke nte ukpɔŋ esie ɔfuhɔde, ekere abaŋa uwem esie emi mikinamke ibet Abasi. Enye emen esit esie owut nte “anuahade oto ke editi ediwak idiɔknkpɔ [esie]“4 onyuŋ “ɔfuhɔ ye nsinsi ndutuhɔ.”5
Ke unana idorenyin esie, enye edi-ti nte ekekpepde enye kini uyen esie ebaŋa “edidi eke Jesus Christ kiet, Eyen Abasi, man osio-isop ɔnɔ idiɔknkpɔ ererimbot.”6 Adiana-do enye editiŋ ata enyenyik udim-ikɔ emi ete: “Nte esit mi ediyirede ke ekikere emi, ami nditua ke esit mi nte: O Jesus, afo Eyen Abasi, nnyene mbɔm baŋa mi.”7 Nte enye ediyomde edisana odudu eke Andinyaŋa, utibe-nkpɔ kiet ama etibe: Enye ete, “Kini ami nkerede emi, enye ete, “Ami ntighe mme ubiak mi aba.”8 Ke ndo-ndo enye okop emem ye unwana. Enye eketiŋ ete ke, “Iduhe nkpɔ [eke] nehede eye onyuŋ enem nte idara mi”9 .
Alma “ama eyire omum” akpanikɔ abaŋade Jesus Christ akama. Edieke nnyin idade mme ikɔ oro ama omum eyire ke ata idem nnyin, nnyin ikpetiŋ ete, “Enye ama eyire omum usuŋ-ɔkɔ ke nte enye ɔkɔduɔde,” ɔwɔrɔde ke enye edisɔp anyan-ubɔk ndien ɔsɔŋɔ omum nkpɔ emi ekewukde esin ke ɔsɔŋɔ itiat-idak-isɔŋ.
Ke eke Alma, ekedi esit esie okoyom onyuŋ ɔsɔŋɔ omum akpanikɔ emi abaŋade uwa ufak Jesus Christ akama. Anande nkpɔ ke mbuɔtidem eke akpanikɔ oro, ye ke odudu ye mfɔn Abasi, ema enyaŋa enye esio ke unana-idorenyin ndien ediyɔhɔ enye ye idorenyin.
Kini ifiɔk-ukpep nnyin midibietke nte eke Alma, mmɔ enehede enyene nsinsi ufɔn. Esit nnyin nko ama “eyire ke ekikere emi” eke Jesus Christ ye mbɔm uwa Esie, ndien ukpɔŋ nnyin ama okop unwana ye idara emi eketienede.
Ndinyene Ekikere abaŋade Jesus Christ
Ebeŋe mi kini Easter edi ke nnyin iyenehede isin esit, isɔŋɔ, inyuŋ imum ekikere andikan ekikere efen emi kabaŋa Jesus Christ isin ke ntotuŋɔ ukpɔŋ nnyin,10 ndiyak enye odu ofuri ini ke esit nnyin, ekpeme nnyin ke se ikerede inyuŋ inamde, man aka-iso ada inem idara eke ima Andinyaŋa edi.11
Ndiyɔhɔ esit nnyin ye odudu Jesus Christ iwɔrɔke ite ke Enye edi nkokure ekikere emi nnyin inyenede. Edi nte oro ɔwɔrɔ ke ofuri ekikere nnyin ediyɔhɔ ke ima Esie, uwem Esie ye ukpepnkpɔ Esie, ye ke uwa ufak ye Eriset Esie. Akananam Jesus iduhe ke inuk emi efrede-ŋkpɔ-ebaŋa, koro ekikere nnyin kabaŋa Enye osuk ododu ke kpukpru ini ndien “kpukpru se idudde ke idem [nnyin etoro] enye!”12 Nnyin ibɔŋ-akam inyuŋ ifiak-itiŋ ke esit nnyin mme ifiɔk-ukpep emi akadade nnyin ekpere Enye. Nnyin imidara ida isin ke esit nnyin mme nsasana mbiet, ndisana nwed Abasi, ye nti-inem ikwɔ man otim osuhɔre ediwak ekikere kusen-kusen emi esibede oduk anana-nduɔk odudu uwem nnyin. Ima emi nnyin inyenede inɔ Enye idisioho nnyin ke mbɔm ye mfuhɔ uwem isɔŋ ifep, edi oro eyeyak nnyin isaŋa ibe mme afanikɔŋ ye ɔsɔŋɔ emi akande eke idem nnyin.
Jesus, ke nditim nkere mbaŋa fi
Ye inemesit ɔyɔhɔde ikpan-esit mi;
Edi eyenehede enem ke ndikut iso fo
Nyuŋ mbɔ nduɔk-odudu kiso fo.13
Ti, ke afo edi eyen spirit eke Ete Heaven. Nte Apostle Paul akanamde anwaŋa ete, “nnyin idi nditɔ Abasi.”14 Afo ama oduŋ ye idiɔŋɔ eke idem fo ke anyan ini mbemiso edidi ke isɔŋ. Ete nnyin akanam nsana-mma uduak ɔnɔ nnyin man idi ke isɔŋ, idikpep, inyuŋ ifiak-inyɔŋ itiene Enye. Enye ɔkɔnɔ Edima Eyen Esie man otode ke odudu eke anan-adaŋa Erisio-isop ye Eriset Esie, nnyin ikpedu uwem ibe udi, ndien ke nte nnyin inyimede edinyene mbuɔtidem ke Enye nnyuŋ nkabare-esit ke idiɔknkpɔ nnyin,15 eyefen-enɔ nnyin ndien ibɔ idorenyin nsinsi uwem.16
Edinɔ Esit ye Spirit Nnyin Ata Akpan Ntiŋ-enyin
Ke uwem isɔŋ emi, esit ye spirit nnyin oyom ata akpan ntiŋe-nyin.17 Esit nnyin enyime nnyin idu uwem, imek, inyuŋ idiɔŋɔ eti ye idiɔk.18 Spirit nnyin esibɔ ɔsɔŋɔ ntiense ete ke Abasi edi Ete nnyin, ke Jesus Christ edi Eyen Abasi, ndien ke ukpepnkpɔ Mmɔ edi ndausuŋ esim inemesit mi ye nsinsi uwem ekebede udi.
Esit Alma ama eyire omum ekikere emi abaŋa Jesus Christ. Oro ama ɔkpuhɔ uwem esie. Akwa mbono edi ini ndifiɔk se Abasi ediyomde ete nnyin inam inyuŋ ikabare-idi. Oro nko edi ini ndifiak nkere-mbaŋa nkɔri nnyin. Nte ubiɔŋ-utom mi adade asaŋa ke ofuri ererimbot, ami mmokut ɔsɔŋɔ nkɔri ŋkpɔ-Abasi ke uwem ndinen, nsinifik eke mbon Ufɔk Abasi.
Isua ition emi ekebede, ekebup nnyin ete inim Andinyaŋa nte akpan-nkpɔ ke kpukpru se nnyin inamde ke edikot ata enyiŋ eke Ufɔk Abasi Jesus Christ eke mme Latter-day Saints.19 Nnyin imitiŋ awak ibaŋa enyiŋ Esie ke ata akpanikɔ.
Isua inaŋ emi ekebede, ke edisuhɔre ini esop udia-ɔbɔŋ nnyin, nnyin imikɔri ke editiŋ-enyin ke edibuana ke udia-ɔbɔŋ Christ. Nnyin imikere awak ibaŋa Jesus Christ inyuŋ isin idem ke enwɔŋɔ nnyin man iti Enye kpukpru ini.20
Diana ye edidu-ikpɔŋ eke idiɔk-udɔŋɔ eke ofuri ererimbot ye unwam eke Edi, Etiene Mi, mme ukpepnkpɔ Andinyaŋa akabare awak ke ufɔkiduŋ nnyin, anwamde nnyin ndituak-ibuot nnɔ Andinyaŋa ke udua oro.
Ke nditiene item President Russell M. Nelson man “ikop uyo Esie,”21 nnyin iminam ukeme nnyin ɔfɔn man idiɔŋɔ suŋ-suŋ uyo eke Edisana Spirit inyuŋ ikut ubɔk Abasi ke uwem nnyin.
Diana ye edisian ye edikure ediwak temple, nnyin imidiwak ediduk ufɔk Jehovah inyuŋ ibɔ mme edidiɔŋ emi Enye ɔkɔŋwɔŋɔde ndinɔ. Nnyin imikop ɔsɔŋɔ ata uyai eke Andinyaŋa ye Andifak nnyin.
President Nelson ete: “Iduhe nkpɔ emi ememde mme emi edide iwiwa ke ndidi utɔ enyene odudu [mbet oro]. Ekikere nnyin ana owuk ese Andinyaŋa ye ikɔ Abasi Esie. Osɔŋ eti eti edidomo nwuk enyin nse Enye ke ofuri ekikere.”22
Ke nnyin edi-se Jesus Christ, iyekut ofuri nkpɔ efen—ekedude ekpere nnyin kini isuk idude ke uwem—ke enyin ima emi nnyin inyenede inɔ Enye. Mme nkpɔ eke minyeneke ufɔn eyekure, ndien nnyin isio mme nkpɔ eke misaŋake ye unwana ye ido Esie ifep. Nte mbufo ekade-iso ke edinehede mum ekikere emi abaŋade Jesus Christ nkama, ebuɔt-idem ye Enye, enyuŋ enim ibet Esie, ami ŋwɔŋɔke ndausuŋ eke heaven kpɔt nnɔ mbufo edi ŋwɔŋɔ odudu heaven—odudu emi adade ɔsɔŋɔ ɔsɔk ediomi mbufo, adade emem ɔsɔk afanikɔŋ mbufo, ye idara ɔsɔk edidiɔŋ mbufo.
Nditi Jesus Christ
Esisit udua emi ekebede, ami ye Kathy ima ikise ufɔkiduŋ eke Matt ye Sarah Johnson. Ndise ediye ufɔkemana mmɔ odu ke mbibene, ediye ndise eke Andinyaŋa, ye idiɔŋɔ eke temple.
Nditɔ iban mmɔ inaŋ, Mandy, Ruby, Claire, ye June, enem-esit etiŋ ebaŋa nte mmɔ emade eka mmɔ.
Ebede isua kiet Sarah esinim ini ke ofuri usen Saturday ɔnɔ ufɔkemana oro edika temple ɔtɔkiet man otodo nkaiferi iban oro ekeme edibuana ke mme baptism nnɔ mbon ufɔkemana emi ema ekekpa.
Ke November eke isua ekebede, Sarah ama enim ini ɔnɔ ufɔkemana edika temple ke akpatre udua ke December ke Thursday osio Saturday efep. Enye ɔdɔhɔ Matt ete, “Ami mmenim ke afo ɔmɔyuhɔ ye ekikere oro.”
Ema ekut udɔŋɔ cancer ke idem Sarah, edi mme dɔkta edikere ke enye eyedu uwem ekpere isua iba mme ita efen. Kini esop udia-ɔbɔŋ kiet, Sarah ama abuana ɔsɔŋɔ ikɔ ntiense esie, ete ke nkpɔ se ediwɔrɔde inɔ enye, imɔ imima Andinyaŋa ke ofuri esit esie ndien ke “Enye ama ebebem-iso enyene edikan.” Nte December ekperede, ke mibekke-enyin nsɔŋidem eke Sarah ɔtɔŋɔ edisuhɔde, ndien emen enye eka ufɔkibɔk. Ke ndaŋ-nsiere usenubɔk Thursday, December 29, enye suŋ-suŋ ama okure uwem isɔŋ esie. Matt okodu ye Sarah ke ofuri okoneyo oro.
Ye esit esie ndibuŋɔ, ye unana ɔsɔŋɔ ke idem ye ekikere, enye edisim ufɔkiduŋ, ofuhɔ ye nditɔ iban esie. Nte Matt esede phone esie, enye edikut nkpɔ-editi eke Thursday emi misinimke ini eke Sarah akanamde ɔnɔ usen oro ɔnɔ edika temple. Matt ete, “Akpa ini ami nkokutde oro, ami ndikere ete, Emi ikemeke ndida itie.”
Edi ekem esit Matt ama ediyere ke ekikere emi ete: Andinyaŋa odu uwem. Iduhe ebiet emi nnyin ikpidude nte ufɔkemana akan ke edisana ufɔk Esie.”
Matt, Maddy, Ruby, Claire, ye June ema ekesim temple kabaŋa edika emi Sarah ekenimde ɔnɔ mmɔ. Ye mmɔŋeyet edisuhɔre ke mfuk esie, Matt ama anam baptism oro ye nditɔ iban esie. Mmɔ ema enehede ekop ima ye nsinsi ediyire ye Sarah, ndien mmɔ ema ekop akwa ima ye ndɔŋesit emem eke Andinyaŋa. Maat editiŋ ete, “Kini ami nkopde ata mfuhɔ ye iduɔesit, ami ndisioro mkpo-idara, ke mfiɔkde inem uduak erinyanŋa-ukpɔŋ eke Ete mi.”
Ke ini Easter emi, ami mmokut ɔyɔhɔ ye ata akpanikɔ eke anana-mbiet uwa ufak eke Amdinyaŋa ye enyene-ubɔŋ Eriset Esie. Nte esit mbufo ɔsɔŋɔke nsinsi eyire ke ekikere abaŋade Jesus Christ, ndien nte mbufo ekade-iso enehede esin uwem mbufo ɔyɔhɔ ke Andinyaŋa, ami ŋwɔŋɔ ke mbufo eyekop idorenyin, emem, ye ima Esie. Ke enying Jesus Christ, amen.