शान्तिका राजकुमारका अनुयायीहरू
जब हामी मुक्तिदाताका जस्तै विशेषताहरू विकास गर्न प्रयास गर्छौँ, हामी संसारमा उहाँको शान्तिको साधन बन्न सक्छौँ ।
जकरियालाई दिइएको भविष्यवाणीको परिपूर्तिमा,१ येशू विजयी भई गधामा सवार भई पवित्र शहरमा प्रवेश गर्नुभयो, जसलाई साहित्यमा “यहूदी राजपरिवारको प्राचीन प्रतीक” मानिन्छ,२ वास्तवमा राजाहरूका राजा र शान्तिका राजकुमारको रूपमा उपयुक्त थियो ।३ उहाँलाई धेरै हर्षित चेलाहरूले घेरेका थिए जसले आफ्नो लुगाहरू, खजूरका पातहरू र अन्य पातहरू येशूको बाटोमा फैलाएका थिए । तिनीहरूले ठूलो स्वरमा यसो भन्दै परमेश्वरको प्रशंसा गरे, “परमप्रभुको नाममा आउनुहुने राजालाई धन्य होस्: स्वर्गमा शान्ति र सर्वोच्चमा महिमा ।”४ अनि पुनः, “होसन्ना दाउदका पुत्रलाई: धन्य हो उहाँ जो परमप्रभुको नाममा आउनुहुन्छ; सर्वोच्चमा होसन्ना ।”५ यो राजसी घटना, जुन हामी पाम आइतबार भनेर चिनिने यस दिनमा मनाउँछौँ, मुक्तिदाताको निःस्वार्थ बलिदान र खाली चिहानको भव्य चमत्कारमा परिणत हुने त्यो भाग्यशाली हप्तामा हुने कष्टप्रद घटनाहरूको आनन्ददायी प्रस्तावना थियो ।
उहाँका अनुयायीहरूको रूपमा, हामी उहाँका विशिष्ट जनहरू हौँ,६ उहाँका सद्गुणहरूको घोषणा गर्न बोलावट गरिएका, उहाँ र उहाँको प्रायश्चितको बलिदानद्वारा उदारतापूर्वक प्रस्तुत गरिएको शान्तिको प्रवर्द्धकहरू । यो शान्ति सबैलाई प्रतिज्ञा गरिएको उपहार हो जसले आफ्नो हृदय मुक्तिदातातर्फ फर्काउँछन् र धार्मिक रूपमा जीवन यापन गर्दछन्; यस्तो शान्तिले हामीलाई नश्वर जीवनको आनन्द लिने शक्ति दिन्छ र हामीलाई हाम्रो यात्राको पीडादायी परीक्षाहरू सहन सक्षम बनाउँछ ।
१८४७ मा, परमप्रभुले अग्रगामी सन्तहरूलाई विशेष निर्देशन दिनुभयो जसलाई शान्त र एकताबद्ध रहनका लागि शान्ति चाहिन्थ्यो किनकि तिनीहरूले पश्चिमतर्फको यात्रामा अप्रत्याशित कठिनाइहरूको सामना गरेका थिए । अन्य विषयहरू मध्ये, परमप्रभुले सन्तहरूलाई “एक अर्कासँग झगडा गर्न बन्द गर्न; एकअर्कालाई नराम्रो बोल्न बन्द गर्न ” निर्देशन दिनुभयो ।७ धर्मशास्त्रले प्रमाणित गर्दछ कि धार्मिकताका कार्यहरू गर्ने र परमप्रभुको आत्माको विनम्रतामा हिंड्ने प्रयास गर्नेहरूलाई उनीहरूले आज हामी जिइरहेका अशान्तिका दिनहरूबाट बच्न आवश्यक शान्तिको प्रतिज्ञा गरिएको छ ।८
शान्तिका राजकुमारका शिष्यहरूका रूपमा, हामीलाई “एकता र एकअर्काप्रतिको प्रेममा एकसाथ बाँधिएका हृदयहरूसँग” जिउन निर्देशन दिइएको छ ।९ हाम्रा प्रिय अगमवक्ता, अध्यक्ष रसल एम. नेल्सनले भर्खरै भन्नुभएको छ, “विवादले मुक्तिदाता खडा हुनुभएका र उहाँले सिकाउनुभएका सबै विषयको उल्लङ्घन गर्दछ ।”१० हाम्रा अगमवक्ताले हाम्रो हृदयहरूमा र हाम्रो जीवनमा अहिले व्याप्त व्यक्तिगत द्वन्द्वहरू अन्त्य गर्न हामी सक्दो प्रयास गर्छौं भनेर पनि बिन्ती गर्नुभयो ।१२
हाम्रा लागि ख्रीष्टको विशुद्ध प्रेमको दृष्टिमा र हामी उहाँका अनुयायीहरूको रूपमा हामीले एकअर्काका लागि प्राप्त गर्न खोज्ने यी सिद्धान्तहरूलाई विचार गरौँ । धर्मशास्त्रहरूले यस प्रकारको प्रेमलाई करूणाका रूपमा परिभाषित गर्दछन् ।१२ जब हामी करूणाका सम्बन्धमा सोच्छौँ, हाम्रो मस्तिष्क शारीरिक, भौतिक वा संवेगात्मक कठिनाइहरूको अनुभव गरिरहेकाहरूको पीडालाई कम गर्न उदार कार्यहरू र दानहरू तर्फ फर्कन्छ । अझै पनि, करूणा हामीले कसैलाई दान गर्ने विषयसँग मात्रै सम्बन्धित छैन तर यो मुक्तिदाताको विशेषता हो र हाम्रो चरित्रको अंश बन्न सक्छ । यो आश्चर्यजनक विषय होइन कि परमप्रभुले हामीलाई आफू स्वयंलाई करूणाको बन्धनको वस्त्र लगाउन निर्देशन दिनुभयो, “जुन परिपूर्णता र शान्तिको बन्धन हो ।”१३ करूणा बिना, हामी केही पनि होइनौँ,१४ र हामी हाम्रो स्वर्गका पिताको महलमा परमप्रभुले हाम्रा लागि तयार पार्नुभएको स्थानको उत्तराधिकारी हुन सक्दैनौँ ।१५
येशूले परिपूर्णता र शान्तिको यस बन्धनको स्वामित्वको अर्थ के हो भनेर, विशेष गरी जब उहाँको शहीद हुनु अघिका पीडादायी घटनाहरूको सामना गर्दै पूर्ण रूपमा उदाहरण दिनुभयो । उहाँले तिनीहरूमध्ये एक जनाले उहाँलाई त्यही रात धोका दिने छ भनेर थाहा हुँदा पनि येशूले विनम्रतापूर्वक आफ्ना शिष्यहरूकाखुट्टा धुनुहुँदा के महसुस गर्नुभएको हुनुपर्छ भनेर एक क्षणका लागि सोच्नुहोस् ।१६ अथवा जब येशूले घन्टौँ पछि, उहाँलाई पक्रन उहाँको विश्वासघाती यहूदालाई साथ दिने मानिसहरूमध्ये एकको कानलाई दयालुपूर्वक निको पार्नुभयो ।१७ अथवा पिलातसका अगाडि उभिएका मुक्तिदातालाई मुख्य पुजारीहरू र एल्डरहरूद्वारा अनुचित रूपमा आरोप लगाइएका बेला समेत र उहाँमाथि लगाइएका झूटा आरोपहरूको विरूद्धमा उहाँले एक शब्द पनि बोल्नुभएन र उहाँले रोमी राज्यपाललाई अचम्म मानेर छोड्नुभयो ।१८
यी तीन दुःखद घटनाहरूद्वारा, मुक्तिदाता, अत्यधिक दुःख र तनावको बोझले दबिएको हुनुभएता पनि, उहाँको उदाहरणद्वारा हामीलाई सिकाउनुभयो कि “करुणाले लामो समयसम्म कष्ट भोग्छ, र दयालु हुन्छ; … ईर्ष्या गर्दैन; … आफैलाई घमन्ड गर्दैन, घमण्ड गर्दैन, आफैँलाई असभ्य व्यवहार गर्दैन, आफ्नो खोजी गर्दैन, सजिलै उत्तेजित हुँदैन, [र] कुनै खराब सोच्दैन ।”१९
जोड दिनु पर्ने अर्को महत्त्वपूर्ण पक्ष अनि हाम्रो शिष्यत्वमा प्रत्यक्ष प्रभाव पार्ने र हामीले मुक्तिदाताको शान्तिलाई कसरी प्रवर्द्धन गर्छौं भन्ने बिषय हामीले एकअर्कालाई व्यवहार गर्ने तरिका हो । उहाँको सांसारिक सेवाका क्रममा, मुक्तिदाताका शिक्षाहरूले प्रेमका गुणहरू, परोपकार, धीरता, विनम्रता र करूणामा ध्यान केन्द्रित मात्र होइन, तर विशेष ध्यान केन्द्रित गर्यो—उहाँसँग नजिक हुन र उहाँको शान्तिलाई प्रवर्द्धन गर्न चाहनेहरूका लागि आधारभूत विशेषताहरू । त्यस्ता गुणहरू परमेश्वरका उपहारहरू हुन् र हामीले तिनीहरूलाई विकास गर्ने प्रयास गर्दा हामी हाम्रा छिमेकीहरूको भिन्नता र कमजोरीहरूलाई थप सहानुभूति, संवेदनशीलता, आदर र सहिष्णुताका साथ हेर्न सुरू गर्छौँ । हामी मुक्तिदाताको नजिक आउँदैछौँ र उहाँ जस्तै बनिरहेका छौँ भन्ने सबैभन्दा स्पष्ट सङ्केतहरू मध्येको एक सङ्केत मायालु, धैर्य र दयालु तरिका हो जुन हामीले जुनसुकै परिस्थितिमा हाम्रा सहयात्रीहरूसँग व्यवहार गर्छौं ।
हामी प्रायः मानिसहरूलाई देख्छौँ जो देखिएका विशेषताहरू, कमजोरीहरू र अरूको विचारहरूको बारेमा नकारात्मक र अपमानजनक टिप्पणीहरूमा संलग्न हुन्छन्, मुख्यतया जब त्यस्ता विशेषताहरू र विचारहरू फरक हुन्छन् वा तिनीहरूले व्यवहार गरेका र सोचेका कुराहरू उल्टो हुन्छ । यी व्यक्तिहरूले अरूहरूलाई त्यस्ता टिप्पणीहरू गरेको देख्नु अति नै सामान्य हो जसले परिस्थितिको वरपरका सबै अवस्थाहरूको सत्य जानकारी नभई आफूले सुनेको विषयलाई दोहोर्याउँछन् । दुर्भाग्यवश, सामाजिक सञ्जालले सापेक्ष सत्य र पारदर्शिताका नाममा यस्तो व्यवहारलाई प्रोत्साहन दिन्छ । संयम बिना, डिजिटल वार्तालापले प्राय मानिसहरूलाई व्यक्तिगत आक्रमण र आक्रोशपूर्ण विवादहरू, निराशा सिर्जना गर्ने, हृदयमा चोट पुर्याउने, र ज्वलन्त शत्रुता तिर दोहोर्याउँछ ।
नफीले अगमवाणी गरे कि पछिल्ला दिनहरूमा, शत्रु क्रोधित हुने छन् र मानिसहरूलाई असल विषयहरूका विरुद्धमा रिस उठाउन उत्प्रेरित गर्ने छन् ।२० धर्मशास्त्रहरूले सिकाउँछन् कि “असल गर्न, परमेश्वरलाई प्रेम गर्न र उहाँको सेवा गर्न आमन्त्रण र प्रोत्साहन गर्ने हरेक विषय परमेश्वरबाट प्रेरित भएको हो ।”२१ अर्कोतर्फ, “जे खराब छ त्यो शैतानबाट आउँछ; किनकि शैतान परमेश्वरको शत्रु हो र उहाँका विरुद्धमा निरन्तर लड्छ र पाप गर्न र निरन्तर त्यो गर्न आमन्त्रण र प्रलोभन गर्छ जुन खराब छ ।”२२
यस अगमवाणीसूचक शिक्षालाई मनन गर्दा, यो कुनै आश्चर्यजनक विषय होइन कि विरोधीको एक रणनीति भनेको परमेश्वरका सन्ततिहरूको हृदयमा शत्रुता र घृणा जगाउनु हो । मानिसहरूले एकअर्काको आलोचना, उपहास र निन्दा गरेको देख्दा ऊ रमाउँछ । यो व्यवहारले व्यक्तिको चरित्र, प्रतिष्ठा र आत्मसम्मानलाई नष्ट गर्न सक्छ, विशेष गरी जब त्यो व्यक्तिलाई अनुचित रूपमा न्याय गरिन्छ । हामीले हाम्रो जीवनमा यस प्रकारको मनोवृत्तिलाई अनुमति दिँदा, शत्रुलाई हाम्रो बीचमा कलहको बीउ रोप्नका लागि हाम्रो हृदयमा स्थान बनाउन अनुमति दिन्छौँ, उसको भोको पासोमा फस्ने जोखिममा रहेको औंल्याउन यो महत्त्वपूर्ण छ ।
यदि हामी हाम्रा विचारहरू, शब्दहरू र कार्यहरूमा होसियार छैनौँ भने, हामी शत्रुका धूर्त चालहरूमा फसेर, हाम्रो वरपरका मानिसहरू र हाम्रा प्रियजनहरूसँगको हाम्रो सम्बन्धलाई नष्ट गर्न सक्छौँ ।
दाजुभाइ तथा दिदीबहिनीहरू, परमप्रभुका विशिष्ट मानिसहरू र उहाँको शान्तिका प्रवर्द्धकहरूका रूपमा, हामी दुष्टका यी चालहरूलाई हाम्रो हृदयमा स्थान लिन दिन सक्दैनौँ । हामीले भावना, सम्बन्ध र जीवनलाई समेत नष्ट गर्ने यस्तो हानिकारक बोझ बहन गर्न सक्दैनौँ । सुसमाचारले महान् प्रसन्नताको शुभ सन्देशलाई प्रतिनिधित्व गर्छ ।
अवश्य पनि, हामी मध्ये कोही पनि परिपूर्ण छैनौँ र निश्चय नै, कहिलेकाहीँ हामी यस प्रकारका व्यवहारमा फस्छौँ । उहाँको पूर्ण प्रेम र हाम्रो मानव प्रवृत्तिको सर्वज्ञ ज्ञानमा, मुक्तिदाताले हामीलाई सदैव यस्ता खतराहरूबाट चेतावनी दिन प्रयास गर्नुहुन्छ । उहाँले हामीलाई सिकाउनुभयो, “किनकि तिमीहरूले जुन न्यायले मुल्याङ्कन गर्छौ, तिमीहरूलाई त्यसैले मुल्याङ्कन गरिने छ; र जुन मापदण्डले तिमीहरूले नाप्दछौ, त्यसैले तिमीहरूमा पुनः नापिने छ ।”२३
मेरा प्यारा दाजुभाइ तथा दिदीबहिनीहरू, हामीहरूले मुक्तिदाताका जस्ता गुणहरू विकास गर्ने प्रयास गर्दा, उहाँ स्वयंले स्थापना गर्नुभएको नमूना अनुसार हामी संसारमा उहाँको शान्तिको साधन बन्न सक्छौँ । म तपाईंहरूलाई उत्थान र सहयोगी मानिसहरूमा रूपान्तरण गर्न सक्ने तरिकाहरू विचार गर्न आमन्त्रण गर्दछु, समझदार र क्षमाशील हृदय भएका व्यक्तिहरू, अरूहरूमा उत्कृष्ट खोज्ने मानिसहरू, सदैव त्यसलाई सम्झिएर “यदि त्यहाँ केही सद्गुण, प्रेम वा असल वा प्रशंसनीय छ भने , हामी यी विषयहरू खोज्छौँ ।”२४
म तपाईंहरूलाई प्रतिज्ञा गर्दछु कि हामीले यी विशेषताहरू अनुशरण र विकास गर्दा, हामी हाम्रा मित्रजनहरूका आवश्यकताहरूप्रति थप सौहार्दपूर्ण र संवेदनशील हुने छौँ२५ र आनन्द, शान्ति र आत्मिक वृद्धिको अनुभव गर्ने छौँ ।२६ नि:सन्देह, परमप्रभुले हाम्रा प्रयासहरूलाई मान्यता दिनु हुने छ र हामीलाई एकअर्काको भिन्नता, कमजोरी र अपूर्णताहरूसँग अझै बढी सहनशील र धैर्यवान हुन आवश्यक उपहारहरू दिनु हुने छ । यस भन्दा बढी, हामीलाई चोट पुर्याउनेहरूलाई अपमान गर्ने वा अपमान गर्ने आग्रहलाई हामी अझै राम्ररी प्रतिरोध गर्न सक्षम हुने छौँ । मुक्तिदाताले गर्नुभएको जस्तै, हामीलाई दुर्व्यवहार गर्ने वा हाम्रा सम्बन्धमा नराम्रो बोल्नेहरूलाई क्षमा गर्ने हाम्रो चाहना निश्चय नै बढ्ने छ र हाम्रो चरित्रको अंश बन्ने छ।
आजको यो पाम आइतबारमा हामी यो आउँदै गरेको आइतबार खाली चिहानको चमत्कार उत्सवको तयारी गरिरहँदा शान्तिका राजकुमारको पदचिन्हमा हिंड्दै हाम्रो प्रेमको कपाडा र परोपकारका खजूरका पातहरू फैलाउन सकौँ । ख्रीष्टमा दाजुभाइ र दिदीबहिनीहरूका रूपमा, हामी खुशीसाथ घोषणा गरौँ, “दाउदका पुत्रलाई होसन्ना: धन्य उहाँ जो परमप्रभुको नाममा आउनुहुन्छ; सर्वोच्चमा होसन्ना ।”२७
म गवाही दिन्छु कि येशू ख्रीष्ट जीवित हुनुहुन्छ र उहाँको प्रायश्चितको बलिदानद्वारा व्यक्त गरिएको उहाँको परिपूर्ण प्रेम, यस संसारमा अनि आगामी संसारमा उहाँसँगै हिँड्न र उहाँको शान्तिको आनन्द लिन चाहने सबैलाई विस्तार गरिएको छ । म यी विषयहरू मुक्तिदाता र उद्धारकर्ता येशू ख्रीष्टको पवित्र नाममा भन्छु, आमीन ।