ត្រូវការអ្នកដែលផ្សះផ្សាគេ
បងប្អូនមានសិទ្ធិជ្រើសរើសដើម្បីរើសយកការទាស់ទែងគ្នា ឬការផ្សះផ្សាគ្នា ។ ខ្ញុំសូមជំរុញទឹកចិត្តបងប្អូនឲ្យ ជ្រើសរើសធ្វើជាអ្នកដែលផ្សះផ្សាគេ នៅពេលឥឡូវនេះ និងជានិច្ចតទៅ ។
បងប្អូនប្រុសស្រីជាទីស្រឡាញ់ ខ្ញុំមានអំណរដែលមានវត្តមាននៅជាមួយបងប្អូន ។ អំឡុងពេលប្រាំមួយខែកន្លងមកនេះ ខ្ញុំគិតដល់បងប្អូន និងអធិស្ឋានសម្រាប់បងប្អូនឥតឈប់ឈរ ។ ខ្ញុំអធិស្ឋានថា ព្រះវិញ្ញាណបរិសុទ្ធនឹងប្រាប់អ្វីដែលព្រះអម្ចាស់ចង់ឲ្យបងប្អូនស្តាប់ នៅពេលខ្ញុំនិយាយទៅកាន់បងប្អូនឥឡូវនេះ ។
អំឡុងពេលខ្ញុំចុះកម្មសិក្សាផ្នែកវះកាត់ជាច្រើនឆ្នាំកន្លងទៅ ខ្ញុំបានជួយដល់គ្រូពេទ្យវះកាត់ម្នាក់ ដែលកំពុងកាត់ជើងដំបៅរលួយឆ្លងមេរោគយ៉ាងខ្លាំងមួយ។ ការវះកាត់នោះពិបាកណាស់ ។ ហើយអ្វីដែលតានតឹងជាងនោះគឺ សមាជិកក្រុមម្នាក់ពុំបំពេញភារកិច្ចបានល្អ ហើយគ្រូពេទ្យវះកាត់នោះក៏បានផ្ទុះកំហឹង ។ កាលគាត់ខឹងខ្លាំង គាត់បានបោះចោលកាំបិតវះកាត់គាត់ ដែលមានសុទ្ធតែមេរោគ ។ វាមកប៉ះចំកំភួនដៃ របស់ខ្ញុំ !
គ្រប់គ្នាក្នុងបន្ទប់វះកាត់នោះ—ក្រៅពីគ្រូពេទ្យវះកាត់ឆេវឆាវនោះ—រន្ធត់ជាខ្លាំង ព្រោះតែទង្វើបំពានលើការអនុវត្តផ្នែកវះកាត់ដ៏គ្រោះថ្នាក់នេះ ។ សំណាងល្អ ខ្ញុំពុំឆ្លងមេរោគ ។ ប៉ុន្តែ បទពិសោធន៍នេះបានធ្វើឲ្យខ្ញុំចាំទុកយូរអង្វែង ។ នៅក្នុងម៉ោងនោះ ខ្ញុំបានសន្យានឹងខ្លួនឯងថា មិនថាមានអ្វី កើតឡើងក្នុងបន្ទប់វះកាត់ ខ្ញុំទេ ខ្ញុំនឹងមិន បាត់បង់ ការគ្រប់គ្រងអារម្មណ៍ខ្ញុំឡើយ ។ ខ្ញុំក៏បានសច្ចានៅថ្ងៃនោះថា ខ្ញុំនឹងមិនបោះអ្វីទាំងអស់ ពេលកំពុងមានកំហឹងឡើយ—មិនថាវាជាកាំបិតវះកាត់ ឬពាក្យសម្ដីនោះទេ ។
សូម្បីតែឥឡូវ ប៉ុន្មានទសវត្សរ៍ក្រោយមកនេះ ខ្ញុំនៅតែឆ្ងល់ក្នុងខ្លួនឯងថា តើកាំបិតមេរោគ ដែលបានប៉ះត្រូវដៃខ្ញុំនោះ ពិសពុលខ្លាំងជាងការឈ្លោះប្រកែកដ៏សាហាវ ដែលឆ្លងរាលពេញក្នុងការសន្ទនាជាសាធារណៈរបស់យើង និងទំនាក់ទំនងផ្ទាល់ខ្លួនដ៏ច្រើននៅសព្វថ្ងៃនេះឬអី ។ ការចេះគួរសម និងសុជីវធម៌ហាក់ដូចជាបានបាត់ខ្លួន ពីក្នុងយុគសម័យដ៏បែកខ្ញែក និងការខ្វែងគំនិតគ្នាដ៏ខ្លាំងនេះហើយ ។
ភាពឆ្មើងឆ្មៃ ការចាប់កំហុសគ្នា និងការនិយាយអាក្រក់ពីអ្នកដទៃគឺជារឿងធម្មតាអស់ទៅហើយ ។ បណ្ឌិតជំនាញ អ្នកនយោបាយ អ្នកសម្ដែង និងអ្នកមានឥទ្ធិពលដទៃទៀតដ៏ច្រើនសន្ធឹក ប្រើពាក្យជេរប្រមាថឥតឈប់ឈរ ។ ខ្ញុំព្រួយបារម្ភយ៉ាងខ្លាំង ព្រោះមនុស្សជាច្រើនហាក់ដូចជាជឿថា ការថ្កោលទោស ការមួលបង្កាច់ និងការនិយាយអាក្រក់ពី នរណាម្នាក់ ដែលមិនយល់ស្របនឹងពួកគេ គឺជារឿងអាចទទួលយកបានទាំងស្រុង ។ មនុស្សជាច្រើនមើលទៅដូចជាចង់បំផ្លាញកេរ្តិ៍ឈ្មោះអ្នកដទៃដោយសម្ដីឥតគិត និងចាក់ដោតចិត្តគេខ្លាំង !
កំហឹងពុំដែលល្អទេ ។ ការបង្កសត្រូវពុំស្ថាបនានរណាម្នាក់ឲ្យល្អទេ ។ ការទាស់ទែងគ្នាពុំនាំឲ្យមានដំណោះស្រាយដ៏បំផុសគំនិតឡើយ ។ គួរឲ្យសោកស្តាយ ពេលខ្លះយើងឃើញឥរិយាបថទាស់ទែងគ្នាបែបនេះកើតមាន សូម្បីតែក្នុងចំណោមសមាជិកសាសនាចក្រយើង ។ ពួកយើងឮអំពីអ្នកដែលនិយាយបន្ទាបបន្ថោកស្វាមីភរិយា និងកូនៗនៃអស់អ្នកដែលប្រើកំហឹងគ្រប់គ្រងលើអ្នកដទៃ និងអ្នកដែលដាក់ទណ្ឌកម្មសមាជិកគ្រួសារដោយ « ការមិននិយាយរកគ្នា » ។ ពួកយើងឮអំពីយុវវ័យ និងកុមារដែលសម្លុតធ្វើបាបគេ និងនិយោជិតដែលបង្ខូចកេរ្តិ៍ឈ្មោះមិត្តរួមការងារ ។
បងប្អូនប្រុសស្រីជាទីស្រឡាញ់ រឿងទាំងអស់នេះមិនគួរកើតមានឡើយ ។ ក្នុងនាមជាសិស្សរបស់ព្រះយេស៊ូវគ្រីស្ទ យើងត្រូវធ្វើជាគំរូពីរបៀបប្រាស្រ័យទាក់ទងជាមួយអ្នកដទៃ—ជាពិសេស នៅពេលយើងមានទស្សនៈខុសគ្នា ។ វិធីដ៏ងាយបំផុតមួយដើម្បីស្គាល់ អ្នកដើរតាមដ៏ពិត របស់ព្រះយេស៊ូវគ្រីស្ទគឺ មើលថាតើបុគ្គលនោះប្រព្រឹត្តចំពោះមនុស្សដទៃដោយចិត្តអាណិតអាសូរប៉ុនណា ។
ព្រះអង្គសង្គ្រោះបានបញ្ជាក់ពីរឿងនេះយ៉ាងច្បាស់ នៅក្នុងទេសនកថារបស់ទ្រង់ទៅកាន់អ្នកដើរតាមដែលនៅអឌ្ឍគោលទាំងពីរ ។ ទ្រង់មានបានមានបន្ទូលថា « មានពរហើយអស់អ្នកដែលផ្សះផ្សាគេ » ។.១ « បើអ្នកណាទះកំផ្លៀងស្តាំនៃអ្នក នោះត្រូវតែបែរកំផ្លៀងម្ខាងទៅឲ្យទៀត » ។២ រួចហើយ ប្រាកដណាស់ ទ្រង់បានក្រើនរំឭកពួកយើងម្នាក់ៗ ឲ្យយើងចេះតាំងចិត្ត ៖ « ត្រូវស្រឡាញ់ពួកខ្មាំងសត្រូវ ត្រូវឲ្យពរដល់អ្នកណាដែលប្រទេចផ្តាសា ត្រូវប្រព្រឹត្តល្អនឹងអ្នកណាដែលស្អប់អ្នករាល់គ្នា ហើយត្រូវអធិស្ឋាន ឲ្យអ្នកណាដែលធ្វើទុក្ខបៀតបៀនដល់អ្នករាល់គ្នាវិញ » ។៣
មុនពេលទ្រង់សុគត ព្រះអង្គសង្គ្រោះបានត្រាស់បង្គាប់ឲ្យពួកសាវកដប់ពីរនាក់ស្រឡាញ់គ្នា ដូចជាទ្រង់បានស្រឡាញ់ពួកគេដែរ ។៤ ហើយបន្ទាប់មក ទ្រង់បានបន្ថែមថា « គេនឹងដឹងថា អ្នករាល់គ្នាជាសិស្សរបស់ខ្ញុំ ដោយសារសេចក្តីនេះឯង គឺដោយអ្នករាល់គ្នាមានសេចក្តីស្រឡាញ់ដល់គ្នាទៅវិញទៅមក » ។៥
សារលិខិតរបស់ព្រះអង្គសង្រ្គោះគឺច្បាស់ណាស់ ៖ សិស្ស ដ៏ពិត របស់ទ្រង់ស្ថាបនា លើកស្ទួយ លើកទឹកចិត្ត បញ្ចុះបញ្ចូល និងបំផុសគំនិត—មិនថាស្ថានភាពលំបាកប៉ុនណាទេ ។ សិស្សដ៏ពិតរបស់ព្រះយេស៊ូវគ្រីស្ទគឺជាអ្នកដែលផ្សះផ្សាគេ ។៦
ថ្ងៃនេះគឺជាថ្ងៃអាទិត្យធាងចាក ។ យើងកំពុងត្រៀមខ្លួនដើម្បីរំឭកដល់ព្រឹត្តិការណ៍ដ៏សំខាន់បំផុត ហើយដែលពុំធ្លាប់បានកត់ត្រានៅលើផែនដីនេះ ដែលជាដង្វាយធួន និងការមានព្រះជន្មរស់ឡើងវិញរបស់ព្រះអម្ចាស់ព្រះយេស៊ូវគ្រីស្ទ ។ វិធីដ៏ល្អបំផុតមួយដែលយើងអាចគោរពព្រះអង្គសង្គ្រោះ គឺការក្លាយជាអ្នកដែលផ្សះផ្សាគេ ។៧
ដង្វាយធួនរបស់ព្រះអង្គសង្រ្គោះបានធ្វើឲ្យយើងអាចយកឈ្នះលើអំពើអាក្រក់ ទាំងអស់ បាន—រួមទាំងការទាស់ទែងគ្នាផងដែរ ។ សូមយល់ឲ្យច្បាស់៖ ការទាស់ទែងគ្នា គឺជា រឿងអាក្រក់ ! ព្រះយេស៊ូវគ្រីស្ទបានប្រកាសថា អស់អ្នកណាដែលមាន « វិញ្ញាណនៃការទាស់ទែងគ្នា » គឺពុំមែនជារបស់ផងទ្រង់ទេ ប៉ុន្តែជា « របស់ផងអារក្សវិញ ដែលជាបិតានៃការទាស់ទែងគ្នា ហើយ [ អារក្សវា ] ចាក់រុកចិត្តមនុស្ស ឲ្យមានកំហឹងទាស់ទែងនឹងគ្នាទៅវិញទៅមក » ។៨ អ្នកញុះញុង់ឲ្យមានការទាស់ទែងគ្នាកំពុងតែធ្វើទង្វើដូចគ្នានឹងសាតាំងធ្វើដែរ មិនថាពួកគេដឹងខ្លួនឬអត់នោះទេ ។ « គ្មានអ្នកណាអាចនឹងបម្រើចៅហ្វាយពីរនាក់បានទេ » ។៩ យើងមិនអាចគាំទ្រសាតាំងដោយការវាយប្រហារជាពាក្យសម្តីរបស់យើង ហើយបន្ទាប់មកគិតថា យើងនៅតែអាចបម្រើព្រះបាននោះឡើយ ។
បងប្អូនប្រុសស្រីជាទីស្រឡាញ់របស់ខ្ញុំ របៀបដែលយើងប្រព្រឹត្តចំពោះគ្នាពិតជាសំខាន់ខ្លាំងណាស់ ! របៀបដែលយើងនិយាយចំពោះ និងអំពីអ្នកដទៃនៅផ្ទះ នៅព្រះវិហារ នៅកន្លែងធ្វើការ និងនៅតាមអនឡាញ គឺសំខាន់ខ្លាំងណាស់ ។ ថ្ងៃនេះ ខ្ញុំសុំឲ្យពួកយើងប្រាស្រ័យទាក់ទងនឹងអ្នកដទៃតាមរបៀបមួយដែលខ្ពស់ជាង និងបរិសុទ្ធជាងនេះ ។ សូមស្ដាប់ដោយយកចិត្តទុកដាក់ ។ « បើសិនជាមានអ្វីណាមួយ ដែលប្រកបដោយគុណធម៌ គួរស្រឡាញ់ ឬឈ្មោះល្អ ឬក៏គួរឲ្យសរសើរ »១០ ដែលយើងអាចនិយាយអំពីមនុស្សម្នាក់ទៀត—មិនថាចំពោះមុខ ឬពីក្រោយខ្នងគាត់នោះទេ—ការណ៍នោះគួរតែជាបទដ្ឋាននៃទំនាក់ទំនង របស់យើង ។
បើស្វាមីភរិយាមួយគូក្នុងវួដរបស់បងប្អូនលែងលះគ្នា ឬអ្នកផ្សព្វផ្សាយសាសនាវ័យក្មេងម្នាក់ត្រឡប់មកផ្ទះមុនកំណត់ ឬក្មេងជំទង់ម្នាក់សង្ស័យពីទីបន្ទាល់ខ្លួន នោះពួកគេមិនត្រូវការការវិនិច្ឆ័យរបស់បងប្អូនឡើយ ។ ពួកគេត្រូវការដកពិសោធន៍សេចក្ដីស្រឡាញ់ដ៏បរិសុទ្ធរបស់ព្រះយេស៊ូវគ្រីស្ទ ដែលឆ្លុះបញ្ចាំងតាមពាក្យសម្ដី និងសកម្មភាពរបស់បងប្អូនវិញ ។
បើមិត្តម្នាក់នៅលើបណ្ដាញសង្គមមានទស្សនៈនយោបាយ ឬទស្សនៈសង្គមមុតមាំខ្លាំង ដែលវាបំពានអ្វីដែលបងប្អូនជឿ ចម្លើយតបរបស់បងប្អូនទាំងខឹងសម្បារ នឹងមិនជួយអ្វីឡើយ ។ បងប្អូននឹងតម្រូវឲ្យបង្កើតទំនាក់ទំនងនៃការយោគយល់ ឲ្យកាន់តែច្រើន នោះហើយជាអ្វីដែលមិត្តរបស់បងប្អូនត្រូវការពិត ។
ការទាស់ទែងគ្នាបណ្ដេញព្រះវិញ្ញាណចេញ—គ្រប់ពេលទាំងអស់ ។ ការទាស់ទែងគ្នាពង្រឹងគំនិតដែលមិនពិត ថា ការប្រឈមមុខដាក់គ្នា គឺជាវិធីតែមួយគត់ដើម្បីដោះស្រាយភាពខុសគ្នា ប៉ុន្តែវាពុំដោះស្រាយបានទេ ។ ការទាស់ទែងគ្នាគឺជាជម្រើសមួយ ។ ការធ្វើជាអ្នកដែលផ្សះផ្សាគេគឺជាជម្រើសមួយ ។ បងប្អូនមានសិទ្ធិជ្រើសរើសដើម្បីរើសយកការទាស់ទែងគ្នា ឬការផ្សះផ្សាគ្នា ។ ខ្ញុំសូមជំរុញទឹកចិត្តបងប្អូនឲ្យ ជ្រើសរើស ធ្វើជាអ្នកដែលផ្សះផ្សាគេ នៅពេលឥឡូវនេះ និងជានិច្ចតទៅ ។១១
បងប្អូនប្រុសស្រី យើងពិតជាអាចផ្លាស់ប្ដូរពិភពលោកនេះបាន—មនុស្សម្ដងម្នាក់ៗ ការប្រាស្រ័យទាក់ទងម្ដងមួយៗ ។ ដោយរបៀបណាទៅ ? ដោយយកគំរូតាមរបៀបគ្រប់គ្រងភាពខុសគ្នានៃមតិដោយស្មោះត្រង់ ដោយគោរពគ្នាទៅវិញទៅមក និងសន្ទនាដោយថ្លៃថ្នូរ ។
ការមានទស្សនៈខុសគ្នាគឺជាផ្នែកមួយនៃជីវិត ។ ជារៀងរាល់ថ្ងៃ ខ្ញុំធ្វើការជាមួយអ្នកបម្រើដ៏លះបង់របស់ព្រះអម្ចាស់ ដែលមើលឃើញបញ្ហាមួយខុសៗគ្នាជានិច្ច ។ ពួកលោកដឹងថា ខ្ញុំចង់ឮគំនិត និងអារម្មណ៍ស្មោះត្រង់របស់ពួកលោក អំពីអ្វីៗដែលយើងពិភាក្សាគ្នា—ជាពិសេស បញ្ហាសំខាន់ៗ ។
ទីប្រឹក្សាដ៏ឧត្តមទាំងពីររូបរបស់ខ្ញុំ គឺប្រធាន ដាល្លិន អេក អូក និងប្រធាន ហិនរី ប៊ី អាវរិង គឺជាគំរូដ៏ល្អពីរបៀបដែលពួកលោកបង្ហាញអារម្មណ៍របស់ពួកលោក—ជាពិសេសពេលពួកលោកគិតខុសពីគ្នា ។ ពួកលោកធ្វើដោយសេចក្ដីស្រឡាញ់ដ៏សុទ្ធសាធចំពោះគ្នាទៅវិញទៅមក ។ មិនដែលនិយាយថា លោកដឹងច្បាស់ជាង អ៊ីចឹង លោកត្រូវតែការពារអំណះអំណាងឲ្យខ្លាំងនោះទេ ។ ក៏មិនដែលបង្ហាញថាត្រូវប្រកួតប្រជែងគ្នានោះដែរ ។ ដោយសារម្នាក់ៗមានពេញទៅដោយសេចក្តីសប្បុរស ដែលជា « សេចក្ដីស្រឡាញ់ដ៏សុទ្ធសាធនៃព្រះគ្រីស្ទ »១២ នោះការពិចារណារបស់យើង អាចត្រូវបានដឹកនាំដោយព្រះវិញ្ញាណនៃព្រះអម្ចាស់ ។ ឱ ! ខ្ញុំស្រឡាញ់ និងគោរពបុរសដ៏អស្ចារ្យទាំងពីររូបនេះណាស់ !
សេចក្ដីសប្បុរសគឺជាថ្នាំបន្សាបដល់ការទាស់ទែងគ្នា ។ សេចក្ដីសប្បុរសគឺជាអំណោយទានខាងវិញ្ញាណ ដែលជួយយើងឲ្យសម្រាតភាពជាមនុស្សខាងសាច់ឈាម ដែលអាត្មានិយម ការពារខ្លួនឯង ឆ្មើងឆ្មៃ និងច្រណែនឈ្នានីសចោលចេញ ។ សេចក្ដីសប្បុរសគឺជាចរិតលក្ខណៈដ៏សំខាន់របស់អ្នកដើរតាមដ៏ពិតរបស់ព្រះយេស៊ូវគ្រីស្ទ ។១៣ សេចក្ដីសប្បុរសកំណត់ពី អ្នកដែលផ្សះផ្សាគេ ។
នៅពេលយើងបន្ទាបខ្លួននៅចំពោះព្រះភ័ក្រ្ដព្រះ ហើយអធិស្ឋានដោយ អស់ពី កម្លាំងចិត្តយើង នោះព្រះនឹងប្រទានសេចក្ដីសប្បុរសដល់យើង ។១៤
អស់អ្នកដែលមានពរឲ្យមានអំណោយទានដ៏ទេវភាពនេះ មានចិត្តអំណត់ និងមានចិត្តល្អ ។ ពួកគេមិនចេះឈ្នានីស មិនចេះអួតខ្លួនឡើយ ។ ពួកគេមិនរហ័សខឹង ហើយមិនគិតអាក្រក់ពីអ្នកដទៃ ។១៥
បងប្អូនប្រុសស្រី សេចក្ដីស្រឡាញ់ដ៏សុទ្ធសាធនៃព្រះគ្រីស្ទគឺជាចម្លើយចំពោះការទាស់ទែងគ្នា ដែលធ្វើឲ្យយើងឈឺចាប់នៅសព្វថ្ងៃនេះ ។ សេចក្ដីសប្បុរសជំរុញឲ្យយើង « យល់ព្រមទទួលបន្ទុកគ្នាទៅវិញទៅមក »១៦ ជាជាងដាក់បន្ទុកគ្នាកាន់តែធ្ងន់ ។ សេចក្ដីស្រឡាញ់ដ៏សុទ្ធសាធនៃព្រះគ្រីស្ទអនុញ្ញាតឲ្យយើង « ឈរជាសាក្សីដល់ព្រះនៅគ្រប់ពេល និងគ្រប់សេចក្ដី »១៧—ជាពិសេស ក្នុងស្ថានភាពដ៏តានតឹង ។ សេចក្ដីសប្បុរសអនុញ្ញាតឲ្យយើងបង្ហាញពីរបៀបដែលបុរស និងស្ដ្រីនៃព្រះគ្រីស្ទនឹងនិយាយ និងប្រព្រឹត្ដ—ជាពិសេស នៅពេលកំពុងរងការរិះគន់ ។
ឥឡូវនេះ ខ្ញុំពុំនិយាយអំពី « សេចក្ដីសុខសាន្ដដែលត្រូវលះបង់អ្វីគ្រប់យ៉ាង » នោះទេ ។១៨ ខ្ញុំកំពុងនិយាយអំពីការប្រព្រឹត្តចំពោះអ្នកដទៃ តាមរបៀបដែលស្របទៅនឹងការរក្សាសេចក្ដីសញ្ញា ដែលបងប្អូនធ្វើ នៅពេលបងប្អូនទទួលទានសាក្រាម៉ង់ ។ បងប្អូនចុះសេចក្ដីសញ្ញាថា នឹងចងចាំព្រះអង្គសង្គ្រោះ ជានិច្ច ។ នៅក្នុងស្ថានភាពដែលតានតឹងអារម្មណ៍យ៉ាងខ្លាំង និងពោរពេញទៅដោយការទាស់ទែងគ្នា ខ្ញុំសូមអញ្ជើញបងប្អូនឲ្យចងចាំព្រះយេស៊ូវគ្រីស្ទ។ សូមអធិស្ឋានឲ្យមានភាពក្លាហាន និងប្រាជ្ញាដើម្បីនិយាយ ឬធ្វើអ្វីដែលទ្រង់នឹងធ្វើ ។ នៅពេលយើងធ្វើតាមម្ចាស់នៃមេត្រីភាព នោះយើងនឹងក្លាយជាអ្នកដែលផ្សះផ្សាគេរបស់ទ្រង់ ។
មកដល់ចំណុចនេះ បងប្អូនអាចគិតថា សារលិខិតនេះពិតជានឹងជួយដល់នរណាម្នាក់ដែលបងប្អូនស្គាល់ ។ ប្រហែលបងប្អូនសង្ឃឹមថា វានឹងជួយគាត់ឲ្យមានចិត្តកាន់តែល្អចំពោះបងប្អូន ។ ខ្ញុំសង្ឃឹមថា វានឹងជួយបាន ! ប៉ុន្តែ ខ្ញុំក៏សង្ឃឹមផងដែរថា បងប្អូននឹងមើលឲ្យជ្រៅទៅក្នុងចិត្ត បងប្អូន ដើម្បីមើលថា តើមានបំណែកនៃចិត្តឆ្មើងឆ្មៃ ឬការច្រណែនណាមួយ ដែលរារាំង បងប្អូន មិនឲ្យក្លាយជាអ្នកដែលផ្សះផ្សាគេដែរឬទេ ។១៩
បើបងប្អូនម៉ឺងម៉ាត់ក្នុងការជួយប្រមូលផ្តុំអ៊ីស្រាអែល និងការស្ថាបនាទំនាក់ទំនងដែលនឹងមានភាពយូរអង្វែងដល់អស់កល្បជានិច្ច ពេលនេះគឺជាពេលដើម្បីបោះចោលភាពល្វីងជូរចត់ហើយ ។ ឥឡូវនេះ គឺជាពេលដើម្បីឈប់ចចេសថា នេះជារបៀបខ្ញុំ ឬអត់ធ្វើនោះទៅ ។ ឥឡូវនេះ គឺជាពេលដើម្បីឈប់ធ្វើអ្វីដែលធ្វើឲ្យអ្នកដទៃខ្លាចរអា ព្រោះតែខ្លាចធ្វើឲ្យបងប្អូនអាក់អន់ចិត្ត ។ ឥឡូវនេះ គឺជាពេលដើម្បីកប់គ្រឿងសស្ត្រាវុធពិជ័យសង្គ្រាមរបស់បងប្អូនហើយ ។២០ បើឃ្លាំងពាក្យសម្ដីរបស់បងប្អូនមានពេញទៅដោយការប្រមាថ និងការចោទប្រកាន់ ឥឡូវនេះ គឺជាពេលដើម្បីបោះវាចោលហើយ ។២១ បងប្អូននឹងរីកចម្រើនឡើងជាបុរស ឬស្ដ្រីដ៏រឹងមាំខាងវិញ្ញាណរបស់ព្រះគ្រីស្ទ ។
ព្រះវិហារបរិសុទ្ធអាចជួយក្នុងការខិតខំរបស់យើងបាន ។ នៅទីនោះ យើងទទួលបានព្រះចេស្ដារបស់ព្រះ ដែលប្រទានសមត្ថភាពឲ្យយើងអាចយកឈ្នះលើសាតាំង ដែលជាបិតានៃការទាស់ទែងគ្នា ទាំងអស់បាន ។២២ សូមបណ្តេញវាចេញពីទំនាក់ទំនងរបស់បងប្អូន ! សូមចំណាំថា យើងក៏ស្តីបន្ទោសដល់មេសត្រូវផងដែរ រាល់ពេលដែលយើងផ្សះផ្សារការយល់ខុស ឬបដិសេធមិនទទួលយកការអាក់អន់ចិត្ត ។ ផ្ទុយទៅវិញ យើងអាចបង្ហាញក្ដីមេត្តាករុណាដ៏ទន់ភ្លន់ ដែលជាចរិតលក្ខណៈនៃសិស្សដ៏ពិតរបស់ព្រះយេស៊ូវគ្រីស្ទ ។ អ្នកដែលផ្សះផ្សាគេ រារាំងសត្រូវ ។
សូមឲ្យយើងក្លាយជាពន្លឺដ៏ពិតនៅលើភ្នំ—ជាពន្លឺមួយដែល « លាក់មិនកំបាំងទេ » ។២៣ សូមយើងបង្ហាញថាមានរបៀបដែលពេញដោយភាពសុខសាន្ត ពេញដោយការគោរពដើម្បីដោះស្រាយបញ្ហាស្មុគស្មាញ និងមានរបៀបដែលបានបំភ្លឺ ដើម្បីដោះស្រាយការខ្វែងគំនិតគ្នា ។ នៅពេលបងប្អូនបង្ហាញសេចក្ដីសប្បុរស ដូចដែលអ្នកដើរតាមដ៏ពិតនៃព្រះយេស៊ូវគ្រីស្ទបានបង្ហាញ នោះព្រះអម្ចាស់នឹងតម្កើងកិច្ចខិតខំរបស់បងប្អូន ហួសពីអ្វីដែលបងប្អូនអាចស្រមៃដល់ទៅទៀត ។
សំណាញ់ដំណឹងល្អគឺជាសំណាញ់ដ៏ធំបំផុតនៅក្នុងពិភពលោកនេះ ។ ព្រះបានអញ្ជើញ មនុស្សទាំងអស់គ្នា ឲ្យមករកទ្រង់ « ទាំងខ្មៅ និងស ទាំងបាវគេ និងសេរី ទាំងប្រុស និងស្រី » ។២៤ ដំណឹងល្អមានកន្លែងសម្រាប់មនុស្សគ្រប់គ្នា ។ ប៉ុន្ដែ មិន មានកន្លែងសម្រាប់ការលំអៀង ការថ្កោលទោស ឬការទាស់ទែងគ្នាទេ ។
បងប្អូនប្រុសស្រីជាទីស្រឡាញ់ រឿងដ៏ល្អបំផុតនឹងកើតមានដល់អ្នកដែលចំណាយពេលក្នុងជីវិតរបស់ខ្លួនដើម្បីលើកស្ទួយអ្នកដទៃ ។ ថ្ងៃនេះ ខ្ញុំសូមអញ្ជើញបងប្អូនឲ្យពិនិត្យមើលភាពជាសិស្សរបស់បងប្អូន ក្នុងបរិបទនៃរបៀបដែលបងប្អូនប្រព្រឹត្តចំពោះអ្នកដទៃ ។ ខ្ញុំសូមផ្ដល់ពរជ័យឲ្យបងប្អូនកែតម្រូវ ដើម្បីឲ្យឥរិយាបថរបស់បងប្អូនបានខ្ពង់ខ្ពស់ ពេញដោយការគោរព និងជាតំណាងឲ្យអ្នកដើរតាមដ៏ពិតរបស់ព្រះយេស៊ូវគ្រីស្ទ ។
ខ្ញុំសូមផ្ដល់ពរជ័យបងប្អូនឲ្យជំនួសការស្ដីបន្ទោសមកជាការទូលអង្វរព្រះ ការស្អប់មកជាការយោគយល់ និងការទាស់ទែងគ្នាមកជាភាពសុខសាន្ដ ។
ព្រះមានព្រះជន្មរស់ ! ព្រះយេស៊ូវគឺជាព្រះគ្រីស្ទ ។ ទ្រង់គឺជាអង្គដឹកនាំសាសនាចក្រនេះ ។ ពួកយើងគឺជាអ្នកបម្រើទ្រង់ ។ ទ្រង់នឹងជួយយើងឲ្យក្លាយជាអ្នកដែលផ្សះផ្សារគេបស់ទ្រង់ ។ ខ្ញុំសូមថ្លែងទីបន្ទាល់ដូច្នេះនៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕