13:49

“Ini ang Akon Ebanghelyo”—“Ini ang Akon Simbahan”

Ni Elder Dale G. Renlund

Sang Korum sang Dose ka Apostoles

Ini ang ebanghelyo sang Manluluwas, kag ini ang Iya Simbahan (tan-awa sa 3 Nefi 27:21; Mosias 26:22; 27:13). Ang kombinasyon sining duha mabaskog kag makapabag-o.

Sa mga siglo, ang black powder amo ang pinakakusog nga eksplosibo. Mapalupad sini ang mga bala sang kanyon, pero indi ini epektibo sa mga proyekto sang pagmina kag paghimo sang dalan. Indi ini halos makabuka sang bato.

Sang 1846 ang Italyano nga kemist nga si Ascanio Sobrero naghimo sang bag-o nga palupok, ang nitroglycerin. Ining mantikaon nga likido halos isa ka libo ka beses nga mas makusog sangsa black powder. Mahapos sini nga mabuka ang bato. Ugaling, delikado ang nitroglycerin. Kon mahulog mo ini bisan sa manubo lang, malupok ini. Kon mag-init ini katama, malupok ini. Kon magbugnaw ini katama, malupok ini. Bisan ibutang mo ini sa mabugnaw kag madulom nga kuwarto kag pabay-an, sa ulihi malupok ini. Gindumilian ang pagbiyahe sini sa halos tanan nga pungsod, kag madamo ang nagdumili sa pag-obra sini.

Sang 1860 isa ka Swedish scientist nga ang ngalan Alfred Nobel nagsugod sa pag-paistable sang nitroglycerin. Pagkatapos sang pito katuig nga pag-eksperimento, nalab-ot niya ang iya tuyo paagi sa pagtunaw sang nitroglycerin sa halos waay kapuslanan nga elemento nga ginatawag diatomaceous earth ukon kieselguhr. Ang kieselguhr mamag-an nga bato nga pwede pudpuron nga daw harina. Kon simpunan sang nitroglycerin, ginasuyop sang kieselguhr ang nitroglycerin, kag ang mahimo nga kula pwede pormahon nga daw mga “lipak.” Sa amo sini nga porma, mas istable ang nitroglycerin. Pwede na ini taguon, ibiyahe, kag gamiton nga wala nagapigaw ang kabaskugon maglupok. Gin-ngalanan ni Nobel ang kombinasyon sang nitroglycerin kag kieselguhr nga “dinamita.”

Ginbag-o gid sang dinamita ang kalibutan. Ginpamanggaranon man sini si Nobel. Kon wala sang stabilizer, nadiskubrehan ni Ascanio nga kadelikado kaayo sang nitroglycerin para gamiton sa komersyo. Kon isa lang ini, pareho sang ginhambal ko, ang kieselguhr limitado lang ang kapuslanan. Pero ang kombinasyon sang duha ka elemento naghimo sang dinamita nga makapabag-o kag importante.

Pareho man sini, ang kombinasyon sang ebanghelyo ni Jesucristo kag sang Simbahan ni Jesucristo sang mga Santos sa Ulihing mga Adlaw nagahatag sang mabaskog kag nagapabag-o nga mga benepisyo para sa aton. Perpekto ang ebanghelyo, pero ang ginsugo sang Dios nga simbahan kinahanglan nga magwali sini, mentinaron ang katinlo sini, kag hikuton ang sagrado sini nga mga ordinansa sa gahum kag autoridad sang Manluluwas.

Pamensara ang kombinasyon sang ebanghelyo sang Manluluwas kag sang Iya Simbahan nga gintukod sang propeta sa Libro ni Mormon nga si Alma. Responsibilidad sang Simbahan nga “dapat wala [ini] sing iwali” luwas lang nga ini paghinulsol kag pagtuo sa Ginuo, nga [magatubos] sa iya katawhan.” Gamit ang awtoridad sang Dios, responsable ang Simbahan sa paghikot sang ordinansa sang bunyag “sa ngalan sang Ginuo bilang isa ka saksi [sang pagsulod] sa isa ka kasugtanan upod sa iya … nga magaalagad kamo sa iya kag magtuman sang iya mga kasugoan.” Ang mga tawo nga nabunyagan nagdala sa ila kaugalingon sang ngalan ni Jesucristo, nagsulod sa Iya Simbahan, kag ginpromisahan sang dako nga gahum paagi sa pagbubo sang Espiritu.

Nagpanong ang mga tawo sa Mga Tubig sang Mormon para mamati kay Alma nga nagawali sang ebanghelyo. Bisan ginarespeto nila atong mga tubig kag ang palibot sini nga kakahuyan, ang Simbahan sang Ginuo indi lugar ukon bilding, bisan sa subong. Ang Simbahan mga ordinaryo lang nga mga tawo, mga disipulo ni Jesucristo, nga nagatililipon kag gin-organisar sa istraktura nga ginpili sang Dios para buligan ang Ginuo nga matuman ang Iya mga katuyuan. Ang Simbahan isa ka instrumento kon diin matun-an naton ang mayor nga papel ni Jesucristo sa plano sang Amay nga Langitnon. Nagahatag ang Simbahan sang pamaagi nga may awtoridad para makapartisipar ang mga indibidwal sa mga ordinansa kag makahimo sang nagadugay nga mga kasugtanan upod sa Dios. Ang pagtuman sina nga mga kasugtanan nagapalapit pa gid sa aton sa Dios, nagpalapit sa aton sang Iya gahum, kag nagabag-o sa aton nga mangin mga tawo nga tuyo Niya nga mangin kita.

Pareho sang dinamita nga pigaw kon wala sang nitroglycerin, ang Simbahan sang Manluluwas espesyal lamang kon gintukod ini sa Iya ebanghelyo. Kon wala ang ebanghelyo sang Manluluwas kag ang awtoridad sa paghikot sang mga ordinansa, ang Simbahan indi mangin halangdon.

Kon wala ang nagapaistable nga epekto sang kieselguhr, limitado ang kapuslanan sang nitroglycerin bilang palupok. Makita sa kasaysayan, nga kon wala ang Simbahan sang Ginuo, ang pag-intiendi sang katawhan sang Iya ebanghelyo indi man mangin istable—pwede maliwat ang doktrina kag mahimo maimpluwensyahan sang lainlain nga mga relihiyon, kultura, kag pilosopiya. Ang resulta sinang mga impluwensya makita sa tagsa ka dispensasyon tubtob sa sining pinakaulihi nga dispensasyon. Bisan nga sang primero ang ebanghelyo ginpahayag nga puro, ang interpretasyon kag pagpangabuhi sinang ebanghelyo amat-amat nga nangin porma sang pagkadiosnon nga kulang sang gahum tungod wala na ang awtorisado sang Dios nga Simbahan.

Ang Simbahan ni Jesucristo sang mga Santos sa Ulihing mga Adlaw nagatugot sa aton nga malab-ot ang gahum sang Dios tungod awtorisado ini Niya sa pagtudlo sang doktrina ni Cristo kag sa pagtanyag sang nagaluwas kag nagapahitaas nga mga ordinansa sang ebanghelyo. Handum sang Manluluwas nga patawaron kita sa aton mga sala, buligan kita nga malab-ot ang Iya gahum, kag bag-uhon kita. Nag-antos Sia para sa aton mga sala kag handum Niya nga luwason kita sa silot nga nagakadapat gid kuntani para sa aton. Gusto Niya nga mangin balaan kita kag mangin perpekto sa Iya.

May gahum si Jesucristo nga himuon ini. Wala lang sia nagasimpatiya sa aton mga kakulangan kag nagpangasubo sa wala katapusan nga pagkondenar sa aton bilang resulta sang sala. Wala, masobra pa dira ang Iya ginhimo, lampas pa kaayo dira, kag ginpanumbalik ang Iya Simbahan para malab-ot naton ang Iya gahum.

Ang sentro sang ebanghelyo nga ginatudlo sang Simbahan amo nga ginpas-an ni Jesucristo “ang aton mga kalisod, kag gindala ang aton mga kasubo.” Iya “[ginpas-an] ang kalautan naton nga tanan.” Iya “ginbatas ang mga pag-antos sa krus,” ginbugto “ang mga gapos sang kamatayon,” nagkayab sa langit, kag … nagpungko sa tuo nayon nga kamot sang Dios, agud magsukot halin sa Amay sang iya mga kinamatarong sang kaluoy.” Ginhimo ini tanan sang Manluluwas tungod palangga Niya ang Iya Amay kag palangga Niya kita. Ginbayran na Niya ang wala dulonan nga bili para Iya “[maangkon] ang tanan nga may pagtuo sa iya [kag apinan]” sila—kita. Wala na sang iban pa nga gusto si Jesucristo kundi nga maghinulsol kita kag magpalapit sa Iya para mapakamatarong kag matinluan kita. Sa sini nga handum, wala Sia nagauntat kag wala nagapalya.

Ang paglab-ot sang gahum sang kasugtanan kag Iya gugma sang kasugtanan paagi sa Iya Simbahan. Ang kombinasyon sang ebanghelyo sang Manluluwas kag sang Iya Simbahan nagabag-o sang aton mga kabuhi. Ginbag-o sini ang lolo kag lola ko sa nanay. Ang lolo ko nga si Oskar Andersson nagatrabaho sadto sa pantalan sa Högmarsö, isa ka pulo sa arkipelago sang Stockholm. Ang iya asawa nga si Albertina kag ang ila kabataan nagaistar sa mainland sang Sweden. Kaisa kada duha ka semana, kon Sabado, nagabugsay si Oskar papuli antes magbalik sa Högmarsö pagkagab-i sang Domingo. Isa ka adlaw, sang ara pa sia sa Högmarsö, nabatian niya ang duha ka Amerikano nga mga misyonero nga nagawali sang ginpanumbalik nga ebanghelyo ni Jesucristo. Nabatyagan ni Oskar nga puro nga kamatuoran ang iya nabatian, kag napuno sia sang indi malaragway nga kalipay.

Pagdason niya nga puli, malipayon nga ginsugid ni Oskar kay Albertina ang parte sa mga misyonero. Ginpaathag niya nga nagapati sia sa ila gintudlo. Ginpangabay niya si Albertina nga basahon ang mga balasahon nga ginhatag sa iya, kag nagsiling sa iya nga wala sia nagapati nga ang ila palaabuton pa nga mga kabataan dapat bunyagan mientras lapsag pa. Nangakig si Albertina kag ginpanghaboy ang mga balasahon sa tumpok sang basura. Halos wala na sila dayon nag-istoryahanay hasta magbalik si Oskar sa trabaho sang Domingo sang gab-i.

Sang nakahalin na sia, ginpamulot ni Albertina atong mga balasahon. Maid-id niya nga ginkomparar ang ila doktrina sa mga ginatudlo sang pirme niya ginagamit nga Biblia. Nakibot sia sang mabatyagan niya nga matuod ang iya ginbasa. Sang madason nga pagpauli ni Oskar, nakabaton sia sang mainit nga pag-abiabi, amo man ang kopya sang Libro ni Mormon nga dala niya. Nalangkag nga nagbasa si Albertina, sa liwat ginkomparar ang doktrina sa doktrina sa iya Biblia. Pareho kay Oskar, nakilala nila ang puro nga kamatuoran kag napuno sang indi mahambal nga kalipay.

Si Oskar, Albertina, kag ang ila kabataan nagsaylo sa Högmarsö para mangin malapit sa pila ka miyembro sang Simbahan didto. Isa ka semana pagkatapos nga ginbunyagan si Oskar kag Albertina sang 1916, gintawag si Oskar para mangin group leader sa Högmarsö. Pareho sang madamo nga mga convert, nagpangatubang si Oskar kag Albertina sang kritisismo tungod sa ila bag-o nga relihiyon. Indi na sila pagbaligyaan sang mga mangunguma sang gatas, gani nagabugsay si Oskar patabok sa fjord kada adlaw para magbakal sang gatas sa mas nakaintiendi nga mangunguma.

Pero sang nagsunod nga tinuig, nagdamo ang miyembro sang Simbahan sa Högmarsö, tungod man sa mabaskog nga testimonya kag nagabaga-baga nga kapagsik ni Albertina sa pagpanghaylo. Sang ang grupo nangin branch, gintawag si Oskar bilang branch president.

Gintahod sang mga miyembro sang Högmarsö branch ina nga isla. Ini ang ila Mga Tubig sang Mormon. Diri sila nakahibalo parte sa ila Manluluwas.

Sa mga tinuig, gintuman nila ang ila kasugtanan sa bunyag, ginbag-o si Oskar kag Albertina sang gahum ni Jesucristo. Ginhandum nila nga maghimo pa gid sang mga kasugtanan kag mabaton ang ila mga bugay sa templo. Para mabaton ina nga mga bugay, permanente sila nga nagbiya sa ila puluy-an sa Sweden pakadto sa Salt Lake City sang 1949. Nagserbe si Oskar bilang lider sang mga miyembro sa Högmarsö sa sulod sang 33 ka tuig.

Ang kombinasyon sang nitroglycerin kag kieselguhr naghatag sang kapuslanan sa dinamita; ang kombinasyon sang ebanghelyo ni Jesucristo kag sang Iya Simbahan indi mabutangan sang presyo. Nabatian ni Oskar kag Albertina ang parte sa ginpanumbalik nga ebanghelyo tungod ang propeta sang Dios nagtawag, nag-asayn, kag nagpadala sang mga misyonero sa Sweden. Sa diosnon nga sugo, gintudo sang mga misyonero ang doktrina ni Cristo kag paagi sa awtoridad sang priesthood ginbunyagan si Oskar kag Albertina. Bilang mga miyembro, padayon si Oskar kag Albertina nga nagtuon, nagtubo, kag nagserbisyo sa iban. Sila nangin mga Santos sa Ulihing mga Adlaw tungod gintuman nila ang mga kasugtanan nga ila ginhimo.

Ginatawag sang Manluluwas ang Simbahan ni Jesucristo sang mga Santos sa Ulihing mga Adlaw nga “akon simbahan” tungod ginsugo Niya ini sa pagtuman sang Iya mga katuyuan—pagwali sang Iya ebanghelyo, pagtanyag sang Iya mga ordinansa kag kasugtanan, kag pagpatigayon nga mapakamatarong kita kag matinluan sang Iya gahum. Kon wala ang Iya Simbahan, wala sang awtoridad, wala sang pagpangwali sang ginpahayag nga mga kamatuoran sa Iya ngalan, wala sang mga ordinansa ukon kasugtanan, wala sang paghayag sang gahum sang pagkadiosnon, wala sang pagbag-o sa kon anong gusto sang Dios nga kita mangin, kag mangin wala kapuslanan ang plano sang Dios para sa Iya mga kabataan. Ang Simbahan sa sining dispensasyon importante kaayo sa Iya plano.

Ginaagda ko kamo nga idedikar pa gid ang inyo kaugalingon sa Manluluwas, sa Iya ebanghelyo, kag sa Iya Simbahan. Kon himuon ninyo ini, matalupangdan ninyo nga ang kombinasyon sang ebanghelyo sang Manluluwas kag Iya Simbahan nagadala sang gahum sa inyo kabuhi. Ining gahum mas mabaskog pa sangsa dinamita. Buk-on sini ang mga bato sa inyo dalanon, bag-uhon kamo para mangin manunubli sa ginharian sang Dios. Kag kamo “[mapuno] sinang kalipay nga di-mapamulong kag puno sang himaya.” Sa ngalan ni Jesucristo, amen.