Pagsunod kay Cristo
Bilang mga sumulunod ni Cristo, nagatudlo kita kag nagapamatuod parte kay Jesucristo, ang aton Perpekto nga Huwaran. Gani sundon naton Sia paagi sa pagsikway sang pagbinaisay.
Sini nga tuig, minilyon ang nainspirar sa plano sang pagtuon sang ebanghelyo nga kilala sa imbitasyon sang Manluluwas nga “Dali, magsunod sa akon.” Ang pagsunod kay Cristo indi pasapayan ukon panalagsa lang nga gawi. Dalayon ini nga dedikasyon kag paagi sang pagpangabuhi nga dapat maggiya sa aton sa tanan nga tion kag sa tanan nga lugar. Ang Iya mga panudlo kag Iya ehemplo nagaklaro sang alagyan para sa tagsa ka disipulo ni Jesucristo. Ginaagda ang tanan sa sining alagyan, kay ginaagda Niya ang tanan nga magpalapit sa Iya, “itom kag puti, ulipon kag hilway, lalaki kag babayi; … kag ang tanan palareho sa Dios.”
I.
Ang una nga tikang sa pagsunod kay Cristo amo ang pagtuman sang Iya ginpaathag bilang “ang dakong sugo sa kasugoan”:
“Higugmaa ang Ginuo nga imo Dios sa bug-os mong tagipusuon, kag sa bug-os mong kalag, kag sa bug-os mong hunahuna.
“Ini amo ang dako kag nahaunang sugo.
“Kag ang ika-duha kaangay sa sini, Higugmaa ang imo isigkatawo subong sa imo kaugalingon.
“Sa sining duha ka sugo natingob ang bug-os nga kasugoan kag ang mga propeta.”
Ang mga kasugoan sang Dios nagahatag sang nagagiya kag nagapalig-on nga puwersa sa aton mga kabuhi. Ang aton mga eksperiyensia sa kabuhi daw pareho sa bata nga lalaki kag sa iya tatay nga nagapalupad sang burador sa mahangin nga adlaw. Samtang mas nagatimbuok ang burador, ang mga hangin nagabutong sang pisi nga nagaangot sa kamot sang gamay nga bata. Bangod wala eksperiyensia sa puwersa sang mga hangin sang kabuhi, ginpangabay niya nga utdon ang pisi agud mas magtimbuok pa gid ang burador. Naglaygay ang iya maalam nga amay nga indi, kag ginpaathag nga ang pisi ang nagahawid sang burador sa husto nga lugar batok sa mga hangin sang kabuhi. Kon buy-an naton ang pisi, ang burador indi na magtimbuok. Paliron ini sang mga hangin sang kabuhi kag indi malikawan nga mahulog sa duta.
Inang importante nga pisi nagarepresentar sang aton mga kasugtanan nga nagaangot sa aton sa Dios, ang aton Amay nga Langitnon kag sa Iya Anak nga si Jesucristo. Kon tahuron naton inang mga kasugtanan paagi sa pagtuman sang Ila mga kasugoan kag pagsunod sa Ila plano sang pagtubos, ang Ila ginpromisa nga mga bugay magatugot sa aton nga magtimbuok sa langitnon nga kahitaasan.
Ang Libro ni Mormom pirme nagapahayag nga si Cristo ang “kapawa sang kalibutan.” Sa Iya pagpakita sa mga Nefinhon, ang nabanhaw nga Ginuo nagpaathag sinang panudlo paagi sa paghambal sa ila, “Nagpahamtang ako sang ehemplo para sa inyo.” “Ako ang kasanag nga ipataas ninyo—inang nakita ninyo nga akon ginahimo.” Sia ang aton huwaran. Mahangpan naton ang Iya ginsiling kag ginhimo paagi sa pagtuon sang balaan nga mga kasulatan kag pagsunod sa mga panudlo sang mga propeta pareho sang ginlaygay ni Pangulong Russell M. Nelson nga aton himuon. Sa ordinansa sang sakramento, nagapakighisugot kita kada Domingo nga kita “magdumdum sa iya kag magtuman sang iya mga kasugoan.”
II.
Sa Libro ni Mormon, ang Ginuo naghatag sa aton sang sadsaran sa Iya gintawag “ang doktrina ni Cristo.” Ang mga ini amo ang pagtuo sa Ginuong Jesucristo, paghinulsol, bunyag, pagbaton sang dulot sang Balaan nga Espiritu, pagpadayon asta sa katapusan, kag pagmangin pareho sa isa ka bata nga diutay,nga nagakahulugan nga magsalig sa Ginuo kag sundon ang tanan nga Iya ginapangayo sa aton.
Duha ka klase ang mga kasugoan sang Ginuo, permanente pareho sang doktrina ni Cristo, kag temporaryo. Ang temporaryo nga mga kasugoan amo inang mga importante gid para sa panginahanglan sang Simbahan sang Ginuo ukon sang mga tumuluo sa temporaryo nga mga sirkumstansya, pero pwede ipahigad kon ang panginahanglan naglipas na. Isa ka halimbawa sang temporaryo nga mga kasugoan amo ang instruksyon sa una nga liderato sang Simbahan nga magsaylo ang mga Santos halin sa New York pakadto sa Ohio, sa Missouri, kag sa Illinois, kag sang ulihi pangunahan ang paggwa sang mga pionero pakadto sa mga Kabukiran sa Weste. Bisan temporaryo lang, samtang nagapadayon pa, ining mga sugo ginhatag agud tumanon.
Ang pila ka permanente nga mga kasugoan malawig-lawig pa kag natuman sang kadam-an. Halimbawa, ang bantug nga sermon ni Pangulong Lorenzo Snow sa layi sang ika-pulo naghatag importansya sa kasugoan nga ginhatag antes pa pero wala pa masyado ginatuman sang mga miyembro sang Simbahan. Ginkinahanglan pa sini liwat nga ipatalupangod sa mga sirkumstansya nga gin-atubang sadto sang Simbahan kag iya sini mga miyembro. Ang bag-o nga mga halimbawa sang pagpatalupangod liwat ginakinahanglan man tungod sang mga sirkumstansya nga ginaatubang subong sang mga Santos sa Ulihing mga Adlaw ukon sang Simbahan. Nagalakip ini sang proklamasyon sa panimalay nga ginpagwa ni Pangulong Gordon B. Hinckley sang nagligad nga henerasyon, kag ang panawagan ni Pangulong Russell M. Nelson sang sini lang nga tawgon ang Simbahan sa iya sini ginpahayag nga ngalan, Ang Simbahan ni Jesucristo sang mga Santos sa Ulihing mga Adlaw.
III.
Isa pa gid ka panudlo sang aton Manluluwas ang daw kinahanglan ipatalupangod liwat sa mga sirkumstansya sang aton panahon.
Panahon karon sang madamo nga maparas kag masakit nga mga tinaga sa aton komunikasyon sa publiko kag kon kaisa bisan sa aton mga pamilya. Dalagku nga mga pagkinalain sa mga isyu parte sa patakaran sang gobierno ang masami nagaresulta sa mga pag-ilinaway—bisan pa gani kaakig—sa publiko kag personal nga mga relasyon. Ini nga espiritu sang kaawayon kon kaisa nagapabudlay sa mga lehislador sa paghimo sang importante nga mga desisyon bisan pa nga kalabanan sang mga tawo ang nagakomporme nga ining mga desisyon dapat gid himuon.
Ano ang dapat itudlo kag himuon sang mga sumulunod ni Cristo sa tion sining makahililo nga komunikasyon? Ano ang Iya gintudlo kag ginpakita?
Talalupangdon nga isa sa una nga mga prinsipyo nga gintudlo ni Jesus sang nagpakita Sia sa mga Nefinhon amo ang paglikaw sa pagbinaisay. Samtang gintudlo Niya ini sa konteksto sang pagbinangig parte sa relihiyoso nga doktrina, ang mga rason nga Iya ginhatag klaro nga magamit sa mga komunikasyon kag mga relasyon sa pulitika, patakaran sa gobierno, kag pamilya. Si Jesus nagtudlo:
“Sia nga may espiritu sang pagbinaisay indi sa akon, kundi iya sang yawa, nga amo ang amay sang pagbinaisay, kag ginasugyot niya ang mga tagipusuon sang mga tawo sa pagpakigbais nga may kaakig, ang isa batok sa isa.
“Yari karon, indi amo ini ang akon doktrina, nga sugyuton ang mga tagipusuon sang mga tawo sa kaakig, ang isa batok sa isa; kundi amo ini ang akon doktrina, nga ang subong nga mga butang pagadulaon.”
Sa nabilin nga tinion sang Iya pag-alagad sa mga Nefinhon, nagtudlo si Jesus sang iban pa nga mga kasugoan nga angot gid sa Iya pagdumili sang pagbinaisay. Natudlo na Niya ini tanan sadto pa sa Iya dalayawon nga Wali sa Bukid, sa amo gid nga lengguahe nga gingamit Niya sang ulihi sa mga Nefinhon. Sambiton ko ang pamilyar nga lengguahe sa Biblia.
“Higugmaa ang inyo mga kaaway,” tudlo ni Jesus, “magpangamuyo kamo para sa mga nagahingabot sa inyo.”
Isa ini sang pinakabantug nga kasugoan ni Cristo—lubos nga bag-o kag budlay katama sundon. Pero isa ini ka importante nga bahin sang Iya imbitasyon para sa tanan nga sundon Sia. Sa gintudlo ni Pangulong David O. McKay, “Wala na sing mas maayo nga paagi nga ipakita ang gugma sa Dios sangsa magpakita sang di-maiyaiyahon nga gugma sa isigkatawo.”
Ari pa ang isa ka panguna nga panudlo Niya nga aton huwaran: “Bulahan ang mga makighidaeton, kay sila tawgon nga mga anak sang Dios.”
Mga makighidaeton! Daku gid ang mabag-o sa aton personal nga mga relasyon kon talikdan sang mga sumulunod ni Cristo ang mapintas kag masakit nga mga tinaga sa aton mga paghinambalanay.
Sa pangkabilogan nga komperensya sang nagligad nga tuig, si Pangulong Russell M. Nelson naghatag sa aton sining mga hangkat:
Isa sa pinakahapos nga paagi para makilala ang tunay nga sumulunod ni Jesucristo amo ang kon paano niya ginatratar ang iban nga mga tawo. …
“… Ang matuod nga mga disipulo ni Jesucristo mga makigdaeton.
“…Isa sang pinakamaayo nga mga pamaagi nga tahuron naton ang Manluluwas amo ang mangin makigdaeton.”
Nagahinakop sang iya mga panudlo: “Ang pagbinaisay isa ka pagpili. Ang pagkamakighidaeton isa ka pagpili. Pwede kamo magpili nga makigbais ukon makig-uli. Ginapangabay ko kamo nga pilionninyo nga mangin makighidaeton, karon kag sa tanan nga oras.”
Ang posible nga mga kaaway dapat magsugod sang ila mga paghinun-anon paagi sa pagkilala sang kinaandan nga mga butang nga ginaugyunan sang tanan.
Agud sundon ang aton Perpekto nga Huwaran kag ang Iya propeta, kinahanglan naton tumanon ang ginakilala bilang ang Bulawanon nga Pagsulundan: “Ang tanan nga mga butang kon ano man nga buot ninyo nga himuon sang mga tawo sa inyo, amo man ang inyo himuon sa ila, kay ini amo ang layi kag ang mga propeta.” Kinahanglan naton magpalangga kag maghimo sang maayo sa tanan. Kinahanglan naton likawan ang pagbinais kag mangin mga makighidaeton sa aton mga paghinambalanay. Indi ini buot silingon nga ikompromiso ang aton mga prinsipyo kag mga prayoridad kundi untaton ang maparas nga pag-atake sa iban tungod sang ila mga prinsipyo kag prayoridad. Ina ang ginhimo sang aton Perpekto nga Huwaran sa Iya pag-alagad. Ina ang ehemplo nga Iya ginpahamtang sa aton, sang gin-imbitar Niya kita nga sundon Sia.
Sa sining komperensya apat ka tuig ang nagligad, sa Pangulong Nelson naghatag sa aton sang hangkat sang propeta para sa aton panahon:
“Handa ka bala nga tugotan ang Dios nga magpangibabaw sa imo kabuhi? Handa ka bala nga tugotan ang Dios nga mangin pinakaimportante nga impluwensya sa imo kabuhi? Tugotan mo bala ang Iya mga pulong, ang Iya mga kasugoan, kag ang Iya mga kasugtanan nga mag-impluwensya sang imo ginahimo sa kada adlaw? Tugotan mo bala ang Iya tingug nga magpanguna sangsa bisan ano nga iban pa?”
Bilang mga sumulunod ni Cristo, nagatudlo kita kag nagapamatuod parte kay Jesucristo, ang aton Perpekto nga Huwaran. Gani sundon naton Sia paagi sa pagsikway sang pagbinaisay. Sa aton paghimakas para sa gusto naton nga mga patakaran sa mga aksyon-publiko, magmangin kabagay kita sa Iya mga bugay paagi sa paggamit sang lengguahe kag mga pamaagi sang mga makighidaeton. Sa aton mga pamilya kag iban pa nga personal nga mga relasyon likawan naton nga mangin maparas kag makapaakig. Tinguhaan naton nga mangin balaan, pareho sang aton Manluluwas, nga sa Iya balaan nga ngalan nagapamatuod ako kag nagapangayo sang Iya bugay nga buligan kita nga mangin Santos, sa ngalan ni Jesucristo, amen. Sa ngalan ni Jesucristo, amen.