Palangga sang Dios ang Tanan Niya nga Kabataan
Ginatawag Niya kita pirme, kag ginagamit Niya kita nga Iya ordinaryo nga mga alagad, sa pagbulig dala sang Iya mga kabataan sa Iya.
Ano ang ginahandum sang Amay nga Langitnon halin sa inyo? Naintiendihan bala ninyo nga sang ara pa kamo sa kalibutan antes sa duta, ginhanda na kamo sang Amay nga Langitnon para sa inyo pagpangabuhi sa duta? Nga nagahambal sa mga lamharon, si Pangulong Russell M. Nelson nagtudlo: “Ang aton Amay nga Langitnon nagtigana sang madamo sang Iya pinakadungganon nga mga espiritu—ayhan … ang Iya pinakaali nga guban—para sa sining katapusan nga tion.” Tungod ginreserba kita para sa sining ulihing mga adlaw, importante sa aton nga magtuon nga mangin mga disipulo ni Jesucristo.
Ang Ginuong Jesucristo amo ang Maayong Manugbantay, kag kilala Niya ang Iya panong, kag kilala sang panong ang Iya Manugbantay tungod “ginatawag niya ang iya mga karnero sa ila ngalan.” Ginatawag Niya kita pirme, kag ginagamit Niya kita nga Iya ordinaryo nga mga alagad, sa pagbulig dala sang Iya mga kabataan sa Iya.
Sang nagligad lang, ako kag isa ka stake president nagbisita sa mga miyembro sang Simbahan sa amon lugar. Sang matapos namon ang naiskedyul namon nga bisitahan, namangkot sa akon ang stake president kon pwede kami kabisita sa isa pa ka pamilya. Nabatyagan niya nga dapat namon sila istoryahon.
Nanuktok kami sa pwertahan kag ginbuksan kami sang isa ka sister. Gintulok niya ako, pero indi niya ako kilala, gani wala sia maayo sang reaksyon. Gintudlo ko ang stake president, nga nagbugno sa iya sa iya ngalan. Sang nabatian kag nakita niya sia, nalipay gid sia. Nagatindog sa gwa sang pwertahan, pareho nila nga ginhakos ang kada isa kag naghibi sila nga duha. Amo sini ang nangin panimuot sang amon pagbisita. Wala kami makahibalo nga gin-chemotherapy ining sister sang nagligad nga adlaw. Maluya sia kaayo para mag-atipan sang iya hamtong na nga anak. Gani, ginbuligan ko ang stake president nga ilisan ang iya bata nga lalaki, kag ginbutang sa iya wheelchair. Ginpakaon namon sa iya ang pagkaon nga gindala sang isa ka mabuot nga sister sang ward antes lang, kag nagbulig kami sa iban nga ulobrahon. Antes kami naghalin sa ila balay, ginhatagan namon sila sang bendisyon.
Ang ginapamensar ko lang gid sa sining pagbisita namon amo ang kompirmasyon nga palangga kaayo sila ni Jesucristo. Naintiendihan Niya sila kag personal nga nakahibalo sang kasakit sang ila pinasahi nga sitwasyon. Ang halos bilog namon nga pagbisita nangin mahipos. Sini nga tion wala kami naghatag sang leksyon ukon nagpakigbahin sang amon paborito nga balaan nga kasulatan, pero maalwan kami nga ginbugayan sang Ginuo sang Iya Espiritu.
Isa sa pinakadako nga rason nga ginpadala kamo diri sang Amay nga Langitnon sa sini nga tiyempo amo nga para malab-ot ninyo ang inyo bug-os nga potensyal. Ang Preach My Gospel nagatudlo sa aton nga bilang mga disipulo ni Cristo, dapat likawan naton nga ikumparar ang aton mga kaugalingon sa isa kag isa. Ang inyo espirituhanon nga mga abilidad pinasahi, personal, kag inyo gid, kag gusto sang Amay nga Langitnon nga buligan kamo nga patubuon ini. May ara gid sang tawo nga mabuligan ninyo nga mabatyagan ang pagpalangga sang inyo Amay nga Langitnon. Diosnon ang inyo potensyal. Bisan importante nga ihanda ninyo ang inyo kaugalingon para magmadinalag-on sa sining kalibutan nga puro paindis-indis, isa sang inyo kritikal nga misyon sa bilog ninyo nga kabuhi amo ang mangin disipulo ni Jesucristo kag sundon ang mga pagpabatyag sang Espiritu. Kon himuon ninyo ini, bugayan sang Dios ang inyo kabuhi, bugayan Niya ang pamilya ninyo karon ukon sa palaabuton, kag bugayan Niya ang kabuhi sang Iya kabataan nga inyo masugata.
Nagakabuhi kita sa panahon sang dako nga oportunidad. Bisan nagaatubang kita sang madamo nga kabudlayan, kabalo ko nga ara ini sila para tugotan kita nga buligan ang iban nga mabatyagan ang pagpalangga sang aton Amay nga Langitnon. Gintudlo ni Pangulong Nelson: “Sa maabot nga inadlaw, makita naton ang pinakadako nga mga pagpahayag sang gahum sang Manluluwas nga amo pa lang makita sang kalibutan.” May pribelihiyo kita nga atipanon ang mga tawo nga nagakinahanglan sang bulig, sang hakos, sang pamatyagan sang kasulhay, ukon bisan updan lang gid naton sila sing mahipos. Kon mabuligan naton nga pamag-anon ang ila mga palas-anon, bisan sing makadali lang, makita naton ang dako nga pagpahayag sang gahum sang Manluluwas sa ila mga kabuhi.
Bilang mga disipulo ni Jesucristo, ang mga Santos sa Ulihing mga Adlaw makahimo gid sang positibo nga epekto sa kalibutan. Makahatag kita sinang kalipay nga makita sa aton mga nawong—kalipay nga ginapakigbahin naton paagi sa mga pulong sang pagpalangga kag maayo nga binuhatan. Mangin maayo kita nga mga kaingod, maayo nga mga amo, maayo nga mga trabahador. Tinguhaan naton nga mangin maayo nga mga Cristohanon sa tanan nga tion.
Ginpanumbalik sang Ginuo ang Iya ebanghelyo upod ang kinahanglanon nga mga ordinansa para mabaton sang kabataan sang Amay nga Langitnon ang tanan nga mga promisa nga nagaangot sa aton sa Iya. Sa pagbulig sa aton mga kauturan sa adlaw-adlaw nila nga mga kabudlayan, tandaan man naton nga buligan sila nga maghimo kag magtuman sining sagrado nga mga promisa sa ila Amay nga Langitnon para nga Sia man makapromisa sa ila sang pinakabugana nga mga bugay sa sining kabuhi kag sa wala katapusan. Ining mga promisa nangin posible lamang paagi sa Pagpanumbalik sang ebanghelyo ni Jesucristo kag sang Iya mga yabi sang priesthood.
Buot silingon, mabuligan naton ang iban nga magpabilin sa dalan sang kasugtanan. Ang iban sa aton nagatalang sa dalan kon kaisa, kag kinahanglan naton tandaan nga para sa aton Amay nga Langitnon, may posibilidad gid kita pirme nga magbalik. Bisan pa nga ang aton pagpanglakaton indi perpekto, ginapadumdom kita pirme sang Manluluwas nga “kon ano kasunson [kita nagahinulsol] kag [nagapangayo] sing kapatawaran, nga may matuod-tuod nga tinutuyo, pagapatawaron [kita].”
Isa sa istratehiya sang kaaway sini nga panahon amo nga ipahunahuna kag papatihon kita nga wala na kita sang tsansa magliwat ukon wala na kita sang paglaum. Ining makaguba nga panghunahuna nagaresulta sa aton nga indi na gid magtinguha. Kag sa amo sini nga tion nga ang aton pagpalangga, ang aton pulong sang pagpapagsik kag suporta, ang aton tiyempo, kag ang aton bulig makahatag sa iban sang paglaum para tilawan pa gid nga makigbato.
Siguro ginapensar ninyo, “OK, pero sin-o ang naga-minister sa akon?” Sa paglakat kag pagbugay sa mga kabuhi sang aton mga kauturan, makatipon kita sang mga testimonya nga magapuno sang aton kabuhi sang pagtuo kay Ginuong Jesucristo. Ining mga testimonya magapapagsik sa aton nga magtinguha pa gid para sa aton kaugalingon. Pabakuron kita sang Balaan nga Espiritu kag buligan kita upod sining mas ginpabaskog nga mga testimonya nga magpadayon sa aton mga kabudlayan kag personal nga mga problema. Kada magtinguha kita nga bugayan ang mga kabuhi sang iban, mas ginakaluy-an kita sang Ginuo; Ginapabakod Niya kita kag ginabuligan sa aton mga kabuhi.
Palihog tandai nga ang Ginuong Jesucristo amo ang inyo Manluluwas kag nakaintiendi gid sa inyo sa personal. Nakahibalo Sia kon daw ano ang magtuman sang inyo calling kag bayaan ang inyo mga ginaobra para magbulig sa mga anak sang Dios. May gahum Sia nga bendisyunan kamo sa tanan-tanan kon magpati kamo sa iya kag indi magduhaduha.
Pinalangga kong mga kauturan, sinang adlaw nga nakabatyag ang lider sang priesthood nga bisitahan ang mag-iloy nga wala sa amon plano, ginapahayag ko nga nahibal-an sang Dios nga kinahanglan nila kami. Kag sang ulihi, ako amo ang naministeran. Sa sina nga adlaw, nabaton ko ang isa sa pinakadako nga mga leksyon parte sa pagpalangga sang Manluluwas sa aton.
Nagapamatuod ako nga si Jesucristo amo ang Manluluwas sang kalibutan, nga Sia buhi, kag nabuhi Sia kag napatay para sa inyo kag sa akon, kag nabanhaw Sia para sa inyo kag sa akon para makalaum kita nga magkilit-anay sa langit nga puno sang kalipay upod ang mga nag-una na sa pihak nga kinabuhi. Kabalo ako nga perpekto ang Iya paghangop sa inyo kag sa akon. Naintiendihan Niya ang tagsa naton ka oras sang kabudlayan, kag may gahum Sia nga buligan kita sa sinang mga tinion kon diin pinakamaluya kita. Kabalo ako nga ang Ginuong Jesucristo kag ang aton Amay nga Langitnon nagpakita kay Joseph Smith para ipanumbalik ang ebanghelyo sa sining panahon. Kabalo ako nga ang aton pinalangga nga propeta nga si Russell M. Nelson isa ka propeta sang Ginuo, kag nagasaksi ako sa sining mga butang sa ngalan ni Jesucristo, amen.