Pagsalig sa Aton Amay
Ang Dios nagasalig sa aton nga maghimo sing madamo nga importante nga mga desisyon, kag sa tanan nga butang ginapangayo Niya nga magsalig kita sa Iya.
Sang Hunyo 1, 1843, si Addison Pratt nagbiya sa Nauvoo, Illinois, agud magwali sang ebanghelyo sa mga Isla sang Hawaii, nga ginbilin ang iya asawa nga si Louisa Barnes Pratt agud mag-atipan sa ila lamharon nga kabataan.
Samtang nagalala ang mga pagpanghingabot sa Nauvoo, rason nga napilitan ang mga Santos nga maghalin, kag sang ulihi sa Winter Quarters samtang nagahanda sila nga magsaylo sa Salt Lake Valley, si Louisa kinahanglan magdesisyon kon bala mabiyahe sia. Mas mahapos kuntani ang magpabilin kag maghulat nga magbalik si Addison sangsa magbiyahe nga isahanon.
Nagpangayo sia sang giya sa propetang Brigham Young sing duha ka beses, nga nagpaisog sa iya nga maglakat. Sa pihak sang dako nga kabudlayan kag iya pagpangalag-ag, nakabiyahe sia sa tagsa ka tion.
Sa una, wala masyado nalipay si Louisa sa pagbiyahe. Apang, amat-amat nga nalingaw sia sa berde nga mga hilamon, maduagon nga talunon nga mga bulak, kag sang duta sa higad sang suba. “Ang kasubo sa akon hunahuna amat-amat nga nadula,” sulat niya, “kag wala na sing mas masadya pa nga babayi sa bilog nga grupo.”
Ang istorya ni Louisa nag-inspirar gid sa akon. Nanamian ako sa iya kahanda nga ipahigad ang iya personal nga mga luyag, sa iya ikasarang nga magsalig sa Dios, kag kon paano ang paggamit sang iya pagtuo nakabulig sa iya nga mahangpan ang sitwasyon.
Ginapahanumdum niya sa akon nga may mapinalanggaon kita nga Amay sa Langit, nga nagaulikid sa aton kon diin man kita, kag nga makasalig kita sa Iya labi pa sa bisan sin-o ukon bisan ano man.
Ang Ginahalinan sang Kamatuoran
Ang Dios nagasalig sa aton nga maghimo sing madamo nga importante nga mga desisyon, kag sa tanan nga butang ginapangayo Niya nga magsalig kita sa Iya. Mabudlay gid ini kon ang aton pagpili ukon ang opinion sang mga tawo lain sangsa Iya kabubut-on para sa Iya mga anak.
Ang iban nagapanugyan nga dapat naton liwaton ang kahulugan sang kon ano ang husto kag kon ano ang sayop tungod nagasiling sila nga indi palareho ang kamatuoran sa tagsa ka tawo, nga ang tagsa ka tawo nagahimo sang iya kaugalingon nga realidad, ukon ang Dios tuman ka maalwan nga wala man gid Sia labot kon ano ang aton himuon.
Sa aton pagtinguha nga maintiendihan kag batunon ang pagbuot sang Dios, makabulig nga dumdumon nga ang mga limitasyon sang husto kag sayop indi kita ang magbuot. Ginpahamtang sang Dios mismo ining mga limitasyon, base sa wala katapusan nga mga kamatuoran para kita makabenepisyo kag mapakamaayo.
Ang handum nga bag-ohon ang wala katapusan nga kamatuoran sang Dios may malawig nga kasaysayan. Nagsugod ini antes nagsugod ang kalibutan, sang si Satanas nagrebelde batok sa plano sang Dios, nga nagtinguha sa pagguba sang kahilwayan sang tawo sa pagpili. Amo ini ang ginsunod sang mga tawo pareho kay Serem, Nehor, kag Korihor nga nakigbais nga ang pagtuo binuang, ang rebelasyon wala sing kapuslanan, kag insakto ang maghimo sang kon ano man ang luyag naton himuon. Ang masubo, masami ining mga pagsipak sa kamatuoran sang Dios nagresulta sa dako nga kasubo.
Bisan pa nga ang iban nga butang mahimo magdepende sa konteksto, pero indi man tanan. Si Pangulong Russell M. Nelson dalayon nga nagtudlo nga ang nagaluwas nga mga kamatuoran sang Dios bug-os, talalupangdon, kag ginhatag sang Dios mismo.
Aton Pagpili
Ang ginapili naton nga saligan ang isa sang importante nga mga desisyon sang aton kabuhi. Si Haring Benjamin nagtudlo sa iya katawhan, “Magpati sa Dios; magpati nga sia gid … ; magpati nga yara sa iya ang tanan nga kaalam … ; magpati nga indi mahangpan sang tawo ang tanan nga butang nga mahangpan sang Ginuo.”
Maayo na lang kay may ara kita sang balaan nga mga kasulatan kag paggiya halin sa buhi nga mga propeta nga magbulig sa aton nga mahangpan ang kamatuoran sang Dios. Kon kinahanglanon sing dugang nga pagpaathag, ginahatag ini sang Dios paagi sa Iya mga propeta. Kag sabton Niya ang aton sinsero nga mga pangamuyo paagi sa Balaan nga Espiritu kon magtinguha kita nga hangpon ang mga kamatuoran nga indi pa naton lubos nga maapresyar.
Si Elder Neil L. Andersen kis-a nagtudlo nga indi kita dapat matingala “kon sa panalagsa ang [aton] personal nga mga panan-aw indi dayon magsanto sa mga panudlo sang propeta sang Ginuo. Amo ini ang mga tinion sang pagtuon,” siling niya, “sang pagpaubos, kon magluhod kita sa pagpangamuyo. Magapasulong kita sa pagtuo, nga nagasalig sa Dios, nga nakahibalo nga sa pagligad sang panahon makabaton kita sing dugang nga espirituhanon nga kaathag halin sa aton Amay nga Langitnon.”
Sa tanan nga tion, makabulig nga dumdumon ang panudlo ni Alma nga ang Dios nagahatag sang Iya pulong suno sa atensyon kag pagpaninguha nga ginahinguyang naton sa sini. Kon magpamati kita sa pulong sang Dios, magabaton kita sing mas dako nga bahin sang pulong; kon ibalewala naton ang Iya laygay, magabaton kita sing mas diutay nga bahin sang pulong tubtob nga wala na sing mabilin sa aton. Ining pagkadula sang ihibalo wala nagakahulugan nga sayop ang kamatuoran; kundi, nagapakita ini nga nadula sa aton ang ikasarang nga hangpon ini.
Magtulok sa Manluluwas
Sa Capernaum, ang Manluluwas nagtudlo parte sa Iya kaugalingon kag iya misyon. Madamo ang nabudlayan maghangop sang Iya mga pulong, rason nga ginsikway nila Sia kag “wala na [magpakig-upod] sa iya.”
Ngaa naghalin sila?
Tungod indi nila gusto ang Iya ginhambal. Gani, ginpili nila nga maghalin, nga gindumili ang ila mga kaugalingon sang mga bugay nga nag-abot kuntani kon nagpabilin sila.
Mahapos para sa aton bugal nga magpugong sa aton sa pagbaton sang wala katapusan nga kamatuoran. Kon indi kita makahangop, pwede kita magpundo, pahagan-haganon ang aton mga ginabatyag, kag dayon magdesisyon kon ano ang himuon. Ang Manluluwas naglaygay sa aton nga “magtulok sa [Iya] sa tagsa ka panghunahuna; indi magduhaduha, indi magkahadlok.” Kon magtutok kita sa Manluluwas, ang aton pagtuo magasugod nga mangin mas mabakod sangsa aton mga kabalaka.
Pareho sa ginlaygay ni Pangulong Dieter F. Uchtdorf sa aton nga himuon: “Palihog, magduda sa inyo mga pagduhaduha antes kamo magduda sa inyo pagtuo. Indi gid naton tugotan ang aton mga pagpangduhaduha nga magpriso sa aton kag magapalayo sa aton sa diosnon nga paghigugma, paghidaet, kag sa mga dulot nga nagaabot paagi sa pagtuo kay Ginuong Jesucristo.”
Ang mga Bugay Nagaabot sa Mga Nagapabilin
Sang ginbayaan sang mga disipulo ang Manluluwas sina nga adlaw, nagpamangkot sia dayon sa Dose, “Buot man bala kamo maghalin?”
Si Pedro nagsabat:
“Ginuo, kay sin-o bala kami makadto? ikaw may mga pulong sang kabuhi nga wala katapusan.
“Kag kami nagatuo, kag nagakilala, nga ikaw ang Cristo, ang Anak sang buhi nga Dios.”
Karon, ang mga Apostoles nagkabuhi sa amo man nga kalibutan, kag nakaeksperiyensya sang amo man nga pag-ipit sang katilingban nga pareho sina sa mga disipulo nga naghalalin. Apang, sa sina nga tion, ginpili nila ang ila pagtuo kag nagsalig sa Dios, gani napadayon ang mga bugay nga ginahatag sang Dios sa mga nagapabilin.
Ayhan ikaw, pareho sa akon, kon kaisa makasapo sang imo kaugalingon sa magtimbang nga bahin sining desisyon. Kon mabudlayan kita sa paghangop ukon pagbaton sang pagbuot sang Dios, makapaumpaw dumdumon nga palangga Niya kita kon ano kita, kon diin na kita sa karon. Kag may natigana Sia nga mas maayo para sa aton. Kon maglab-ot kita sa Iya, buligan Niya kita.
Bisan pa nga ang paglab-ot sa Iya mabudlay, subong nga ang amay nga nagpangita sang pagpang-ayo para sa iya anak ginhambalan sang Manluluwas, “Ang tanan nga butang mahimo sa iya nga nagatuo.” Sa aton mga tinion sang kabudlayan, kita man makapakitluoy, “Tabangi ang [akon] pagkadimatinuohon.”
Pagtugyan sang Aton Kabubut-on sa Iya
Si Elder Neal A. Maxwell kis-a nagtudlo nga “ang pagtugyan sang kabubut-on sang isa ka tawo ang amo lamang nga pinasahi nga personal nga butang nga kinahanglan naton ibutang sa altar sang Dios.” Indi katingalahan nga si Haring Benjamin nalangkag nga ang iya katawhan mangin “pareho sing isa ka bata, nga masinulundon, malulo, mapainubuson, mapainumuron, puno sang gugma, handa sa pagsunod sa tanan nga butang nga ginatan-aw sang Ginuo nga nagakabagay nga ipatuman sa iya, bisan pareho sing isa ka bata nga nagasunod sa iya amay.”
Sa dalayon, ang Manluluwas nagapahamtang sing perpekto nga huwaran para sa aton. Bisan pa nasuboan sia, kag nakahibalo sang masakit nga buluhaton nga kinahanglan Niya himuon, nagpaidalom Sia sa kabubut-on sang Iya Amay, kag gintuman ang Iya misyon bilang Mesias kag ginbuksan ang promisa sang wala katapusan sa imo kag sa akon.
Ang desisyon nga itugyan ang aton kabubut-on sa Dios isa ka buhat sang pagtuo nga labing importante sa aton pagkadisipulo. Sa paghimo sinang desisyon, natun-an naton nga ang aton pagbuot wala nabuhinan; kundi, napadako kag napadyaan sang presensya sang Balaan nga Espiritu, nga nagadala sang katuyoan, kalipay, paghidaet, kag paglaum nga indi naton makita sa bisan diin.
Sang nagligad nga pila ka bulan, ako kag isa ka stake president nagbisita sa isa ka sister sa iya stake kag sa iya batan-on nga anak nga lalaki. Sa pila ka tuig nga nagpalayo sia sa Simbahan, nga nag-ubay sang mabudlay kag mapintas nga mga banas, nagbalik sia. Sa amon pagbisita, namangkot kami kon ngaa nagbalik sia.
“Nangin magamo ang akon kabuhi,” siling niya, “kag nahibal-an ko kon diin ako dapat.”
Dayon ginpamangkot ko sia kon ano ang iya natun-an sa iya eksperiyensya.
Emosyonal niya nga ginhambal nga natun-an niya nga kinahanglan niya magtambong sa simbahan sing dalayon agud mauntat ang batasan nga indi pag-abot kag kinahanglan niya nga magtinir tubtob nga diri na niya gusto nga magpabilin. Indi mahapos ang iya pagbalik, pero sang gingamit niya ang pagtuo sa plano sang Amay, nabatyagan niya nga nagbalik ang Espiritu.
Kag dayon dugang pa niya, “Natun-an ko sa akon kaugalingon nga maayo ang Dios kag ang Iya dalanon mas maayo sangsa akon.”
Nagapamatuod ako parte sa Dios nga aton Wala Katapusan nga Amay nga nagapalangga sa aton; parte sa Iya Anak nga si Jesucristo nga nagluwas sa aton. Nakahibalo Sila sang aton mga kasakit kag mga hangkat. Indi gid kita Nila pagpabay-an kag nakahibalo gid Sila kon paano kita buligan. Mangin malipayon kita kon magsalig kita sa Ila sing labaw pa sangsa bisan sin-o ukon bisan ano man. Sa sagrado nga ngalan ni Jesucristo, amen.