11:35

Batona ang Dulot sang Ginuo nga Paghinulsol

Ni Elder Jorge M. Alvarado

Sang Sitenta

Indi naton paghulaton nga magbudlay ang tanan antes magliso sa Dios. Indi naton paghulaton tubtob sa katapusan sang aton kabuhi para maghinulsol gid.

Nagapamatuod ako sang mapinalanggaon nga Amay nga Langitnon. Sang Abril 2019 nga pangkabilogan nga komperensya, pila ka gutlo pagkatapos nga gin-sustain ako sa akon bag-o nga responsibilidad bilang General Authority Seventy, nagkanta ang koro sang “I Stand All Amazed” nga nagtudok gid sa akon dughan kag kalag.

Ako na’bulong sa Iya trono nanaog
Tabangan kalag sang subong kong’ masuayon,
Nga sia maghatag dakong gugma sa subong ko,
Para batunon, tubuson, pakatarungon.

Sang nabatian ko yadtong mga pulong, nagdayaw ako. Nabatyagan ko nga bisan sa akon kakulangan kag kapaltahan, ginbugayan ako sang Ginuo “nga sa iya kusog mahimo ko ang tanan.”

Ang pagbatyag sang kakulangan, kahuyang ukon pagkaindi bagay butang nga nabatyagan sang madamo sa aton. Nabatyagan ko ini sa gihapon; nabatyagan ko ini sang pagtawag sa akon. Pirme ko ini nabatyagan, kag bisan subong nga nagahambal ako sa inyo. Pero, narealisar ko nga wala ako nagaisahanon sa sining pamatyagon. Ang matuod, madamo sang istorya sa balaan nga kasulatan parte sa may pareho sining pamatyagon. Halimbawa, madumduman naton si Nefi bilang isa ka matutum kag maisog nga alagad sang Ginuo. May mga bes nga nagbatyag sia sang pagkaindi bagay, kahuyang, kag kakulangan.

Nagsiling sia: “Sa pihak sang dako nga kaayo sang Ginuo, sa pagpakita sa akon sining dako kag dalayawon nga mga buluhaton, ang akon tagipusuon nagasinggit: O, makaluluoy ako nga tawo! Huo, ang akon tagipusuon nagakasubo tungod sang akon unod; ang akon kalag nagakalisud tungod sang akon mga kalainan.”

Ang Propeta nga si Joseph Smith pirmi nagahambal sang “kabasulanan,” sang iya kahubin, “sa [iya] kahuyang kag mga kakulangan.” Pero ang pagbatyag ni Joseph sang kakulangan kag kabalaka kabahin sang nagtulod sa iya nga magbinagbinag, magtuon, kag magpangamuyo. Kon matandaan ninyo, naglakat sia para mangamuyo sa kakahuyan malapit sa ila balay para pangitaon ang kamatuoran, kalinong, kag kapatawaran. Nabatian niya ang Ginuo nga nagsiling: “Joseph, anak ko, ang imo mga sala napatawad na. Maglakat ka, lakat sa akon mga palatukuran, kag magbantay sang akon mga sugo. Yari karon, Ako ang Ginuo sang Himaya. Ginlansang ako sa krus para sa kalibutan agud tanan sila nga nagapati sa akon ngalan makaangkon sang wala’y katapusan nga kabuhi.”

Ang sinsero nga handum ni Joseph nga maghinulsol kag pangitaon ang kaluwasan sang iya kalag nakabulig sa iya mga magpalapit kay Jesucristo kag magbaton sang kapatawaran sang iya mga sala. Ining dalayon nga panikasog nagbukas sang pwertahan sa nagapadayon nga Pagpanumbalik sang ebanghelyo ni Jesucristo.

Ining matahum nga eksperiyensya ni Propetang Joseph Smith nagapakita kon paano ang balatyagon sang kahuyang kag kakulangan makabulig sa aton nga makilala ang aton nahulog nga kinaiya. Kon mapainubuson kita, ini makabulig sa aton nga marealisar ang aton pagkinahanglan kay Jesucristo kag mapukaw sini ang handum sang aton mga tagipusuon nga magliso sa Manluluwas kag maghinulsol sang aton mga sala.

Mga abyan ko, ang paghinulsol kalipay! Ang matam-is nga paghinulsol kabahin sang adlaw-adlaw nga proseso sa diin, “dinalan sa dinalan, pagsulundan sa pagsulundan,” ginatudloan kita sang Ginuo nga magpangabuhi sang kabuhi nga nasentro sa Iya mga ginatudlo. Pareho kay Joseph kag Nefi, pwede kita “mag-ampo sa [Dios] agud kaluoyan [kita]; kay gamhanan sia sa pagluwas.” Sarang Niya tumanon ang bisan ano nga matarong nga handum ukon panginahanglan kag mapaayo ang bisan ano nga pilas sa aton mga kabuhi.

Sa Libro ni Mormon: Isa pa ka Saksi kay Jesucristo, ikaw kag ako makabasa sing di-maisip nga mga istorya sang mga indibidwal nga nakatuon kon paano magpalapit kay Cristo paagi sa sinsero nga paghinulsol.

Luyag ko ipaambit sa inyo ang halimbawa sang mapinalanggaon nga kaluoy sang Ginuo paagi sa isa ka eksperiyensya nga natabo sa akon puluy-an sa isla sang Puerto Rico.

Sa amon banwa nga Ponce sadto nga ang isa ka sister sa Simbahan nga si Célia Cruz Ayala nagdesisyon nga hatagan niya sang Libro ni Mormon ang isa ka abyan. Ginputos niya ini kag gindul-ong ining regalo, nga mas malahalon para sa iya sangsa mga diamante ukon ruby, siling niya. Sang nagapakadto na sia, ginpalapitan sia sang kawatan, gin-agaw ang iya bag, kag gindalagan ang espesyal niya nga regalo.

Sang gin-istorya niya ini sa simbahan, siling sang iya abyan, “Basi wala ka lang kabalo! Amo na ini ang imo oportunidad para ipakigbahin ang ebanghelyo!”

Pagligad sing pila ka adlaw, kabalo kamo kon ano ang natabo? Si Célia nakabaton sang sulat. Ari sa kamot ko subong ang ina nga sulat nga ginhatag ni Célia. Siling diri:

“Mrs. Cruz:

“Patawara ako, patawara ako. Wala ka lang kabalo kon daw ano ang paghinulsol ko nga ginkawatan ta ka. Pero tungod sini, nagbag-o ang kabuhi ko kag padayon nga magabag-o.

“Atong libro [ang Libro ni Mormon] nakabulig gid sa akon kabuhi. Gintay-og ako sang damgo sadtong tawo sang Dios. … Ibalik ko ining imo lima ka [dolyares,] kay indi ko ini magasto. Gusto ko mabal-an mo nga daw may kasanag sa imo. Inang kasanag ang nagpugong sa akon [nga sakiton ka], kundi nagdalagan na lang ako.

“Gusto ko mabal-an mo nga makita mo ako liwat, pero indi mo na ako makilala, kay mangin utod mo na ako. … Diri sa ginaestaran ko, kinahanglan ko pangitaon ang Ginuo kag magsimba sa ginasimbahan mo.

“Ang mensahe nga ginsulat mo sa sinang libro nagpahibi sa akon. Halin sang Miyerkules sang gab-i indi ko ini mauntatan basa. Nangamuyo ako kag nangayo nga patawaron ako sang Dios [kag] patawara ako. … Abi ko ang pinutos mo nga regalo pwede ko mabaligya. [Sa baylo,] gintulod ako sini nga [liwaton] ang akon kabuhi. … Patawara ako, patawara ako, maluoy ka.

“Ang nagapanago mo nga abyan.”

Mga kauturan, ang kasanag sang Manluluwas sarang maglab-ot sa aton, bisan ano ang aton mga sirkumstansya. “Indi matabo nga maglugdang kamo sing mas madalom sangsa silak sang kasanag sang Pagbayad-Sala ni Cristo,” siling ni Pangulong Jeffrey R. Holland.

Tuhoy sa wala ginpaabot nga magbaton sang regalo ni Célia, ang Libro ni Mormon, ining brother padayon nga nagasaksi pa gid sang kaluoy sang Ginuo. Bisan pa nadugayan antes ginpatawad sining brother ang iya kaugalingon, nakakita sia sang kalipay sa paghinulsol. Daw ano nga milagro! Isa ka matutum nga sister, isa ka Libro ni Mormon, sinsero nga paghinulsol, kag ang gahum sang Manluluwas nagresulta sa pagpangalipay sa kabug-osan sang mga bugay sang ebanghelyo kag sagrado nga mga kasugtanan sa balay sang Ginuo. Iban nga miyembro sang pamilya nagsunod kag nagbaton sang sagrado nga mga responsibilidad sa ulubasan sang Ginuo, lakip na ang full-time nga pang-misyonaryo nga pag-alagad.

Kon magpalapit kita kay Jesucristo, ang aton banas sang sinsero nga paghinulsol sa ulihi magadala sa akon sa balaan nga templo sang Manluluwas.

Daw ano ka matarong nga motibo ang magtinguha nga mangin matinlo—nga mangin bagay sa kabug-osan sang mga bugay nga ginhimo posible sang aton Amay nga Langitnon kag Iya Anak paagi sa sagrado nga mga kasugtanan sa templo! Ang regular nga pag-alagad sa balay sang Ginuo kag pagtinguha nga tumanon ang sagrado nga mga kasugtanan nga ginahimo naton didto magapatubo sang aton handum kag ikasarang nga maeksperiyensyahan ang pagbag-o sang tagipusuon, kusog, kaisipan, kag kalag nga kinahanglanon naton para mangin mas pareho sa aton Manluluwas. Si Pangulong Russell M. Nelson nagpamatuod: “Wala sang mas magabukas sang langit [sangsa pagsimba sa templo]. Wala gid!”

Pinalangga kong mga abyan, pamatyag bala ninyo daw kulang kamo? Nga indi kamo bagay? Ginaduhaduhaan bala ninyo ang inyo kaugalingon? Siguro nagapamangkot kamo: Masarangan ko ni ayhan?? Basi ulihi na ang tanan? Ngaa nagapalya ako nga grabe man ang pagtinguha ko?

Mga kauturan, sigurado makahimo kita sang mga sala sa aton pagpanglakaton. Pero tandai nga, sa gintudlo ni Elder Gerrit W. Gong: “Ang Pagbayad-Sala sang aton Manluluwas wala dulonan kag wala katapusan. Ang kada isa sa aton nagatalang kag nagapalya. Kon kaisa, nagakadula kita. Mapinalanggaon kita nga ginapadumdom sang Dios nga bisan diin man kita ukon bisan ano ang aton ginhimo, pwede gid kita magbalik. Nagahulat Sia nga handa sa paghakos sa aton.”

Sa gintudlo man sang akon mahal nga asawa nga si Cari Lu, tanan kita kinahanglan nga maghinulsol, magbalik, kag magliwat sang oras sa “zero o’clock” kada adlaw.

Ang mga sablag magaabot. Indi naton paghulaton nga magbudlay ang tanan antes magliso sa Dios. Indi naton paghulaton tubtob sa katapusan sang aton kabuhi para maghinulsol gid. Kundi, subong pa lang, bisan diin man kita sa dalan sang kasugtanan, magtutok sa nagatubos nga gahum ni Jesucristo kag sa handum sang aton Amay nga Langitnon nga magbalik sa Iya.

Ang balay sang Ginuo, Iya balaan nga mga kasulatan, Iya balaan nga mga propeta kag mga apostoles nagainspirar sa aton nga magtinguha para sa personal nga pagkabalaan paagi sa doktrina ni Cristo.

Kag si Nefi nagsiling: “Kag karon, tamda, pinalangga kong mga kauturan, amo ini ang dalan; kag wala na sing iban pa nga dalan ukon ngalan nga ginhatag sa idalom sang langit nga paagi sa sini ang lalaki [kag babayi] mahimo nga maluwas sa ginharian sang Dios. Kag karon, tamda, amo ini ang doktrina ni Cristo, kag ang bugtong kag matuod nga doktrina sang Amay, kag sang Anak, kag sang Balaan nga Espiritu.”

Ang proseso sang “pagpakig-uli” sa Dios mahimo nga daw mabudlay. Pero ikaw kag ako pwede magpundo, magpahimuyong, magtulok sa Manluluwas, kag maghandum nga pangitaon kag aksyonan ang gusto Niya nga bag-uhon naton. Kon himuon naton ini nga sinsero, masaksihan naton Iya nga pagpaayo. Kag panumduma kon paano mabugayan ang aton mga kaliwatan kon batunon naton ang dulot sang Ginuo nga paghinulsol!

Ang Dakong Maninihon, tudlo sang akon tatay, magadihon kag magapapino sa aton, nga ayhan mabudlay. Apang, ang Dakong Manugbulong magatinlo man sa aton. Naeksperiyensyahan ko kag padayon nga naeksperiyensyahan ina nga nagapang-ayo nga gahum. Nagasaksi ako nga natabo ini paagi sa pagtuo kay Jesucristo kag sa adlaw-adlaw nga paghinulsol.

O, kanami nga ulikdon niya ako

Panginmatyan ako!

Nagapamatuod ako sa pagpalangga sang Dios kag sa wala dulonan nga gahum sang Pagbayad-Sala sang Iya Anak. Mabaskog naton ini nga mabatyagan kon sinsero kag bug-os tagipusuon kita nga maghinulsol.

Mga abyan, saksi ako sang mahimayaon nga Pagpanumbalik sang ebanghelyo paagi kay Propetang Joseph Smith kag sa diosnon nga giya sang Manluluwas karon paagi sa Iya propeta kag taghambal nga si Pangulong Russell M. Nelson. Kabalo ako nga si Jesucristo buhi kag Sia ang Dako nga Manugbulong sang aton mga kalag. Kabalo ako kag nagapamatuod nga ining tanan matuod, sa balaan nga ngalan ni Jesucristo, amen.