10:13

Handa ang Iya Kamot sa Pagbulig sa Aton

Ni Elder Juan Pablo Villar

Sang Sitenta

Kon maglab-ot kita kay Jesucristo nga may pagtuo, ara gid Sia pirme.

Sang bata pa ako, bilang pamilya nagbakasyon kami sa isa ka baybayon sang akon tumandok nga pungsod, ang Chile. Nalipay ako nga maghinguyang sang pila ka adlaw nga magkasadya sang tig-ilinit upod sa akon pamilya. Nalipay man ako kay abi ko makabuylog na gid man ako kag himuon ang kinaandan nga ginahimo sang akon duha ka magulang nga lalaki para sa kalingawan sa tubig.

Isa ka adlaw ang akon mga utod nga lalaki naghampang kung sa diin ang mga balod nagawaswas, kag pamatyag ko dako kag hamtong na ako para sundon sila. Samtang nagapakadto ako sa sina nga lugar, narealisar ko nga ang mga balod mas dalagko sangsa makita mo gikan sa baybayon. Sa hinali, may balod nga madasig nga nagpalapit sa akon, nga nakibot ako. Daw gin-agaw ako sang gahum sang kinaugali, kag ginguyod ako sa kadadalman sang dagat. Wala ako sing nakita ukon nabatyagan nga bisan ano nga basehan samtang ginahaboy-haboy ako sang tubig. Samtang nagahunahuna ako nga mahimo ako malunod, nabatyagan ko ang isa ka kamot nga nagaguyod sa akon pakadto sa ibabaw. Sang ulihi, nakita ko ang adlaw kag nakaginhawa.

Nakita sang akon utod nga si Claudio ang akon mga pagtinguha nga mangin isa ka hamtong kag nagpalapit para luwason ako. Indi ako malayo sa baybay. Bisan pa manabaw ang tubig, naglibog akon ulo kag wala ko marealisar nga mabuligan ko man lang kuntani ang akon kaugalingon. Ginhambalan ako ni Claudio nga kinahanglan ko maghalong kag, kon luyag ko, mahimo niya ako tudloan. Bisan pila na ka galon sang tubig ang akon natulon, ang akon bugal kag handum nga mangin mas hamtong mas mabaskog, kag nagsiling ako, “Siyempre ah.”

Siling ni Claudio sa akon nga kinahanglan ko sulungon ang mga balod. Hambal ko sa akon kaugalingon mapierde gid ako sa daw dako nga pader sang tubig.

Samtang nagahilapit ang bag-o nga dako nga balod, madasig nga nagsiling si Claudio: “Tan-awa ako; amo ini ang imo paghimo sini.” Nagdalagan si Claudio pakadto sa nagapadulong nga balod kag naglumpat sa sini antes ini ma-utod. Nagdayaw gid ako sa iya paglumpat amo nga wala ko makita ang masunod nga nagapadulong nga balod. Gani sa liwat gindala ako sa kadadalman sang dagat kag gin-itsa sang mga puwersa sang kinaugali. Pagligad sang pila ka segundo, may kamot nga nagkapyot sa akon, kag ginguyod ako liwat pakadto sa ibabaw kag hangin. Naghaganhagan ang akon bugal.

Sini nga tion gin-agda ako sang akon utod nga maglumpat upod sa iya. Suno sa iya pangagda, ginsunod ko sia, kag naglumpat kami sing dungan. Matyag ko daw ginadaug ko ang pinakakomplikado nga hangkat. Sa pagkamatuod, indi ini mahapos, apang nahimo ko ini, bangod sang bulig kag halimbawa nga ginpakita sang akon utod nga lalaki. Ang iya kamot nagluwas sa akon sing makaduha ka beses; ang iya halimbawa nagpakita sa akon kon paano atubangon ang akon hangkat kag mangin madinalag-on sa sina nga adlaw.

Si Pangulong Russell M. Nelson nag-agda sa aton nga maghunahuna sing selestiyal, kag luyag ko nga sundon ang iya laygay kag iaplikar ini sa akon istorya sa tig-ilinit.

Ang Gahum sang Manluluwas sa Kasumpong

Kon maghunahuna kita sing selestiyal, mahangpan naton nga sa aton mga kabuhi magaatubang kita sang mga hangkat nga daw mas dako pa sangsa aton kapasidad nga daugon ang mga ini. Sa tion sang aton mortal nga panahon, ginapaidalom kita sa mga pag-atake sang kasumpong. Kaangay sang mga balod nga may gahum sangsa akon sadto nga adlaw sang tig-ilinit, mahimo kita magbatyag nga wala sing gahum kag luyag magpadala sa mas mabaskog nga kapalaran. Yadtong “malain nga mga balod” mahimo nga magtulod sa aton sa diin nga mga kilid-kilid. Apang indi pagkalimti kon sin-o ang may gahum sa sina nga mga balod kag, sa kamatuoran, sa tanan nga butang. Amo ina ang aton Manluluwas, si Jesucristo. May gahum Sia sa pagbulig sa aton gikan sa tagsa ka makaluluoy nga kahimtangan ukon malain nga sitwasyon. Bisan pa kon nagabatyag kita nga malapit sa Iya, mahimo gihapon Niya kita malab-ot kon sa diin kita sa aton sitwasyon subong.

Samtang nagadab-ot kita sa Iya nga may pagtuo, yara Sia pirme, kag sa Iya tion, mangin handa Sia kag luyag magkapyot sang aton mga kamot kag sa pagguyod sa aton pakadto sa isa ka luwas nga duog.

Ang Manluluwas kag ang Iya Halimbawa sa Pag-alagad

Kon kita nagahunahuna sing selestiyal, kilalahon naton si Jesucristo bilang isa ka wala sing kasawayan nga halimbawa sang pag-alagad. May sulundan para sa aton sa balaan nga mga kasulatan kon Sia ukon ang Iya mga sumulunod nagalbulig sa isa ka tawo nga nagakinahanglan sang bulig, pagluwas, ukon isa ka bugay samtang ginalab-ot nila ang ila mga kamot. Subong sang akon istorya, nahibal-an ko nga ang akon utod nga lalaki yara didto, apang ang pag-upod indi bastante para sa akon. Nahibal-an ni Claudio nga ginabudlayan ako, kag nagkadto sia sa pagbulig sa pagkuha sa akon sa tubig.

Kon kaisa, nagahunahuna kita nga kinahanglan lang naton nga yara para sa isa ka tawo nga nagakinahanglan sang bulig, kag sa masami may yara pa kita sing sobra pa sa sina nga mahimo. Ang pag-angkon sang walay katapusan nga panan-awan makabulig sa aton sa pagbaton sang rebelasyon sa paghatag sang sibu sa tion nga bulig sa iban nga nagakinahanglan. Makasalig kita sa giya kag inspirasyon sang Balaan nga Espiritu agud mahibal-an kon ano nga sahi sang bulig ang kinahanglanon, kon bala ini temporal nga suporta pareho sang emosyonal nga kasulhayan, pagkaon, ukon bulig sa adlaw-adlaw nga mga buluhaton, ukon espirituhanon nga giya sa pagbulig sa iban sa ila pagpanglakaton sa paghanda, paghimo, kag pagtahod sang sagrado nga mga kasugtanan.

Ang Manluluwas Handa sa Pagluwas sa Aton

Sang si Pedro, ang nauna nga Apostoles, “naglakat sa ibabaw sang tubig, sa pagkadto kay Jesus, … nahadlok sia; kag nagasugod sa paglugdang,” nian “nagsinggit sia, nga nagasiling, Ginuo, luwasa ako.” Nahibal-an ni Jesus ang pagtuo nga ginpakita ni Pedro sa pagkadto sa Iya sa ibabaw sang tubig. Nahibal-an man Niya ang kahadlok ni Pedro. Suno sa kasaysayan, si Jesus “sa gilayon … gin-untay ang iya kamot, kag ginkaptan sia,” nga nagasiling sang masunod nga mga pulong: “O ikaw nga may diutay nga pagtuo, ngaa bala nagduhaduha ka?” Ang iya mga pulong wala sa pag-akig kay Pedro kundi sa pagpahanumdom sa iya nga Sia, ang Mesias, kaupod niya kag ang mga disipulo.

Kon maghunahuna kita sing selestiyal, mabaton naton ang kumpirmasyon sa aton mga tagipusuon nga si Jesucristo amo gid ang aton Manluluwas, ang aton Manugpangapin sa Amay, kag ang aton Manunubos. Sa aton paggamit sang pagtuo sa Iya, luwason Niya kita gikan sa aton napukan nga kahimtangan, labaw sa aton mga hangkat, mga kahuyangan, kag mga kinahanglanon sa sining umalagi nga kabuhi, kag hatagan kita sang pinakadako sa tanan nga mga dulot, nga amo ang kabuhi nga walay katapusan.

Ang Manluluwas Wala Nagapangampo sa Aton

Ang akon utod nga lalaki wala nagpangampo sa akon sadto nga adlaw kundi nagpadayon agud matun-an ko kon paano ini himuon para sa akon kaugalingon. Nagpadayon sia, bisan pa nga kinahanglan niya ako luwason sing duha ka beses. Nagpadayon sia, bisan pa indi ko ini makuha sang primero. Nagpadayon sia agud malandas ko ina nga hangkat kag magmadinalag-on. Kon maghunahuna kita sing selestiyal, marealisar naton nga ang aton Manluluwas yara didto sa madamo nga mga beses kon kinahanglanon sa paghatag sang bulig kon luyag naton magtuon, magbag-o, magdaug, mag-atubang, ukon magmadinalag-on sa bisan ano nga magadala sang matuod kag walay katapusan nga kalipay sa aton mga kabuhi.

Ang mga Kamot sang Manluluwas

Ang balaan nga mga kasulatan nagahimo sang simbolo kag kahulugan sang mga kamot sang Manluluwas. Sa Iya nagapasag-uli nga sakripisyo, ang Iya mga kamot gintuhog sang mga lansang agud ipahamtang Sia sa krus. Pagkatapos sang Iya Pagkabanhaw, nagpakita Sia sa Iya mga disipulo sa isa ka perpekto nga lawas, apang ang mga marka sa Iya mga kamot nagapabilin bilang isa ka pahanumdom sang Iya walay katapusan nga sakripisyo. Ang Iya kamot yara pirme para sa aton, bisan pa nga indi naton ini makita ukon mabatyagan sa una, tungod kay ginpili Sia sang aton Amay nga Langitnon nga mangin aton Manluluwas, ang Manunubos sang tanan nga katawhan.

Kon nagapanumdom ako sang selestiyal, nahibal-an ko nga wala kita ginabilin nga nagaisahanon sa sini nga kabuhi. Samtang dapat naton atubangon ang mga hangkat kag mga pagtilaw, ang aton Amay nga Langitnon nakahibalo sang aton mga ikasarang kag nakahibalo nga masarangan naton ukon malampuwasan ang aton mga kabudlayan. Dapat naton himuon ang aton bahin kag magdangop sa Iya nga may pagtuo. Ang Iya Pinalangga nga Anak, si Jesucristo, amo ang aton manluluwas kag yara pirme. Sa Iya ngalan, sa sagrado nga ngalan ni Jesucristo, amen.