Pagkabalaan sa Ginuo sa Adlaw-adlaw nga Pagkabuhi

Ni Elder Gerrit W. Gong

Sang Korum sang Dose ka Apostoles

Ang pagkabalaan sa Ginuo nagahimo sang adlaw-adlaw nga pagkabuhi nga sagrado. Nagadala ini sa aton mas palapit kag mas malipayon sa Ginuo kag sa isa kag isa.

Ang amon pagtililipon sang pamilya Gong sang sini lang naglakip sang isa ka makalilipay nga pasundayag sang talento, nga may paindis-indis sa dad jokes [mga lahog sang amay].

Pero ini nga paindis-indis indi kinaandan. Sa isa ka grupo amo ang Lolo (ako) kag duha ka apo, nagaedad 12 kag 11 anyos. Sa pihak nga grupo amo ang artificial intelligence (AI) nga ginaprograma sang isa ka pakaisa nga magsugid sang dad jokes sa estilo ni Gerrit W. Gong. Si Lolo Gerrit W. Gong kontra sa AI Gerrit Gong.

Ang mga apo kag ako ang nag-una.

Ano ang tawag mo sa dinosaur nga ginabunggo ang iya salakyan? Tyrannosaurus Wrecks.

Si AI Gerrit Gong gintudloan—maghunahuna pareho kay Gerrit W. Gong. Maghambal pareho sa iya.

AI Gerrit Gong—“Yari ang isa ka dad joke nga ginhambal kuno abi ni Gerrit W. Gong, nga gamit ang iya mainit, madinumdumon, kag makapabaskog nga estilo: Ngaa ang kubos nga kahoy nagapayuhum sa mga tawo? Tungod nagpanggamot ini sa pagpalangga kag nagpananga sang kaayo. Pareho sinang puno, kita man sarang makakuha sang kusog sa aton mga gamot kag kalipay sa pagpakita sang kaayo sa iban nga tawo.

Te, ano sa pamatyag n’yo? Amo ina nga gintawag sila nga dad jokes.

Sa palibot naton may mga oportunidad sa pagkadlaw, pagkalipay, pagtan-aw nga may mapinasalamaton nga mga mata. Ang aton isa ka ebanghelyo sang kalipay kag pagkabalaan sa adlaw-adlaw nga pagkabuhi. Ang pagkabalaan nagapahamtang sang mga butang para sa sagrado nga katuyoan. Pero ang pagkabalaan nagaagda man sa aton nga updan ang matag-adlaw nga pagpangabuhi sang sagrado—nga malipay sa matag-adlaw nga bugay sa tunga sining kalibutan sang mga kahuol kag mga hangkat. Sa paglakat upod ang Ginuo, kita kinahanglan nga mangin balaan, tungod Sia balaan, kag agud mabuligan kita nga mangin balaan, ang Ginuo nagaagda sa aton nga maglakat upod sa Iya.

Ang tagsa sa aton may istorya. Kon ako kag si Sister Gong makigkita sa inyo—mga miyembro sa Simbahan kag mga kaabyanan sa madamo nga lugar kag sirkumstansya—ang inyo mga istorya sang pagkabalaan sa Ginuo sa matag-adlaw nga pagkabuhi nagainspirar sa amon. Ginapangabuhi ninyo ang pito ka K: komunyon sa Dios, komunidad kag kaluoy sa isa kag isa, katampad kag kasugtanan sa Dios, pamilya, kag mga abyan—kabuhi nga nasentro kay Kristo.

Nagadamo nga nagadamo ang mga ebidensya nga nagapakita sang talalupangdon nga kamatuoran: ang relihioso nga mga tumuluo sa kabilogan mas malipayon, mas maayo sing panglawas, kag mas may balatyagon sang katumanan sangsa ila nga wala sing espirituhanon nga pangako ukon koneksyon. Ang kalipay kag ang kaayawan sa kabuhi, mental kag pisikal nga ikaayong-lawas, kasayuran kag katuyoan, ugali kag kinaya, suod nga kaangtanan, bisan ang pinansyal kag materyal nga kalig-unan—sa tagsa ka kategorya, ang mga nagapangabuhi sang ila relihiyon nagasanyog.

Nagatagamtam sila sing mas maayo nga pisikal kag mental nga panglawas kag mas may kaayawan sa kabuhi sa tanan nga panahon kag ano man nga sahi sang grupo sang mga tawo.

Inang ginatawag sang mga manugpanalawsaw nga “relihioso nga kalig-on” nagatanyag sang kaathag, katuyoan, kag inspirasyon sa tunga sang mga kabudlayan sa kabuhi. Ang panimalay nga puno sang pagtuo kag komunidad sang mga Santos nagadaug sang pag-isahanon kag kasubo sa tunga sang kadam-an. Ang pagkabalaan sa Ginuo nagasiling “indi” sa malaw-ay nga mga hambalanon, “indi” sa matigdas nga kaalam nga nagahalit sa iban, “indi” sa social media nga nagapangwarta paagi sa pagtulod sang kaakig kag pagbinahin-bahin. Ang pagkabalaan sa Ginuo nagasiling sang “huo” sa sagrado kag matinahuron, “huo” sa aton pagka-pinakahilway, pinakamalipayon, pinakamatuod, pinakamaayo nga kaugalingon samtang nagasunod kita sa Iya sa pagtuo.

Ano bala kon sayuron ang pagkabalaan sa Ginuo sa adlaw-adlaw?

Ang pagkabalaan sa Ginuo sa adlaw-adlaw nga pagkabuhi daw pareho sa duha ka young adult, kasal sing isa ka tuig, nga nagaambitanay sing may katunay kag kahanda nga maimpluwensyahan sang mga kasugtanan sang ebanghelyo, sakripisyo, kag pag-alagad sa ila nagasugod pa lang nga mga kabuhi.

Ang asawa nagsugod sa pagsiling, “Sang sa hayskul, ara ako sa madulom nga kahimtangan. Nabatyagan ko nga wala ang Dios para sa akon. Isa ka gab-i, ang isa ka text halin sa abyan nagsiling, ‘Oy, nabasa mo na bala ang Alma 36?’

“Sang nagsugod ako sa pagbasa,” siling niya, “gindaug ako sang paghidaet kag gugma. Pamatyag ko nga ginahatagan ako sining daku nga hakos. Sang ginbasa ko ang Alma 36:12, nahibal-an ko nga nakita ako sang Amay nga Langitnon kag nahibal-an kon ano gid ang akon ginabatyag.”

Nagpadayon sia, “Antes kami magpakasal, nangin prangka ako sa akon nobyo nga wala ako sing daku nga testimonya parte sa ika-pulo. Ngaa ginapangayo sang Dios nga maghatag kami sing kuwarta samtang ang iban madamo kaayo sing mahatag? Ang akon nobyo nagbulig sa pagpaathag nga indi ini parte sa kuwarta kundi sa pagsunod sa isa ka sugo nga ginpangabay sa amon. Ginhangkat niya ako sa pagsugod bayad sang ika-pulo.

“Nakita ko gid ang pagtubo sang akon testimonya,” siling niya. “Kon kaisa ang kuwarta maiwat, apang nakita namon ang madamo nga mga pagpakamaayo, kag bisan paano ang mga sweldo makaigo man.”

Sa amo man, “sa akon klase sa nursing,” siling niya, “Ako lang ang miyembro sang Simbahan kag ako lang ang may bana. Madamo nga tinion nga nagpauli ako halin sa klase nga naugot ukon nagahibi tungod akon nabatyagan nga lain ang ila pagtratar sa akon kag nagakomento sing negatibo parte sa akon mga ginapatihan, sa akon pagsuksok sang garments, ukon sa akon pagpamana nga lamharon pa.”

Pero padayon niya, “Sining nagligad nga semester akon natun-an nga mas maayo nga akon ipahibalo ang akon mga ginapatihan kag mangin maayo nga ehemplo sang ebanghelyo. Ang akon ihibalo kag testimonya nagtubo bangod gintilawan ako sa akon ikasarang sa pagtindog sing isahanon kag mangin mabakod sa kon ano ang akon ginapatihan.”

Ang lamharon nga bana nagdugang, “Antes sang akon misyon may mga tanyag sa akon nga maghampang sang baseball sa kolehiyo. Sa paghimo sang mabudlay nga desisyon, ginpaiway ko yadtong mga tanyag kag naglakat sa pag-alagad sa Ginuo. Indi ko pag-ibaylo yadtong duha ka tuig sa bisan ano.

“Pagpauli,” siling niya, “nagpaabot ako sang mabudlay nga pagbalhin apang nasalapuan ko ang akon kaugalingon nga mas mabakod, mas madasig, kag mas mapagros. Mas mabaskog ang akon paghaboy [sang bola] sangsa sang naghalin ako. Mas madamo sang tanyag sa akon nga maghampang sangsa paghalin ko, lakip na ang akon ginahandum nga eskwelahan. Kag, labing importante,” siling niya, “nagasalig ako sa Ginuo sing labi pa sangsa sang una.”

Naghinakop sia, “Bilang isa ka misyonero gintudlo ko nga ang Amay nga Langitnon nagasaad sa aton sing gahum sa aton mga pangamuyo, apang kon kaisa ginakalimtan ko ina para sa akon kaugalingon.”

Ang aton talaguan sang pangmisyonero nga mga pagpakamaayo sang pagkabalaan-sa-Ginuo bugana kag puno. Ang pinansyal, tiyempo, kag iban pa nga mga sirkumstansya masami nga indi mahapos. Apang kon ang mga misyonero sang tanan nga edad kag ginhalinan nagakonsagrar sang pagkabalaan sa Ginuo, ang tanan mahimo nga mag-uswag sa tion kag paagi sang Ginuo.

Karon sa pagsugid sang inagihan nga natabo 48-ka-tuig ang nagligad, ang isa ka senior nga misyonero nagapaambit, “Luyag sang akon amay nga makakuha ako sang edukasyon sa kolehiyo, indi nga maglakat sa misyon. Wala madugay pagkatapos sadto, gin-atake sia sa tagipusuon kag napatay sa edad nga 47. Nakonsensya ako. Paano ko mapaayo ang relasyon ko sa akon amay?

“Sang ulihi,” padayon niya, “pagkatapos nga nagdesisyon ako nga magmisyon, nadamgohan ko ang akon amay. Malinong kag kontento, nalipay sia nga magaalagad ako.”

Ining senior nga misyonero nagapadayon, “Pareho sa ginatudlo sang Doktrina kag mga Kasugtanan 138, nagapati ako nga ang akon amay makaalagad bilang isa ka misyonero sa kalibutan sang mga espiritu. Ginahanduraw ko ang akon amay nga nagabulig sa amon lolo sa tuhod, nga nagbiya sa Germany sa edad nga 17 kag nadula sa pamilya, nga makita liwat.”

Ang iya asawa nagdugang, “Sa lima ka mag-utod nga lalaki sa pamilya sang akon bana, ang apat nga nag-alagad sa mga misyon amo ang mga may mataas nga kurso sa kolehiyo.”

Ang pagkabalaan sa Ginuo sa adlaw-adlaw nga pagkabuhi daw pareho sa isa ka lamharon nga nagabalik nga misyonero nga nakatuon nga tugutan ang Dios nga magpangibabaw sa iya kabuhi. Antes sini, sang ginpangabay nga magbendisyon sa isa ka tawo nga nagamasakit sing grabe, ining misyonero nagsiling, “May pagtuo ako; bendisyonan ko sia nga mag-ayo. Apang,” siling sang nagbalik nga misyonero, “natun-an ko sa sina nga tion nga magpangamuyo indi para sa kon ano ang akon luyag, kundi para sa kon ano ang nahibaloan sang Ginuo nga kinahanglan sang tawo. Ginbendisyonan ko ang utod sang paghidaet kag kasulhayan. Sang ulihi nagtaliwan sia sing malinong.”

Ang pagkabalaan sa Ginuo sa adlaw-adlaw nga pagkabuhi daw isa ka gamay nga hilikuton nga nagalab-ot sa pihak sang belo para magkonektar, maglugpay, kag magpabakod. Ang administrador sang isa ka daku nga unibersidad nagasiling nga nakabatyag sia nga ang mga indibidwal nga kilala lang niya sa mga sugilanon nga iya nabatian nagapangamuyo para sa iya. Yadtong mga indibidwal nagdedikar sang ila kabuhi sa unibersidad kag padayon nga nagaulikid sa misyon kag mga estudyante sini.

Ginahimo sang isa ka utod nga babayi ang iya bug-os nga masarangan kada adlaw, pagkatapos nga ginluiban sia kag ang iya kabataan sang iya nga bana. Ginadayaw ko gid sia kag ang iban pa nga kaangay niya. Isa ka adlaw samtang nagapamilo sang linabhan, ang iya kamot nagatongtong sa tumpok sang mga garment, nagpanghayhay sia sa iya kaugalingon, “Ano ang pulos?” Nabatyagan niya ang isa ka malulo nga tingog nga nagapasalig sa iya, “Ang imo mga kasugtanan ara sa akon.”

Sa sulod sang 50 ka tuig, ang isa pa ka utod nga babayi naghandum sing kaangtanan sa iya amay. “Sang nagadaku ako,” siling niya, “daw grupohay ang akon mga magulang nga lalaki kag ang akon amay, kag dayon ari lang ako diri—ang bugtong nga anak nga babayi. Ang akon lang luyag amo nga mangin ‘bastante na’ para sa akon amay.

“Dayon nagtaliwan ang akon iloy! Sia lang gid ang nagakonekta sa amon ni tatay.

“Isa ka adlaw,” siling sang sister, “nabatian ko ang isa ka tingog nga nagasiling, ‘Agdaha ang imo amay kag dalha sia sa templo upod sa imo.’ Amo yadto ang umpisa sang duha-ka-beses-kada-bulan nga date upod sa akon amay sa balay sang Ginuo. Ginhambalan ko ang akon amay nga palangga ko siya. Ginhambalan niya ako nga palangga niya man ako.

“Ang paghinguyang sang tion sa balay sang Ginuo nag-ayo sa amon. Ang akon iloy indi makabulig sa amon diri sa duta. Ginkinahanglan niya ang mangin yara sa pihak nga bahin sang belo agud magbulig sa pagkay-o sang naguba. Ang templo nagkompleto sang amon pagpanglakaton padulong sa pagkabug-os bilang isa ka walay katapusan nga pamilya.”

Ang amay nagasiling, “Ang dedikasyon sang templo isa ka daku nga espirituhanon nga eksperiyensya para sa akon kag sa akon bugtong nga anak nga babayi. Karon upod kami nga nagatambong kag nagabatyag nga nagabakod ang amon pagpalangga.”

Ang pagkabalaan sa Ginuo sa adlaw-adlaw nga pagkabuhi nagalakip sang mga tion sang pag-ulikid kon ang mga hinigugma nagataliwan. Sang temprano sini nga tuig, ang akon pinalangga nga iloy, si Jean Gong, mahidaeton nga nagtaliwan pila ka adlaw antes sang iya ika-98 nga kaadlawan.

Kon pamangkuton mo ang akon iloy, “Gusto mo bala sang rocky road, white chocolate ginger, ukon strawberry nga sorbetes?” Si Nanay masiling, “Huo, palihog, mahimo ko bala matilawan ang kada isa?” Sin-o ang makasiling “indi” sa imo iloy, ilabi na gid kon nanamian sia sang tanan nga eksperiyensia sa kabuhi?

Isa ka bes ginpamangkot ko si Nanay kon ano nga mga desisyon ang nagporma sang iya kabuhi.

Siling niya, “Ang mabunyagan bilang miyembro sang Ang Simbahan ni Jesucristo sang mga Santos sa Ulihing mga Adlaw kag pagsaylo halin sa Hawaii pakadto sa mainland, sa diin nakilala ko ang imo amay.”

Ginbunyagan sang 15-anyos, ang nagaisahanon nga miyembro sang iya daku nga pamilya nga nagbuylog sa aton Simbahan, ang akon iloy may pagtuo sa kasugtanan kag pagsalig sa Ginuo nga nagpakamaayo sang iya kabuhi kag sang tanan nga henerasyon sang amon pamilya. Nahidlaw ako sa akon iloy, pareho man nga nahidlaw kamo sa mga katapo sang inyo pamilya. Pero nakahibalo ko nga wala nadula ang akon iloy. Wala lang sia diri subong. Ginapasidunggan ko sia kag ang tanan nga nagtaliwan bilang maisog nga mga halimbawa sang adlaw-adlaw nga pagkabalaan sa Ginuo.

Siempre, ang pagkabalaan sa Ginuo sa adlaw-adlaw nga pagkabuhi nagalakip sang mas masunson nga pagkadto sa Ginuo sa Iya balaan nga balay. Matuod ini, katapo man kita sang Simbahan ukon mga abyan.

Tatlo ka mag-abyan ang nagkadto sa open house sang Bangkok Thailand Temple.

“Isa ini ka duog sang grabe nga pagpang-ayo,” siling sang isa.

Sa bulunyagan, may isa pa nga nagsiling, “Kon yari ako diri, luyag ko nga matinloan kag indi na magpakasala liwat.”

Ang ikatlo nagsiling, “Mabatyagan mo bala ang espirituhanon nga gahum?”

Sa siyam ka sagrado nga pulong, ang aton mga templo nagaagda kag nagabantala:

“Pagkabalaan sa Ginuo.

“Ang Balay sang Ginuo.”

Ang pagkabalaan sa Ginuo nagahimo sang adlaw-adlaw nga pagkabuhi nga sagrado. Ginapalapit kita sini nga mas malipayon sa Ginuo kag sa isa kag isa kag ginahanda kita nga magpuyo upod sa Dios naton nga Amay, kay Jesucristo, kag sa aton mga mahal sa kabuhi.

Pareho sa akon abyan, ayhan nagapalibog ka kon bala palangga ka sang imo Amay nga Langitnon. Ang sabat isa ka mabaskog, bug-os nga huo! Mabatyagan naton ang Iya pagpalangga kon himuon naton ang pagkabalaan sa Ginuo nga aton tagsa ka adlaw, malipayon kag wala katubtuban. Kabay nga himuon naton ini ang akon ginapangamuyo, sa sagrado nga ngalan ni Jesucristo, amen.

Mga Tanda

1. Halin sang panahon sang Daan nga Katipan, ginatudloan kita, “Busa pakabalaana ang inyo kaugalingon, kag magpakabalaan kamo; kay ako balaan” (Levitico 11:44). Dapat kita maglakat sa pagkabalaan sa atubangan sang Ginoo (tan-awa sa Doktrina kag mga Kasugtanan 20:69), [magtindog] sa balaan nga mga lugar (tan-awa sa Doktrina kag mga Kasugtanan 45:32), [magdumdum] sang adlaw nga inugpahuway (tan-awa sa Exodo 20:8), magsuksok sang balaan nga mga panapton (tan-awa sa Exodo 29:29), [maggamit] sang balaan nga lana sa paghaplas (tan-awa sa Exodo 30:25), pakamaayuhon sang balaan nga mga propeta (tan-awa sa Doktrina kag mga Kasugtanan 10:46), kag magsalig sa balaan nga mga kasulatan (tan-awa sa Doktrina kag mga Kasugtanan 20:11), balaan nga mga layi (tan-awa sa Doktrina kag mga Kasugtanan 20:20), kag balaan nga mga anghel (tan-awa sa Doktrina kag mga Kasugtanan 20:6). Ang pagkabalaan sa Ginuo gintuyo sa pagbugay sang tanan nga aspeto sang aton adlaw-adlaw nga pagpangabuhi.

2. Tan-awa sa Moises 6:34.

3. Tan-awa sa “Religion and Spirituality: Tools for Better Wellbeing?,” Gallup Blog, Okt. 10, 2023, news.gallup.com. “Sa bilog nga kalibutan, ang mga tawo nga may daku nga dedikasyon sa pagkaespirituhanon ukon relihiyon may mas maayo nga ikaayo (wellbeing] sa madamo nga aspeto”—lakip na ang positibo nga mga emosyon, pagpakigbahin sa komunidad, kag sosyal nga mga koneksyon (Faith and Wellness: the Worldwide Connection Between Spirituality Wellbeing [2023], 4, faithandmedia.com/research/gallup).

4. Ang tagsa ka ginkutlo nga eksperiyensia ginpaambit—nga may akon pagdayaw kag apresasyon—sa mga pulong sang mga indibidwal nga natungdan kag paagi sa ila pahanugot.

5. Sa karon sa Simbahan, ang bataon nga mga hamtong nga naga-edad 18–35 (dala ang mga pamatan-on nga solo-lawas kag minyo nga bataon nga mga hamtong) kag single adults (edad 36–45) nagabug-os sang un-tersia (32.5 porsyento) sang kabug-usan nga mga miyembro sang Simbahan. Sa sinang 5.623 milyones ka mga miyembro sang Simbahan, ang bataon kag solo-lawas nga mga hamtong nga naga-edad 18–35 nagabug-os sa numero nga 3.625 milyones (nga sa diin 694,000 ang minyo), kag ang solo-lawas nga mga hamtong nga naga-edad 36–45 nagabug-os sa numero nga 1.998 milyones. Ang aton bataon kag solo-lawas nga mga hamtong talalupangdon; kag ang kada isa malahalon. Ang tagsa may yara sang indibidwal nga istorya sang pagtuo, pagtinguha, kalig-on, kag kaluoy. Ang halimbawa nga ginpaambit diri nagarepresentar sang talalupangdon nga sahi sang mga sugilanon kag eksperiyensia nga ginapaambit sang bataon kag solo-lawas nga mga hamtong samtang nagapakigkita ako sa inyo sa madamo nga mga kahimtangan kag mga sirkumstansya sa bug-os nga Simbahan.

6. Sa karon, mga 77,500 ka mga misyonero ang nagaalagad sa 450 ka misyon sa bug-os nga kalibutan. Nagalakip ini sang mga bataon nga teaching missionaries, bataon nga service missionaries, kag senior couples, apang indi sang 27,800 ka senior service missionaries kag long-term volunteers. Ang kada istorya sang misyonero, halin sa paghanda tubtob sa pag-alagad kag pagbalik, indibidwal kag puno sang pagkabalaan sa Ginuo sa kaugalingon nga inagihan.

   Madamo nga eksperiyensia sang mga misyonero ang nagapakita sing espiritwal nga sulundan. Nagalakip ini sang indibidwal nga panaksihon sang maalwan nga pag-agda kag pagbulig sa iban nga magpalapit kay Jesucristo kag sang misyonero nga mangin disipulo ni Jesucristo kag misyonero nga sinsero nga ginatun-an kag ginapangabuhi ang mga prinsipyo nga ginatudlo sa Iwali ang Akon Ebanghelyo. Ang mga misyonero nga sinsero nga nagatuon kag nagapangabuhi sang mga prinsipyo nga ginatudlo sang Iwali ang Akon Ebanghelyo nagabag-o, bisan pa lubos nga ginabag-o, sang ila mga inagihan sa pagpanaksihon. Natun-an nila nga higugmaon ang mga tawo, mga duog, mga lenguahe, kag mga kultura. Ginatuman nila ang propesiya paagi sa pagdala sang malipayon nga balita sang kabug-osan sang ginpanumbalik nga ebanghelyo ni Jesucristo sa mga pungsod, mga kaliwat, kag mga katawhan. Nakita nila ang maayo sa kag pagtuon sa pagkabuhi upod sa tagsa ka kaupod. Nagatrabaho sila upod sa mga miyembro, mga lider, kag mga abyan sa madamo nga mga sirkumstansya kag ginhalinan, kag madamo pa.

   Ginasagod sang mga misyonero nga sinsero nga nagatuon kag nagapangabuhi sang mga prinsipyo nga ginatudlo sa Iwali ang Akon Ebanghelyo ang pagtuo kag pagsalig. Nagatukod sila sang ginkonsagrar nga mga pag-updanay. Natun-an nila nga ang pagtuman nagadala sing mga pagpakamaayo kag mga milagro. Sa madamo nga iban pa nga personal nga mga paagi, sila matuodtuod nga nangin kag nakahibalo paagi sa kasugtanan nga: “Isa ako ka disipulo ni Jesucristo, ang Anak sang Dios” (3 Nefi 5:13).

7. Ang pila sang aton labing matutom kag maisog nga mga miyembro sang Simbahan, mga kauturan nga babayi kag mga lalaki, nasalapoan ang ila mga kaugalingon nga nagaatubang sang mga sitwasyon nga wala gid nila ginapaabot kag indi gid kuntani pagpilion. Ining matuod nga mga Santos nagapadayon, adlaw-adlaw, masami nga nagahulat sa Ginuo. Ang Ginuo nakahibalo sang kada isa kag, pareho sang mapinalanggaon nga ginapaambit sini nga halimbawa, nagahandum sa pagpaisog kag pagpabakod sa tagsa sa aton sa Iya tion kag paagi.

8. Madamo sing pagkahidlaw sa mga kaangtanan sa mga ginikanan kag kabataan. Nagapasalamat gid ako sa tagsa ka sitwasyon nga, bisan pa pagkatapos sang madamo nga mga tinuig, ang pag-uliay, pagpatawad, kag pag-angkon sang kasugtanan ginatuga ukon ginapanumbalik. Ining maayo nga utod nga babayi indi luyag nga may maghunahuna sing malain sa iya amay. Siling niya, “Isa sia ka maayo kag matutom nga lider kag isa ka maayo nga amay.”

9. Ang isa ka kabaliskaran sang pagkaginikanan amo nga ang mga kabataan ginaporma sing maayo sang kon paano sila ginasagod, apang sa masami diutay lamang ang ila madumduman sang una nga mga tinuig sang ang ila mga iloy wala sing kakapoy, indi maiyaiyahon nga nagpakailoy. Ang mga tinaga kulang sa pagpabutyag sang kamatuoran nga ang akon paghangop, gugma, kag apresasyon sa akon amay kag iloy nagsangkad kag nagdalom samtang ako nangin bana, ginikanan, kag lolo. Sa pagpakita sang kinaugali sang henerasyon sang plano sang kalipay, mahimo naton, sa mga salaming sang templo sang wala’y katapusan, makita ang aton kaugalingon bilang isa ka iloy, lola, lola sa tuhod sa isa ka direksyon kag bilang isa ka anak nga babayi, apo, apo sa tuhod sa pihak nga direksyon.

10. Sa karon, ginabanta 60 porsyento sang mga miyembro sang Simbahan sa bug-os nga kalibutan nagapuyo sa sulod sang 50 milyas (80 km ukon mga isa ka oras nga pagbiyahe sa madamo nga mga lugar) sa balay sang Ginuo. Sa masunod nga mga tinuig, kon ang gin-anunsyo nga mga templo mahuman na, halos tatlo sa apat ka bahin sang mga miyembro sang Simbahan ang magapuyo sa sulod sang isa ka oras nga pagbiyahe pakadto sa isa ka balay sang Ginuo. Depende sa mga sirkumstansya, ginalauman nga bastante na ini kalapit agud makakadto pirme sa Ginuo sa Iya balaan nga balay, kag sa amo mapakamaayo ang mga henerasyon sang hamili nga mga katapo sang pamilya kag ang aton kaugalingon kag ang aton mga kaliwatan.

11. Sa aton mga templo, ang sulundan nga inskripsion amo ang “Pagkabalaan sa Ginuo, ang Balay sang Ginuo.” Pila sa mga templo nagalakip sang kapin pa sa sini nga inskripsyon, pareho sang pagdugang sang ngalan sang Simbahan. Ang pila ka mga templo may inskripsiyon nga ginbaliskad: “Ang Balay sang Ginuo, Pagkabalaan sa Ginuo” (sa Atlanta, Los Angeles, kag San Diego sa Estados Unidos). Ang inskripsiyon sa Logan Utah nga Templo nagasiling lamang, “Pagkabalaan sa Ginuo.”