10:49

Suod kay Jesucristo: Ang Mangin Asin sang Duta

Ni Elder Jose A. Teixeira

Sang Pangulohan sang Sitenta

Kon nagapabilin kita nga suod sa Ginuo, ang aton mga kabuhi natural nga magasalaming sang Iya kasanag, kag mangin “asin kita sang duta.”

Ang Manluluwas nagtudlo nga kon kita “ginatawag sa [Iya] wala’y katubtuban nga ebanghelyo, kag nagapakighisugot paagi sa wala’y katapusan nga kasugtanan, ginakabig [kita] bilang asin sang duta.” Ang asin himo sa duha ka gintingob nga elemento. Indi kita pwede mangin asin nga kita lang; kon mangin asin kita sang duta, dapat kita mangin suod sa Ginuo, kag ina ang akon makita sa pagpakigsimpon ko sa mga miyembro sang Simbahan sa bilog nga kalibutan—makita ko ang tampad nga mga miyembro sang Simbahan nga suod sa Ginuo, dedikado sa ila mga pagtinguha nga mag-alagad sa iban kag mangin asin sang duta.

Ang inyo malig-on nga dedikasyon dalayawon nga ehemplo. Ang inyo pag-alagad ginaapresyar kag ginapakamahal.

Ang aton mga lamharon nagapakita sang dalayawon nga kaisog kag debosyon. Malipayon nila nga ginaobra ang buluhaton sang family history, kag ang ila pirme nga pagbisita sa balay sang Ginuo testigo sang ila dedikasyon. Ang ila kahanda sa paghatag sang tiempo kag kusog agud mag-alagad sa misyon sa bilog nga kalibutan nagapakita sang madalom kag mabakod nga pagtuo. Wala lang sila nagapartisipar kundi nagapanguna sa dalan agud mangin mga disipulo nga suod kay Jesucristo. Ang ila pagserbisyo nagapasilak sang kasanag kag paglaum, nga nagatandog sang madamo nga kabuhi. Sa inyo, nga mga lamharon sang Simbahan, ginapabutyag namon ang amon hugot nga pagpasalamat para sa inyo makainspirar nga pagserbisyo. Indi lang kamo ang palaabuton sang Simbahan kundi ang iya man sini karon. Kamo matuod ang asin sang duta!

Palangga ko ang Ginuong Jesucristo kag nabatyagan nga ginpakamaayo sa oportunidad nga magserbisyo upod sa inyo sa Simbahan sang Ginuo. Ang aton paghiusa kag kusog, nga nabase sa isa naton ka pagtuluohan, nagapasalig sa aton nga wala kita nagaisahanon sa sining buluhaton. Ululupod, makapadayon kita sa pagpauswag sang ginharian sang Dios, nga napundar sa serbisyo, gugma, kag mabakod nga pagtuo.

Sang nagtudlo si Jesucristo malapit sa Dagat sang Galiliea, pirme sia naggamit sang ordinaryo nga mga bagay nga pamilyar sa iya tagpalamati agud magtudlo sang dalagku nga espirituhanon nga mga kamatuoran. Ang isa sinang mga bagay amo ang asin. Si Jesus nagpahayag, “[Kamo] ang asin sang duta,”pulong nga puno sang kahulugan kag importansya, labi na para sa mga tawo sang Iya panahon nga nakaintiendi sang balor sang asin sa madamo nga aspeto.

Ang dumaan nga hilikuton sang pag-ani sang asin sa Algarve, ang na-sur nga rehiyon sang akon pungsod nga Portugal, nagsugod linibo ka tuig ang nagligad sa panahon sang Romanong Emperyo. Talalupangdon nga ang mga metodo nga ginagamit sang mga manug-asin nga ginatawag marnotos, diutay lang ang ginbag-o halin sadto. Ining dedikado nga mga trabahador nagagamit sang tradisyonal nga mga pamaagi, kag nagaobra gamit gid lang ang kamot, nga ginamentinar ang ginpasubli sa madamo nga mga siglo.

Ining dumaan nga metodo nagaani sang ginatawag “bulak sang asin.” Agud lubos nga maapresyar ang komplikado nga proseso sang pag-ani sang bulak sang asin, importante nga maintiendihan ang kahimtangan sang pagpatubas sini. Ang mga katunggan sang asin sa higad-baybay sang Algarve nagahatag sang maayo gid nga kondisyones sa pagpatubas sang asin. Ang tubig sang dagat ginapailig sa manabaw nga mga punong, nga kilala bilang asinan, sa diin ginapabay-an ini agud maghubas sa init sang adlaw. Paghubas sang tubig, ang bulak sang asin nagaporma sang mapino nga mga kristal sa ibabaw sang asinan. Ining mga kristal tama ka puro kag may pinasahi, manami nga kapinohon. Mainandamon nga ginakandos sing hapaw sang marnotos ang mga kristal sa ibabaw sang tubig gamit ang espesyal nga kagamitan, isa ka proseso nga nagapangayo sang daku nga kasagad kag kasibu. Sa Portugal, ining ali gid nga asin ginatawag nga “krema nga asin” tungod pwede ini makandos sing inanay pareho sang krema sa ibabaw sang gatas. Ining mapino nga asin ginahandum gid tungod sa iya kapuro kag pinasahi nga sabor, nga nagahimo sini nga importante nga ingrediente sa pagpangluto.

Pareho nga ang marnotos nagahimakas agud masiguro nga makaani sila sang pinakamaayo nga kalidad sang asin, kita man, bilang mga katawhan sang kasugtanan sang Ginuo, dapat maghimo sang aton masarangan agud ang aton gugma kag ehemplo, kutob sa mahimo, puro nga pagsalaming sang aton Manluluwas, nga si Jesucristo.

Sang una nga panahon, ang asin labaw sangsa panimpla lang—importante ini nga preserbatibo kag simbolo sang kaputli kag kasugtanan. Nakahibalo ang mga tawo nga ang asin importante agud mapreserba ang pagkaon kag mas mapanami ang sabor. Naintiendihan man nila ang serioso nga matabo kon ang asin madulaan sang iya kaparat ukon sabor kon makontaminar ukon masimbugan ini.

Pareho nga ang asin pwede magtab-ang, kita man pwede madulaan sang aton espirituhanon nga kapagsik kon ang aton pagtuo kay Jesucristo mangin pasapayan. Mahimo nga amo lang gihapon kita kon tan-awon, pero kon wala sang mabakod nga nasulod nga pagtuo, madula ang aton ikasarang nga maghimo sang kinalain sa kalibutan kag pagwaon ang pinakamaayo nga kinaiya sa mga ara sa aton palibot.

Gani, paano naton idirekta ang aton kusog kag mga pagpanikasog agud makahimo sang kinalain kag mangin ang pagbag-o nga kinahanglan sang kalibutan sa karon? Paano naton maamligan ang pagkadisipulo kag magpadayon nga mangin positibo nga impluwensya?

Ang mga pulong sang aton mahal nga propeta nagabalikbalik pa sa akon hunahuna: “Luyag sang Dios nga ululupod kita nga mag-obra kag magbinuligay. Amo ina kon ngaa ginapadala Niya kita sa duta sa mga pamilya kag ginaorganisar kita sa mga ward kag mga stake. Amo ina kon ngaa ginapangayo Niya sa aton nga mag-alagad kag mag-minister sa isa kag isa. Amo ina kon ngaa ginapangayo Niya sa aton nga magkabuhi sa kalibutan pero indi mangin iya sang kalibutan.”

Kon ang aton mga kabuhi puno sang katuyoan kag pag-alagad, malikawan naton ang espirituhanon nga pagpawala; Pero, kon ang aton mga kabuhi wala sang diosnon nga katuyoan, makahulugan nga pag-alagad sa iban, kag sagrado nga mga oportunidad sa pagbinagbinag kag pagpamalandong, amat-amat kita nga nagakapoot sa aton mga hilikuton kag maiyaiyahon nga mga interes, nga ginarisgo ang pagkadula sang aton sabor. Ang bulong sini amo ang magpadayon sa pag-alagad—nga mapisan sa pagpakigbahin sa maayo nga kawsa kag sa pagpauswag sang aton mga kaugalingon kag sang aton sosyedad.

Pinalangga kong mga kauturan, bugay sa aton karon nga ari kita sa Simbahan ni Jesucristo kag may oportunidad nga mag-alagad sa Iya Simbahan. Ang aton mga sirkumstansya mahimo nga magkalainlain, pero tanan kita makahimo sang kinalain.

Dumduma ang marnotos, ang mga manug-asin; nagagamit sila sang simple nga mga kagamitan sa pag-ani sang pinakamaayo nga mga kristal, ang pinakaali nga asin! Kita man makahimo sang simple nga mga butang nga, upod ang tayuyon nga paghimakas sa magagmay kag makahulugan nga mga buhat, makapabaskog sang aton pagkadisipulo kag dedikasyon kay Jesucristo. Ari ang apat ka simple pero epektibo nga mga paagi nga makatinguha kita nga mangin “asin sang duta”:

Magpadayon nga himuon ang balay sang Ginuo nga pinakaimportante nga bahin sang aton pagsimba. Karon nga ang mga templo mas malapit na gid sa aton, ang pag-una sang regular nga pagsimba sa balay sang Ginuo magabulig sa aton nga mag tutok sa kon ano ang pinakaimportante kag magapahamtang sang aton mga kabuhi nga nasentro kay Cristo. Sa templo, makita naton ang pinakaimportante nga bahin sang aton pagtuo kay Jesucristo kag ang matuod nga kahulugan sang aton pagsimba sa Iya.
Hungod kita nga maghimakas nga pabakuron ang iban paagi sa pagpangabuhi sang ebanghelyo sing ululupod. Mapabakod naton ang aton mga pamilya paagi sa tayuyon kag hungod nga mga pagtinguha nga dal-on ang mga prinsipyo sang ebanghelyo sa aton mga kabuhi kag mga panimalay.
Mangin handa sa pagbaton sang mga calling kag pagserbisyo sa Simbahan. Ang pagserbisyo sa aton lokal nga mga kongregasyon nagatugot sa aton nga suportahan ang isa kag isa kag ululupod nga magtubo. Bisan pa nga ang pagserbisyo indi pirme mahapos, pirme ini makalilipay.
Kag katapusan, gamiton ang digital nga mga kagamitan sa komunikasyon nga may katuyoan. Subong, ang digital nga komunikasyon nagatugot sa aton nga makig-angot sa paagi nga wala pa gid natabo sang una. Pareho sa madamo sa inyo, ginagamit ko ining mga kagamitan nga magpakig-angot sa mga kauturan sa simbahan kag sa akon pamilya kag kaabyanan. Sa akon pagpakig-angot sa ila, mas nagalapit ako sa ila; makaminister sa isa kag isa sa tinion sang panginahanglan kon indi kita makakadto sing personal. Ining mga kagamitan wala duda nga isa ka bugay, pero makapalayo ini sa aton sa madalom, makahulugan nga mga pagpakig-angot kag sa ulihi magaguyod sa aton sa mga pamatasan nga nagausik sang aton panahon sa mga hilikuton nga kulang sang katuyoan. Ang pagtinguha nga mangin asin sang duta nagalakip sing masobra kaayo sangsa wala untat nga pagtan-aw sang reels (malip-ot nga mga video) sa aton mga cellphone.

Sa aton paghimo sang balay sang Ginuo nga sentro sang aton mga kabuhi, hungod nga pagpabakod sang iban paagi sa pagpangabuhi sang ebanghelyo, pagbaton sang mga tawag sa pag-alagad, kag paggamit sang digital nga mga kagamitan nga may katuyoan, maamligan naton ang aton espirituhanon nga kapagsik. Pareho nga ang asin sa iya pinakapuro may gahum sa pagpanamit kag pagpreserba, amo man ang aton pagtuo kay Jesucristo kon ginasagod kag ginaprotektahan ini paagi sa aton dedikasyon sa Cristohanon nga pag-alagad kag gugma.

Kon nagapabilin kita nga suod sa Ginuo, ang aton mga kabuhi natural nga magasalaming sang Iya kasanag, kag mangin asin kita sang duta. Sa sini nga paghimakas, wala lang naton ginapauswag ang aton mga kabuhi kundi ginapabakod man ang aton mga pamilya kag mga komunidad. Kabay nga maghimakas kita nga tipigan ining kasuod sa Ginuo, indi gid pagdulaon ang aton sabor, kag mangin ang gamay, diutay nga kristal sang asin nga gusto sang Ginuo nga kita mangin. Sa ngalan ni Jesucristo, amen.