9:46

Ang Hangin Wala Gid Nag-untat sa Paghuyop

Ni Elder Aroldo B. Cavalcante

Sang Sitenta

Mabuligan naton ang iban nga mag-uswag sa ila pagpanglakaton agud mabaton ang mga pagpakamaayo sang Dios.

Sang 2015, sa estado sang Pernambuco, Brazil, 62 ka miyembro sang J. Reuben Clark Law Society nagbulig sa Opisina sang Piskal sa pag-imbestigar sang legal nga mga problema sang mga residente sa apat ka nagkalain-lain nga mga balay-alaypan. Sing lima ka oras sang isa ka Sabado, ining mga abogado nag-interbyu sing kapin 200 ka residente sing isa-isa, ang tagsa sa ila ginkalimtan na kag wala ginasapak sang sosyedad.

Sang nagainterbyu sila, natukiban nila ang pila ka mga krimen nga nahimo batok sa tigulang nga mga residente pareho sang pagpatumbaya, pagmaltrato, kag di-awtorisado nga paggamit sang mga pundo. Isa ka importante nga hilikuton sining asosasyon sang mga abogado amo nga amligan ang mga imol kag mga nagakinahanglan. Pagligad lang sing duha ka bulan, ang piskal nakapasaka sang kaso batok sa mga partido nga may salabton.

Ang ila pagbulig perpekto nga halimbawa sang panudlo ni Haring Benjamin “nga kon kamo ara sa pag-alagad sang inyo isigkatawo, kamo ara lamang sa pag-alagad sang inyo Dios.”

Isa ka residente nga personal ko gin-interbyu sadtong pro bono ukon libre nga proyekto amo ang isa ka mabuot nga 93-anyos nga babayi nga ang ngalan si Lúcia. Sa iya pagpasalamat sa amon serbisyo, naglahog sia, “Pakasli ko!”

Nakibot ako kag nagsabat: “Tan-awa bala inang matahum nga hubin nga babayi! Asawa ko na sia kag sia ang piskal sang estado.”

Ginbalosan niya dayon sing sabat: “Te ano? Hubin sia, matahum, kag dasig makapamana liwat. Ikaw na lang ang ara sa akon!”

Wala nasolusyonan ang tanan nga problema sang manami nga mga residente sina nga adlaw. Pat-od nga padayon sila nagaeksperiyensya sang kabudlayan kon kaisa pareho sang mga Jarednon sa ila mga sakayan dagat sa mabudlay nga pagbiyahe padulong sa duta nga ginpanaad, “nga nalubong sa kaidadalman sang dagat tungod sang daw-bukid nga mga balod nga nagahampas sa ila.”

Pero sadto nga Sabado, ang mga residente sang balay-alaypan nakahibalo nga bisan pa ginkalimtan na sila sang sosyedad, personal sila nga kilala sang isa ka mapinalanggaon nga Amay nga Langitnon, Isa nga ginasabat bisan ang pinakasimple nga mga pangamuyo.

Ang Agalon sang mga agalon nagpahanabo sang “mabaskog nga hangin” nga maghuyop sa mga Jarednon padulong sa ginpromisa nga mga pakamaayo. Sing amo man, mahimo kita magdesisyon nga magserbe bilang diutay nga hangin sa mga kamot sang Ginuo. Pareho nga “ang hangin wala gid nag-untat sa paghuyop” sang mga Jarednon padulong sa duta nga ginpanaad, makabulig kita sa iban nga mag-uswag sa ila pagpanglakaton agud makabaton sang mga pakamaayo sang Dios.

Pila ka tuig ang nagligad, sang kami sang akon mahal nga asawa nga si Chris gin-interbyu para sa akon calling bilang bishop, ang amon stake president nagpangabay sa akon nga mainampuon nga binagbinagon ang mga ngalan nga irekomendar bilang mga manuglaygay. Pagkabati niya sang mga ngalan nga akon ginrekomendar, nagsiling sia nga may mga dapat ako mabal-an parte sa isa sa ila.

Una, ini nga brother indi kabalo magbasa. Ika-duha, wala sia salakyan para magbisita sa mga miyembro. Ika-tatlo, pirme—pirme gid sia—nagasuksok sang sunglass sa simbahan. Bisan pa nga sinsero ang mga kabalaka sang president, nagapati gid ako nga dapat ko sia irekomendar sa gihapon bilang akon manuglaygay kag ginsuportahan ako sang stake president.

Makita sa mga guya sang mga miyembro ang ila pagkatingala sang gintib-ong ako kag akon mga manuglaygay isa ka Domingo sa sakramento nga miting. Ining pinalangga nga brother mahinay nga nagsaka sa pulpito kon sa diin ang mga suga sa ibabaw nagbanaag sa iya sunglass.

Pagkapungko niya sa tupad nakon, ginpamangkot ko sia, “Brother, may problema ka sa imo panan-aw?”

“Wala,” siling niya.

“Te ngaa nagasuksok ka sang sunglass sa simbahan?” Pamangkot ko. “Abyan ko, kinahanglan makita sang mga miyembro ang imo mga mata, kag kinahanglan makita mo man sila sing maayo.”

Sa sina nga tion, ginkakas niya ang iya sunglass kag wala na ginsuksok pa liwat sa simbahan.

Ining pinalangga nga brother nag-alagad upod sa akon tubtob nga gin-release ako bilang bishop. Karon, padayon sia nga nagaalagad sing matutum sa Simbahan kag isa sia ka ehemplo sang dedikasyon kag katutum sa Ginuong Jesucristo. Pero, sang nagliligad nga tinuig, indi sia kilala nga miyembro nga nagasuksok sang sunglass kag nagapungko nga halos nalimtan sa mga bangko sang kapilya. Masami ko ginahunahuna, “Pila ayhan ka matutum nga brothers kag sisters ang nagapungko nga nalimtan sa tunga naton karon?”

Kilala man kita ukon nalimtan, ang mga pagtilaw pat-od nga maabot sa tagsa sa aton. Kon magdangop kita sa Manluluwas para sa bulig, mahimo Niya “ikonsagrar ang [aton] mga pag-antos para sa [aton] kaayohan” kag buligan kita nga atubangon ang aton mga pagtilaw sa bagay nga nagahimo posible sang aton espiritwal nga pag-uswag. Kon para man sa mga residente sang balay-alaypan, ang isa ka ginhusgahan nga miyembro sang Simbahan, ukon sin-o pa nga iban, mahimo kita nga mangin “ang hangin [nga] wala gid nag-untat sa paghuyop,” nga nagadala sang paglaum kag nagagiya sa iban padulong sa banas sang kasugtanan.

Ang aton pinalangga nga propeta, si Pangulong Russell M. Nelson, naghimo sang makalilipay kag makainspirar nga imbitasyon sa mga lamharon: “Subong mabaskog ko nga ginasulit ang pangabay sang Ginuo nga ang tagsa ka takos, makasarang nga pamatan-on maghanda kag maglakat sa misyon. Para sa mga pamatan-on nga mga Santos sa Ulihing mga Adlaw, ang pagserbisyo sa misyon isa ka responsibilidad sang priesthood. … Para sa inyo nga mga lamharon kag makasarang nga mga sisters, ang misyon isa man ka mabaskog, pero opsyunalnga oportunidad.”

Adlaw-adlaw, ginasabat sang linibo ka mga pamatan-on ang matagnaon nga panawagan sang Ginuo nga mag-alagad bilang mga misyonero. Maalam kamo, kag pareho sang ginsiling ni Pangulong Nelson, kamo “may mas dako nga impluwensya sa kalibutan sangsa nagligad nga mga henerasyon!” Siyempre, indi buot silingon nga kamo mangin pinakamaayo nga bersion sang inyo kaugalingon sa tion nga magsulod na kamo sa missionary training center.

Imbes sini, ayhan magbatyag kamo pareho kay Nefi nga, “gingiyahan sang Espiritu, kay wala makahibalo antes pa sang mga butang nga dapat [ninyo] himuon. Bisan pa nga amo sini nagpadayon [kamo].”

Ayhan, wala kamo sing kompiansa pareho kay Jeremias kag mahambal, “Indi ako makahibalo maghambal: kay bata ako.”

Ayhan makita pa ninyo ang inyo personal nga mga kakulangan kag magsinggit pareho kay Moises: “O, Ginuo ko, indi ako madagmit maghambal … : kundi makuli ako sa paghambal, kag mabug-at sing dila.”

Kon ang bisan sin-o sa inyo nga pinalangga kag mabaskog nga mga lamharon ang may amo sini nga panghunahuna subong, dumduma nga ang Ginuo nagsabat, “Dili ka magsiling, bata ako: kay sa bisan kay sin-o ipadala ko ikaw magkadto ka”, kag nagapromisa Sia, “Karon lakat ka, kag magaupod ako sa imo baba kag magatudlo sa imo sang imo ihambal.”18 Kag nagapromisa Sia, “Karon lakat ka, kag magaupod ako sa imo baba kag magatudlo sa imo sang imo ihambal.”

Ang inyo pagbag-o halin sa inyo kinaandan pakadto sa espiritwal nga kaugalingonmatabo “sing dinalan sa dinalan, pagsulundan sa pagsulundan” kon hanuot kamo nga magtinguha sa pag-alagad kay Jesucristo sa patag sang misyon paagi sa adlaw-adlaw nga paghinulsol, pagtuo, sibo nga pagtuman, kag pagpangabudlay agud “pirme makakita, makatudlo sing paghinulsol, kag makabunyag sang mga hinaylo.”

Bisan pa nga nagasuksok kamo sang name tag, kon kaisa makabatyag kamo nga daw wala kamo ginakilala ukon ginkalimtan na lang. Apang, kinahanglan ninyo mahibal-an nga may perpekto kamo nga Amay nga Langitnon, nga personal nga nakakilala sa inyo, kag isa ka Manluluwas, nga nagapalangga sa inyo. Makaupod ninyo ang mga lider sang misyon, nga sa pihak sang ila mga diperensya, magaalagad sa inyo bilang “ang hangin [nga] wala gid nag-untat sa paghuyop” sa paggiya sa inyo pagpanglakaton sa personal nga pagbag-o.

Sa “duta nga nagailig sing gatas kag dugus” magaalagad kamo sa inyo misyon, mabun-ag kamo liwat sing espirituhanon kag mangin bilog-kabuhi nga disipulo ni Jesucristo sa inyo pagpalapit sa Iya. Mahibal-an ninyo nga wala gid kamo ginkalimtan.

Bisan may ara iban nga maghulat sing “madugay” para sa kaumpawan, kay “wala pa sing tawo” nga makabulig, ang Ginuong Jesucristo nagtudlo sa aton nga wala gid Sia sing may malimtan nga bisan sin-o. Sa baylo, nangin perpekto Sia nga huwaran sa pagpangita sinang isa sa tagsa ka tion sang Iya mortal nga pag-alagad.

Ang tagsa sa aton, kag ang mga yara sa palibot naton—nagapangatubang sang aton kaugalingon nga mga unos sang oposisyon kag mga balod sang mga pagtilaw nga nagapalugdang sa aton adlaw-adlaw. Apang “ang hangin [indi] gid mag-untat sa paghuyop padulong sa duta nga ginpanaad … ; kag gani padparon [kita] sa atubang sang hangin.”

Ang tagsa sa aton mahimo mangin bahin sining hangin—ang amo man nga hangin nga nagpakamaayo sang mga Jarednon sa ila pagbiyahe kag ang amo man nga hangin nga, sa bulig naton, makapakamaayo sang mga wala makilal-i kag mga ginkalimtan nga malab-ot ang ila kaugalingon nga duta nga ginpanaad.

Nagapamatuod ako nga si Jesucristo amo ang aton Mananabang sa Amay. Sia isa ka buhi nga Dios kag nagahikot bilang mabaskog nga hangin nga pirme magagiya sa aton sa banas sang kasugtanan. Sa ngalan ni Jesucristo, amen.