Ang Kalipay sang Aton Pagtubos
Ang gugma kag gahum ni Jesucristo makaluwas sang tagsa sa aton gikan sa aton mga sayop, mga kahuyangan, kag mga sala kag makabulig sa aton nga mangin mas maayo.
Mga 10 ka tuig ang nagligad nahunahuna ko nga magpinta sang larawan sang Manluluwas. Bisan pa isa ako ka pintor, daw ginbudlayan ako. Paano ako magpinta sang larawan ni Jesucristo nga nagalaragway sang Iya Espiritu? Diin ako dapat magsugod? Kag diin ako makakita sang tiyempo?
Bisan pa sang akon mga pamangkot, nagdesisyon ako nga magpadayon kag magsalig nga buligan ako sang Ginuo. Pero kinahanglan ko magpadayon kag itugyan ang mga posible matabo sa Iya. Nagpangamuyo ako, nagbinagbinag, nagpanalawsaw, kag nagdrowing, kag ginbugayan nga makakita sang bulig kag mga galamiton. Kag ang isa ka puti nga kanbas nagsugod nga mangin labaw pa sa isa ka kanbas lang.
Ang proseso indi mahapos. Kon kaisa indi ini pareho sa akon ginalauman. Kon kaisa, may mga tinion sang inspirado nga pagpalhit (sang pinta) kag mga ideya nga nagapanami sang resulta. Kag sa madamo nga beses, kinahanglan ko lang magtinguha liwat kag liwat kag liwat.
Sang abi ko ang oil painting tapos na kag mala na, ginsugdan ko ang pagbutang sang natural nga barnis agud maprotektahan ini gikan sa higko kag yab-ok. Samtang ginahimo ko ini, natalupangdan ko nga ang buhok sa painting nagsugod sa pagliwat, paglapta, kag pagkapanas. Narealisar ko gilayon nga ginbutang ko gale ang barnis sing tama katemprano, nga ang bahin sinang painting basa pa!
Napanas ko sang barnis ang isa ka bahin sang painting. Ahay, nadismaya gid ako. Pamatyag ko daw ginguba ko lang ang ginbulig sang Dios sa akon nga himuon. Naghibi ako kag naglain ang akon pamatyag. Sa pagkawalay paglaum, ginhimo ko ang kinaandan nga ginahimo sang bisan sin-o sa isa ka sitwasyon nga pareho sini: Gintawgan ko ang akon iloy. Maalam kag kalmado sia nga nagsiling, “Indi mo mabawi ang imo nahimo, apang himoa ang pinakamaayo nga masarangan mo.”
And I Partook [Kag Nakigbahin Ako], ni Kristin M. Yee
Gani nagpangamuyo ako kag nagpakitluoy para sa bulig kag nagpinta sa bilog nga gab-i sa pagkay-o. Kag nadumduman ko nga gintan-aw ko ang painting pagkaaga—mas maayo na ini tan-awon. Paano ini nangin posible? Ang abi ko nga sayop nga indi na makay-o nangin oportunidad nga mapakita ang Iya maluluy-on nga kamot. Wala pa Niya natapos ang painting, kag wala pa Sia nakatapos sa akon. Daw ano nga kalipay kag kaumpawan ang nagpuno sang akon tagipusuon. Gindayaw ko ang Ginuo tungod sang Iya kaluoy, kay ini nga milagro wala lamang nagsalbar sang painting kundi nagtudlo sa akon sing dugang pa parte sa Iya gugma kag gahum sa pagluwas sa tagsa sa aton gikan sa aton mga sayop, mga kahuyangan, kag mga sala kag sa pagbulig sa aton nga mangin mas maayo.
Pareho nga ang akon pagpasalamat sa Manluluwas nagdako samtang maluluy-on Niya ako nga ginbuligan sa pagkay-o sang “indi makay-o” nga painting, nagtubo man ang akon personal nga gugma kag pagpasalamat sa akon Manluluwas samtang nagtinguha ako nga pabaskugon upod sa Iya ang akon mga kahuyangan kag mapatawad sang akon mga sayop. Wala katapusan gid ako nga nagapasalamat sa akon Manluluwas nga sarang ako magbag-o kag matinluan. Palangga ko Sia, kag gusto ko himuon ang kon ano ang gusto Niya nga ipahimo sa akon kag kon ano ang gusto Niya nga ako mangin.
Ang paghinulsol nagatugot sa aton nga mabatyagan ang gugma sang Dios kag makilala kag higugmaon Sia sa mga paagi nga indi naton mahibal-an. Parte sa babayi nga naghaplas sang mga tiil sang Manluluwas, Sia nagsiling, “Ang iya mga sala, nga madamo, ginpatawad; kay naghigugma sia sing daku: apang ang ginpatawad sing diutay, nagahigugma sing diutay.” Ginhigugma gid niya si Jesus, kay ginpatawad gid Niya sia.
May amo sina nga kaumpawan kag paglaum sa paghibalo nga sarang kita magtinguha liwat—nga, pareho sang gintudlo ni Elder Bednar, makabaton kita sang nagapadayon nga kapatawaran sang aton mga sala paagi sa nagapakabalaan nga gahum sang Balaan nga Espiritu samtang matuod-tuod kag sinsero kita nga nagahinulsol.
Ang nagatubos nga gahum ni Jesucristo isa sang pinakadako nga ginpromisa nga bugay sang aton mga kasugtanan. Hunahunaa ini samtang nagapartisipar ka sa sagrado nga mga ordinansa. Kon wala ini, indi kita makapauli sa presensya sang aton Amay sa Langit kag sa mga pinalangga naton.
Nakahibalo ako nga ang aton Ginuo kag Manluluwas, nga si Jesucristo, gamhanan sa pagluwas. Bilang Anak sang Dios nga nagbayad para sa mga sala sang kalibutan kag naghatag sang Iya kaugalingon nga kabuhi kag nagbaton sini liwat, Sia nagauyat sang gahum sang pagtubos kag pagkabanhaw. Ginhimo Niya nga mangin posible ang imortalidad para sa tanan kag ang kabuhi nga walay katapusan para sa mga nagapili sa Iya. Nakahibalo ako nga paagi sa Iya nagabayad-sala nga sakripisyo, makahinulsol kita kag matuodtuod nga matinloan kag matubos. Isa ka milagro nga ginahigugma Niya kamo kag ako sa sini nga paagi.
Nagsiling Sia, “Indi bala kamo subong magbalik sa akon, kag maghinulsol sang inyo mga sala, kag mahaylo, agud nga mapaayo ko kamo?” Sarang Niya nga ayuhon ang “mga nahapay nga mga duog” sang inyo kalag—ang mga duog nga ginhimo nga mamala, matigdas, kag mamingaw sang sala kag kasubo—kag “himuon ang [inyo] kamingawan subong sang Eden.”
Pareho nga indi naton mahangpan ang kasakit kag kadalumon sang pag-antos ni Cristo sa Getsemane kag sa krus, amo man kita “indi makatakos sang mga dulunan ukon makahangop sang kadalumon sang [Iya] diosnon nga pagpatawad,” kaluoy, kag gugma.
Mahimo nga mabatyagan mo kon kaisa nga indi posible nga matubos, nga ayhan ikaw isa ka eksepsion sa gugma sang Dios kag sa nagabayad-sala nga gahum sang Manluluwas bangod sang imo mga kabudlayan ukon bangod sang imo nahimo. Pero nagapamatuod ako nga malab-ot ka sang Ginuo. Ang Manluluwas “nagpanaog sa idalom sang tanan nga mga butang” kag yara sa isa ka diosnon nga posisyon sa pagbayaw sa imo kag sa pagbawi sa imo gikan sa pinakamadulom nga kadadalman kag sa pagdala sa imo sa “makahalawhaw nga kapawa.” Paagi sa Iya mga pag-antus, naghimo Sia sang paagi para sa tagsa sa aton nga malampuwasan ang aton personal nga mga kahuyangan kag mga sala. “May yara sia sang bug-os nga gahum sa pagluwas sang tagsa ka tawo nga nagatuo sa iya ngalan kag nagapatubas sang bunga nga takus sa paghinulsol.”
Pareho nga nagkinahanglan ini sang pagpangabudlay kag pagpakitluoy para sa bulig sang langit agud makay-o ang painting, kinahanglan man sang pagpangabudlay, pagkasinsero sang tagipusuon, kag pagpaubos agud magdala “sang bunga nga takus sa paghinulsol.” Ining mga bunga nagalakip sang paggamit sang aton pagtuo kag pagsalig kay Jesucristo kag sa Iya nagabayad-sala nga sakripisyo, paghalad sa Dios sang isa ka masinulub-on nga tagipusuon kag mahinulsulon nga espiritu, pagkumpisar kag pagtalikod sa sala, pagpanumbalik sang naguba sa pinakamaayo nga aton masarangan, kag pagtinguha nga magkabuhi sing matarong.
Agud maghinulsol gid kag magbag-o, kinahanglan anay kita nga “makumbinse sang aton mga sala.” Ang isa ka tawo indi magtumar sang bulong luwas lang nga nakaintiendi sila nga nagamasakit sila. Mahimo nga may mga tion nga indi kita handa sa pagtan-aw sa sulod sang aton kaugalingon kag makita kon ano gid ang nagakinahanglan sang pag-ayo kag pagkay-o.
Sa mga sinulatan ni C. S. Lewis, si Aslan naghambal sining mga pulong sa isa ka tawo nga nasiod sa iya kaugalingon nga mga padihot: “O [katawhan], daw ano ka sagad nga ginadepensahan ninyo ang inyo kaugalingon [gikan] sa tanan nga mahimo makabulig sa inyo!”
Diin ayhan kamo kag ako nagadepensa sang aton kaugalingon gikan sa mga butang nga mahimo makabulig sa aton?
Indi naton pagdepensahan ang aton kaugalingon gikan sa kaayuhan nga luyag sang Dios nga ibugay sa aton. Gikan sa gugma kag kaluoy nga luyag Niya nga mabatyagan naton. Gikan sa kasanag kag ihibalo nga luyag Niya ihatag sa aton. Gikan sa pag-ayo nga nahibaloan Niya nga kinahanglan gid naton. Gikan sa mas madalom nga kaangtanan sa kasugtanan nga Iya ginatuyo para sa tanan Niya nga mga anak nga lalaki kag babayi.
Ginapangamuyo ko nga ipahigad naton ang bisan ano nga “mga hinganiban sa inaway” nga aton gingamit sing hungod ukon bisan pa indi hungod agud pangapinan ang aton kaugalingon gikan sa mga pagpakamaayo sang gugma sang Dios. Mga hinganiban sang bugal, pagkamaiyaiyahon, kahadlok, dumot, pagkaakig, pagkakampante, indi-matarong nga paghukom, mga kahisa—bisan ano nga magapugong sa aton nga higugmaon ang Dios sa bug-os naton nga mga tagipusuon kag sa pagtuman sang tanan naton nga mga kasugtanan sa Iya.
Samtang ginatahod naton ang aton mga kasugtanan, ang Ginuo makahatag sa aton sang bulig kag gahum nga kinahanglan naton agud pareho nga makilala kag malampuwasan ang aton mga kahuyangan, lakip na ang espirituhanon nga parasito sang bugal. Ang aton propeta nagsiling:
“Ang paghinulsol amo ang dalan sa pagkaputli, kag ang kaputli nagadala sang gahum.”
“Kag o, daw ano naton kakinahanglan ang Iya gahum sa mga adlaw nga maabot.”
Pareho sang akon painting, ang Ginuo wala pa makatapos sa aton kon kita magsayop, ukon wala Sia nagapalagyo kon kita maghuyang. Ang aton pagkinahanglan sang pag-ayo kag bulig indi palas-anon sa Iya, kundi ang rason gid nga nagkari Sia. Ang Manluluwas Mismo nagsiling:
“Yari karon, nagkari ako sa kalibutan sa pagdala sang pagtubos sa kalibutan, sa pagluwas sang kalibutan gikan sa sala.”
“Ang akon butkon sang kaluoy ginauntay sa inyo, kag kon sin-o man ang magakari, sia ang akon batunon; kag bulahan yadtong mga nagakari sa akon.”
Gani kari—kari kamo nga ginakapoy, ginalapyo, kag masubo; kari kag bayai ang inyo mga pagpangabudlay kag makakita sang kapahuwayan sa Iya nga nagahigugma gid sa inyo. Itakod ang Iya gota sa inyo, kay Sia mapainubuson kag malulo sa tagipusuon.
Ang aton Amay nga Langitnon kag Manluluwas nakakita sa inyo. Nahibaloan nila ang inyo tagipusuon. Nagaulikid sila sa inyo ginakabalak-an, lakip na ang mga ginahigugma ninyo.
Ang Manluluwas sarang makatubos sinang nadula, lakip na ang naguba nga mga relasyon. Naghimo sia sang paagi para sa tanan nga napukan nga matubos—agud ginhawaan sang kabuhi ang daw patay kag wala sang paglaum.
Kon nagahimakas ka sa isa ka sitwasyon nga sa banta mo dapat mo na malampuwasan sa karon, indi mag-untat. Mangin mapailubon sa inyo kaugalingon, tumana ang inyo mga kasugtanan, maghinulsol sing masunson, magpangayo sang bulig sa inyo mga lider kon kinahanglanon, kag magkadto sa balay sang Ginuo sing regular tubtob sa inyo masarangan. Pamatii ang mga pagpabatyag nga Iya ginapadala sa inyo. Indi Niya pagbiyaan ang Iya kaangtanan sa kasugtanan upod sa inyo.
May mga mabudlay kag komplikado nga mga relasyon sa akon kabuhi nga akon ginpakigbatoan kag sinsero nga gintinguhaan nga pauswagon. Kon kaisa daw mas masami ako nga napaslawan. Natingala ako, “Wala ko bala ini nakay-o sang nagligad? Wala ko gid bala nadaug ang akon kahuyang?” Natun-an ko sa pagligad sang panahon nga indi ako depektoso; kundi, masami nga may dugang pa nga dapat trabahuon kag dugang pa nga pag-ayo nga kinahanglanon.
Si Elder D. Todd Christofferson nagtudlo: “Sa pagkamatuod ang Ginuo nagayuhum sa isa nga luyag mag-abot sa paghukom sing takos, nga determinado nga nagapangabudlay adlaw-adlaw sa pag-ilis sang kahuyang sa kabaskog. Ang matuod nga paghinulsol, ang matuod nga pagbag-o mahimo nga nagakinahanglan sang sulitsulit nga mga pagtinguha, apang may yara sang isa ka butang nga nagapaputli kag balaan sa amo nga pagtinguha. Ang diosnon nga kapatawaran kag pag-ayo nagailig sing natural sa amo nga kalag.”
Ang tagsa ka adlaw isa ka bag-o nga adlaw nga puno sang paglaum kag mga posibilidad tungod kay Jesucristo. Kada adlaw kamo kag ako mahimo makahibalo, pareho sang ginpahayag ni Nanay Eva, sang “kalipay sang aton pagtubos,” ang kalipay nga mangin bug-os, ang kalipay nga mabatyagan ang wala nagakapaslawan nga gugma sang Dios para sa inyo.
Nakahibalo ako nga ang aton Amay sa Langit kag Manluluwas nagahigugma sa inyo. Si Jesucristo ang Manluluwas kag Manunubos sang tanan nga katawhan. Buhi Sia. Paagi sa Iya nagabayad-sala nga sakripisyo, ang mga gapos sang kamatyon ginbugto sing wala katubtuban agud nga mangin hilway kita nga magpili sang pag-ayo, pagtubos, kag kabuhi nga wala katapusan upod sa aton mga ginapalangga. Kag nagapamatuod ako sa sining mga butang sa Iya ngalan, si Jesucristo, amen.